അമ്മൂമ്മയുടെ ആ പ്രിയപ്പെട്ട സാരികൾ ഇനിയെനിക്ക് സ്വന്തം: സൗഭാഗ്യ, വീഡിയോ

മരണത്തിന്റെ കൈപ്പിടിച്ച് ഭൂമിയിൽ നിന്നും ഓരോ മനുഷ്യരും വിട പറയുമ്പോൾ, അവർ സ്നേഹത്തോടെ വാങ്ങി സൂക്ഷിച്ച വസ്തുക്കളും വസ്ത്രങ്ങളുമെല്ലാം അനാഥമാകുകയാണ്. അവരുടെ പ്രിയപ്പെട്ടവർ ചിലപ്പോൾ, വിട പറഞ്ഞവരുടെ അവസാന ഓർമയെന്നവണ്ണം അവയെ ജീവിതത്തോട് ചേർത്തുപിടിക്കും. അത്തരത്തിൽ ഏറെ പ്രിയപ്പെട്ടൊരാളുടെ ഓർമകളെ കുറിച്ചുള്ള ഒരു വീഡിയോ ആണ് ഇപ്പോൾ ശ്രദ്ധ കവരുന്നത്. 

നർത്തകിയും സോഷ്യൽ മീഡിയ താരവുമായ സൗഭാഗ്യ വെങ്കിടേഷ് ആണ് വീഡിയോ പങ്കുവച്ചത്. ഡിസംബർ ഒന്നിനായിരുന്നു അഭിനേത്രിയും സംഗീതഞ്ജയും സൗഭാഗ്യയുടെ മുത്തശ്ശിയുമായ സുബ്ബലക്ഷ്മി വിടവാങ്ങിയത്.  

അമ്മൂമ്മയുടെ അമൂല്യമായ സാരി കളക്ഷൻ പരിചയപ്പെടുത്തുകയാണ് സൗഭാഗ്യ വീഡിയോയിൽ. വിശേഷാവസരങ്ങളിൽ അമ്മൂമ്മ ധരിച്ചിരുന്ന പല സാരികളെയും അതിനു പിന്നിലെ ഓർമകൾ പങ്കിട്ട് പരിചയപ്പെടുത്തുകയാണ് സൗഭാഗ്യ. 

തിരുവനന്തപുരം സ്വദേശിനിയായ സുബ്ബലക്ഷ്മി കുട്ടിക്കാലത്ത് തന്നെ സംഗീതം പരിശീലിച്ചിരുന്നു. ജവഹർ ബാലഭവനിൽ ഏകദേശം 27 വർഷക്കാലം സംഗീതാധ്യാപികയായി ജോലി നോക്കി. ആകാശവാണിയിലും പ്രവർത്തിച്ചിരുന്നു. ജോലിയിൽ നിന്ന് റിട്ടയർ ചെയ്ത ശേഷം ഹോർലിക്സിന്റെ ഒരു പരസ്യചിത്രത്തിലൂടെയാണ് ക്യാമറയുടെ മുന്നിലെത്തുന്നത്. 

നർത്തകിയും അഭിനേത്രിയുമായ മകൾ താരാകല്യാണിനൊപ്പം ടെലിവിഷൻ പരമ്പരയുടെ ചിത്രീകരണ സെറ്റിൽ എത്തിയപ്പോൾ നടൻ സിദ്ധിക്കിനെ പരിചയപ്പെട്ടു, അതാണ് നന്ദനം സിനിമയിലേക്ക് എത്തിച്ചേരാൻ കാരണമായത്. തുടർന്ന് ഏറെ സിനിമകളിൽ മുത്തശ്ശിയായും ഹാസ്യരസപ്രധാനമായ വേഷങ്ങളും അവതരിപ്പിച്ചു. കല്യാണരാമൻ, പാണ്ടിപ്പട, നന്ദനം, രാപ്പകൽ എന്നിവയെല്ലാം ശ്രദ്ധേയ ചിത്രങ്ങളാണ്. 'മേരിക്കുണ്ടൊരു കുഞ്ഞാട്' എന്ന ചിത്രത്തിലെ ഗാനം ആലപിച്ച് ചലച്ചിത്ര പിന്നണി ഗാനരംഗത്തും തുടക്കമിട്ടിരുന്നു.  ഇപ്പോള്‍ മലയാളം കടന്നു ബോളിവുഡില്‍ വരെ എത്തിയിട്ടുണ്ട് സുബ്ബലക്ഷ്മിയമ്മ. അകാലത്തില്‍ അന്തരിച്ച യുവതാരം സുശാന്ത് സിങ് രജ്‌പുത് നായകനായ 'ദിൽ ബെച്ചാര' എന്ന ചിത്രത്തിലൂടെയായിരുന്നു സുബ്ബലക്ഷ്മിയമ്മയുടെ ഹിന്ദി അരങ്ങേറ്റം.

Read More Entertainment Stories Here

• അടുത്ത ജന്മം ഷംന കാസിമിന്റെ മകനായി ജനിക്കണം: മിഷ്‌കിൻ
• ഇങ്ങനെയുമുണ്ടോ ഒരു പപ്പാ വിളി?; 'അനിമലി'നെ ട്രോളി ട്രോളന്മാർ
• ജമന്തിയുടെ ശബ്ദമായത് പാർവ്വതി
• ബാലേട്ടനും മക്കളും വർഷങ്ങൾക്കു ശേഷം വീണ്ടും കണ്ടപ്പോൾ; വീഡിയോ
• ഇതിപ്പോ ഒരു ഹോളി ആഘോഷിച്ച പോലുണ്ടല്ലോ: വൈറലായി ജിപി- ഗോപിക ഹൽദി വീഡിയോ
• ഏറിയാൽ 2000 രൂപ, അതിലും വിലയുള്ളത് ഒന്നും വാങ്ങാറില്ല: സായ് പല്ലവി