Weekly Horoscope Aug 24-Aug 30: വാരഫലം, അശ്വതി മുതൽ രേവതിവരെ

Weekly Horoscope: ആദിത്യൻ ചിങ്ങം രാശിയിൽ മകം ഞാറ്റുവേലയിൽ സഞ്ചരിക്കുന്നു. ചന്ദ്രൻ വെളുത്ത പ്രഥമ മുതൽ സപ്തമി വരെ തിഥികളിലാണ്. പ്രോഷ്ഠപദമാസത്തിൻ്റെ ആരംഭമാണ് ആഗസ്റ്റ് 24 ന് ഞായറാഴ്ച. പൂരം മുതൽ വിശാഖം വരെയുള്ള നക്ഷത്രങ്ങളിലൂടെ ഈയാഴ്ച ചന്ദ്രൻ കടന്നുപോകുന്നു. ചൊവ്വ കന്നിരാശിയിൽ അത്തം നക്ഷത്രത്തിലാണ്. ബുധൻ കർക്കടകത്തിലുണ്ട്. ആഗസ്റ്റ് 30 ന് ചിങ്ങം രാശിയിൽ പ്രവേശിക്കുന്നു. ആയില്യം നക്ഷത്രത്തിലാണ് ബുധൻ. ശുക്രൻ കർക്കടകം രാശിയിൽ പൂയം നക്ഷത്രത്തിലൂടെ സഞ്ചരിക്കുന്നു.

ശനി മീനംരാശി ഉത്രട്ടാതിയിൽ വക്രഗതി തുടരുകയാണ്. വ്യാഴം മിഥുനം രാശിയിൽ പുണർതത്തിലുണ്ട്. രാഹു കുംഭത്തിൽ പൂരൂരുട്ടാതിയിലും കേതു ചിങ്ങത്തിൽ പൂരത്തിലും പിൻഗതി തുടരുകയാണ്. ഈ ഗ്രഹനിലയെ അവലംബിച്ച് അശ്വതി മുതൽ രേവതി വരെയുള്ള നാളുകാരുടെ വാരഫലം ഇവിടെ അവതരിപ്പിക്കുന്നു.

അശ്വതി

വാരാദ്യ ദിവസങ്ങളിൽ ഉന്നമനേച്ഛ കുറയാം. പല കാര്യങ്ങളും ചെയ്യാൻ കഴിയുമെങ്കിലും ആലസ്യത്താൽ പിന്നത്തേക്ക് മാറ്റിവെക്കുന്നതാണ്. ചുമതലകളിൽ പരാങ്മുഖരാവും. ചൊവ്വാഴ്ച മുതൽ ഉത്തരവാദിത്വങ്ങളിൽ ജാഗരൂകരാവും. ഉചിത തീരുമാനങ്ങൾ കൈക്കൊള്ളും. അവ വിട്ടുവീഴ്ചയില്ലാതെ നടപ്പിലാക്കുവാനും കഴിയുന്നതാണ്. സ്വതന്ത്ര ചുമതലകളിൽ നന്നായി ശോഭിക്കും. ഇടപാടുകൾ ഗുണകരമാവും. മനസ്സിനെ മസൃണമാക്കുന്ന അനുഭവങ്ങൾ ഉണ്ടായേക്കും. പ്രണയികൾ ഭാവികാര്യത്തിൽ ശുഭപ്രതീക്ഷ പുലർത്തുന്നതാണ്. ഭോഗസുഖമുണ്ടാവും.

Also Read:ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

ഭരണി

കഴിവിനനുസരിച്ച് ഉയരാനും സന്ദർഭത്തിനനുസരിച്ച് പ്രതികരിക്കാനും കഴിഞ്ഞില്ലല്ലോ എന്ന ഖേദമുണ്ടാവാം. ഞായറും തിങ്കളും പലതരം അസൗകര്യങ്ങൾ വരുന്നതാണ്. ചൊവ്വ മുതൽ ഊർജ്ജസ്വലത കൈവന്നേക്കും. സ്വദൗത്യങ്ങളിൽ ആബദ്ധരാവും. അധ്വാനഭാരത്തെക്കുറിച്ച് ആകുലപ്പെടുകയില്ല. ചെലവ് അമിതമാവാതിരിക്കാൻ സാധിക്കും. വരും ദിവസങ്ങളെക്കുറിച്ച് വ്യക്തമായ ധാരണ പുലർത്തിക്കൊണ്ട് കർമ്മരംഗത്ത് വർത്തിക്കുന്നതാണ്. അനുരാഗികൾക്ക് ആഹ്ളാദ സന്ദർഭങ്ങൾ സംജാതമാകും. ആരോഗ്യകാര്യങ്ങളിൽ ശ്രദ്ധയുണ്ടാവണം.

കാർത്തിക

ഗുണാനുഭവങ്ങൾ കുറയില്ല. എന്നാൽ എല്ലാക്കാര്യത്തിലും കരുതൽ വേണംതാനും. വാഗ്ദാനങ്ങൾ പാലിക്കപ്പെടുന്നത് ആത്മവിശ്വാസമുയർത്തും. ബിസിനസ്സ് കാര്യങ്ങളിൽ  പുരോഗതി വന്നെത്തും. വിപണന തന്ത്രങ്ങൾ ഫലവത്തായേക്കും. കൂട്ടുകാരുടെ നിർദ്ദേശങ്ങൾ പ്രാവർത്തികമാക്കാൻ സാധിക്കുന്നതാണ്. ഔദ്യോഗിക കാര്യങ്ങളിൽ തൃപ്തികുറയാനിടയുണ്ട്. സ്ഥലംമാറ്റത്തിൻ്റെ ഉത്തരവ് കൈയിൽ കിട്ടാത്തതിനാൽ ആശങ്കയുണ്ടായേക്കും.വാഗ്വാദങ്ങൾക്ക് മുതിരരുത്. ശത്രുക്കളെ മൗനം കൊണ്ട് നിരാകരിക്കാനാവും എന്നത് ഓർമ്മിക്കണം.

രോഹിണി

ഉദ്യോഗസ്ഥർക്ക് അധികജോലിഭാരം ഉണ്ടാവും. അലച്ചിൽ മൂലം ദേഹക്ഷീണവും മടുപ്പും അനുഭവപ്പെടാം. തൊഴിലിടത്തിൽ സഹകരണം കുറയുന്നതാണ്. പുതിയ കാര്യങ്ങൾ അവതരിപ്പിക്കുന്നത് ചിലരുടെ എതിർപ്പിന് കാരണമാവാം. സ്വാശ്രയ ബിസിനസ്സുകാർ ആഘോഷങ്ങളെ മുന്നിൽക്കണ്ട് ഒരുക്കം തുടങ്ങുന്നതാണ്. ഏജൻസി പ്രവർത്തനം മോശമാവില്ല. സാമ്പത്തികം കൈകാരം ചെയ്യുന്നതിൽ വിജയം വരിക്കുന്നതായിരിക്കും. വിരുന്നുകളിൽ / മംഗളകർമ്മങ്ങളിൽ സംബന്ധിക്കുന്നതാണ്. ഞായർ, തിങ്കൾ, വെള്ളി ദിവസങ്ങൾക്ക് മേന്മ കുറയാം.

മകയിരം

കാര്യാലോചനകളിൽ ക്ഷണിക്കപ്പെടും. ഉറച്ച നിലപാടുകൾ അറിയിക്കാൻ മടിക്കില്ല. പുതിയ അവസരങ്ങൾ പ്രതീക്ഷിക്കുന്നവർക്ക് അർഹമായ പദവി/ ജോലി ലഭിക്കാം. ഗാർഹികമായി അസംതൃപ്തികൾ വരാവുന്നതാണ്. എന്നാൽ അനുരഞ്ജനം സ്വീകരിച്ചേക്കും. വാഹനം ഉപയോഗിക്കുന്നതിൽ ശ്രദ്ധയുണ്ടാവണം. അമിതചിന്ത പ്രവൃത്തിയിൽ പരാങ്മുഖത്വമരുളും. പഠനത്തിൽ ഏകാഗ്രത കുറയാനിടയുണ്ട്. അപ്രസക്ത കാര്യങ്ങൾക്കായി ധനവും ഊർജ്ജവും ചെലവാകുന്നതാണ്. ബന്ധുവിൻ്റെ വിവാഹത്തിന് സാമ്പത്തിക സഹായം സ്വമേധയാ നൽകും.

തിരുവാതിര

സഹജമായ സിദ്ധികൾ ചിലപ്പോൾ തിരിച്ചറിയാനായേക്കില്ല. അഥവാ അവയ്ക്ക് സ്വീകാര്യത കിട്ടാതെ വരാം. പരാശ്രയത്വം ആവശ്യമാവുന്ന ഘട്ടങ്ങളുണ്ടാവും.കടം കൊടുത്ത തുകയുടെ ചെറിയൊരു ഭാഗം മടക്കിക്കിട്ടാം. ബന്ധുക്കളുടെ പ്രശ്നങ്ങളിൽ നിന്നും മാറിനിൽക്കുക അഭികാമ്യം. വ്യവഹാരങ്ങൾ തീരാത്തതിൽ വിഷമമുണ്ടാവും. ബുധശുക്രന്മാർ രണ്ടാം ഭാവത്തിൽ സഞ്ചരിക്കുകയാൽ വചോവിലാസം കൈവരുന്നതാണ്. എഴുത്തുകാർക്കത് ഗുണപ്രദമാവും. കുടുംബാംഗങ്ങളുമൊത്ത് വിനോദയാത്ര ആസൂത്രണം ചെയ്യും. വാരാദ്യം കൂടുതൽ ഗുണകരമായിരിക്കും.

പുണർതം

പ്രതീക്ഷിച്ച കാര്യങ്ങൾ ഒരുവിധം നടന്നുകിട്ടിയേക്കും. കർമ്മരംഗത്ത് കൂടുതൽ സക്രിയരാവുന്നതാണ്. സഹപ്രവർത്തകരുടെ സഹകരണം കുറയില്ല. എന്നാൽ ഔദ്യോഗികമായ ദൗത്യകർമ്മങ്ങൾ രഹസ്യമാക്കി വെക്കുകയാവും ഉചിതം. ആവശ്യങ്ങൾക്കായുള്ള പ്രക്ഷോഭങ്ങളിൽ നിന്നും വിട്ടുനിൽക്കാനിടയുണ്ട്. തന്മൂലം ചിലരുടെ വിരോധം സമ്പാദിച്ചേക്കാം. വ്യാപാരരംഗത്തെ മാന്ദ്യത്തിന് ഒട്ടൊക്കെ മാറ്റമുണ്ടാവുന്നതാണ്. ഉപഭോക്താക്കളെ ആകർഷിക്കുവാനുള്ള പരസ്യങ്ങൾ ആവിഷ്ക്കരിക്കേണ്ടതായി വന്നേക്കും. പുതിയ തലമുറയുടെ കാര്യത്തിൽ ആശയക്കുഴപ്പം തുടരപ്പെടാം. സാഹസങ്ങൾ ഒഴിവാക്കുക തന്നെ വേണം. വാഗ്വിലാസം ആദരണീയമാവും.

പൂയം

സ്വാശ്രയശീലം അഭിനന്ദിക്കപ്പെടും. സംഘടനയുടെ വാർഷികാഘോഷങ്ങളുടെ തയ്യാറെടുപ്പുകൾ വിലയിരുത്തുന്നതാണ്. പുതിയ സാങ്കേതിക വിഷയങ്ങൾ അറിയാത്തതിൽ വിഷമം തോന്നും. ധനപരമായി ശരാശരിക്കാലമാണ്. പഠനം, വിവാഹസംഭാവന, ക്ഷേത്രാടനം എന്നിങ്ങനെ സൽകാര്യങ്ങൾക്ക് ചെലവേറുന്നതായിരിക്കും. ഗൃഹത്തിലെ വൃദ്ധജനങ്ങളുടെ ആരോഗ്യപരിരക്ഷയിൽ ജാഗ്രത കുറയരുത്. ഭൂമിയിൽ നിന്നും ആദായമുണ്ടാവും. സഹോദരരുടെ സ്നേഹവും പിന്തുണയും അനുഭവിച്ചറിയും.  പ്രണയികൾക്കിടയിൽ പിണക്കങ്ങൾ ഉടലെടുക്കാം.

ആയില്യം

ഗൃഹനിർമ്മാണം പുരോഗമിക്കും. എന്നാൽ അനുവദിച്ച പ്ലാനിൽ മാറ്റം വരുത്താനിടയുണ്ട്. പലകാര്യങ്ങളിൽ സുഹൃത്തുക്കളുടെ അഭിപ്രായം ആരായുമെങ്കിലും അവ നടപ്പിലാക്കില്ല.പണയസ്വർണം തിരിച്ചെടുക്കാൻ സാധിച്ചേക്കും. വ്യാപാരത്തിൽ നിന്നും ആദായം വർദ്ധിക്കുന്നതാണ്. മകൻ്റെ ജോലിക്കാര്യത്തിലെ അനിശ്ചിതത്വം വിഷമിപ്പിക്കും. ജന്മത്തിലെ ശുക്രൻ സുഖഭോഗങ്ങളുടെതായ സാഹചര്യം രൂപപ്പെടുത്താം. പിതാവിൻ്റെ ആരോഗ്യത്തിൽ ശ്രദ്ധ വേണം. കരാർ പണികർ ചെയ്യുന്നവർക്ക് അദ്ധ്വാനം കൂടുന്നതായിരിക്കും.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

മകം

ജന്മരാശിയിലൂടെ ഒന്നിലധികം ഗ്രഹങ്ങൾ കടന്നുപോകുന്നതിനാൽ സ്വൈരം കുറയും. കർമ്മനിരതത്വം ഉണ്ടാവും. എന്നാൽ വേണ്ടത്ര ശ്രദ്ധയുണ്ടാവില്ല.  ലക്ഷ്യത്തിലെത്താൻ ആവർത്തിത ശ്രമം ആവശ്യമാവുന്നതാണ്. വാക്കുകൾ പരുഷങ്ങളാവാൻ സാധ്യത കാണുന്നു. സ്വന്തം തീരുമാനങ്ങൾ ചിലപ്പോൾ തിരുത്തുകയാണ് അഭികാമ്യമെന്നു വന്നാലും അതിനുമുതിരാതെ പിടിവാശികാട്ടും. ഓൺലൈൻ ബിസിനസ്സിൽ ലാഭം കിട്ടിത്തുടങ്ങുന്നതാണ്. താത്കാലിക ജോലിക്ക് അവസരങ്ങൾ കാണുന്നു.  അനുരാഗികൾക്ക് വിഘ്നങ്ങളെ നേരിടേണ്ടി വരാം.  ആടയാഭരണാദികൾ വാങ്ങുന്നതാണ്.

പൂരം

പ്രാരബ്ധങ്ങളിൽ വലയുന്നതാണ്. പലതിനും ഉത്തരം കിട്ടാതെ വിഷമിക്കും. ആരംഭിച്ച കാര്യങ്ങളിൽ വിജയിക്കുക ദുഷ്കരമായി അനുഭവപ്പെടും. വാഗ്ദാനലംഘനങ്ങൾ മനസ്സിനെ കലുഷമാക്കാം. പഠിതാക്കൾക്ക് ഏകാഗ്രത കുറഞ്ഞേക്കും. പ്രോജക്ടുകൾ പൂർത്തിയാക്കാത്തതിനാൽ അധ്യാപകരുടെ ശകാരത്തിന് പാത്രമാവും. വാക്കുകൾക്ക് നിയന്ത്രണം നഷ്ടപ്പെടാം. കരുതൽ വേണം. ഇലക്ട്രോണിക് ഉല്പന്നം വാങ്ങുന്നതായിരിക്കും. രോഗികൾക്ക് അല്പം ആശ്വാസമുണ്ടാവും. വിദേശത്തുനിന്നും അനുകൂല വാർത്ത കേൾക്കുന്നതാണ്.

ഉത്രം

ഉന്മേഷഭാവം കുറയാം. ഇടയ്ക്ക് ചിന്താപരത ഏറും. പ്രായോഗികതയെക്കാൾ ആദർശത്തെ സ്നേഹിക്കുന്നതാണ്.ധനക്ലേശം വാരാദ്യത്തെക്കാൾ പിന്നീട് കുറയും. ക്ഷേത്രകാര്യങ്ങൾക്ക് സമയം കണ്ടെത്തുന്നതായിരിക്കും. കുടുംബത്തിൻ്റെ ആവശ്യങ്ങൾ നിറവേറ്റുന്നതിൽ ഉത്സുകതയുണ്ടാവും. മനോരഥങ്ങൾ പകുതി വഴിയോളം ചെല്ലാം. സ്വന്തം സ്ഥാപനത്തിൻ്റെ നടത്തിപ്പിന് കഴിവുള്ളവരെ അന്വേഷിക്കും. ജന്മരാശിയിലെ പാപഗ്രഹങ്ങൾ ഇടക്കിടെ പലായനചിന്തയുണ്ടാക്കും. ഭാവിയിലെ രാഷ്ട്രീയ മത്സരത്തിന് ഒരുങ്ങാൻ നിർദ്ദേശം ലഭിക്കാം.

അത്തം

പന്ത്രണ്ടിലും ജന്മത്തിലും രണ്ടിലുമായി ചന്ദ്രൻ സഞ്ചരിക്കുകയാൽ ഈയാഴ്ച സമ്മിശ്രഫലങ്ങളാവും. ചെലവ് കൂടാനിടയുണ്ട്. യാത്രകളും സാധ്യതയാണ്. തീരുമാനങ്ങൾ ശ്രദ്ധാപൂർവ്വം  കൈക്കൊള്ളേണ്ടതുണ്ട്. രാഷ്ട്രീയക്കാർക്ക് തിരിച്ചടികളുണ്ടാവുന്നതാണ്.  ചൊവ്വ, ബുധൻ, വ്യാഴം ദിവസങ്ങൾക്ക് ശുഭത്വം ഭവിച്ചേക്കും. വാഗ്ദാനങ്ങൾ പാലിക്കാൻ കഴിയുന്നതായിരിക്കും. തടസ്സപ്പെട്ട കാര്യങ്ങൾ പൂർത്തിയാക്കുന്നതാണ്. ധനസമാഹരണത്തിന് അവസരം വരും. സുഹൃൽ സമാഗമത്തിന് സാഹചര്യമുണ്ടാവും. ആരോഗ്യപരമായി സ്വസ്ഥത അനുഭവപ്പെടാം.

ചിത്തിര

പ്രതീക്ഷിച്ച ധനം വന്നെത്തും. കച്ചവടം മെച്ചപ്പെടുന്നതാണ്. ഗവേഷകരുടെ അന്വേഷണാത്മകത ഫലം കാണും.  കലാപ്രവർത്തനത്തിൽ അർഹിക്കുന്ന പ്രശംസ ലഭിക്കും. നിക്ഷേപങ്ങളിൽ നിന്നുള്ള ധനാഗമം  ആവശ്യത്തിന് ഉതകുന്നതായിരിക്കും. അന്യനാട്ടിലെ ബിസിനസ്സ് പുഷ്ടിപ്പെടുത്താനായി പാർട്ണർമാരെ ക്ഷണിക്കുവാൻ തീരുമാനിച്ചേക്കും. ചൊവ്വ, ബുധൻ ദിവസങ്ങളിൽ വ്യയാധിക്യം വരാം. യാത്രാക്ലേശത്തിനും സാധ്യതയുണ്ട്. തുടർന്നുള്ള ദിവസങ്ങളിൽ ഗൃഹസൗഖ്യം ഭവിക്കും. പ്രണയികൾക്കിടയിലെ പിണക്കം ശുഭപര്യവസായിയാവും.

Also Read: സെപ്റ്റംബർ മാസഫലം, അശ്വതി മുതൽ രേവതി വരെ

ചോതി

സ്വന്തം ശക്തിയിലും കഴിവിലും വിശ്വാസമേറുന്നതാണ്. ചെറുതടസ്സങ്ങളോ പിന്തിരിപ്പിക്കലുകളോ വരാം. എന്നാൽ തടസ്സങ്ങളിൽ ചഞ്ചലപ്പെടില്ല. ബിസിനസ്സ് രംഗത്തെ വിപണിയുടെ ആവശ്യങ്ങളെ തൃപ്തിപ്പെടുത്താൻ പര്യാപ്തമാക്കി മാറ്റും. ഭാഗ്യാനുഭവങ്ങൾ കുറയില്ല. സന്താനങ്ങളുടെ കാര്യത്തിൽ നല്ല ജാഗ്രതയുണ്ടാവണം. പുതുതലമുറയുടെ നിർബന്ധശീലങ്ങൾ മനപ്രയാസത്തിന് കാരണമാകാം. സർക്കാരിൽ നിന്നും കിട്ടേണ്ട ആനുകൂല്യങ്ങൾ കൈവശമെത്തിച്ചേരും. രോഗി പരിചരണത്തിന് സമയം കണ്ടെത്തുന്നതാണ്. ചൊവ്വ, ബുധൻ ദിവസങ്ങളിലെ ശുഭാരംഭങ്ങൾ ഒഴിവാക്കണം.

വിശാഖം

വ്യത്യസ്ത മേഖലകളിൽ കഴിവും താല്പര്യവും പുലർത്തും. തന്മൂലം ചിലപ്പോൾ ഏകാഗ്രത കുറയുന്നതായി തോന്നാം. ഒപ്പമുള്ളവരുടെ പ്രശ്നങ്ങൾ പരിഹരിക്കാൻ ആത്മാർത്ഥശ്രമം നടത്തുന്നതാണ്. തൊഴിലിടത്തിൽ പദവിക്കയറ്റം പ്രതീക്ഷിക്കും. എന്നാൽ കാത്തിരിപ്പ് തുടരേണ്ടി വരും. വിദ്യാർത്ഥികൾക്ക് ശ്രദ്ധാലുക്കളാവാൻ സാധിക്കുന്നതാണ്. ദാമ്പത്യരംഗം സംതൃപ്തിയേകും. അവിവാഹിതരുടെ വിവാഹാലോചനകളിൽ തടസ്സങ്ങൾ വരാം. പന്ത്രണ്ടാം ഭാവത്തിൽ ചൊവ്വ സ്ഥിതിചെയ്യുകയാൽ വാഹനയാത്രയിൽ കൂടുതൽ ശ്രദ്ധയുണ്ടാവണം.

അനിഴം

പരിശ്രമങ്ങൾ ഫലവത്താകുന്ന സന്ദർഭമാണ്. തൊഴിൽ തേടുന്നവർക്ക് താത്കാലികമായിട്ടെങ്കിലും ജോലി ലഭിക്കും. വാക്കുകൾ വിലമതിക്കപ്പെടുന്നതാണ്. സമൂഹമധ്യത്തിൽ സ്വീകാര്യതയുണ്ടാവും. സ്വാശ്രയ തൊഴിലിൽ മുൻപത്തെക്കാൾ മെച്ചം വന്നെത്തുന്നതായിരിക്കും. ധനപരമായി ഉയർച്ച പ്രതീക്ഷിക്കാം. സാങ്കേതിക കാര്യങ്ങൾ പഠിച്ചറിയാനുള്ള ഔൽസുക്യമുണ്ടാവും. സ്വായത്തമായ കഴിവുകളിൽ അഭിമാനം തോന്നുന്നതാണ്. ഗൃഹനിർമ്മാണത്തിൽ ചില തടസ്സങ്ങൾ വന്നുകൊണ്ടിരിക്കും. 
തീർത്ഥാടനത്തിലൂടെ മനസ്സന്തോഷം നേടുന്നതാണ്.

തൃക്കേട്ട

പത്താംഭാവത്തിലെ രവിചന്ദ്രയോഗവും പതിനൊന്നിലെ ശശിമംഗളയോഗവും ഗുണകരമായി ഭവിക്കും. തൊഴിൽ ക്ലേശങ്ങൾക്ക് പരിഹാരമുണ്ടായി തുടങ്ങുന്നതാണ്. അന്വേഷണങ്ങൾ വ്യർത്ഥമാവുകയില്ല. കുടുംബാന്തരീക്ഷം കൂടുതൽ ഊർജ്ജദായകമാവും. മുതിർന്നവരുടെ മാനസിക പിന്തുണ പ്രോൽസാഹനമേകും. ബിസിനസ്സ് യാത്രകൾ ഫലപ്രദമായി അനുഭവപ്പെടും. ഭാവനാത്മകമായ കാര്യങ്ങളിൽ നല്ലഫലം പ്രതീക്ഷിക്കാവുന്ന വാരമാണ്. 
വസ്തു / ഭൂമി ഇവയിൽ നിന്നും ആദായം വരുന്നതാണ്. പാരമ്പര്യത്തിൻ്റെ ശീലാചാരങ്ങളെ പുറമേ എതിർത്താലും മാനസികമായി വ്യതിചലനം ഇഷ്ടപ്പെടുകയില്ല.

Also Read: ഈ ആഴ്‌ച നിങ്ങൾക്കെങ്ങനെ?

മൂലം

ചന്ദ്രസഞ്ചാരം അനുകൂലരാശികളിലൂടെയാകയാൽ ഇഷ്ടാനുഭവങ്ങൾക്ക് മുഖ്യത്വം വരുന്നതാണ്. മത്സരം / അഭിമുഖം ഇവയിൽ വിജയിക്കും. എതിർക്കുന്നവരെ സമർത്ഥമായി പ്രതിരോധിക്കുന്നതാണ്. ആരംഭിച്ച കാര്യങ്ങൾ കൃത്യമായിത്തന്നെ നിർവഹണത്തിലെത്തിക്കാൻ സാധിക്കും. വ്യാപാരത്തിൽ നേട്ടമുയരുന്നതാണ്. സർഗാത്മക പ്രവർത്തനങ്ങളിൽ ഏകാഗ്രതയുണ്ടാവും. തൊഴിൽ രംഗത്തെ കിടമത്സരങ്ങളിൽ വിജയിക്കുന്നതാണ്. സാമ്പത്തിക വിഷയങ്ങളിൽ അടുക്കും ചിട്ടയും പുലർത്തുവാൻ കഴിയും. ദീർഘദർശിത്വത്തോടെ പ്രവർത്തിക്കുന്നതാണ്.

പൂരാടം

മനസ്സമാധാനവും പ്രവൃത്തികളിൽ ഉത്സാഹവും ഭവിക്കുന്നതാണ്. തീരുമാനങ്ങൾ കൃത്യമായി കൈക്കൊള്ളാനാവും. അവ പ്രാവർത്തികമാക്കുവാനും വിഷമമുണ്ടാവില്ല. സുഹൃത്തുക്കളുടെ പിന്തുണ ലഭിക്കുന്നതാണ്. സ്വയം പലതും പഠിച്ചറിയും. പരിമിതികളെ മറികടക്കാൻ സദാ ഔത്സുക്യം പുലർത്തുന്നതായിരിക്കും. മകൻ്റെ ജോലിക്കാര്യത്തിൽ ചില ശുഭസൂചനകൾ ലഭിക്കുന്നതാണ്. കടബാധ്യതകൾ വീട്ടുന്നതിന് ഊർജ്ജിതശ്രമം തുടരും. പാരമ്പര്യ തൊഴിലുകൾ ഏറ്റെടുക്കാൻ മുന്നോട്ടുവരും. ആരോഗ്യം തൃപ്തികരമായിരിക്കുന്നതാണ്.

ഉത്രാടം

പൊതുവേ കാര്യസിദ്ധിക്കാവും മുൻതൂക്കമെങ്കിലും അമിതമായ ആത്മവിശ്വാസം ഒഴിവാക്കണം. ഗൃഹനിർമ്മാണം പൂർത്തിയാക്കി ഗൃഹപ്രവേശത്തിന് ഉറ്റവരെ ക്ഷണിക്കും. ഉദ്യോഗസ്ഥർക്ക് ശരാശരിക്കാലമാണ്. മേലധികാരികളുടെ അനിഷ്ടത്തിന് പാത്രമായേക്കും. ബിസിനസ്സിൽ സാമാന്യമായ ലാഭം കൈവരും. കൂടുതൽ വിപുലീകരണത്തിന് ഗ്രഹാനുകൂലതയില്ല. വാഹനത്തിന് ചെറിയ അറ്റകുറ്റപ്പണി വരാം. വൃദ്ധജനങ്ങളുടെ പരിചരണത്തിന് കൂടുതൽ സമയം നീക്കിവെക്കേണ്ടി വരാം. രാഷ്ട്രീയം കൊണ്ട് ആത്മസംതൃപ്തിയുണ്ടാവില്ലെന്ന് തിരിച്ചറിയും.

തിരുവോണം

വാരാദ്യം സൗഖ്യം കുറയുന്നതാണ്. തീരുമാനങ്ങൾ തെറ്റാണെന്ന് അറിയുകയാൽ ഖേദിക്കേണ്ടിവരും. ചെലവ് കൂടാനുമിടയുണ്ട്. ചൊവ്വ മുതൽ അനുകൂലത പ്രതിക്ഷിക്കാം.  സ്ഥിരജോലിക്കായുള്ള അപേക്ഷ പരിഗണിക്കപ്പെടും. പ്രയത്നത്തിന് അർഹമായ പ്രതിഫലം ലഭിക്കുന്നതാണ്. സംഘടനയിൽ പദവി ഉയരുവാനിടയുണ്ട്. പഴയ കുടിശികകൾ കിട്ടിയേക്കാം. തൽസംബന്ധമായ പരാതി അധികൃതർക്ക് നൽകുന്നതാണ്. കുടുംബത്തിനുള്ളിൽ സമാധാനം കുറയാതിരിക്കാനായി വിട്ടുവീഴ്ച ചെയ്യും.

അവിട്ടം

സ്വാശ്രയത്വം ആഗ്രഹിക്കും. എന്നാൽ പലപ്പോഴും പരാശ്രയത്വം ആവശ്യമാവും. ലഘുയത്നത്തിലൂടെ നേടാവുന്നവ ഇപ്പോൾ കൂടുതൽ അദ്ധ്വാനിച്ചിട്ടുമാത്രമേ കരഗതമാവുകയുള്ളൂ എന്ന നിലവരും. ഗവേഷകർക്ക് കൂടുതൽ അവസരങ്ങൾ വന്നെത്തുന്നതാണ്. തൊഴിലിടത്തിൽ ആധിപത്യം പുലർത്താൻ ശ്രമിക്കും. ചൊവ്വ വരെ ക്ലേശങ്ങളുണ്ടാവും. ബുധനാഴ്ച മുതൽ ഗുണത്തിന് മേൽക്കോയ്മ വരും. ധനപരമായ സമ്മർദ്ദങ്ങളെ മറികടക്കും. എതിർപ്പുകളെ മറികടക്കുവാനാവും. വിവാഹാദികളിൽ പങ്കെടുക്കും.

Also Read: നിങ്ങളുടെ ജീവിതപങ്കാളി എങ്ങനെയുള്ള ആളാവും?

ചതയം

ആത്മവിശ്വാസം കൂടുന്ന സാഹചര്യങ്ങൾ ഉണ്ടാവും. പരാധീനതകളെ മറികടക്കുന്നതാണ്. മത്സരങ്ങളിൽ നിന്നും പിന്തിരിയുകയില്ല. ബിസിനസ്സിൽ പ്രതീക്ഷിച്ച ലാഭം കൈവരാൻ അല്പം കൂടി കാത്തിരിപ്പ് തുടരണം. പാർട്ണർഷിപ്പ് സംരംഭങ്ങളിൽ തൃപ്തി കുറയാനിടയുണ്ട്. ചുമതലകൾ പകരക്കാരെ ഏല്പിക്കുന്നതിൽ കരുതൽ വേണം. പ്രണയികൾക്ക് എതിർപ്പുകളെ നേരിടേണ്ടി വരുന്നതാണ്. ഭൂമി വ്യാപാരത്തിൽ നഷ്ടം വരാനിടയുണ്ട്. കബളിപ്പിക്കപ്പെടാതിരിക്കാൻ കരുതൽ വേണം. തിങ്കൾ, ചൊവ്വ ദിവസങ്ങളിൽ അഷ്ടമരാശിക്കൂറാകയാൽ കരുതൽ വേണ്ടതുണ്ട്.

പൂരൂരുട്ടാതി

തർക്കങ്ങളിൽ നിന്നും വാഗ്വാദങ്ങളിൽ നിന്നും ഒഴിഞ്ഞുനിൽക്കുന്നത് അഭികാമ്യം. ബിസിനസ്സ് കാര്യങ്ങൾക്ക് കൂടുതൽ സമയം കണ്ടെത്തേണ്ടതുണ്ട്. നല്ല അവസരങ്ങൾ പ്രതീക്ഷിച്ചതുപോലെ വീണുകിട്ടണമെന്നില്ല. പണമിടപാടുകളിൽ ജാഗ്രത വേണം. ഭൂമിവ്യാപാരം നീണ്ടുപോകാനിടയുണ്ട്. ഉന്നതോദ്യോഗസ്ഥരുടെ പിന്തുണ ലഭിക്കുകയാൽ സഹപ്രവർത്തകരുടെ ഇടയിൽ സ്ഥാനോന്നതി ലഭിക്കും. വിദ്യാർത്ഥികൾക്ക് പരീക്ഷകളിൽ നന്നായി ശോഭിക്കാൻ കഴിയും. കുടുംബാംഗങ്ങളുടെ ആവശ്യങ്ങൾ മനസ്സിലാക്കി പ്രവർത്തിക്കും. വാരമധ്യം മുതൽ കൂടുതൽ അനുകൂലഫലങ്ങൾ വന്നുചേരുന്നതാണ്.

ഉത്രട്ടാതി

ആഗ്രഹിച്ച ചില ഗൃഹോപകരണങ്ങൾ വാങ്ങിയേക്കും. സ്വന്തം തൊഴിലിൽ ഉയർച്ചയുണ്ടാവുന്നതാണ്. കൂടുതൽ തൊഴിലാളികളെ താത്കാലികമായി നിയമിച്ചേക്കും. അവസരങ്ങൾ തേടുന്നവർക്കും നിരാശപ്പെടേണ്ടി വരില്ല. ദിനചര്യകളിലും ഭക്ഷണരീതിയിലും മറ്റും ചില മാറ്റങ്ങൾ വരുത്താനിടയാവും. ബന്ധുക്കൾക്ക് സഹായം നൽകാൻ സന്നദ്ധത കാട്ടും. രാഷ്ട്രീയക്കാർ ജന്മശനിക്കാലമാകയാൽ ദുരാരോപണങ്ങളെ നേരിട്ടേക്കും. സ്നേഹബന്ധം ദുർബലപ്പെടുന്നുണ്ടോ എന്ന് സന്ദേഹമാവും.തിങ്കളും ചൊവ്വയും ആരോഗ്യസംരക്ഷണത്തിൽ ശ്രദ്ധിക്കണം.

രേവതി

കുടുംബാന്തരീക്ഷം സംതൃപ്തമാവും. മകളുടെ ജോലിക്കാര്യത്തിൽ ശുഭപ്രതീക്ഷയേറും. രോഗഗ്രസ്തർ അല്പം കൂടി കരുതൽ കൈക്കൊള്ളുന്നത് നന്നായിരിക്കും. കർമ്മരംഗത്ത് ചില അഴിച്ചു പണികൾ നടത്താനിടയുണ്ട്. എതിർപ്പുന്നയിക്കുന്നവരെ സമർത്ഥമായി പ്രതിരോധിക്കാൻ കഴിയുന്ന കാലമാണ്. ചെറുയാത്രകൾ വേണ്ടിവരും. എന്നാൽ അവയാൽ വലിയ മെച്ചം വരികയുമില്ല.ബഹുകാര്യങ്ങളിൽ ഇടപ്പെടുന്നതിനാൽ ഏകാഗ്രത കുറയാനിടയുണ്ട്.സുഹൃൽസംഗമത്തിൻ്റെ സംഘാടനം ഏറ്റെടുക്കുന്നതാണ്. തിങ്കൾ, ചൊവ്വ, ബുധൻ ദിവസങ്ങളിൽ ശുഭാരംഭം ഒഴിവാക്കണം.

Read More: സമ്പൂർണ വർഷഫലം; അശ്വതി മുതൽ രേവതി വരെ