സമ്പൂര്‍ണ വാരഫലം, അശ്വതി മുതൽ രേവതി വരെ; March 24-March 30, 2024, Weekly Horoscope

ആദിത്യൻ മീനം രാശിയിൽ, ഉത്രട്ടാതി ഞാറ്റുവേലയിൽ സഞ്ചരിക്കുന്നു. ചൊവ്വ കുംഭം രാശിയിൽ ചതയം നക്ഷത്രത്തിലാണ്. ബുധൻ മാർച്ച് 25 ന് മീനം രാശിയിൽ നിന്നും മേടം രാശിയിൽ അശ്വതി നക്ഷത്രത്തിൽ പ്രവേശിക്കുന്നു. വ്യാഴം മേടം രാശിയിൽ  ഭരണി നക്ഷത്രത്തിലാണ്. 

ശുക്രൻ കുംഭം രാശിയിൽ പൂരൂരുട്ടാതിയിൽ സഞ്ചരിക്കുന്നു. ശനി കുംഭം രാശിയിൽ ചതയത്തിലും രാഹു മീനം രാശിയിൽ രേവതിയിലും കേതു കന്നി രാശിയിൽ അത്തം നാളിലുമാണ്. ചന്ദ്രൻ മാർച്ച് 24 ന് ചതുർദ്ദശി - പൗർണമി തിഥികളിലാണ്.  കൃഷ്ണപക്ഷ പഞ്ചമി വരെയുള്ള തിഥികളുണ്ട്, ഈ ആഴ്ചയിൽ. ഉത്രം മുതൽ അനിഴം വരെയുള്ള നക്ഷത്രങ്ങളിലാണ് ചന്ദ്രൻ്റെ സഞ്ചാരം. 

ഈയാഴ്ചയിലെ അഷ്ടമരാശി നോക്കാം. ഞായർ ഉച്ചവരെ കഴിഞ്ഞ ആഴ്ചയുടെ തുടർച്ചയായി വരുന്ന മകരക്കൂറിൻ്റെ അഷ്ടമരാശിയാകുന്നു. തുടർന്ന് ചൊവ്വ രാത്രി വരെ കുംഭക്കൂറിൻ്റെയും തുടർന്ന് വെള്ളി പ്രഭാതം വരെ മീനക്കൂറിൻ്റെയും അതിനുശേഷം മേടക്കൂറിൻ്റെയും അഷ്ടമരാശിയാണ്. 

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെയും സമ്പൂര്‍ണ വാരഫലം ഇവിടെ പരിശോധിക്കുന്നു. 

അശ്വതി

നേട്ടങ്ങൾക്ക് മുൻതൂക്കമുണ്ടാവുന്ന വാരമായിരിക്കും. കച്ചവടക്കാർക്ക് പ്രതീക്ഷിച്ച ലാഭം കൈവശമെത്തും.  ഉദ്യോഗത്തിൽ  സമാധാനവും സഹപ്രവർത്തകരുടെ പിന്തുണയും ഉണ്ടാകുന്നതാണ്. അല്പം അധ്വാനം കൂടുന്നതായിരിക്കും. ഗാർഹിക ജീവിതത്തിൽ ഒരുവിധം സ്വസ്ഥത പ്രതീക്ഷിക്കാം. ബന്ധങ്ങളുടെ ദാർഢ്യം നിലനിർത്താൻ കഴിയുന്നതാണ്. വിരുദ്ധ ആശയങ്ങളുള്ള സുഹൃത്തുക്കളെ പരസ്പരം ഇണങ്ങരാക്കുന്ന ദൗത്യത്തിൽ വിജയിക്കുന്നതാണ്. വാരാന്ത്യദിവസങ്ങൾ ഗുണകരമായേക്കില്ല.

ഭരണി

കർമ്മോത്സുകത ഉണ്ടാവുന്നതാണ്.  സ്വയം തിരുത്തി മുന്നോട്ടു നീങ്ങാൻ സന്നദ്ധതയുണ്ടാവും. കരാർ പണികൾ പുതുക്കിക്കിട്ടാം. വലിയ തോതിലുള്ള മുതൽ മുടക്കുന്നതിന് ഇപ്പോൾ ഗ്രഹാനുകൂല്യമില്ലെന്ന വസ്തുത ഓർമ്മയിലുണ്ടാവണം. പഴയ കടബാധ്യതകൾ ചിത്തശല്യത്തിന് വഴിയൊരുക്കാം. വിദ്യാർത്ഥികൾ സാങ്കേതിക പഠനത്തിന് തയ്യാറെടുപ്പുകൾ തുടങ്ങിയേക്കും. പ്രിയപ്പെട്ടവരിൽ നിന്നും ഇഷ്ടവസ്തുക്കൾ പാരിതോഷികമായി ലഭിക്കുന്നതാണ്. ചെറുയാത്രകൾ കൊണ്ട് നേട്ടമുണ്ടാവും.

കാർത്തിക

വൈകാരിക ക്ഷോഭം കാരണം യാഥാർത്ഥ്യം വിലയിരുത്തുന്നതിൽ പാളിച്ചകൾ വന്നേക്കാം. തൊഴിലിടത്തിൽ താൽപര്യം കുറയുന്നതാണ്. പുതിയ അവസരങ്ങൾ ലഭിക്കാൻ കാത്തിരിക്കേണ്ടതുണ്ട്. ഗവേഷണത്തിൽ ആലസ്യമുണ്ടാവും. ന്യായമായ ആവശ്യങ്ങൾക്ക് പണം തടസ്സമാവില്ല. സന്താന പ്രതിബന്ധത്തിന് ചികിൽസ തുടരേണ്ടി വരുന്നതാണ്. സാമൂഹ്യ മാധ്യമങ്ങളിൽ കൂടുതൽ സമയം ചെലവഴിച്ചേക്കും. അഭിപ്രായപ്രകടനങ്ങളിലെ മിതത്വമില്ലായ്മ ശത്രുക്കളെ ക്ഷണിച്ചുവരുത്താം.

രോഹിണി

കണ്ടകശനിയും വ്യാഴത്തിൻ്റെ പ്രാതികൂല്യവും ഉണ്ടെങ്കിലും തൊഴിൽ രംഗം വളർച്ചയുടെ പാതയിലാവും. ലാഭം  അധികരിക്കും. ഉദ്യോഗസ്ഥർക്ക് ജോലിഭാരം കൂടുമെങ്കിലും പുതുപദവികൾക്ക് അർഹത ലഭിക്കും. പരീക്ഷ / അഭിമുഖം എന്നിവയിൽ ശോഭിക്കുന്നതാണ്. കുടുംബ ജീവിതത്തിലെ പിണക്കങ്ങൾ മറക്കപ്പെടും. ആഘോഷങ്ങളിൽ പങ്കുചേരാൻ നാട്ടിലെത്താനാവും. കൂട്ടുകാരുമായി ഒത്തുചേർന്ന് ആത്മീയ യാത്രകൾ സംഘടിപ്പിക്കുന്നതാണ്. ഞായർ, തിങ്കൾ ദിനങ്ങൾക്ക് മെച്ചം കുറയാം.

മകയിരം

നല്ലഫലങ്ങൾ വിശേഷിച്ചും, കർമ്മരംഗത്ത് നേട്ടങ്ങൾ പ്രതീക്ഷിക്കാനാവുന്ന വാരമാണ്. മേലുദ്യോഗസ്ഥരുടെ അവഗണന അനുഭവിച്ചവർ പരിഗണനാലിസ്റ്റിൻ്റെ മുന്നിലിടം പിടിയ്ക്കും. ഊഹക്കച്ചവടത്തിൽ നേട്ടങ്ങൾ പ്രതീക്ഷിക്കാം. കുടുംബ തർക്കങ്ങൾ ഭംഗിയായി ഒത്തുതീർക്കുന്നതാണ്. ദാമ്പത്യത്തിൽ സ്വൈരം പുലരും. മകൻ്റെ വിദേശ യാത്രയുമായി ബന്ധപ്പെട്ട രേഖകൾക്ക് അനുമതി ലഭിച്ചേക്കും. വീടുപണി പുരോഗമിക്കുന്നതാണ്. വ്യായാമം, വിശ്രമം, ഭക്ഷണം എന്നിവയുടെ സമയക്രമം തെറ്റിയേക്കും.

തിരുവാതിര

വാരാദ്യത്തിന് പ്രസന്നത ഉണ്ടാവും. പ്രതീക്ഷകൾ നിറവേറും. വിശിഷ്ട വ്യക്തികളെ പരിചയപ്പെടാൻ അവസരം ലഭിക്കുന്നതാണ്. ചൊവ്വ, ബുധൻ ദിവസങ്ങളിൽ ആലസ്യമുണ്ടാകാം. ജോലിയിൽ ശുഷ്കാന്തി കുറയുന്നതാണ്. ചില കാര്യങ്ങൾ പിന്നീടത്തേക്കാക്കും. അച്ഛനും മകനും തമ്മിൽ തർക്കമുണ്ടാകും. തുടർ ദിവസങ്ങളിൽ അവസരോചിത തീരുമാനങ്ങൾ കൈക്കൊള്ളും. നോക്കിയും കണ്ടും പണം ചെലവഴിക്കും. സർക്കാരിൽ നിന്നും ലഭിക്കേണ്ട രേഖകൾ കിട്ടിയേക്കും.

പുണർതം

പഠനത്തിൽ ഏകാഗ്രത കുറയുന്നതായി സ്വയം തോന്നും. അവധിക്കാല സ്വപ്നങ്ങൾ നെയ്തുകൂട്ടുന്നതിൽ മനസ്സ് സന്തോഷിക്കും. തൊഴിൽ തേടുന്നവർ വാഗ്ദാനങ്ങളിൽ പ്രതീക്ഷയർപ്പിക്കും. വീട്ടിൽ നിന്നും മാറി നിൽക്കേണ്ട സാഹചര്യം വന്നുകൂടായ്കയല്ല. ഭാവനാവിലാസങ്ങൾ  സുഹൃത്തുക്കളാൽ പരിഹസിക്കപ്പെടാം. കരാർ ജോലികൾക്ക് തടസ്സമുണ്ടാവുന്നതല്ല. വാടക വീട് കണ്ടെത്താൻ ശ്രമം തുടരുന്നതാണ്. പൊതുക്കാര്യങ്ങളിൽ ഖണ്ഡിതമായ അഭിപ്രായം പറഞ്ഞ് ശത്രുക്കളെ നേടിയേക്കും.

പൂയം

നക്ഷത്രനാഥനായ ശനിക്ക് മൗഢ്യം തീർന്നതിനാൽ പരിശ്രമങ്ങൾ പാഴാകില്ല. ചലനോർജ്ജം വർദ്ധിക്കുന്നതാണ്. ആത്മാർത്ഥത തിരിച്ചറിയപ്പെടും. സഹായ വാഗ്ദാനങ്ങൾ പാലിക്കപ്പെടുന്നതാണ്. അടുത്ത ബന്ധുക്കളുടെ മംഗളകർമ്മങ്ങളിൽ പങ്കെടുക്കാനാവും. നിലവിലെ രോഗാവസ്ഥയ്ക്ക് ചികിൽസാമാറ്റം ആഗ്രഹിക്കും. കടബാധ്യതകൾ തീർക്കാൻ വസ്തുവിൽക്കുന്നത് സംബന്ധിച്ച് കുടുംബാംഗങ്ങൾ എതിർപ്പ് അറിയിക്കും. അനുരാഗികൾക്ക് ഭാവിയെക്കുറിച്ചോർത്ത് ഉൽക്കണ്ഠ തോന്നാം.

ആയില്യം

നക്ഷത്രനാഥനായ ബുധന് നീചസ്ഥിതിയിൽ നിന്നും മാറ്റം വരുന്നത് ഗുണകരമാവും. ചില ഉൽക്കണ്ഠകൾ അവസാനിച്ചേക്കും. പരീക്ഷകളിൽ നന്നായി ശോഭിക്കാനാവും. ബിസിനസ്സ് ഉടമ്പടികൾ ഒപ്പുവെക്കുവാൻ കഴിയും. ഉദ്യോഗസ്ഥർക്ക് സ്വതന്ത്ര ചുമതലകൾ കൈവരുന്നതാണ്. ബന്ധുക്കളിൽ നിന്നും ഉയർന്ന വിമതസ്വരങ്ങൾ ഇല്ലാതായേക്കും. ബൗദ്ധികമായ തീരുമാനങ്ങൾ മറ്റുള്ളവർക്ക് അംഗീകരിക്കേണ്ടി വരുന്നതാണ്. കലാകായിക രംഗത്ത് പ്രവർത്തിക്കുന്നവർക്ക് അഭ്യുദയം ഉണ്ടാകും. ഞായർ, തിങ്കൾ, ബുധൻ, വ്യാഴം ദിവസങ്ങൾക്ക് മെച്ചമേറുന്നതാണ്.

മകം

വിദ്യാർത്ഥികൾക്ക് മനസ്സിരുത്തി പഠിക്കാൻ കഴിഞ്ഞെന്നുവരില്ല. കൂട്ടുകച്ചവടത്തിൽ താല്പര്യം കുറയുന്നതാണ്. സുഹൃത്തുക്കൾക്കായി അലയേണ്ടിവരും. ശാരീരികാധ്വാനമുള്ള ജോലികൾ ചെയ്യാൻ ഇടയാവുന്നതാണ്. വിരുന്നുകാരെ പ്രതീക്ഷിക്കേണ്ടതുണ്ട്. പാചകപരീക്ഷണങ്ങൾ പ്രശംസ നേടിയേക്കും. പിതാവിൻ്റെ ഉപദേശം കാര്യസാധ്യത്തിന് സഹായകമാവും. സകുടുംബം ക്ഷേത്രാടനത്തിന് മുതിരുന്നതാണ്. യാത്രകളിൽ പണമോ / രേഖകളോ നഷ്ടമാകാൻ സാധ്യതയുണ്ട്. ജാഗ്രത കൈക്കൊള്ളണം.

പൂരം

കുടുംബകലഹങ്ങൾക്ക് വിരാമം പ്രതീക്ഷിക്കാം. അനുരഞ്ജനത്തിൻ്റെ പാത സ്വീകരിക്കുവാൻ നിർബന്ധതരാകും. സ്വകാര്യ സ്ഥാപനത്തിലെ ജോലി ഉപേക്ഷിക്കാനുള്ള തീരുമാനം ഇപ്പോൾ ദോഷകരമായേക്കും. സഹപ്രവർത്തകരെ പഴിചാരാനുള്ള ശ്രമത്തിന് വേണ്ടത്ര പിന്തുണ ലഭിച്ചെന്നു വരില്ല. രേഖകൾ പുതുക്കാനോ പുതിയത് നേടാനോ ആവർത്തിത ശ്രമം വേണ്ടിവരുന്നതാണ്. സാമൂഹ്യമാധ്യമങ്ങളിൽ ഒരുപാട് നേരം ചെലവഴിച്ചേക്കും.  വാക്കുകളുടെ പാരുഷ്യം സുഹൃത്തുക്കളുടെ പിണക്കത്തിന് കാരണമാകുന്നതാണ്.

ഉത്രം

നക്ഷത്രനാഥനായ ആദിത്യൻ്റെ രാഹുയോഗം പലനിലയ്ക്കും പുരോഗതിയെ തടസ്സപ്പെടുത്താൻ ഇടവരുത്തുന്നതാണ്. സ്വയം തൊഴിൽ ചെയ്യുന്നവർക്ക് ലാഭപ്രതീക്ഷ മങ്ങും. മത്സരങ്ങൾക്ക് കരുതിയതിലും കടുപ്പമുണ്ടായേക്കും. ഉപജാപങ്ങളെ സമയോചിതമായി പ്രതിരോധിക്കുന്നതിൽ വീഴ്ച വരുന്നതാണ്. സാമ്പത്തിക വാഗ്ദാനങ്ങൾ വൈകിയേക്കാം. പിതാവിൻ്റെ ആരോഗ്യകാര്യത്തിൽ അലംഭാവമരുത്. മകളുടെ ഉപരിപഠനം സംബന്ധിച്ച് ആശയക്കുഴപ്പത്തിന് സാധ്യത കാണുന്നു. നാട്ടിലേക്ക് മടങ്ങാനുളള ശ്രമം വിജയിച്ചേക്കും.

അത്തം

സാങ്കേതിക കാര്യങ്ങൾ മനസ്സിലാക്കാൻ ശ്രമം തുടരുന്നതാണ്. വിവരശേഖരണം, അറിവ് അടയാളപ്പെടുത്തി സൂക്ഷിക്കുക എന്നിവയ്ക്ക് സമയം കണ്ടെത്തും. പണമിടപാടുകളിൽ ശ്രദ്ധയുണ്ടാവണം. പണയവസ്തു വീണ്ടെടുക്കുന്നതിൽ ക്ലേശിച്ചേക്കും. എതിർപ്പുകളെ നന്നായി ചെറുക്കാനാവും.  ഭക്ഷണത്തിലെ അശ്രദ്ധ  മൂലം രോഗസാധ്യത കാണുന്നു. നവസംരംഭങ്ങൾ ബാലാരിഷ്ടകളിലാവും. താത്ത്വികവും ആദർശപരവുമായ നിലപാടുകൾ മൂലം സുഹൃത്തുക്കൾ പിണങ്ങാം.

ചിത്തിര

കൂട്ടുകെട്ട്  വീട്ടിൽ ചർച്ചാവിഷയമാകും. അവധിക്കാല യാത്രകൾക്ക്  എതിർപ്പുണ്ടാവും. പഠനത്തിൽ ഏകാഗ്രത കുറയുന്നതാണ്. ഉദ്യോഗസ്ഥർ മേലധികാരികളുടെ അപ്രീതിക്ക് പാത്രമായേക്കാം. സ്വകാര്യ കമ്പനിയിൽ പ്രവർത്തിക്കുന്നവർക്ക് നിർദ്ദിഷ്ട ഗോളുകൾ നേടുക എന്നത് ഏറ്റവും ദുർഘടമായിത്തീരും. കൃഷിക്കാർക്ക് ഭൂമിയിൽ നിന്നും ആദായം കുറഞ്ഞേക്കും. കലാഭിരുചികൾ വളരാം. കമ്മീഷൻ പ്രവർത്തനങ്ങളിൽ നിന്നും ആദായം ഉയരുന്നതാണ്.

ചോതി

ഏർപ്പെടുന്ന കാര്യങ്ങളിൽ വേഗത്തിൽ മുഷിച്ചിലുണ്ടാവും. ദൗത്യങ്ങൾ സമയബന്ധിതമായി പൂർത്തിയാക്കാത്തത് പ്രശ്നങ്ങളുണ്ടാക്കും. ഉദ്യോഗസ്ഥർ വെറുതെ അവധിയെടുക്കാം. ചെറുപ്പക്കാർ മാതാപിതാക്കളുമായി കലഹിക്കുന്നതാണ്. ചെലവ് കൂടുതലാകുന്നത് കുടുംബ ബഡ്ജറ്റിൻ്റെ താളം തെറ്റിച്ചേക്കാം. കൈവായ്പകൾ തിരികെ കിട്ടിയേക്കില്ല. വാടക വീട് ഒഴിയേണ്ടി  വരുന്നതാണ്. രാഷ്ട്രീയ കാര്യങ്ങളിൽ ആവേശത്തോടെ മുഴുകും.

വിശാഖം

പല കാര്യങ്ങളിൽ താത്പര്യം വികസിക്കുന്നതാണ്. സ്വന്തം കഴിവുകളിൽ അമിത വിശ്വാസം തോന്നിയേക്കും. എന്നാൽ ഗ്രന്ഥരചന, ഗവേഷണം, ശില്പ നിർമ്മാണം തുടങ്ങിയവ പൂർത്തീകരിക്കാൻ കാലവിളംബമേർപ്പെടുന്നതാണ്. ജന്മനാട്ടിലേക്ക് മടങ്ങാനുള്ള തീരുമാനത്തിന് കുടുംബാംഗങ്ങളുടെ എതിർപ്പുണ്ടാവും. തൊഴിൽ തേടുന്നവർ ദിവസവേതന വ്യവസ്ഥയിൽ താൽകാലിക ലാവണം കൊണ്ട് തൃപ്തിപ്പെടേണ്ട സ്ഥിതിയുണ്ടാവും. മാനസിക പിരിമുറുക്കം ആരോഗ്യത്തെ ബാധിച്ചേക്കാം.

അനിഴം

നല്ല അനുഭവങ്ങൾ വാരാദ്യം വന്നുചേരുന്നതാണ്. ആത്മവിശ്വാസം വർദ്ധിച്ചേക്കും. സാമ്പത്തികമായി മെച്ചം ഭവിക്കുന്നതാണ്. പ്രവർത്തന മികവ് എല്ലാവരാലും അഭിനന്ദിക്കപ്പെടും. തൊഴിൽരംഗത്തെ പ്രശ്നങ്ങൾ നീതിബോധത്തോടെ പരിഹരിക്കുന്നതാണ്. സഹോദരിയുടെ വിവാഹത്തിനുള്ള ശ്രമങ്ങൾ തുടരും. ജീവിതപങ്കാളിക്ക് പുതിയ സംരംഭം തുടങ്ങാൻ വേണ്ട സംവിധാനങ്ങൾ ഒരുക്കിത്തുടങ്ങുന്നതാണ്. വാഹനത്തിൻ്റെ കേടുപാടുകൾ നീക്കാൻ കരുതിവെച്ച തുക പോരാതെ വരുന്നതാണ്.

തൃക്കേട്ട

നക്ഷത്രനാഥനായ ബുധൻ ആറാമെടത്തേക്ക് നീങ്ങുകയാൽ പ്രത്യുല്പന്നമതിത്വം കൊണ്ട് എതിർപ്പുകളെ മറികടന്നേക്കും. പഠനത്തിൽ വ്യക്തമായ പുരോഗതിയുണ്ടാവും. ബുദ്ധിപരമായ വിനോദങ്ങളിൽ വിജയിക്കുന്നതാണ്. ബന്ധുജനങ്ങളുടെ സഹായം പ്രതീക്ഷിക്കാതെ തന്നെ ലഭിക്കുവാനിടയുണ്ട്. സ്വന്തം തൊഴിലിൽ നിന്നും തരക്കേടില്ലാത്ത വരുമാനം വന്നുചേരും. ഗൃഹത്തിലെ മുതിർന്നവരുടെ ആരോഗ്യകാര്യത്തിൽ ശ്രദ്ധ വേണ്ടതുണ്ട്. ഉത്സവാഘോഷങ്ങളിൽ ഭാഗഭാക്കാകും. വാരാന്ത്യത്തിൽ വിരുന്നുകളിൽ പങ്കെടുക്കുന്നതാണ്. 

മൂലം

പ്രതീക്ഷിക്കാത്ത വ്യക്തികളിൽ നിന്നും സഹായം ലഭിച്ചേക്കും. കർമ്മമേഖലയിൽ ഉണർന്ന് പ്രവർത്തിക്കുന്നതാണ്. തിങ്കൾ മുതൽ വെള്ളി വരെ നേട്ടങ്ങൾക്കാവും മുൻതൂക്കം. സാമ്പത്തിക ഞെരുക്കത്തിന് നല്ലരീതിയിൽ അയവുണ്ടാകും. കാര്യാലോചനായോഗങ്ങളുടെ നേതൃപദവി വഹിക്കുവാനാവും. കുടുംബ പ്രശ്നങ്ങൾ അപരിഹാര്യമായി തുടരുന്നതാണ്. സുഹൃത്തുക്കളുടെ അഭിപ്രായം സ്വീകരിക്കാൻ കഴിഞ്ഞേക്കില്ല. തന്മൂലം മനക്ലേശം വരാം. സൽകാര്യങ്ങളും നല്ലചിന്തകളും മനസ്സിൽ ഇടംപിടിക്കുന്നതാണ്.

പൂരാടം

വ്യക്തിപരമായും തൊഴിൽപരമായും മെച്ചപ്പെട്ട ആഴ്ചയാണ്. ഇച്ഛാശക്തിയും കർമ്മശക്തിയും ഇണക്കാനാവും. സ്വന്തം നിലപാടുകൾ ഒപ്പമുള്ളവരെക്കൊണ്ട് അംഗീകരിപ്പിക്കാൻ കഴിയുന്നതാണ്. ഊഹക്കച്ചവടത്തിൽ ആദായമുണ്ടാകും. മംഗളകർമ്മങ്ങളിൽ പങ്കെടുക്കാനാവും. നാലാം ഭാവത്തിൽ പാപഗ്രഹങ്ങൾ തുടരുകയാൽ വീട്ടിൽ ഓട/ മലിനജലം / ശൗചാലയം സംബന്ധിച്ച അറ്റകുറ്റപ്പണി വേണ്ടിവരുന്നതാണ്. വളർത്തുമൃഗങ്ങളുടെ അസുഖം വിഷമിപ്പിക്കാം. കലാസിദ്ധികൾ പുഷ്ടിപ്പെടുന്നതാണ്.

ഉത്രാടം

ആദ്യത്തെ ഒന്നുരണ്ടുദിവസങ്ങൾ മനക്ലേശപ്രദങ്ങളാണ്. ആലസ്യം ബാധിച്ചേക്കാം. ജോലിചെയ്യാൻ മടിയുണ്ടാവുന്നതാണ്. ചൊവ്വ മുതൽ കാലം അനുകൂലം. വിഷാദചിന്തകൾ അകലുന്നതാണ്. കുടുംബത്തിന് നൽകിയ വാഗ്ദാനം പാലിക്കപ്പെടാം. വായ്പ അനുവദിച്ചു കിട്ടുന്നതാണ്. ബിസിനസ്സിൽ പുതിയ കൂട്ടുകെട്ടുകൾ ഉടലെടുത്തേക്കും. പുറത്തിറക്കിയ ഉല്പന്നങ്ങൾ ഉപഭോക്താക്കളുടെ പ്രീതിനേടുന്നതാണ്. ഉപരിപഠനത്തിനുള്ള തടസ്സങ്ങൾ നീങ്ങാം. ബന്ധുഭവനം സന്ദർശിക്കാൻ സമയം കണ്ടെത്തുന്നതാണ്.

തിരുവോണം

മുൻപ് പലതവണ ശ്രമിച്ചിട്ടും പരാജയപ്പെട്ടുപോയവ ഇപ്പോൾ ലഘുപ്രയത്നം കൊണ്ട് നേടാനാവും. ആത്മാഭിമാനം ഉയരും. സഹപ്രവർത്തകർ അംഗീകരിക്കും. കച്ചവടരംഗം ഉന്മേഷകരമാവും. പുതിയ ശാഖകൾ തുറക്കുന്നതിനെ മുൻനിർത്തിയുള്ള ആലോചനകൾ കൂടുതൽ സജീവമാകുന്നതാണ്. വസ്തു / വീട് വിൽക്കാൻ സാധിച്ചേക്കും. ജീവിത പങ്കാളിക്ക് ഉദ്യോഗത്തിൽ ഉയർച്ചയുണ്ടാകും. രാഷ്ട്രീയ നിലപാടുകൾ പരസ്യപ്പെടുത്തും.  അതുമൂലം കുടുംബത്തിൽ ചില ഭിന്നാഭിപ്രായങ്ങൾ ഉടലെടുത്തേക്കാം.

അവിട്ടം

പുരോഗതിക്ക് തടസ്സമുള്ളതായി തോന്നുന്നതാണ്. അതിൻ്റെ കാരണങ്ങൾ കണ്ടെത്താനും സാധിച്ചേക്കില്ല. സാമൂഹികമായ അംഗീകാരം കിട്ടാതെ വരും. പിന്തുണ ലഭിക്കുമെങ്കിലും അത് സമർത്ഥമായി പ്രയോജനപ്പെടുത്താൻ കഴിഞ്ഞേക്കില്ല. സുഹൃത്തുക്കളുടെ ഉപദേശം സ്വീകരിക്കും. വൃദ്ധരായ മാതാപിതാക്കൾക്ക് രോഗാരിഷ്ടകൾ ഉണ്ടാവാം. ആഴ്ചയുടെ അവസാനം ചില നേട്ടങ്ങൾ വന്നെത്തും. ധനക്ലേശം നീങ്ങി അത്യാവശ്യകാര്യങ്ങൾ മുടക്കം കൂടാതെ നടക്കുന്നതാണ്.

ചതയം

പാപഗ്രഹങ്ങൾ  ശക്തമായിട്ടുള്ള പ്രതികൂലത തുടരുകയാൽ നിശ്ചയിച്ച യാത്ര മാറ്റിവെക്കേണ്ട സാഹചര്യം സംജാതമായേക്കും. ബിസിനസ്സിൽ ലാഭമോ നഷ്ടമോ പറയാനാവാത്ത സ്ഥിതിയുണ്ടാവും. ഉദ്യോഗസ്ഥർക്ക് പ്രതീക്ഷിച്ച സ്ഥാനക്കയറ്റത്തിന് കാത്തിരിപ്പ് തുടരേണ്ടതായുണ്ട്. ആരോഗ്യപ്രശ്നങ്ങൾ ഉണ്ടാവുന്നതാണ്. അഷ്ടമരാശിയുള്ളതിനാൽ ഞായർ, തിങ്കൾ ദിവസങ്ങളിൽ ശുഭാരംഭം ഒഴിവാക്കണം. കമ്മീഷൻ / ഏജൻസി ഏർപ്പാടുകളിൽ നിന്നും നേട്ടങ്ങൾ വന്നെത്താം.

പൂരൂരുട്ടാതി

സമീപകാലത്ത് തുടങ്ങിയ സംരംഭങ്ങളിൽ വേണ്ടത്ര പുരോഗതി ഉണ്ടാവാത്തത് മനസ്സ് മടുപ്പിച്ചേക്കാം. സാങ്കേതിക വിദഗ്ദ്ധരുടെ ഉപദേശപ്രകാരം ചില മാറ്റങ്ങൾ വരുത്താൻ മുതിരുന്നതാണ്. കുടുംബത്തിൻ്റെ പിന്തുണ കുറയുന്നതായി തോന്നിയേക്കാം. പാരമ്പര്യ വസ്തുക്കളുടെ ന്യായമായ ഓഹരി കൈവശമെത്തും. ഗൃഹജീർണ്ണോദ്ധാരണം ആലോചനകൂടാതെ തുടങ്ങരുത്. വായ്പ / ചിട്ടി ഇവയിൽ നിന്നും കുറച്ച് സാമ്പത്തിക സഹായം സിദ്ധിച്ചേക്കും. ആരോഗ്യപരമായി കരുതൽ വേണം.

ഉത്രട്ടാതി

രാഹുവും സൂര്യനും ജന്മരാശിയിൽ തുടരുന്നതിനാൽ പ്രശ്നങ്ങൾ തുടർക്കഥയാവും. ഗുണം കിട്ടാത്ത കാര്യങ്ങൾക്കായി അമിതാധ്വാനം ഉണ്ടാവുന്നതാണ്. അലച്ചിലിനും സാധ്യതയുണ്ട്. ഉദ്യോഗസ്ഥർക്ക് മേലധികാരികളുടെ ശാസന / അപ്രീതി ഉണ്ടായേക്കും. വലിയ മുതൽമുടക്കുകൾക്ക് കാലം അനുകൂലമല്ല. ഭാവിപഠനം സംബന്ധിച്ച് വ്യക്തമായ തീരുമാനം ഉരുത്തിരിഞ്ഞേക്കില്ല. പക്വമായ പ്രഭാഷണശൈലി സദസ്യരുടെ കരഘോഷം നേടും. ബുദ്ധിമാന്മാരായ സുഹൃത്തുക്കൾ പിന്തുണയ്ക്കുന്നതാണ്.

രേവതി

ബന്ധുക്കളുമായുളള പിണക്കം തുടരപ്പെടാം. പുതിയ ജോലിക്കായി നടത്തുന്ന ശ്രമം ഭാഗികമായി വിജയിക്കുന്നതാണ്. മാനസിക പിരിമുറുക്കം തെല്ല് കുറഞ്ഞേക്കും. കടം വാങ്ങുന്ന പ്രവണത നിയന്ത്രിക്കപ്പെടണം. സംഘടനയിൽ നയപരമായ നിലപാടെടുത്തേക്കും. വീടുവിട്ടു കഴിയുന്നവർക്ക് പ്രശ്നപരിഹാരത്തിന് വഴിതെളിയുന്നതാണ്. രഹസ്യബന്ധങ്ങൾ പരസ്യമാവുന്നതിൻ്റെ ജാള്യം അനുഭവപ്പെടും. പാദരോഗങ്ങൾ, ജീവിതശൈലീ രോഗങ്ങൾ ഇവ ഉപദ്രവിച്ചേക്കാം. ഏജൻസികൾ മുഖേന നേട്ടം പ്രതീക്ഷിക്കാനാവും.

Read More

• വാരഫലം, മൂലം മുതൽ രേവതി വരെ; March 24-March 30, 2024, Weekly Horoscope
• വാരഫലം, അശ്വതി മുതൽ ആയില്യം വരെ; March 24-March 30, 2024
• വാരഫലം, മകം മുതൽ തൃക്കേട്ട വരെ; March 24-March 30, 2024
• 2024 ഏപ്രിൽ മാസത്തിലെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: April 2024Horoscope
• WeeklyHoroscope(March 17– March 23, 2024): ഈ ആഴ്‌ച നിങ്ങൾക്കെങ്ങനെ?