ലാ നിന പ്രതിഭാസം വരുന്നു; ഓഗസ്റ്റ്, സെപ്റ്റംബർ മാസങ്ങളിൽ പതിവിൽ കൂടുതൽ മഴയ്ക്ക് സാധ്യത

തിരുവനന്തപുരം: ഇത്തവണ ഇടവപ്പാതിയിൽ പതിവിലും കൂടുതൽ മഴ ലഭിക്കുമെന്നാണ് കേന്ദ്ര കാലാവസ്ഥാ വകുപ്പ് നൽകുന്ന വിവരം. ജൂലൈയിൽ രൂപമെടുക്കുന്ന ലാ നിന പ്രതിഭാസത്തെ തുടർന്ന് ഓഗസ്റ്റ്, സെപ്റ്റംബർ മാസങ്ങളിൽ പതിവിൽ കൂടുതൽ മഴ ലഭിക്കുമെന്നാണ് കേന്ദ്ര കാലാവസ്ഥാ വകുപ്പ് നൽകുന്ന സൂചന. കനത്ത മഴയുടെ ഫലമായി ചില പ്രദേശങ്ങളിൽ നദീതീരങ്ങളിലും നഗരങ്ങളിലും വെള്ളപ്പൊക്കം, മണ്ണിടിച്ചിൽ, ഉരുൾപൊട്ടൽ, മേഘവിസ്ഫോടനം എന്നിവ ഉണ്ടാകാമെന്നും മുന്നറിയിപ്പുണ്ട്.

ലാ നിന പ്രതിഭാസം സമുദ്രോപരിതലത്തെ തണുപ്പിക്കുകയാണ് ചെയ്യുന്നത്. ചൂടുവെള്ളം തെക്കേ അമേരിക്കൻ ഭാ​ഗത്ത് നിന്ന് ഓസ്ട്രേലിയൻ ഭാ​ഗത്തേക്ക് ഒഴുകും. ഇത് ഇന്ത്യയിൽ കൂടുതൽ മഴയ്‌ക്ക് കാരണമാകും. ഇതിന് മുമ്പ് 2020-2023ലാണ് ഈ നൂറ്റാണ്ടിലെ ഏറ്റവും ദൈർഘ്യമേറിയ ലാ നിന പ്രതിഭാസം കണ്ടിരുന്നത്.

തെക്കുപടിഞ്ഞാറൻ കാലാവർഷത്തിൽ മഴ കുറയ്‌ക്കാൻ ഇടയാക്കുന്ന പസഫിക് സമുദ്രത്തിലെ എൽ നിനോ പ്രതിഭാസം ദുർബലമായെന്നും ഇതിന് നേർവിപരീതമായ ലാ നിന പ്രതിഭാസമാകും ഈ കാലവർഷക്കാലത്ത് സംഭവിക്കുകയെന്നും മുന്നറിയിപ്പിൽ‌ പറയുന്നു. ഇത്തവണ 106 ശതമാനത്തിലേറെ മഴയാണ് പ്രവചിച്ചിട്ടുള്ളത്.

ന്യൂട്രൽ എൽ നിനോ സതേൺ ഓസിലേഷൻ (ENSO) അവസ്ഥ എപ്പോൾ വേണമെങ്കിലും ഉയർന്നുവരുമെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) പറഞ്ഞു. ലാ നിനയുടെ വരവിന് മുന്നോടിയായി സെൻട്രൽ, മധ്യരേഖാ പസഫിക് സമുദ്രത്തിലെ സമുദ്ര താപനില തണുക്കുന്നുവെന്നാണ് റിപ്പോർട്ട്.  സമുദ്ര-അന്തരീക്ഷ ഇടപെടലുകളുടെ ഫലമായി സ്വാഭാവികമായി സംഭവിക്കുന്ന കാലാവസ്ഥാ പ്രതിഭാസമാണ് എൻസോ (ENSO). മധ്യ, കിഴക്കൻ ഉഷ്ണമേഖലാ പസഫിക് സമുദ്രത്തിലെ സമുദ്രോപരിതല താപനിലയെ അവ സ്വാധീനിക്കുന്നു.

ENSOയ്ക്ക് മൂന്ന് ഘട്ടങ്ങളുണ്ട്. എൽ നിനോയെ സൂചിപ്പിക്കുന്ന ഊഷ്മള സാഹചര്യങ്ങൾ, ലാ നിനയെ സൂചിപ്പിക്കുന്ന നിഷ്പക്ഷവും തണുത്തതുമായ അവസ്ഥകൾ. എൻസോ ആഗോള കാലാവസ്ഥയെ ബാധിക്കുകയും മഴ, ചൂട്, തണുത്ത തരംഗങ്ങൾ എന്നിവയുടെ രൂപത്തിൽ തീവ്രമായ കാലാവസ്ഥയെ പ്രേരിപ്പിക്കുകയും ചെയ്യുന്നു. ജൂണിൽ എൻസോ ന്യൂട്രൽ അവസ്ഥകൾ ഉയർന്നുവരുമെന്നും, ജൂലൈ, സെപ്തംബർ മാസങ്ങളിൽ അത് ലാ നിനയായി മാറുമെന്നും കേന്ദ്ര കാലാവസ്ഥാ വകുപ്പ് അറിയിച്ചു.

കേരളത്തിൽ തെക്കുപടിഞ്ഞാറൻ മൺസൂൺ എപ്പോൾ വേണമെങ്കിലും ആരംഭിക്കുമെന്ന് പ്രതീക്ഷിക്കുന്നതിനാൽ, നാല് മാസം നീണ്ടുനിൽക്കുന്ന പ്രധാന മഴക്കാലത്തിന് തുടക്കമായി കഴിഞ്ഞു. വരും മാസങ്ങളിൽ ലാ നിനയുടെ വികസനം ഈ വർഷം ഒരു നല്ല മഴക്കാല സീസണിനെക്കുറിച്ചുള്ള പ്രതീക്ഷകൾ ഉയർത്തുന്നുണ്ട്.

പസഫിക് സമുദ്രത്തിലെ എൽ നിനോ പ്രതിഭാസം ദുർബലമായെന്നും ഇതിന് നേർവിപരീതമായ ലാ നിന പ്രതിഭാസമാകും ഈ കാലവർഷക്കാലത്ത് സംഭവിക്കുകയെന്നും മുന്നറിയിപ്പിൽ‌ പറയുന്നു. ഇത്തവണ 106 ശതമാനത്തിലേറെ മഴയാണ് പ്രവചിച്ചിരിക്കുന്നത്. 

”മൺസൂൺ ന്യൂനമർദ സംവിധാനങ്ങളും, ഡിപ്രഷനും പോലെ മൺസൂൺ മഴയെ ബാധിക്കുന്ന മറ്റു പല ഘടകങ്ങളും ഉണ്ടെങ്കിലും, ലാ നിന പ്രധാന ഘടകങ്ങളിലൊന്നാണ്. ഒരു ലാ നിന വർഷത്തിൽ സാധാരണയിൽ കൂടുതൽ മഴ പ്രതീക്ഷിക്കാം. ഈ വർഷം, ലാ നിന സാഹചര്യങ്ങൾ കാരണം ഓഗസ്റ്റ്, സെപ്റ്റംബർ മാസങ്ങളിൽ കൂടുതൽ മഴ ലഭിച്ചേക്കാം, ”ഐഎംഡി ഡയറക്ടർ ജനറൽ മൃത്യുഞ്ജയ് മൊഹപത്ര പറഞ്ഞു.

കേന്ദ്ര കാലാവസ്ഥാ വകുപ്പിന്റെ റിപ്പോർട്ട് പ്രകാരം, ഇത്തവണ മൺസൂണിൽ തെക്കൻ ഉപദ്വീപിലും മധ്യ ഇന്ത്യയിലും സാധാരണ പോലെ മഴ ലഭിക്കുമെന്ന് പ്രതീക്ഷിക്കുന്നു. വടക്കുപടിഞ്ഞാറൻ ഇന്ത്യയിലും സാധാരണ പോലെ മഴ ലഭിക്കും, അതേസമയം കിഴക്കും വടക്കുകിഴക്കും ഇന്ത്യയിൽ ജൂൺ-സെപ്തംബർ കാലയളവിൽ ശരാശരിയിൽ താഴെ മാത്രമെ മഴ ലഭിക്കൂ.

ലാ നിന വർഷങ്ങളിൽ ചുഴലിക്കാറ്റ് സാധ്യത സാധാരണയേക്കാൾ കൂടുതലാണെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജിയിലെ (പൂനെ) ശാസ്ത്രജ്ഞൻ റോക്സി മാത്യു കോൾ പറഞ്ഞു. “ലാ നിന പൊതുവെ ശക്തമായ മൺസൂൺ കാറ്റ് പ്രവാഹത്തെ പിന്തുണയ്ക്കുന്നു. ശക്തമായ മൺസൂൺ പ്രവാഹത്തിന് മൺസൂൺ ഡിപ്രഷനുകൾക്ക് ഈർപ്പം നൽകാനും കൂടുതൽ മഴ നൽകാനും കഴിയും. എന്നിരുന്നാലും, ഒരു ലാ നിന വർഷത്തിൽ മൺസൂൺ ഡിപ്രഷനുകളുടെ എണ്ണം വ്യത്യസ്തമാണോ എന്നതിനെക്കുറിച്ച് വ്യക്തമായ സൂചനകളൊന്നുമില്ല," റോക്സി മാത്യു പറഞ്ഞു.

"ലാ നിന വർഷങ്ങളിൽ ചുഴലിക്കാറ്റ് സാധ്യത സാധാരണയേക്കാൾ കൂടുതലാണ്. അതിനാൽ സൈക്ലോജെനിസിസിന് അനുകൂലമായി പ്രവർത്തിക്കാം. ബംഗാൾ ഉൾക്കടലും അറബിക്കടലും ഉൾപ്പെടുന്ന വടക്കേ ഇന്ത്യൻ മഹാസമുദ്രത്തിൽ ലാ നിന അവസ്ഥകൾ സമുദ്രത്തിലെ താപത്തിൻ്റെ അളവ് വർദ്ധിപ്പിക്കുന്നു. ലാ നിന സമയത്ത് അനുകൂലമായ സാഹചര്യങ്ങൾക്കൊപ്പം, വടക്കേ ഇന്ത്യൻ മഹാസമുദ്രത്തിലെ താപനില അതിവേഗം വർദ്ധിക്കും. ഊഷ്മളമായ സമുദ്രാവസ്ഥകളോടുള്ള പ്രതികരണമായി വളരെ കഠിനമായ പല ചുഴലിക്കാറ്റുകളും അതിവേഗം തീവ്രത പ്രാപിക്കും. ഇത് സ്ഥിരമായ ചൂടും ഈർപ്പവും നൽകും,” കോൾ കൂട്ടിച്ചേർത്തു.

Read More

• 'ഏകാധിപത്യം,' പഞ്ചാബ് സർക്കാരിനെ താഴെയിറക്കുമെന്ന് അമിത് ഷാ ഭീഷണിപ്പെടുത്തി: അരവിന്ദ് കെജ്രിവാൾ
• ഇൻഡിഗോ വിമാനത്തിൽ ബോംബ് ഭീഷണി, യാത്രക്കാരെ ഒഴിപ്പിച്ചു
• പ്രജ്വല്‍ രേവണ്ണ നാട്ടിലേക്ക്; ഉടൻ കീഴടങ്ങുമെന്ന് വീഡിയോ സന്ദേശം
• അടുത്ത സർക്കാർ രൂപീകരിക്കും; ഇതിനകം തന്നെ ഭൂരിപക്ഷം സീറ്റുകൾ ഉറപ്പിച്ച് കഴിഞ്ഞെന്ന് അമിത് ഷാ
• അഗ്നിഗോളമായി രാജ്ക്കോട്ടിലെ ഗെയിം സെന്റർ; കുരുന്നുകൾ ഉൾപ്പടെ വെന്തു മരിച്ചത് 27 പേർ
• 'ഇവിടത്തെ കാര്യം നോക്കാൻ ഞങ്ങൾക്കറിയാം'; പാക്കിസ്ഥാൻ നേതാവിന് കേജ്രിവാളിന്റെ മറുപടി
• പോർഷെ അപകടം: ഡ്രൈവറെ തട്ടിക്കൊണ്ടു പോയി തടവിൽ പാർപ്പിച്ചു; കൗമാരക്കാരന്റെ മുത്തച്ഛൻ അറസ്റ്റിൽ