Horoscope September 2025: സെപ്റ്റംബർ മാസഫലം, അശ്വതി മുതൽ രേവതി വരെ

Horoscope September 2025: ആദിത്യൻ സെപ്തംബർ 1 മുതൽ 16 വരെ ചിങ്ങം രാശിയിലും തുടർന്ന് കന്നിരാശിയിലും സഞ്ചരിക്കുന്നു. പൂരം, ഉത്രം, അത്തം എന്നീ ഞാറ്റുവേലകൾ ഇക്കാലത്ത് കടന്നുപോകുന്നു. വെളുത്ത പക്ഷത്തിൽ മാസം തുടങ്ങുന്നു. സെപ്തംബർ 7 ന് വെളുത്തവാവാണ്. അന്ന് ചതയം നക്ഷത്രത്തിലായി പൂർണ്ണ ചന്ദ്രഗ്രഹണവും ഉണ്ട്. സെപ്തംബർ 21 ന് കറുത്തവാവും വരുന്നു. 

പിറ്റേന്ന് (സെപ്തംബർ 22 ന്) ആശ്വിനമാസവും ശരദ് ഋതുവും നവരാത്രിയും ആരംഭിക്കുന്നു. ദുർഗ്ഗാഷ്ടമി സെപ്തംബർ 30 ന് ആണ്. മഹാനവമിയും വിജയദശമിയും ഒക്ടോബർ 1,2 തീയതികളിലായിട്ടാണ് വരുന്നത്. ശനിയുടെ സ്ഥിതി മീനം രാശിയിൽ ഉത്രട്ടാതി നക്ഷത്രത്തിലാണ്. എന്നാൽ ശനിക്ക് വക്രഗതിയുണ്ട്. വ്യാഴം മിഥുനം രാശിയിൽ പുണർതം നക്ഷത്രത്തിൽ സഞ്ചരിക്കുന്നു. 

രാഹു കുംഭം രാശിയിൽ പൂരൂരുട്ടാതി രണ്ടാം പാദത്തിലും കേതു കന്നിരാശിയിൽ പൂരം ഒന്നാം പാദത്തിലും തുടരുകയാണ്. ചൊവ്വ മാസാദ്യം കന്നിരാശിയിൽ അത്തം നക്ഷത്രത്തിലാണ്. തുടർന്ന് ചിത്തിരയിൽ പ്രവേശിക്കുന്നു. സെപ്തംബർ 13 ന് തുലാം രാശിയിലേക്ക് സംക്രമിക്കുകയാണ്. മാസാന്ത്യത്തിൽ ചോതി നക്ഷത്രത്തിലൂടെയും സഞ്ചരിക്കുന്നുണ്ട്.

ബുധൻ മാസാദ്യം ചിങ്ങം രാശിയിലുണ്ട്. സെപ്തംബർ 15 ന് ഉച്ചരാശിയായ കന്നിയിൽ പ്രവേശിക്കുന്നു. സെപ്തംബർ മുഴുവൻ ബുധൻ മൗഢ്യത്തിലുമാണ്. ശുക്രൻ മാസാദ്യം കർക്കടകം രാശിയിലാണ്. സെപ്തംബർ 14 ന് ചിങ്ങം രാശിയിലേക്ക് സംക്രമിക്കും. ഈ ഗ്രഹനിലയെ അവലംബിച്ച് അശ്വതി മുതൽ രേവതി വരെയുള്ള നക്ഷത്രങ്ങളിൽ ജനിച്ചവരുടെ 2025 സെപ്തംബർ മാസത്തെ നക്ഷത്രഫലം ഇവിടെ വിശകലനം ചെയ്യുന്നു.

Also Read:ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

അശ്വതി

ജോലിസ്ഥലത്ത് കൂടുതൽ സ്വീകാര്യതയുണ്ടാവും. തീരുമാനങ്ങൾ ആലോചിച്ചെടുക്കേണ്ട സന്ദർഭമാണിത്. പ്രായോഗിക പരിചയം മുന്നേറാൻ വഴിയൊരുക്കുന്നതാണ്.  ചില തടസ്സങ്ങൾ അനിവാര്യമായി സംജാതമാകും. കുടുംബകാര്യങ്ങളിൽ മുഴുവനായുള്ള സംതൃപ്തി കൈവരുമെന്ന് പറയാനാകില്ല.ഒരു അസ്വാരസ്യങ്ങൾ ഉണ്ടാവാം. തൊഴിൽ യാത്രകൾ വേണ്ടിവന്നേക്കും. വിദേശത്ത് ജോലി ചെയ്യുന്നവർക്ക് നാട്ടിൽ വീട് വാങ്ങാൻ അവസരം തുറന്നുകിട്ടും.  സഹോദരാനുകൂല്യം അധികം പ്രതീക്ഷിക്കേണ്ടതില്ല. ആറിലെ ചൊവ്വ ആത്മവിശ്വാസമേകും. പ്രതിസന്ധികളെ മുൻകൂട്ടി കാണുന്നതാണ്. പോംവഴി സ്വയം രൂപപ്പെടുത്തുകയും ഒപ്പമുള്ളവർക്ക് പറഞ്ഞു കൊടുക്കുകയും ചെയ്യും. കടബാധ്യതകളിൽ പെടാതിരിക്കാൻ ശ്രദ്ധിയുണ്ടാവണം.

Also Read:വാരഫലം, അശ്വതി മുതൽ ആയില്യംവരെ

ഭരണി

ബഹുകാര്യങ്ങളിൽ മുഴുകുന്നതാണ്. ജോലിഭാരം കൂടുന്നതായിരിക്കും. ആത്മാർത്ഥതയെ മേലധികാരികൾ ചൂഷണം ചെയ്യുന്നതായി തോന്നാം. ദൗത്യങ്ങൾ ഏറ്റെടുക്കുന്നതിൽ രണ്ടുമനസ്സുണ്ടാവും. എങ്കിലും മനസ്സർപ്പിച്ചുതന്നെ പ്രവർത്തികളിൽ മുഴുകുന്നതാണ്. പുതുജോലിക്കായി നടത്തുന്ന ശ്രമങ്ങൾ ഫലവത്തായേക്കും. തന്മൂലം വീട്ടിൽ നിന്നും അകലേക്ക് മാറാനിടയുണ്ട്. കുടുംബസമേതം യാത്രകളുണ്ടാവും. പതിവ് വിരസതകളിൽ നിന്നും താത്കാലികമായെങ്കിലും മാറനാവും. ശീലങ്ങൾ നിയന്ത്രിക്കാനായി പുതിയ പ്രതിജ്ഞ കൈക്കൊണ്ടേക്കും. പിതാവിന് ഉദ്യോഗത്തിൽ ഉയർച്ച വരുവാനിടയുണ്ട്. ആരാധ്യ വ്യക്തിത്വങ്ങളെ കാണാൻ ശ്രമിക്കുന്നതാണ്. സാമ്പത്തികമായി സംതൃപ്തി ഭവിക്കുന്ന കാലമാവും.

കാർത്തിക

മുൻകൂട്ടി തീരുമാനിച്ചതുപോലെയാവില്ല പല കാര്യങ്ങളും നടക്കുക. എങ്കിലും സന്ദർഭത്തിനൊത്ത് ഉയരാൻ കഴിയുന്നതായിരിക്കും. സ്വയം തിരുത്താനും ആത്മപരിശോധ നടത്താനും  തയ്യാറാവേണ്ടതുണ്ട്. ധനപരമായി നല്ല കാലമാണ്. സർക്കാർ/ബാങ്ക് വായ്പകൾക്ക് സാധ്യത കാണുന്നു. കിട്ടാക്കടങ്ങൾ ഭാഗികമായെങ്കിലും കിട്ടിയേക്കും. പുതിയ സംരംഭങ്ങൾ കുറശ്ശെയായി ചുവടുറപ്പിച്ച് തുടങ്ങുന്നതാണ്.  അവിവാഹിതരുടെ വിവാഹ കാര്യത്തിൽ തീരുമാനം ഉണ്ടാവുന്നതായിരിക്കും.  ആഢംബരത്തിനായി ചെലവു ചെയ്യും. സഹപ്രവർത്തകർക്ക് പ്രായോഗിക നിർദ്ദേശങ്ങൾ നൽകുന്നതാണ്. പഞ്ചമഭാവത്തിലെ ചൊവ്വ സൂചിപ്പിക്കുന്നത് മക്കളുടെ പിടിവാശിയെയാണ്. തന്മൂലം മനക്ലേശം ഉണ്ടാവുന്നതിനിടയുണ്ട്. മാസത്തിൻ്റെ രണ്ടാം പകുതിയിൽ ഗുണഫലങ്ങളേറും.

Also Read:നിങ്ങളുടെ ഇന്നത്തെ ദിവസം, രാശി ഫലം

രോഹിണി

ആദിത്യൻ നാലിലും അഞ്ചിലും ആയി സഞ്ചരിക്കുന്നു. രണ്ടിൽ വ്യാഴവും പതിനൊന്നിൽ ശനിയും തുടരുന്നു. ന്യായമായ അഭീഷ്ടങ്ങൾ കരഗതമാവുന്നതാണ്. പ്രശ്നങ്ങൾ തുടരും. എന്നാൽ പരിഹാര മാർഗങ്ങൾ കണ്ടെത്തപ്പെടാം. അധിക ജോലിഭാരം വിഷമിപ്പിക്കുന്നതാണ്. നിലവിലെ തൊഴിലുപേക്ഷിച്ചിട്ട് പുതിയത് കണ്ടെത്താൻ തത്കാലം ഗ്രഹാനുകൂല്യം ഇല്ലെന്നത് ഓർമ്മിക്കണം. വേതന വർദ്ധനവ് നാമമാത്രമായിരിക്കും. സ്വാശ്രയ ബിസിനസ്സിൽ വളർച്ച പ്രതീക്ഷിക്കാം. ഉപഭോക്താക്കൾ സേവനങ്ങളിൽ തൃപ്തി രേഖപ്പെടുത്തും. കുടുംബ ബന്ധങ്ങളിൽ ദാർഢ്യം ഭവിക്കും. മക്കളുടെ കാര്യത്തിൽ അസംതൃപ്തി / മനോവിഷമം വരാം. കൂട്ടായ ചർച്ചകൾക്കും ഒത്തുചേരലുകൾക്കും അവസരം സൃഷ്ടിക്കണം. സാമ്പത്തികമായ പിരിമുറുക്കങ്ങൾ ഉണ്ടായേക്കില്ല. രാഷ്ട്രീയത്തിൽ വിരക്തി തോന്നും. ബന്ധുസമാഗമം ആഘോഷങ്ങളെ അവിസ്മരണീയമാക്കുന്നതാണ്.

മകയിരം

എല്ലാരംഗത്തും മാറ്റങ്ങൾ കൊണ്ടുവരാൻ തീവ്രമായി അഭിലഷിക്കും. യാഥാർത്ഥ്യത്തെക്കാൾ സ്വപ്നത്തിൻ്റെ പിന്നാലെ സഞ്ചരിക്കുന്നതാണ്.പരിശ്രമങ്ങളിൽ ഫലസാധ്യത കുറവാണ്. കഴിവുകൾ സ്വയം തിരിച്ചറിയാൻ സാധിക്കുമെന്നൊരു മെച്ചമുണ്ട്. ഉന്നതരുടെ വാഗ്ദാനം ലഭിക്കും. അത് പ്രാവർത്തികമാകാൻ സാധ്യത കുറവാണ് എന്നതായിരിക്കും ഫലശ്രുതി. സാമ്പത്തികമായി അല്പം സ്വസ്ഥത വരാനിടയുണ്ട്. പാരമ്പര്യസ്വത്തിൽ നിന്നും ധനാഗമം ഉണ്ടാവുന്നതാണ്. കുടുംബകാര്യത്തിൽ ഏകപക്ഷീയമായ തീരുമാനം കൈക്കൊള്ളേണ്ടി വന്നേക്കും. തന്മൂലം കുടുംബസമാധാനം കുറയുന്നതാണ്. കാലഘട്ടത്തിന് ഇണങ്ങുന്ന ഇലക്ട്രോണിക് ഉപകരണങ്ങൾ വാങ്ങുന്നതാണ്. ബന്ധുവിൻ്റെ മകളുടെ വിവാഹത്തിന് സാമ്പത്തിക സഹായം ചെയ്യുവാനാവും.

തിരുവാതിര

മാസത്തിൻ്റെ ആദ്യ പകുതി മികച്ചതാവും. തൊഴിലിൽ വളർച്ചയുണ്ടാവുന്നതാണ്. അധികാരികൾക്ക് അഭിമതരാവും. ദുർഘട പ്രശ്നങ്ങൾക്ക് പരിഹാരം കണ്ടെത്താനായേക്കും. ധനവരവ് മോശമാവില്ല. ചിട്ടി, നറുക്കെടുപ്പ് ഇവയിൽ വിജയിക്കും.  പാരമ്പര്യ കർമ്മരംഗത്ത് മടുപ്പനുഭവിക്കാനിടമുണ്ട്. രോഗഗ്രസ്തർക്ക് ചികിൽസാ മാറ്റത്തിലൂട ആശ്വാസം പ്രതീക്ഷിക്കാം. വിദ്യാഭ്യാസത്തിനോ ജോലിക്കോ ഗവേഷണത്തിനോ വിദേശ സാധ്യതകൾ നിലവിലുണ്ടായിരിക്കും. പ്രണയ ജീവിതം പുഷ്കലമായി തുടരുന്നതാണ്. മാസത്തിൻ്റെ രണ്ടാം പകുതിയിൽ സമ്മർദ്ദങ്ങൾ അനുഭവപ്പെടാം. കടം വാങ്ങേണ്ടി വന്നേക്കും. കരാറുകളിൽ പങ്കാളിയാവുമ്പോൾ സേവന വേതന വ്യവസ്ഥകൾ വായിച്ചറിയേണ്ടതാണ്. കൂട്ടുകെട്ടുകളിൽ ജാഗ്രതയുണ്ടാവണം.

പുണർതം

ബഹുകാര്യങ്ങൾ കാരണം ഔദ്യോഗിക ജീവിതം തിരക്കുപിടിച്ചതാവും. പുതുസംരംഭങ്ങൾ പുരോഗതിയിലേക്ക് നീങ്ങുന്നതാണ്. കാര്യാലോചനകളിൽ പങ്കെടുക്കുകയാൽ  ഭാവിപ്രവർത്തനം സംബന്ധിച്ച് വ്യക്തത കൈവരും. അന്യദിക്കിൽ  കഴിയുന്നവർക്ക് സ്വന്തം നാട്ടിലേക്ക് സ്ഥലംമാറ്റം ഉണ്ടാവുന്നതാണ്. മകൻ്റെ ജോലിക്കാര്യത്തിൽ അനുകൂല സൂചന ലഭിക്കും. വസ്തു / വീട് വാങ്ങുന്ന കാര്യത്തിൽ വീട്ടിൽ രണ്ടഭിപ്രായം ഉടലെടുക്കാനിടയുണ്ട്. ആഘോഷങ്ങളിൽ പങ്കെടുക്കാൻ ദൂരദിക്കിൽ നിന്ന് ഉറ്റബന്ധുക്കളെത്തുന്നതാണ്. ലോണുകൾ അടഞ്ഞുതീരുകയാൽ സന്തോഷമുണ്ടാവും. മാസത്തിൻ്റെ രണ്ടാം പകുതിയിൽ തൊഴിലിടത്തിൽ വേണ്ടത്ര സ്വാസ്ഥ്യം കിട്ടിയേക്കില്ല. കർക്കടക്കൂറുകാർക്ക് മാസാദ്യം സ്വൈരം കുറയുന്നതാണ്.

പൂയം

പുതിയ ജോലി തേടുന്നവർക്ക് നല്ല അവസരങ്ങൾ പ്രതീക്ഷിക്കാം. എന്നാലും നിലവിലെ ജോലി ഉപേക്ഷിക്കുന്നത് അഭിലഷണീയമല്ല.  പാരമ്പര്യസ്വത്ത് വിൽക്കാനുള്ള ശ്രമം  വിജയിക്കുന്നതാണ്. തന്മൂലം കടബാധ്യതകൾ വീട്ടാൻ സാധിച്ചേക്കും. ബിസിനസ്സുകാർക്ക് വിപണിയിൽ ആധിപത്യം ഉറപ്പിക്കാൻ പരസ്യങ്ങളെ ആശ്രയിക്കേണ്ടി വരാം. വിദേശത്തു കഴിയുന്നവർക്ക് ആഘോഷങ്ങൾക്കായി നാട്ടിലെത്താനാവും. പ്രണയവിഘ്നങ്ങളെ മറികടക്കുന്നതാണ്. സാങ്കേതികജ്ഞാനം സമ്പാദിക്കാൻ അവസരം ഉണ്ടാവും. രാഷ്ട്രീയ മത്സരങ്ങളിൽ പദവി നിലനിർത്താൻ ക്ലേശിക്കും. വേണ്ടപ്പെട്ടവരെന്ന് വിശ്വസിച്ചവർ എതിരുനിൽക്കാം. മാസത്തിൻ്റെ രണ്ടാം പകുതി കൂടുതൽ ഫലപ്രദമായിരിക്കും. കിടപ്പു രോഗികൾക്ക് ചികിൽസാ മാറ്റം സാന്ത്വനമേകുന്നതാണ്.

ആയില്യം

സ്വതസിദ്ധമായ കഴിവുകൾ പ്രയോജനപ്പെടുത്താൻ സന്ദർഭമുണ്ടാവും.  പ്രൈവറ്റ് സ്ഥാപനത്തിൽ ജോലി ചെയ്യുന്നവർക്ക് സ്ഥാനക്കയറ്റമോ വേതനവർദ്ധനവോ സാധ്യതയാണ്.  ഗാർഹിക സാഹചര്യങ്ങൾ പൂർണ്ണമായും തൃപ്തി നൽകുന്നവയാവില്ല. അനുരഞ്ജനത്തിൻ്റെ പാത സ്വീകരിക്കുക അഭികാമ്യം. കുറച്ചു കാലമായി വിൽക്കാൻ ശ്രമിച്ച വസ്തുവിന് ഇപ്പോൾ ആവശ്യക്കാരുണ്ടായേക്കാം. ഗവേഷണ പ്രബന്ധം പൂർത്തീകരിക്കുന്നതാണ്. കലാകാരന്മാർക്ക് അവസരങ്ങളുണ്ടാവും. രാഷ്ട്രീയ രംഗത്ത് ശത്രുക്കൾ വർദ്ധിക്കും. മത്സരാധിഷ്ഠിത കരാറുകൾ നേടാൻ  കഴിയുന്നതാണ്. മാസത്തിൻ്റെ രണ്ടാം പകുതിയിൽ ഗുണ്ടാനുഭവങ്ങൾ കൂടുവാനിടയുണ്ട്. വായ്പയ്ക്കുള്ള അപേക്ഷ പരിഗണിക്കപ്പെടും. ഗൃഹനിർമ്മാണം സംബന്ധിച്ച ആലോചനകൾ പുരോഗമിക്കുന്നതാണ്.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

മകം

ജന്മത്തിലും രണ്ടിലുമായി ആദിത്യൻ പാപഗ്രഹയോഗത്തോടെ സഞ്ചരിക്കുകയാൽ പുരോഗതി തടസ്സപ്പെടുന്നതായിരിക്കും. കാര്യനിർവഹണത്തിന് പരാശ്രയം ആവശ്യമായി വരുന്നതാണ്. തൊഴിൽ സ്ഥാപനത്തിൽ സർക്കാരിൻ്റെ ഏതെങ്കിലും തരത്തിലുള്ള ഇടപെടലുകൾ ഉണ്ടാവാൻ സാധ്യതയുണ്ട്. ആലോചനാ ശൂന്യമായ തീരുമാനങ്ങൾ കൈക്കൊള്ളരുത്. സാമ്പത്തികമായി കുറച്ചൊക്കെ മെച്ചം ഭവിക്കും. മുൻകാല കുടിശികയോ ജോലിയിൽ നിന്നും പിരിഞ്ഞവർക്ക് ലഭിക്കാനുള്ള ആനുകൂല്യമോ കിട്ടാം. ഗൃഹനിർമ്മാണത്തിനുള്ള പ്ളാൻ തയ്യാറാക്കും. മകളുടെ ജോലിസ്ഥലത്തിനൊപ്പം പോയി താമസിക്കേണ്ട സ്ഥിതിയുണ്ടാവുന്നതാണ്. ക്ഷോഭം നിയന്ത്രിക്കേണ്ടതുണ്ട്. ആരോഗ്യ പരിരക്ഷ അനിവാര്യം.

പൂരം

പതിനൊന്നിൽ വ്യാഴം സഞ്ചരിക്കുകയാൽ ജീവിതം  ഉത്കൃഷ്ട പാതകളിലൂടെ സഞ്ചരിക്കും.  ധനപരമായി സംതൃപ്തിയുണ്ടാവും. ചിട്ടി പോലുള്ള നിക്ഷേപങ്ങളിൽ  ചേർന്നേക്കും. ആടയാഭരണങ്ങൾ വാങ്ങാൻ സാമ്പത്തിക സ്ഥിതി സഹായകമാവും. സമൂഹത്തിൽ സ്വീകാര്യത തുടരും. ജന്മത്തിലും രണ്ടിലുമായി ആദിത്യൻ കേതു, കുജൻ എന്നീ ഗ്രഹങ്ങളുമായി യോഗം ചെയ്ത്  സഞ്ചരിക്കുകയാൽ വഴിനടത്തം, കായികാധ്വാനം എന്നിവ മൂലം ദേഹക്ലേശമുണ്ടാവും. മിക്കവാറും അകാരണമായി മനക്ലേശം അനുഭവപ്പെടുന്നതാണ്. അധികാരികളുമായി / സഹപ്രവർത്തകരുമായി പൊരുത്തപ്പെടാൻ വിഷമമുണ്ടാവും.  വിദ്യാഭ്യാസത്തിൽ ആലസ്യം നിഴൽ പരത്താം. പ്രണയത്തിൽ വിഘ്നങ്ങളും ദാമ്പത്യത്തിൽ സ്വൈരക്കേടുകളും സാധ്യതയാണ്. ആരോഗ്യപാലനത്തിൽ  ജാഗ്രത വേണം.

ഉത്രം

ശക്തമായ നിലപാടെടുക്കുകയാൽ സംഘടനകളിൽ എതിർപ്പുയരാം. വിവാദങ്ങളിൽ മൗനം അവലംബിക്കുന്നതാവും ഉചിതം. ദുരാരോപണങ്ങളെ തമസ്കരിക്കും. സാമ്പത്തികമായ പിരിമുറുക്കത്തിന് അയവുണ്ടാവുന്നതാണ്.  ഇച്ഛാശക്തി ചിലപ്പോൾ ദുർബലമാവും. വാഗ്ദാനങ്ങൾ സമയബന്ധിതമായി പൂർത്തിയാക്കുവാൻ ക്ലേശിക്കും. സാങ്കേതികജ്ഞാനം പുതുതലമുറയിൽ നിന്നും നേടുന്നതാണ്. ആദർശത്തിൽ അഭിനിവേശമുണ്ടാവും. എന്നാൽ സ്വയം അവ ലംഘിച്ച് പ്രായോഗികത കൈക്കൊള്ളും. പൂർവ്വവിദ്യാർത്ഥി സംഗമത്തിൽ പങ്കെടുത്ത് സ്നേഹബന്ധം പുതുക്കും. അനാവശ്യമായ തിടുക്കം ഉപേക്ഷിക്കുകയാവും ഉചിതം. കരാറുകൾ പുതുക്കിക്കിട്ടും. ചെറുസംരംഭങ്ങൾ ബാലാരിഷ്ടകൾ കടക്കും. ആരോഗ്യപരമായി സമാശ്വാസം ഭവിക്കുന്നതാണ്.

അത്തം

പന്ത്രണ്ടിലും ജന്മത്തിലും ആദിത്യൻ സഞ്ചരിക്കുകയാൽ മാനസിക സമ്മർദ്ദം   തുടരുന്നതാണ്. ചെറിയ നേട്ടങ്ങൾക്ക് പോലും ആവർത്തിത ശ്രമം ആവശ്യമാവും. പുതിയ ജോലി കിട്ടാനായി അന്വേഷണശ്രമം കൂട്ടേണ്ടതുണ്ട്. സംഘടനകളിൽ പിന്തുണ കുറയാം. സാമ്പത്തികരംഗത്തിന് തളർച്ചയുണ്ടാവില്ല. എന്നാൽ ചെലവിന് പല വഴികൾ വന്നെത്തും. ദിനചര്യകളിൽ ആലസ്യം വരാനിടയുണ്ട്. വിദ്യാർത്ഥികൾക്ക് ഏകാഗ്രത കുറയാം. പഴയ കാര്യങ്ങൾ ആലോചിച്ച് മനസ്സിൻ്റെ സമാധാനം കുറഞ്ഞേക്കും. ദാമ്പത്യത്തിൽ കുറ്റപ്പെടുത്തലുകൾ കൂടാനിടയുണ്ട്. ബന്ധുക്കളുടെ തർക്കത്തിൽ മൗനം പാലിക്കുക ഉചിതം. തീർത്ഥാടനത്തിന് അവസരം കിട്ടുന്നതാണ്. ഏജൻസി/കമ്മീഷൻ ഏർപ്പാടുകൾ ഗുണകരമാവും. ചെറുസംരംഭങ്ങൾ ആദായകരമാവുന്നതാണ്.

ചിത്തിര

കന്നിക്കൂറുകാരെക്കാൾ മെച്ചപ്പെട്ട അനുഭവങ്ങളാവും തുലാക്കൂറുകാർക്ക്. കന്നിക്കൂറിൽ ജനിച്ചവർക്ക് സെപ്തംബറിൽ ഔദ്യോഗിക രംഗത്ത് സമാധാനം കുറയുന്നതാണ്.  മേലധികാരികളാൽ ചോദ്യം ചെയ്യപ്പെടാം. നേട്ടങ്ങൾ മെല്ലെയാവുന്നതാണ്. വരവിനെക്കാൾ ചെലവ് കൂടി നിൽക്കും. തുലാക്കൂറുകാർക്ക് ഉദ്യോഗസ്ഥലത്ത്  സമാധാനമുണ്ടാവും. പ്രൈവറ്റ് സ്ഥാപനങ്ങളിൽ സ്ഥാനക്കയറ്റത്തിന് സാധ്യത കാണുന്നു. വീട്ടിനടുത്തേക്ക് സ്ഥലംമാറ്റം ലഭിക്കാം. സഹപ്രവർത്തകർക്കും മേലധികാരികൾക്കും മധ്യേ പാലമായി പ്രവർത്തിക്കുന്നതാണ്. കലാരംഗത്ത് വിജയ കിരീടം ചൂടിയേക്കും.  ഭൂമിയിൽ നിന്നും ആദായം ലഭിക്കാം. ഗാർഹികരംഗത്ത് അലോസരമുണ്ടാവാനിടയുണ്ട്. ഗുരുനാഥന്മാരെ കണ്ട് അഭിപ്രായം നേടും.

ചോതി

ആത്മവിശ്വാസം ഉയരുന്നതാണ്. ആസൂത്രണ വൈഭവം ശ്രദ്ധിക്കപ്പെടും. മുൻപ് തടസ്സപ്പെട്ട പല കാര്യങ്ങളും ഇപ്പോൾ സുഗമമായ നിർവഹണത്തിലെത്തും. ജോലി തേടുന്നവർ നിരാശപ്പെടേണ്ടി വരില്ല. ഉന്നതോദ്യോഗസ്ഥരുടെ പിന്തുണ ലഭിക്കും. രാഷ്ട്രീയ പ്രവർത്തനം കൂടുതൽ ഊർജ്ജസ്വലമാവും.  തൊഴിൽരംഗത്ത് പുരോഗതി ദൃശ്യമാകുന്നതാണ്. നവ്യമായ പരിഷ്കരണങ്ങൾക്ക് മുന്നോട്ടുവരും. ശാസ്ത്രീയ/ഗവേഷണ വിഷയങ്ങളിൽ താത്പര്യമേറും. പ്രണയികൾ വിവാഹ തീരുമാനത്തിലെത്തും. പിതൃ - പുത്ര ബന്ധത്തിലെ കാലുഷ്യങ്ങൾ നീങ്ങിയേക്കാം. മാസത്തിൻ്റെ അവസാനത്തെ ഏതാനും ദിവസങ്ങൾക്ക് മേന്മ കുറയുന്നതാണ്. ചെലവ് അധികരിക്കാൻ സാധ്യതയുണ്ട്.

വിശാഖം

അപ്രസക്തമായ കാര്യങ്ങളുടെ പിറകെ പോകുന്ന പരിപാടി അവസാനിപ്പിക്കും. തൊഴിലില്ലാത്തവർക്ക് താത്കാലികമായ വരുമാനമാർഗമെങ്കിലും തുറന്നുകിട്ടും. ഉദ്യോഗസ്ഥരുടെ ഏകോപന നൈപുണ്യം പ്രശംസിക്കപ്പെടും. പുതിയ കാര്യങ്ങൾ പഠിച്ചറിയാൻ ഔത്സുക്യം പുലർത്തുന്നതാണ്. വിദേശത്ത് പഠന സാധ്യതകൾ ആരായും. സഹജമായ കഴിവുകൾ തിരിച്ചറിയാനും പോഷിപ്പിക്കാനും സന്നദ്ധതയുണ്ടാവും. ബന്ധുക്കളുടെ ആരോഗ്യപ്രശ്നങ്ങൾക്ക് വിദഗ്ദ്ധ ചികിൽസ ഒരുക്കും. സകുടുംബ തീർത്ഥാടനമോ വിനോദയാത്രയോ സാധ്യതകൾ. ഭാഗ്യാനുഭവങ്ങൾ ഉണ്ടാവും. ചിട്ടി, നറുക്കെടുപ്പ് ഇവയിൽ നിന്നും ധനാഗമം കൈവരുന്നതാണ്. അനുരാഗമലരുകൾ ക്ക് വിരിയാനായേക്കും. ദാമ്പത്യത്തിൽ ഇടയ്ക്ക് സ്വരച്ചേർച്ച കുറയാം. സർക്കാരിൽ നിന്നും അനുവാദം / ലൈസൻസ്/ ആനുകൂല്യം ലഭിക്കുന്നതാണ്.

അനിഴം

ഉത്സാഹവും ഉന്മേഷവും ഉണ്ടാക്കുന്ന കാലമാവും. തൊഴിൽ പ്രശ്നങ്ങൾക്ക് പരിഹാരം ഭവിക്കുന്നതാണ്. നവീന സംരംഭത്തിന് സർക്കാരിൽ നിന്നുള്ള അംഗീകാരം / അനുവാദം കൈവരും. ഉന്നതരുമായുള്ള കൂടിക്കാഴ്ചകൾ ദിശാബോധം നൽകാൻ ഉതകുന്നതാണ്. മത്സരങ്ങൾ / അഭിമുഖങ്ങൾ എന്നിവയിൽ വിജയിക്കുവാനാവും. വിദ്യാഭ്യാസ വായ്പ ലഭിക്കാൻ സാധ്യതയുണ്ട്. വ്യവഹാരങ്ങളിൽ ന്യായമായ തീർപ്പ് സുനിശ്ചിതമാണ്. കെട്ടിടനിർമ്മാണത്തിൽ, നാലാം ഭാവത്തിൽ രാഹു സഞ്ചരിക്കുകയാൽ ചില തടസ്സങ്ങൾ ഉണ്ടാവാൻ സാധ്യത കാണുന്നുണ്ട്. മക്കളുടെ പ്രവർത്തനങ്ങൾ നിരീക്ഷിക്കാൻ മറക്കരുത്. അന്യനാട്ടിൽ കഴിയുന്നവർക്ക് വളരെക്കാലത്തിനു ശേഷം ജന്മനാട്ടിൽ പോകാൻ അവസരം വന്നെത്തുന്നതായിരിക്കും.

തൃക്കേട്ട

തൊഴിലന്വേഷണം സഫലമാവും. ന്യായമായ പദവികൾ ലഭിച്ചേക്കാം. സ്ഥാനോന്നതി കൈവരുന്നതാണ്. സ്വന്തം മേഖലയിൽ മേധാവിത്വം നിലനിർത്തുവാനാവും. പിതൃ-പുത്രബന്ധം, മുന്നത്തെക്കാൾ രമ്യമാവുന്നതാണ്. ബിസിനസ്സിൽ ഉപഭോക്താക്കളെ ആകർഷിക്കുന്ന കാര്യങ്ങൾ നടപ്പിലാക്കും. വിദ്യാർത്ഥികളുടെ ആത്മവിശ്വാസം ഉയർന്നേക്കും. ഗൃഹനിർമ്മാണാദികൾ മെല്ലെയാവാനിടയുണ്ട്. വായ്പകൾ പരിഗണിക്കപ്പെടും. എന്നാൽ ധനാഗമത്തിന് കാത്തിരിക്കേണ്ടി വന്നേക്കാം. രോഗഗ്രസ്തരായവർക്ക് നവചികിത്സ മൂലം രോഗനിവൃത്തി വരാം. ഉപാസനാദികൾ പുഷ്ടിപ്പെടുന്നതാണ്. ഭൗതിക നിലവാരം ഉയർന്നേക്കും.  പതിനൊന്നിൽ ചൊവ്വ തുടരുകയാൽ ഭൂമി വിൽക്കുക/ വാങ്ങുക ഇത്യാദികൾ സാധ്യതകളാണ്. സഹോദരർക്കിടയിലെ അനൈക്യം പരിഹരിക്കപ്പെടാം.

Also Read: സമ്പൂർണ വർഷഫലം; അശ്വതി മുതൽ രേവതി വരെ

മൂലം

അഷ്ടമരാശിയിൽ നിന്നും ആദിത്യൻ മാറുന്നതിനാൽ പല തടസ്സങ്ങൾ അകലും. മനസ്സിൻ്റെ നിരുന്മേഷത നീങ്ങും. പ്രത്യാശ പൊട്ടിമുളക്കുന്നതാണ്. ജോലി തേടുന്നവർക്ക് മുൻപത്തെക്കാൾ നല്ല അവസരങ്ങൾ വന്നെത്തും. പ്രൈവറ്റ് ജോലി കൊണ്ട് ന്യായമായ ആവശ്യങ്ങൾ പൂർത്തിയാക്കും. വീട്ടിനടുത്തേക്ക് സ്ഥലം മാറ്റം ലഭിക്കാം. പിതാവിന് തൊഴിൽപരമായി നേട്ടങ്ങൾ വന്നെത്തും. രാഷ്ട്രീയത്തിൽ സല്പേരുണ്ടാവും.  നവസംരംഭങ്ങൾ തുടങ്ങാൻ സർക്കാരിൽ നിന്നും അനുമതി  ലഭിക്കുന്നതാണ്. ബന്ധുക്കൾക്കിടയിലെ കാലുഷ്യം അകലാം. സൗഹൃദം പുഷ്ടിപ്പെടുന്നതാണ്. ചുറ്റും ചതിക്കുഴികൾ ഉണ്ടെന്ന് ഇടയ്ക്ക് ഓർക്കുന്നത് നന്ന്. അമിത ആത്മവിശ്വാസം ദോഷം ചെയ്യും. വാഹനയാത്രയിൽ കരുതലുണ്ടാവണം. ധനനിക്ഷേപങ്ങൾ സുരക്ഷതമാണെന്ന് ഉറപ്പ് വരുത്തണം.

പൂരാടം

കാര്യനിർവഹണത്തിലെ തടസ്സങ്ങൾ നീങ്ങുന്നതായിരിക്കും. ഔദ്യോഗികമായി അധികാരമുള്ള ചുമതലകൾ മേലധികാരി വിശ്വസിച്ചേല്പിക്കും. നിർദ്ദേശങ്ങൾ സഹപ്രവർത്തകർക്ക് സ്വീകാര്യമാവും. ജോലിഭാരം അമിതമാവില്ല. വ്യാപാര മേഖലയിൽ ആവിഷ്കരിച്ച വിപണന തന്ത്രങ്ങൾ ഫലം കാണും. പരസ്യത്തിനായി ഏർപ്പെട്ട ചെലവുകൾ അല്പാല്പമായി കിട്ടിത്തുടങ്ങുന്നതാണ്. പഴയ സ്വത്തുതർക്കം മൂലം നിസ്സഹകരണം തുടർന്ന ബന്ധുക്കൾ വീണ്ടും അടുക്കും. പ്രബന്ധ രചനക്കായി സമയം കണ്ടെത്താനാവും. നാലാം ഭാവത്തിലെ കണ്ടകശനി വക്രഗതിയിലാവുകയാൽ ഗൃഹനിർമ്മാണത്തിലെ തടസ്സങ്ങൾ നീങ്ങാം. ജന്മനാട്ടിൽ കഴിയുന്ന മാതാപിതാക്കളെ സന്ദർശിക്കാനാവും. പ്രണയത്തിലേർപ്പെട്ടവർക്ക് എതിർപ്പുകൾ കുറയുന്നതിൽ ആഹ്ളാദം ഭവിക്കുന്നതാണ്.

ഉത്രാടം

ഉപരിപ്ലവമായ കാര്യങ്ങളിൽ മനസ്സ് വ്യാപരിച്ചേക്കും. കർമ്മരംഗത്ത് തടസ്സങ്ങൾ ഉണ്ടാവുന്നതിൽ ഖേദിക്കും. താത്കാലിക ജോലി കരഗതമായേക്കാം. സാമ്പത്തികമായ പിരിമുറുക്കത്തിന് അയവുണ്ടാവുമെങ്കിലും കെടുകാര്യസ്ഥത വരാതിരിക്കാൻ ജാഗ്രത വേണ്ടതുണ്ട്. പുതുസംരംഭങ്ങളുടെ കൂടിയാലോചനകൾക്ക് അനുകൂല സമയമാണ്. പക്ഷേ തുടങ്ങാൻ ഈ സമയം സ്വീകരിക്കാതിരിക്കുക നന്ന്. സാങ്കേതിക കാര്യങ്ങൾ ഉൾക്കൊള്ളാൻ ശ്രമിക്കുന്നതാണ്. ഗൃഹനിർമ്മാണം  തുടങ്ങിയവർക്ക് കാര്യങ്ങൾ തട്ടിയും മുട്ടിയുമാണെങ്കിലും മുന്നോട്ടുപോകും. വായ്പകൾ നേടാൻ ആവർത്തിത ശ്രമം വേണം. വിദ്യാർത്ഥികൾക്ക് പഠനസഹായഗ്രന്ഥങ്ങൾ കൂടുതലായി ആവശ്യമാവും. മാസത്തിൻ്റെ അവസാന പത്തുദിവസങ്ങളിൽ ഗുണാനുഭവങ്ങളുണ്ടാകുന്നതാണ്.

തിരുവോണം

ആദിത്യൻ എട്ടിലും ഒമ്പതിലും സഞ്ചരിക്കുകയാൽ ഉദ്യോഗസ്ഥർക്ക് സമ്മിശ്രഫലങ്ങളാണ്. അധ്വാനഭാരം ഇരട്ടിക്കും. മേലധികാരികൾ കഴിവുകളെ അംഗീകരിച്ചേക്കില്ല. ജോലി തേടുന്നവർക്ക് കാത്തിരിപ്പ് തുടരേണ്ടി വരാം. ബിസിനസ്സിൽ ലാഭം സാമാന്യമായിട്ടാവും. കൂടുതൽ മുതൽമുടക്കിന് അത്ര അനുകൂലമല്ല കാലം എന്നതോർക്കണം. ഉപാസനാദികൾക്ക് വിഘ്നം വരാം. ബന്ധങ്ങൾക്ക് ദാർഢ്യം കുറയാനിടയുണ്ട്. പ്രണയികൾക്കിടയിൽ പിണക്കത്തിന്  സാധ്യതയുണ്ട്. അക്കാദമിക് ഗവേഷണത്തിന് പ്രോൽസാഹനം ലഭിക്കുന്നതാണ്. ചെറിയ നേട്ടങ്ങളും ശുഭവാർത്തകളും ആഘോഷങ്ങളും ജീവിതത്തെ സുരഭിലമാക്കാം. വിദേശത്തു നിന്നും മകൻ്റെ ധനം വന്നെത്തുന്നതാണ്.  ദീർഘ യാത്രകളിൽ കരുതൽ വേണ്ടതുണ്ട്.

അവിട്ടം

ആദിത്യസഞ്ചാരം മൂലമുള്ള ഗുണദോഷഫലങ്ങൾ സംജാതമാകും.  മുൻകൂട്ടി തീരുമാനിച്ചവ അവസാന നിമിഷം നടന്നുകിട്ടിയേക്കാം.  അധികാരികളുടെ വിപ്രതിപത്തിക്ക് പാത്രമാകാനിടയുണ്ട്. ന്യായമായ ആവശ്യങ്ങൾ നിറവേറ്റാൻ കഴിയുന്നതായിരിക്കും. ബിസിനസ്സ് യാത്രകൾ ഭാഗികമായി വിജയിക്കും. പിതാമഹൻ്റെ/ മാതാമഹൻ്റെ ആരോഗ്യത്തിൽ കരുതലുണ്ടാവണം. ചില കടപ്പാടുകൾ മനസ്സിനെ വ്യാകുലമാക്കാം. ഉത്സവ നടത്തിപ്പുമായി ബന്ധപ്പെട്ട സ്ഥാനങ്ങൾ വഹിക്കേണ്ടി വരുന്നതാണ്. മകളുടെ വിവാഹാലോചനകൾ പുരോഗമിക്കും. വ്യാഴനുകൂല്യം ഉള്ളതിനാൽ ദാമ്പത്യത്തിൽ സമാധാനവും ഐക്യവും രൂപപ്പെടുന്നതാണ്. ചെലവിൽ നിയന്ത്രണം അനിവാര്യമാണ്. ആരോഗ്യ കാര്യത്തിൽ അലംഭാവമരുത്.

ചതയം

ഏഴിലും എട്ടിലുമായിട്ടാണ് ആദിത്യസഞ്ചാരം. ആകയാൽ  ആത്മശക്തിക്ക് മങ്ങൽ വരാം. സ്വാനുഭവങ്ങൾ ചില സാഹചര്യങ്ങളെ മറികടക്കാൻ വേണ്ടത്ര സഹായിച്ചില്ലെന്ന് വരാം. അലച്ചിൽ കൂടും. അധ്വാനം അധികരിക്കും. പക്ഷേ അതിനനുസരിച്ചുള്ള പ്രതിഫലം കൈവന്നേക്കില്ല. സ്ഥാനപ്രാപ്തിക്ക് കടുത്തമത്സരങ്ങൾ വേണ്ടതായ ഭവിക്കും. വ്യാഴാനുകൂല്യം ഉള്ളതിനാൽ ആത്യന്തിക വിജയം സ്വന്തമാവാതിരിക്കില്ല. വ്യാപാരത്തിൽ നിന്നും ആദായം പ്രതീക്ഷിച്ചത്ര കിട്ടാനിടയില്ല. എങ്കിലും ന്യായമായ കാര്യങ്ങളും ആവശ്യങ്ങളും മുടങ്ങുകയുമില്ല. വിദേശത്ത് ജോലി ചെയ്യുന്നവർക്ക് മാറ്റം പ്രതീക്ഷിക്കാം. വിദ്യാഭ്യാസപരമായി ഉന്മേഷവും ഉത്സാഹവും വന്നെത്തുന്നതാണ്. കുടുംബ ബന്ധങ്ങൾ കരുത്താകും. മംഗളകർമ്മങ്ങൾക്ക് നേതൃത്വം വഹിക്കും. ആതുരന്മാർക്ക് ചികിൽസാ സഹായം നൽകുവാനാവും.

പൂരൂരുട്ടാതി

കുംഭക്കൂറുകാർക്ക് പ്രതിസന്ധികളെ തരണം ചെയ്യാൻ അത്യദ്ധ്വാനം ആവശ്യമായി വരുന്നതാണ്. ഉദ്യോഗാർത്ഥികളുടെ നിയമനം നീളാം. വരുമാനം ശരാശരിയാവും. ചെലവുകൾ വെട്ടിച്ചുരുക്കുക അഭിലഷണീയം. ഇഷ്ടവസ്തുക്കൾക്ക് മോഹവില കൊടുക്കേണ്ട സാഹചര്യം ഉണ്ടാവാം. ദൂരസ്ഥലത്തുനിന്നും നാട്ടിനടുത്തേക്ക് സ്ഥലം മാറ്റം കാത്തിരിക്കുന്നവർക്ക് നിരാശയാവും തത്കാലം ഫലം. മേലധികാരകളുടെ അപ്രീതി പുലർത്തും. ചെറുകിട കച്ചവടക്കാർക്ക് നേട്ടങ്ങൾ പ്രതീക്ഷിക്കാം. ചിട്ടി, നറുക്കെടുപ്പ് ഇവയിൽ നിന്നും ധനാഗമം ഉണ്ടാവും. മീനക്കൂറുകാർക്ക് ജീവിതത്തിൽ ശോഭിക്കാൻ കഴിയുന്ന കാലഘട്ടമാണ്. മത്സരങ്ങളെ ആത്മവിശ്വാസത്തോടെ നേരിടും. മാസത്തിൻ്റെ രണ്ടാം പകുതിയിൽ ഔദ്യോഗിക യാത്രകൾ അധികരിക്കുന്നതാണ്.

ഉത്രട്ടാതി

പ്രൊമോഷൻ പ്രതീക്ഷിക്കുന്നവർക്ക് അറിയിപ്പുണ്ടാവും. ദാമ്പത്യ കലഹങ്ങളിൽ ഒത്തുതീർപ്പുകൾക്ക് സാധ്യതയുണ്ട്. പ്രണയം പുഷ്കലമാവുന്നതാണ്. തീർത്ഥാടനം നവോന്മേഷത്തിന് കാരണമാകും. തൊഴിലിടത്തിൽ സമാധാനമുണ്ടാവും. പുതിയ പദ്ധതികൾ ആവിഷ്കരിക്കും. മേലുദ്യോഗസ്ഥരുടെ പ്രോൽസാഹനം കിട്ടാനിടയുണ്ട്. തൊഴിലിൽ നിന്നും പിരിഞ്ഞവർക്ക് ആനുകൂല്യങ്ങൾ ഭാഗികമായെങ്കിലും കൈവരുന്നതായിരിക്കും. ഭോഗസുഖം ഭവിക്കുന്നതാണ്. ആരോഗ്യ പരിശോധനകൾ തൃപ്തികരമായ ഫലം സൂചിപ്പിക്കാം. സ്വാശ്രയ തൊഴിലിൽ പുതിയ പാർട്ണർമാരെ ചേർക്കുന്നത് കരുതലോടെയാവണം. മാസത്തിലെ അവസാനത്തെ ഏതാനും ദിവസങ്ങൾക്ക് രമ്യത നഷ്ടമാകാം. സാഹസങ്ങൾക്ക് മുതിരാതിരിക്കണം. വ്യയാധിക്യത്തിന് സാധ്യത കാണുന്നു.

രേവതി

മുന്നേകൂട്ടി ആസൂത്രണം ചെയ്ത കാര്യങ്ങൾ ഭംഗിയായി പ്രാവർത്തികമാക്കും. ശത്രുക്കളുടെ പ്രവർത്തനങ്ങളെ തമസ്കരിച്ചു കൊണ്ട് നിശബ്ദമാക്കാനാവും. ധനപരമായി മോശം സമയമല്ല. എന്നാൽ ഏറ്റവും നല്ലകാലവുമല്ല. വ്യയങ്ങളിൽ കർശനമായ നിയന്ത്രണം വേണ്ടതുണ്ട്. ചൊവ്വയുടെ ഏഴ്, എട്ട് ഭാവങ്ങളിലെ സ്ഥിതി പ്രണയത്തെയും ദാമ്പത്യത്തെയും ചെറുതായോ വലുതായോ ബാധിച്ചേക്കാം. അതിനാൽ കരുതൽ വേണ്ടതാണ്. സഹപ്രവർത്തകരുടെ സഹകരണം ലഭിക്കും. ബിസിനസ്സിൽ വിശ്വാസം വർദ്ധിക്കുന്നതാണ്. പരസ്യങ്ങൾ ഗുണം ചെയ്തുതുടങ്ങും. ജീവിതരീതിയിൽ മാറ്റം വരുത്തുവാനാവും. വ്യായമത്തിന് കൃത്യമായ സമയം മാറ്റിവെക്കേണ്ടതുണ്ട്. കലാകാരന്മാർക്ക് ധാരാളം അവസരങ്ങൾ ലഭിക്കുന്നതാണ്. സാഹിത്യ പ്രവർത്തനങ്ങൾക്ക് നേരം കണ്ടെത്തും. ഉപാസനകൾ മുടങ്ങാതിരിക്കാൻ കരുതൽ വേണം.

Read More: Venus Transit 2025: ശുക്രൻ കർക്കടകം, ചിങ്ങം രാശികളിലേക്ക്; അശ്വതി മുതൽ രേവതി വരെ