സമ്പൂര്‍ണ വാരഫലം, അശ്വതി മുതൽ രേവതി വരെ; March 31-April 06, 2024, Weekly Horoscope

ആദിത്യൻ മീനം രാശിയിൽ രേവതി ഞാറ്റുവേലയിൽ സഞ്ചരിക്കുന്നു. ശനി കുംഭം രാശിയിൽ ചതയം നക്ഷത്രത്തിലാണ്. ഏപ്രിൽ 6 ന് ശനിയാഴ്ച ഉച്ചതിരിഞ്ഞ് ശനി ചതയത്തിൽനിന്നും പൂരൂരുട്ടാതിയിലേക്ക് പ്രവേശിക്കും. ചൊവ്വ കുംഭം രാശിയിൽ ചതയം നക്ഷത്രത്തിൽ തുടരുന്നു. മാർച്ച് 31 ന് വൈകിട്ട് ശുക്രൻ കുംഭത്തിൽ നിന്നും ഉച്ചരാശിയായ മീനത്തിലേക്ക് സംക്രമിക്കും. പൂരൂരുട്ടാതി - ഉത്രട്ടാതി നാളുകളിലായാണ് ശുക്രൻ്റെ ഈയാഴ്ചയിലെ സഞ്ചാരം. 

ബുധൻ മേടം രാശിയിൽ അശ്വതി നക്ഷത്രത്തിൽ സഞ്ചാരം തുടരുന്നു. വ്യാഴം മേടം രാശിയിൽ ഭരണി നക്ഷത്രത്തിലാണ്. രാഹു മീനം രാശിയിൽ രേവതി നക്ഷത്രത്തിലും കേതു  കന്നിയിൽ അത്തം നക്ഷത്രത്തിലും അപ്രദക്ഷിണ സഞ്ചാരം തുടരുന്നു. കറുത്ത പക്ഷത്തിൽ ഷഷ്ഠി മുതൽ ദ്വാദശി വരെയുള്ള തിഥികളാണ് ഈയാഴ്ച. ചന്ദ്രൻ തൃക്കേട്ട മുതൽ ചതയം വരെയുള്ള നക്ഷത്രങ്ങളിലൂടെ സഞ്ചരിക്കുന്നു. 

ഈയാഴ്ചയിലെ ചന്ദ്രന്റെ അഷ്ടമരാശിക്കൂറിലെ സഞ്ചാരം എപ്രകാരമാണെന്ന് നോക്കാം. ഞായറാഴ്ച അർദ്ധരാത്രി വരെ മേടക്കൂറുകാർക്കാണ് അഷ്ടമരാശി. തിങ്കളും ചൊവ്വയും ഇടവക്കൂറുകാർക്കും ബുധനും വ്യാഴവും മിഥുനക്കൂറുകാർക്കും വെള്ളിയും ശനിയും കർക്കടകക്കൂറുകാർക്കും അഷ്ടമരാശിയുണ്ട്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെയും സമ്പൂര്‍ണ വാരഫലം ഇവിടെ പരിശോധിക്കുന്നു. 

അശ്വതി

വാരാദ്യദിനത്തിന് ശോഭ കുറയും. വിശ്രമത്തിന് സമയം കിട്ടിയേക്കില്ല. വ്യർത്ഥമായ കാര്യങ്ങൾ ചെയ്യേണ്ടി വരുന്നതാണ്. മറ്റു ദിവസങ്ങളിൽ പരിശ്രമമനുസരിച്ചാവും നേട്ടങ്ങൾ. സാമ്പത്തിക സ്ഥിതി മോശമാവില്ല. എന്നാൽ ആഢംബരച്ചെലവുകൾ ഏറുന്നതാണ്. ബന്ധുക്കളുടെ കാര്യത്തിൽ ഇടപെടുന്നത് ദുഷ്കീർത്തിക്ക് ഇടവരുത്തിയേക്കും. പ്രസ്ഥാനത്തിൽ നിന്നും വേണ്ടത്ര പരിഗണന കിട്ടുന്നില്ലെന്ന തോന്നൽ ശക്തമാവും. ഊഹക്കച്ചവടത്തിൽ നേട്ടമുണ്ടാകുന്നതാണ്. എല്ലാക്കാര്യത്തിലും സംതൃപ്തി ശരാശരിയായിരിക്കും.

ഭരണി

നക്ഷത്രനാഥൻ ആയ ശുക്രന് ഉച്ചസ്ഥിതി വരുന്നത് ഗുണകരമാണ്. വീട്ടിലും പുറത്തും ആദരിക്കപ്പെടും. പറയുന്ന വാക്കിന് വിലയുണ്ടാവുന്നതാണ്. കഴിവുകൾ ഫലപ്രദമായി ഉപയോഗിക്കാനാവും. സ്ത്രീകളുടെ പിന്തുണ പ്രതീക്ഷിക്കാം. ഇഷ്ടജനങ്ങൾക്കൊപ്പം യാത്രകൾക്ക് അവസരമുണ്ടാവും. ബിസിനസ്സിൽ നിന്നുള്ള വരുമാനം ഉയരാം. എന്നാൽ ചെലവിനങ്ങളും കൂടാം. എതിർപ്പ് പ്രകടിപ്പിച്ചവർ അനുകൂല നിലപാടുകൾ കൈക്കൊണ്ടേക്കും. ബുധനാഴ്ച മുതൽ കൂടുതൽ നേട്ടങ്ങൾ ഉണ്ടാവുന്നതാണ്.

കാർത്തിക

സമ്മിശ്രമായ അനുഭവങ്ങൾക്കാവും സാധ്യത. മേടക്കൂറുകാർക്ക് പ്രതിസന്ധികളെ നേരിടേണ്ടിവരും. എന്നാൽ അവയെ മറികടക്കുവാൻ സാധിക്കുന്നതാണ്. ബന്ധുക്കളുടെ വിരോധം സമ്പാദിക്കേണ്ടിവരും. ഇടവക്കൂറുകാരിൽ ഉദ്യോഗസ്ഥരായിട്ടുള്ള വ്യക്തികൾക്ക് ഗുണകരമായ വാരമാണ്. സ്വന്തം തൊഴിൽ ചെയ്യുന്നവർക്ക് ലാഭം കുറയും. തടസ്സങ്ങൾ വരാനിടയുണ്ട്. എന്നാലും ആത്മവിശ്വാസത്തിന് ഇളക്കം തട്ടാനിടയില്ല. ഇലക്ട്രോണിക് ഉപകരണങ്ങൾ വാങ്ങുന്നതാണ്

രോഹിണി

തിങ്കളും ചൊവ്വയും അഷ്ടമരാശിക്കൂറ് ദിനങ്ങളാണ്.  ശുഭാരംഭം ഒഴിവാക്കണം. ജാമ്യം നിൽക്കുക മുതലായവ കരുതലോടെ വേണം. പണച്ചെലവ് കൂടാം. മറ്റു ദിവസങ്ങളിൽ പ്രയത്നം അംഗീകരിക്കപ്പെടും. കർമ്മരംഗത്ത് ഉന്മേഷം ഉണ്ടാവുന്നതാണ്. വായ്പക്കായി നടത്തുന്ന ശ്രമം ഫലം കണ്ടേക്കും. കുടുംബകാര്യങ്ങളിൽ സംതൃപ്തിയുണ്ടാവും. സ്വതന്ത്ര നിലപാടുകൾക്ക് പിന്തുണ വർദ്ധിക്കുന്നതാണ്. രാശിനാഥനായ ശുക്രൻ്റെ ഉച്ചസ്ഥിതിയാൽ പ്രവർത്തനവിജയം പ്രതീക്ഷിക്കാം. 

മകയിരം

പ്രശ്നങ്ങളെ വൈകാരികമായി സമീപിച്ചേക്കും. എതിരാളിയുടെ കൗശലങ്ങളെ തിരിച്ചറിയുന്നതിൽ അമളി വന്നേക്കാം. പുതുസംരംഭങ്ങൾ തുടങ്ങാൻ ഈയാഴ്ച അനുകൂലമാവില്ല. വീടുപണി ഇഴയുന്നതിന് സാമ്പത്തികം കാരണമായേക്കും. സുഹൃത്തുക്കളുമായി തീരുമാനിച്ചിരുന്ന യാത്രയിൽ നിന്നും സ്വയം ഒഴിവാകും. പ്രണയവിവാഹത്തിന് വീട്ടുകാരുടെ അംഗീകാരം ലഭിക്കാം. പ്രതീക്ഷിച്ച ധനം കൈവശമെത്താൻ ചെറിയ കാലതാമസം വരുന്നതാണ്. സർക്കാരിൽ നിന്നും ലഭിക്കേണ്ട രേഖകൾ ലഭിച്ചേക്കാം.

തിരുവാതിര

കുടുംബത്തിലെ തർക്കങ്ങൾ ഒരുവിധം പരിഹരിക്കും. ജീവിത പങ്കാളിയുമായി മനസ്സ് തുറന്ന് സംസാരിക്കുവാനാവും. ഔദ്യോഗിക ചുമതലകൾ ഭംഗിയായി നിറവേറ്റുന്നതാണ്. കടം വാങ്ങിയ തുക ഭാഗികമായി കൊടുത്തു തീർക്കാൻ കഴിയും. മകനെ ഉപരിപഠനത്തിന് മുന്നോടിയായി ഇടക്കാല കോഴ്സുകളിൽ ചേർക്കുന്നതാണ്. വസ്തുവിന്റെ വില്പനക്കായി പരസ്യം കൊടുക്കും. അന്യനാട്ടിൽ കഴിയുന്നവർ കൂട്ടുകാരുടെ പ്രേരണയാൽ നാട്ടിലെ ഉത്സവത്തിന് വരാൻ തയ്യാറെടുപ്പുകൾ നടത്തും. ബുധൻ, വ്യാഴം ദിവസങ്ങൾക്ക് മേന്മ കുറയുന്നതായിരിക്കും.

പുണർതം

പതിനൊന്നാം ഭാവത്തിൽ രാശിനാഥനായ ബുധൻ വ്യാഴത്തോടൊപ്പം സഞ്ചരിക്കുകയാൽ ഗുണാധിക്യം പ്രതീക്ഷിക്കാം. സാമ്പത്തികമായ അലട്ടലുകൾക്ക് പോംവഴി തെളിയുന്നതാണ്. കർമ്മരംഗത്ത് വിജയിക്കാൻ കഴിയും. വാക്കുകൾ ശ്രവിക്കാൻ  ആളുണ്ടാവും. ഗൃഹസൗഖ്യം പ്രതീക്ഷിക്കാം. ജീവിത പങ്കാളിക്ക് ജോലി ലഭിക്കുന്നതാണ്. അല്ലെങ്കിൽ നിലവിലെ ജോലിയിൽ ഉയർച്ച ഉണ്ടാവുന്നതായിരിക്കും. ആഴ്ച മധ്യത്തിലെ രണ്ടു ദിവസങ്ങൾ തെല്ല് ക്ലേശപ്രദങ്ങളായേക്കാം. സമയനിഷ്ഠ തെറ്റാനുമിടയുണ്ട്.

പൂയം

വാരാന്ത്യത്തിലൊഴികെ മറ്റുദിവസങ്ങളിൽ മെച്ചപ്പെട്ട അനുഭവങ്ങൾ വന്നെത്തുന്നതാണ്. തീരുമാനങ്ങൾ ചിന്തിച്ച് കൈക്കൊള്ളും. സഹപ്രവർത്തകരോട് യുക്തിയുക്തമായി സംസാരിക്കുവാനാവും. പൊതുപ്രവർത്തകർ ഏല്പിക്കപ്പെട്ട ദൗത്യങ്ങളിൽ മുഴുകും. കുടുംബകാര്യങ്ങളിൽ അനാസ്ഥയുണ്ടാവാം. തന്മൂലം ഗൃഹാന്തരീക്ഷം അല്പം കലുഷമാവാൻ സാധ്യതയുണ്ട്. അനുരാഗികളുടെ ഹൃദയബന്ധം ശക്തമാകുന്നതാണ്. സുഹൃത്തുക്കൾ തമ്മിലുള്ള കലഹത്തിൽ മാധ്യസ്ഥത്തിന് മുതിരുന്നതുമൂലം അപകീർത്തിക്ക് അവസരം വന്നേക്കാം.

ആയില്യം

നക്ഷത്രനാഥനായ ബുധൻ പത്താം രാശിയായ മേടത്തിൽ സഞ്ചരിക്കുകയാൽ കർമ്മരംഗം മെച്ചപ്പെടുന്നതാണ്. തൊഴിൽ തേടുന്നവർക്ക് ശുഭവാർത്ത കേൾക്കാനാവും. കരാറു പണികൾ പുതുക്കപ്പെടുന്നതാണ്. സ്ഥാനോന്നതിക്ക് സാധ്യത കാണുന്നു. പരീക്ഷ / അഭിമുഖം എന്നിവയിൽ ശോഭിക്കാൻ കഴിയും. കലാകായിക മത്സരങ്ങളിൾ വിജയിക്കുന്നതാണ്. സ്വജനങ്ങളുടെ പിണക്കം തീർക്കാൻ പരിശ്രമം തുടരും. ചുറ്റുപാടുമുള്ളവർക്ക് ഗുണമുള്ള കാര്യങ്ങൾ ചെയ്യാൻ മുന്നിട്ടിറങ്ങും. സാമൂഹ്യമാധ്യമങ്ങളിൽ പിന്തുണ വർദ്ധിക്കുന്നതാണ്.

മകം

സാമാന്യമായ നേട്ടങ്ങൾ വന്നെത്തുന്ന വാരമാണ്. പല കാര്യങ്ങളിലും ആശയക്കുഴപ്പം തുടരുന്നതാണ്. കുടുംബകാര്യങ്ങളിൽ മകൻ്റെയോ മകളുടെയോ അഭിപ്രായം ഉൾക്കൊള്ളാൻ തയ്യാറാവുകയില്ല. ജീവിതപങ്കാളിയുടെ പിന്തുണയുണ്ടാവും. നിലവിലെ ബിസിനസ്സ് കൈമാറ്റം ചെയ്യാൻ ആഗ്രഹിച്ചേക്കും. ഭൂമി വിൽപ്പനയിൽ തടസ്സങ്ങൾ വരാം. ഉദ്യോഗസ്ഥർക്ക് ക്ഷേമകാലമാണ്. ആഗ്രഹിച്ച സ്ഥാനക്കയറ്റം ലഭിച്ചേക്കും. സംഘടനാ പ്രവർത്തനത്തിന് കൂടുതൽ സമയം കണ്ടെത്തുന്നതാണ്.

പൂരം

നക്ഷത്രനാഥനായ ശുക്രന് ഉച്ചസ്ഥിതി വരികയാൽ സ്വാഭിമാനം വർദ്ധിക്കും. മുൻപ് കിട്ടാത്ത അംഗീകാരം / ആദരം ഒക്കെ ഇപ്പോൾ സമൂഹത്തിൽ നിന്നും ലഭിച്ചേക്കാം. കലാപ്രവർത്തനം വിജയിക്കുന്നതാണ്. സംരംഭങ്ങളിൽ ലാഭം വന്നുതുടങ്ങും. പ്രണയ വിവാഹത്തിനുള്ള വീട്ടുകാരുടെ എതിർപ്പ് മാറിയേക്കാം. ഭോഗസുഖമുണ്ടാവും. സസ്പെൻഷനിൽ കഴിയുന്നവർക്ക് തിരികെ ജോലിയിൽ പ്രവേശിക്കുവാനാവും. രോഗബാധിതർക്ക് നല്ല ചികിൽസ ലഭിക്കുന്നതാണ്. ഭാഗ്യാനുഭവങ്ങൾ പ്രതീക്ഷിക്കാം.

ഉത്രം

സുഹൃത്തുക്കളുമായി  ചുറ്റിക്കറങ്ങുന്നത് മാതാപിതാക്കളുടെ ശ്രദ്ധയിൽപ്പെടും. നിയന്ത്രണങ്ങൾ വരാം. തൊഴിൽ തേടുന്നവരുടെ പരിശ്രമങ്ങൾ തടസ്സപ്പെടുന്നതാണ്. ഔദ്യോഗിക രംഗത്തുള്ളവർക്ക്   മേലധികാരിയുടെ അപ്രീതിയുണ്ടാവും. രോഗക്ലേശങ്ങൾ സാധ്യതയാണ്. സാമ്പത്തിക പിരിമുറുക്കത്തിന് തെല്ല് അയവുണ്ടാകും. വീടുവിട്ടു നിൽക്കുന്നവർക്ക് തിരികെ മടങ്ങാൻ കാലതാമസം വന്നുചേരുന്നതാണ്. രാഷ്ട്രീയ നിലപാടുകൾ പരസ്യപ്പെടുത്താൻ മുന്നോട്ടുവരും.

അത്തം

പ്രവർത്തനത്തിൽ നിശ്ചയദാർഢ്യമുണ്ടാകും. ഉത്സാഹം പ്രകടമാവും. കുടുംബ ജീവിതത്തിൽ വിട്ടുവീഴ്ച ചെയ്യേണ്ടി വരുന്നതാണ്. വിദ്യാർത്ഥികൾ ഇടക്കാല കോഴ്സുകൾ തെരഞ്ഞെടുത്തേക്കാം. ഏജൻസി/കമ്മീഷൻ തുടങ്ങിയ ഏർപ്പാടുകളിൽ നിന്നും ലാഭം ഉണ്ടായേക്കും. വസ്തുവിൻ്റെ ഭാഗം സംബന്ധിച്ച് സഹോദരരുടെ വാക്കുകൾ ചെവിക്കൊള്ളും. എതിർപ്പ് പ്രകടിപ്പിച്ചവർ ഐക്യത്തിലെത്താം. വാഹനം വാങ്ങാനുള്ള ഉദ്യമം ലക്ഷ്യം കാണുന്നതാണ്. ഗവേഷണത്തിലും ഗ്രന്ഥരചനയിലും പുരോഗതിയുണ്ടാവും.

ചിത്തിര

പ്രവേശനപ്പരീക്ഷയ്ക്ക് വിദ്യാർത്ഥികൾക്ക് തീവ്രപരിശീലനം വേണ്ടിവരുന്നതാണ്. കുടുംബകാര്യങ്ങൾക്ക് കൂടുതൽ സമയം ചെലവഴിക്കും. പ്രതികൂലതകളെ ആത്മശക്തിയോടെ നേരിടുന്നതാണ്. അനൗദ്യോഗിക യാത്രകൾ ഉണ്ടാവും. കൂട്ടുകച്ചവടത്തിൽ പുതിയ പങ്കാളികളെ ചേർക്കാൻ ശ്രമിക്കുന്നതാണ്. വായ്പ നേടാൻ നടത്തുന്ന ശ്രമം വിജയിച്ചേക്കും. ബന്ധുഗൃഹത്തിലെ വിവാഹത്തിൽ പങ്കെടുക്കുന്നതാണ്. പേരക്കുട്ടിയുടെ ജനനത്താൽ ഗൃഹത്തിൽ ആഹ്ളാദം അലയടിക്കും.

ചോതി

അന്യദേശ-വിദേശ യാത്രകൾക്ക് തയ്യാറെടുപ്പുകൾ തുടങ്ങുവാനാവും. സർക്കാരിൽ നിന്നും ലഭിക്കേണ്ട രേഖകൾ പ്രതീക്ഷിച്ച സമയത്തിൽ തന്നെ ലഭിക്കുന്നതാണ്. ബന്ധുക്കളുമായി ഇണങ്ങാൻ ശ്രമം നടത്തുന്നതായിരിക്കും. ഉദ്യോഗത്തിൽ ഉയർച്ചയുണ്ടാകും. സ്ഥലംമാറ്റക്കാര്യത്തിൽ സ്വന്തം സംഘടനയിൽ തന്നെ ചില തർക്കങ്ങൾ ഉടലെടുത്തേക്കും. അഞ്ചാം ഭാവത്തിലെ ശനി- കുജ യോഗം മൂലം കുട്ടികളുമായി തർക്കത്തിന് ഇടവരുന്നതാണ്. രാഷ്ട്രീയ പ്രവർത്തനത്തിൽ അമിതാവേശം കാണിക്കും.

വിശാഖം

സാമാന്യം നല്ലതുടക്കം ലഭിക്കുന്ന വാരമാണ്. അനുകൂലമായ വാർത്ത തേടിയെത്തും. തിങ്കൾ, ചൊവ്വ ദിവസങ്ങളിൽ ചെലവ് കൂടുന്നതാണ്. സുഹൃത്തുക്കളോട് പിണങ്ങേണ്ടി വരാം. സാമൂഹ്യ ജീവിതത്തിൽ അംഗീകാരം കുറയുന്നതായി ശങ്കിക്കുന്നതാണ്. വ്യാഴം മുതൽ മനക്ലേശം കുറയും. സ്വന്തം തൊഴിലിൽ സാമ്പത്തിക മെച്ചം പ്രതീക്ഷിക്കാം. ഊഹക്കച്ചവടം ഗുണകരമാവുന്നതാണ്. എതിർപ്പുകളെ പ്രതിരോധിക്കുന്നതിൽ വിജയിക്കും. ഉന്നത വ്യക്തികളുടെ പിന്തുണ ലഭിക്കുന്നതാണ്. കാര്യക്ഷമത അഭിനന്ദിക്കപ്പെടും.

അനിഴം

ആത്മാർത്ഥത അഭിനന്ദിക്കപ്പെടും. അയവില്ലാത്ത നിലപാടുകൾ  ശത്രുക്കളെ സൃഷ്ടിച്ചേക്കാം. സാമ്പത്തിക കാര്യങ്ങളിൽ വളർച്ചയുണ്ടാവും. അസാധ്യം എന്നു കരുതി മുൻപ് മാറ്റിവെച്ച കാര്യങ്ങൾ ഇപ്പോൾ നടന്നു കിട്ടാം. പുതിയ കോഴ്സുകളിൽ ചേരാൻ അവസരം ലഭിക്കാനിടയുണ്ട്. പ്രിയസുഹൃത്തുക്കളുമായി വിനോദയാത്രക്ക് സന്ദർഭമുണ്ടാവും. ഭാവനാശക്തി അധികരിക്കുന്നതാണ്.  സ്വതസ്സിദ്ധമായ കഴിവുകൾക്ക് തെളിച്ചമുണ്ടാവും. കലാപ്രവർത്തകർക്ക് പുതിയ അവസരം ലഭിക്കുന്നതാണ്.

തൃക്കേട്ട

ഗുണാനുഭവങ്ങൾ വർദ്ധിക്കും. ശത്രുപക്ഷത്തിൻ്റെ ദുരാരോപണങ്ങളെ മറികടക്കുന്നതാണ്. സഹപ്രവർത്തകർ വേണ്ടത്ര പിന്തുണയേകും. തർക്കവസ്തുക്കൾ സംബന്ധിച്ച കേസ് രാജിയായേക്കും. സംഘടനാ പ്രവർത്തനത്തിന് കൂടുതൽ സമയം ചെലവഴിക്കുന്നതാണ്. ഗൃഹാന്തരീക്ഷം അല്പം പ്രക്ഷുബ്ധമാവാം. വാക്കുകൾ വഴക്കിന് വഴിവെച്ചേക്കും. പ്രണയികൾക്ക് ആഹ്ളാദിക്കാൻ സന്ദർഭമുണ്ടാകും. ബിസിനസ്സുകാർക്ക് മെച്ചപ്പെട്ട സമയമാണ്.ഏജൻസി പ്രവർത്തനത്തിൽ വിജയിക്കാൻ കഴിഞ്ഞേക്കും.

മൂലം

തീരുമാനങ്ങൾ സാക്ഷാൽകരിക്കാൻ കാലതാമസമുണ്ടാവും. വ്യക്തിബന്ധങ്ങളുടെ പവിത്രത നിലനിർത്താൻ ക്ലേശിച്ചെന്നു വരാം. സ്വയം ചെയ്യുന്ന തൊഴിലുകളിൽ കൂടുതൽ മുതൽമുടക്കിന് / വിപുലീകരണത്തിന് തൽകാലം മുതിരരുത്. നിക്ഷേപങ്ങൾ നടത്തും മുൻപ് സാമ്പത്തിക വിദഗ്ദ്ധരുടെ അഭിപ്രായം കൈക്കൊള്ളണം. മാനസിക ക്ലേശങ്ങൾക്ക് പതിയെ അയവുവരുന്നതാണ്. കുടുംബാംഗങ്ങൾ അവസരോചിതമായി പെരുമാറും. അകലങ്ങളിൽ കഴിയുന്നവർക്ക് ഉത്സവാഘോഷാദികളിൽ പങ്കെടുക്കാൻ നാടണയാനായേക്കും.

പൂരാടം

തീരെ പ്രതീക്ഷിക്കാത്ത ചിലരുടെ സഹായം പ്രയോജനകരമാവും. ഉദ്യോഗസ്ഥർക്ക്  ദൗത്യങ്ങൾ ഏറ്റെടുക്കാനും അവയിൽ തിളങ്ങാനും സന്ദർഭം വന്നെത്തും. ഗൃഹനിർമ്മാണം വേഗത്തിലാക്കാൻ ശ്രമം തുടരുന്നതാണ്. ആഢംബര വസ്തുക്കൾ വാങ്ങുന്നതിന് ചെലവുണ്ടായേക്കും. മകൻ്റെ / മകളുടെ ഉപരിവിദ്യാഭ്യാസത്തിന് വിദേശ സാധ്യത തേടും. പൊതുപ്രവർത്തനത്തിന് സമയം കണ്ടെത്തും. സമയബന്ധിതമായി പ്രവർത്തിക്കുന്നതിൽ വിജയിക്കുന്നതാണ്. ആരോഗ്യ പരിപാലനത്തിൽ  ശ്രദ്ധ കുറയാം.

ഉത്രാടം

ബിസിനസ്സിൽ കൂടുതൽ ശ്രദ്ധ ചെലുത്തേണ്ട സമയമാണ്. വ്യക്തിജീവിതത്തിലും സാഹചര്യങ്ങളെ വരുതിയിലാക്കാൻ കൂടുതൽ പ്രയത്നം വേണ്ടി വരും. ഗവേഷകർക്ക് പ്രബന്ധ രചന പൂർത്തീകരിക്കാനാവും. കുടുംബ ജീവിതത്തിൽ സ്വൈരം പ്രതീക്ഷിക്കാം. കടബാധ്യതകൾ പരിഹരിക്കാനായുള്ള ശ്രമം തുടരുന്നതാണ്. ഓഹരി ലഭിച്ച വസ്തുവിന് പ്രതീക്ഷിച്ച വില കിട്ടാതെ വരാം. സ്ത്രീകളിൽ നിന്നും പിന്തുണയുണ്ടാവും. പ്രൊമോഷൻ സാധ്യത തള്ളിക്കളയാനാവില്ല. സുഹൃത്തിനു നൽകുന്ന സമയോചിത നിർദ്ദേശം സ്വീകാര്യമായിത്തീരും.

തിരുവോണം

പ്രവർത്തനോർജ്ജം ലഭിക്കുന്ന വാരമാണ്.  പ്രധാന തീരുമാനങ്ങൾ സന്ദിഗ്ദ്ധതയില്ലാതെ തന്നെ കൈക്കൊള്ളും. സഹപ്രവർത്തകരുടെ എതിർപ്പുകളെ തൃണവൽഗണിക്കും. സാമ്പത്തിക അച്ചടക്കം പാലിക്കാൻ മകനെ ഉപദേശിച്ചേക്കും. തന്മൂലം ചില അലോസരങ്ങൾ ഗാർഹികാന്തരീക്ഷത്തിൽ ഉരുണ്ടുകൂടാം. അറ്റകുറ്റപ്പണി കഴിഞ്ഞ് വാഹനം ഉപയോഗത്തിലെത്തും. ബന്ധുവിൻ്റെ വിവാഹത്തിന് മുൻനിന്ന് പ്രവർത്തിക്കും.  വിദേശത്തു കഴിയുന്നവർക്ക് നാട്ടിലേക്ക് മടങ്ങാൻ സാഹചര്യം ഒരുങ്ങും.

അവിട്ടം

വേണ്ടപ്പെട്ടവരോട് പരുഷവാക്കുകൾ പറയേണ്ടി വന്നേക്കാം. പ്രതീക്ഷിച്ച ധനം തടസ്സപ്പെടുന്നതാണ്. രാഷ്ട്രീയ പദവികളോ അംഗീകാരങ്ങളോ നിരാകരിച്ചേക്കും. കുടുംബാംഗങ്ങളുടെ സഹകരണമില്ലായ്മയെ വിമർശിക്കുന്നതാണ്. ഗൂഢശാസ്ത്രങ്ങളിൽ താല്പര്യമേറും. നവസംരംഭങ്ങൾ തുടങ്ങുന്നതിന് ഗ്രഹാനുകൂല്യം ഇല്ലാത്ത സമയമാണ്. അതിഥികളെ  സൽകരിക്കേണ്ടി വരാം. അപ്രസക്തമായ കാര്യങ്ങൾക്കായി അധികനേരം ചെലവഴിക്കേണ്ട സ്ഥിതിയുണ്ടാവും. ദൈവീക സമർപ്പണം ആത്മസംതൃപ്തിയേകാം.

ചതയം

ചൊവ്വ ജന്മനക്ഷത്രത്തിൽ തുടരുന്നതിനാൽ വൈകാരികഷോഭം തുടർക്കഥയാവും. നീതിബോധത്തോടെ പ്രവർത്തിക്കാൻ കഴിഞ്ഞില്ലെന്ന് വരാം. ഷോപ്പിംഗ് ചെലവുകൾ കൂടുന്നതിൻ്റെ പേരിൽ കുടുംബ കലഹം ഉയർന്നേക്കാം. വസ്തു വിൽപ്പനയിൽ ലാഭം കുറയുന്നതാണ്. സഹോദരരുടെ നിലപാടുകളിൽ അതൃപ്തിയുണ്ടാവും. സാമൂഹ്യ മാധ്യമങ്ങളിലെ അഭിപ്രായങ്ങൾക്ക് കനത്ത വിമർശനം നേരിടാനിടയുണ്ട്. സാധാരണ ചെയ്യുന്ന പ്രവർത്തനങ്ങൾ ഒരു വിധം തൃപ്തിയായി പൂർത്തീകരിക്കും. ആരോഗ്യപരമായ ശ്രദ്ധ പുലർത്തേണ്ടതുണ്ട്.

പൂരൂരുട്ടാതി

നേട്ടങ്ങൾക്ക് മുൻതൂക്കമുണ്ടാവും. വിജയത്തിനുള്ള വഴി തെളിഞ്ഞു കിട്ടുന്നതാണ്.  പ്രവർത്തനത്തിലെ മികവ് മേലധികാരികളുടെ പ്രീതിക്കിടയാക്കും. സമൂഹം അംഗീകരിക്കുന്ന വ്യക്തികളുടെ പിന്തുണ പ്രതീക്ഷിക്കാം. തൊഴിലിടം ശാന്തമാകും. സ്വതസ്സിദ്ധമായ കഴിവുകൾ പുറത്തെടുക്കാനാവും. വീടുവിട്ടു കഴിയുന്നവർക്ക് നാട്ടിലേക്ക് മടങ്ങാൻ കഴിയുന്നതാണ്. കടം വാങ്ങിയ തുക മടക്കി നൽകാനാവും. സംഘടനാ പ്രവർത്തനത്തിൽ നേതൃത്വം വഹിക്കും.

ഉത്രട്ടാതി

ഭൗതിക നേട്ടങ്ങൾ പലതുണ്ടാവും. അപ്രതീക്ഷിത യാത്രകൾ കൊണ്ട് ചില പ്രയോജനങ്ങൾ വന്നു ചേരും. ഗൃഹാന്തരീക്ഷം സമാധാനപൂർണമാകും. മകൻ്റെ ജോലിക്കാര്യത്തിൽ ശുഭവാർത്തയുണ്ടാവും. കരാർ ജോലിക്കാർക്ക് സ്ഥിരനിയമനത്തിന് സാധ്യതയുണ്ട്. പ്രണയികൾക്ക് ഹൃദയബന്ധം ദൃഢമാകുന്നതാണ്. സുഹൃത്തുക്കളുടെ പിന്തുണ ലഭിക്കാം. എതിർപ്പുകളിൽ കൂസുകയില്ല. വാരാന്ത്യ ദിവസങ്ങൾക്ക് മികവ് കുറയാം. അനാവശ്യച്ചെലവുകൾ ഉണ്ടാവുന്നതാണ്.

രേവതി

ജന്മനക്ഷത്രത്തിൽ രാഹു സഞ്ചരിക്കുകയാൽ സുലഭങ്ങൾ ദുർലഭങ്ങളാവും. ദുഷ്കീർത്തിയുണ്ടായേക്കും. ആലസ്യം തുടരും. എന്നാലും ചില നേട്ടങ്ങളും മെച്ചങ്ങളും പ്രതീക്ഷിക്കാം. സാമ്പത്തിക ഞെരുക്കത്തിന് അയവ്  പ്രതീക്ഷിക്കാം. ശുക്രൻ ജന്മരാശിയിൽ സഞ്ചരിക്കുകയാൽ കലാജീവിതത്തിൽ ഉയരാൻ അവസരം വന്നെത്തുന്നതാണ്. അശനശയനത്തിന് ഭംഗമുണ്ടാവില്ല. ഭോഗസുഖം ഭവിക്കും. കുടുംബത്തിൽ മംഗളകർമ്മങ്ങൾ നടക്കാം. ദാമ്പത്യത്തിൽ സ്വൈരം ഉണ്ടാവും. കൃഷികാര്യങ്ങളിൽ ശ്രദ്ധ പതിഞ്ഞേക്കും. കർമ്മരംഗത്ത് വളർച്ചയുടെ ലക്ഷണം കാണപ്പെടും. 

Read More

• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 April 01 to April 07
• വാരഫലം, മൂലം മുതൽ രേവതി വരെ; March 31-April 06, 2024, Weekly Horoscope
• വാരഫലം, മകം മുതൽ തൃക്കേട്ട വരെ; March 31-April 06, 2024, Weekly Horoscope
• വാരഫലം, അശ്വതി മുതൽ ആയില്യം വരെ; March 31-April 06, 2024, Weekly Horoscope
• ഗുണാനുഭവങ്ങൾ വർഷിക്കുന്ന ശുക്രൻ-അശ്വതി മുതൽ രേവതി വരെയുള്ള നക്ഷത്രക്കാരുടെ ഫലം
• Weekly Horoscope (March 24– March 30, 2024): ഈ ആഴ്‌ച നിങ്ങൾക്കെങ്ങനെ?
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 March 25 to March 31
• സമ്പൂര്‍ണ വാരഫലം, അശ്വതി മുതൽ രേവതി വരെ; March 24-March 30, 2024, Weekly Horoscope