Venus Transit 2025: ശുക്രൻ കർക്കടകം, ചിങ്ങം രാശികളിലേക്ക്; അശ്വതി മുതൽ രേവതി വരെ

Venus Transit to Cancer, Leo: 2025 ആഗസ്റ്റ് 20 ന് /1201 ചിങ്ങം 4 ന് ശുക്രൻ മിഥുനം രാശിയിൽ നിന്നും കർക്കടകം രാശിയിലേക്ക് സംക്രമിക്കുന്നു. 25 ദിവസങ്ങൾക്കു ശേഷം, സെപ്തംബർ 14 ന്/ ചിങ്ങം 29 ന് ചിങ്ങം രാശിയിലേക്കും പകരുകയാണ്. ഭൗതിക ജീവിതത്തിൻ്റെ പാരുഷ്യങ്ങൾക്കിടയിൽ മനസ്സിനെ സ്നേഹചോദിതവും പ്രേമസുരഭിലവുമാക്കുന്ന ഗ്രഹമാണ് ശുക്രൻ. കവിതാ, നാടകം, ഗാനം, സിനിമ തുടങ്ങിയ കലകളുടെ കാരകഗ്രഹമാണ് ശുക്രൻ. 

ഗോചരഫല ചിന്തയിൽ 12 രാശികളിൽ സഞ്ചരിക്കുമ്പോൾ ശുക്രനാണ് ഏറ്റവും കുറച്ച് ദോഷഫലങ്ങൾ നൽകുന്നത്. 6, 7, 10 എന്നീ ഭാവങ്ങളിലൂടെ സഞ്ചരിക്കുമ്പോൾ മാത്രമാണ് ശുക്രൻ വിപരീത അനുഭവങ്ങൾ  സൃഷ്ടിക്കുന്നത്. അതാകട്ടെ മറ്റു ഗ്രഹങ്ങൾ ഉണ്ടാക്കുന്ന ദോഷാനുഭവങ്ങളെക്കാൾ കുറവായിട്ടായിരിക്കും.

കർക്കടകം, ചിങ്ങം, രാശികളിലെ ശുക്രസഞ്ചാരം അശ്വതി മുതൽ രേവതി വരെയുള്ള നക്ഷത്രങ്ങളില്‍ ജനിച്ചവരെ എങ്ങനെ സ്വാധീനിക്കുന്നു എന്നാണ് ഇവിടെ അപഗ്രഥിക്കുന്നത്.

Also Read: ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)
 
ആഗസ്റ്റ് 20 ന് ശുക്രൻ കർക്കടകം രാശിയിലേക്കും സെപ്തംബർ 14 ന് ചിങ്ങം രാശിയിലേക്കും പകരുന്നു. മേടക്കൂറുകാർക്ക് ഈ മാറ്റങ്ങൾ രണ്ടും അനുകൂലമാണ്. നാലാമെടത്തിലെ സഞ്ചാരം മനസ്സുഖത്തിനും ഗൃഹസ്വസ്ഥതയ്ക്കും കാരണമാകും. തൊഴിലിടത്തിൽ ആത്മവിശ്വാസത്തോടെ പ്രവർത്തിക്കാൻ സാധിക്കുന്നതാണ്. ബന്ധുക്കളുമായുണ്ടായിരുന്ന പിണക്കം മാറി ഇണക്കം പുലരും. സൗഹൃദം ദൃഢതരമാവും. പ്രത്യേകിച്ചും സ്ത്രീസൗഹൃദം. വാഹനത്തിൻ്റെ അറ്റകുറ്റം പൂർത്തിയാക്കി നിരത്തിലിറക്കാനാവുന്നതാണ്.  മാതാപിതാക്കളുടെ ആരോഗ്യസ്ഥിതി മെച്ചപ്പെടും. പുതുവസ്ത്രാഭരണങ്ങൾ പാരിതോഷികമായി ലഭിക്കാം. നവീന ഇലക്ട്രോണിക് ഉപകരണം വാങ്ങാനിടയുണ്ട്. സാമ്പത്തികമായ മെച്ചം വന്നുചേരും. സെപ്തംബർ 14 മുതൽ ശുക്രൻ ചിങ്ങം രാശിയിൽ സഞ്ചരിക്കുന്നു.  ഭാവനയും ക്രിയാത്മകതയും ഉയരും. പ്രണയികൾക്ക് സന്തോഷിക്കാനവസരം കൈവരുന്നതാണ്. സാമൂഹികമായ അംഗീകാരമുണ്ടാവും. സന്താനങ്ങൾക്ക് പഠനം/ ജോലി സംബന്ധിച്ച ഉയർച്ച പ്രതീക്ഷിക്കാം.

ഇടവക്കൂറിന് (കാർത്തിക 2,  3,  4 പാദങ്ങൾ,  രോഹിണി, മകയിരം 1, 2 പാദങ്ങൾ)

ഇടവക്കൂറുകാർക്ക് 3,4 രാശികളിലായി ശുക്രൻ സഞ്ചരിക്കുകയാൽ ജീവിതം കൂടുതൽ സുഗമവും സ്വച്ഛന്ദവുമാവും. കുടുംബാംഗങ്ങളുടെ, വിശേഷിച്ച് സഹോദരിമാരുടെ അനുകൂല നിലപാടുകൾ ഗുണം ചെയ്യും. സഹായ സഹകരണം പുറത്തുനിന്നും വേണ്ടുവോളം കിട്ടുന്നതാണ്. കാര്യനിർവഹണത്തിൽതടസ്സങ്ങളുണ്ടാവില്ല. വരുമാന മാർഗത്തിൽ വളർച്ച പ്രകടമാവും. പുതിയ സംരംഭങ്ങൾക്ക് സ്വീകാര്യത കൈവരുന്നതാണ്. 
പ്രണയികൾ വിവാഹതീരുമാനത്തിലെത്തിയേക്കാം. ആഡംബര വസ്തുക്കൾ സ്വന്തമാക്കും. ആടയാഭരണങ്ങൾക്ക് ചെലവ് ചെയ്യുന്നതാണ്. വിലപ്പെട്ട ഇലക്ട്രോണിക് ഉല്പന്നങ്ങൾ പാരിതോഷികം ലഭിക്കാനിടയുണ്ട്. വസ്തുവാങ്ങാൻ സാധ്യത കാണുന്നു.  ഗൃഹനിർമ്മാണത്തിന് പ്രാരംഭം കുറിക്കാനും കഴിഞ്ഞേക്കും. പ്രൈവറ്റ് സ്ഥാപനത്തിലെ ജോലിയിൽ വേതനവർദ്ധനവ് പ്രതീക്ഷിക്കാം. നിക്ഷേപങ്ങൾ പുതുക്കാൻ കഴിയും. ഉദ്യോഗസ്ഥർക്ക് വീട്ടിനടുത്തേക്ക് സ്ഥലം മാറ്റം കിട്ടുന്നതാണ്.

മിഥുനക്കൂറിന് (മകയിരം 3, 4, തിരുവാതിര, പുണർതം 1,  2,  3)

ജന്മരാശിയിൽ നിന്നും 2, 3  ഭാവങ്ങളിലേക്കാണ് ശുക്രൻ്റെ മാറ്റം. അനുകൂല ഫലങ്ങൾ ജന്മരാശിയിലെന്നപോലെ ശുക്രന് കർക്കിടകം, ചിങ്ങം രാശികളിൽ സഞ്ചരിക്കുമ്പോഴും നൽകാനാവും. വിദ്യാഭ്യാസ പുരോഗതി വന്നെത്തും. മത്സരങ്ങളിലും അഭിമുഖങ്ങളിലും ശോഭിക്കുന്നതാണ്. വചോവിലാസം ആകർഷണീയമാവും. കലാസാഹിത്യരംഗം പുഷ്ടിപ്പെടും. വാഹനം ഇല്ലാത്തവർക്ക് പുതുവാഹനം വാങ്ങാനായേക്കും. കഴിവിനനുസരിച്ച് സ്വകാര്യ സ്ഥാപനത്തിൽ ജോലി ലഭിക്കുന്നതാണ്. പുതിയ കാര്യങ്ങൾ പഠിച്ചറിയാൻ ഉത്സുകതയുണ്ടാവും. ജീവിതശൈലീ രോഗങ്ങളെ നിയന്ത്രിക്കും. ആരോഗ്യം വീണ്ടെടുക്കാൻ കഴിയുന്നതാണ്. ഉന്നതരുടെ പിന്തുണ കിട്ടുന്നതുമൂലം സ്ഥാനലബ്‌ധിയുണ്ടാവും. സ്ത്രീകളുടെ സഹായവും വന്നെത്തുമെന്നതും പ്രസ്താവ്യമത്രെ!  ഭാവിയിൽ പ്രയോജനം ചെയ്യുന്ന നിക്ഷേപങ്ങൾക്ക്  സാഹചര്യം ഒരുങ്ങും. പ്രണയാനുഭവങ്ങൾ ഉണ്ടായേക്കും. ഭൗതിക സാഹചര്യം മെച്ചപ്പെടുന്നതാണ്.

കർക്കടകക്കൂറിന് (പുണർതം നാലാം പാദം, പൂയം, ആയില്യം)

പന്ത്രണ്ടാം ഭാവത്തിൽ നിന്നും ജന്മത്തിലേക്കും രണ്ടാം ഭാവത്തിലേക്കും ശുക്രൻ സഞ്ചരിക്കുന്നു. ഭോഗസുഖമുണ്ടാവും. പ്രണയം ജീവിതത്തിൽ സുരഭിലവായുപോലെ കടന്നുവരുന്നതാണ്. പ്രണയിക്കുന്നവരുടെ ഇടയിലാകട്ടെ ഹൃദയൈക്യമേറും. ദാമ്പത്യത്തിലും സ്വൈരം നിറയുന്നതാണ്. കലാപഠനത്തിൽ ഉയരാൻ കഴിഞ്ഞേക്കും. ജോലിയിൽ സമാധാനമുണ്ടാവും. ബാഹ്യ ഇടപെടലുകളെ ചെറുക്കാൻ സാധിക്കും. സ്വാശ്രയ ബിസിനസ്സ് വിപുലീകരിക്കുന്നതിന് വേണ്ടപ്പെട്ടവരുമായി കൂടിയാലോചന നടത്തുന്നതാണ്. വിദേശത്തു പോകാനുള്ള തടസ്സം  മാറിക്കിട്ടും. കാവ്യരചനയിലും ചിത്രരചനയിലും മികവ് തെളിയിക്കും.  മോടിപിടിപ്പിച്ച വീട്ടിൽ താമസമാരംഭിക്കും. ധനസമാഹരണത്തിൽ വിജയിക്കുന്നതാണ്. മധുരമായ സംഭാഷണ ശൈലി വ്യക്തിത്വത്തെ ആകർഷകമാക്കും. വിലകൂടിയ പാരിതോഷികങ്ങൾ ലഭിക്കാം. പൊതുവേ പറയുകയാണെങ്കിൽ ജീവിതസാഹചര്യം ഉയർന്നേക്കും. ഭൗതികതയിൽ മുഴുകുന്നതാണ്.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ശുക്രൻ പതിനൊന്നാമെട ത്തിൽ നിന്നും പന്ത്രണ്ടാമെടത്തിലേക്കും പിന്നീട് ജന്മരാശിയിലേക്കും സഞ്ചരിക്കുന്നു.  പതിനൊന്നിൽ സഞ്ചരിക്കുമ്പോൾ ശുക്രൻ സർവ്വവിധത്തിലുള്ള അഭീഷ്ടങ്ങളും നൽകുന്നു. പന്ത്രണ്ടിൽ ഗുണഫലങ്ങളുണ്ട്, തീർച്ചയായും. ഒപ്പം ചില പരിമിതികളും കൂടി പ്രതീക്ഷിക്കാം.  ദൂരദിക്കുകളിൽ കഴിയുന്ന വേണ്ടപ്പെട്ടവരുടെ സ്നേഹം ഉപഹാരരൂപത്തിൽ ലഭിക്കുന്നതാണ്. നല്ല കാര്യങ്ങൾക്കായി ധനം ചെലവുചെയ്യും. കുടുംബത്തിൽ മംഗള / പൂജ കർമ്മങ്ങൾ നടന്നേക്കാം. പ്രിയപ്പെട്ടവർക്ക് വിലപിടിച്ച ആടയാഭരണങ്ങളും പാരിതോഷികങ്ങളും വാങ്ങിനൽകുന്നതിൻ്റെ ചെലവുണ്ടാവും.  ചിരകാലമായി ആഗ്രഹിച്ച മുന്തിയ ഇലക്ട്രോണിക് ഉല്പന്നം തനിക്കായി സ്വന്തമാക്കാൻ സാധ്യതയുണ്ട്. കൈവായ്പകൾ മടക്കി നൽകാൻ അവസരം വന്നെത്തും. കുടുംബ സമേതം വിനോദയാത്ര നടത്താം. ജന്മരാശിയിൽ ശുക്രൻ സഞ്ചരിക്കുമ്പോൾ ഭോഗസുഖങ്ങളേറും. പ്രണയികൾ ഭാവി സംബന്ധിച്ച പ്രധാന തീരുമാനത്തിലെത്തും. ഭൗതിക സാഹചര്യം മെച്ചപ്പെടുന്നതായിരിക്കും. ദാമ്പത്യം സ്നേഹപൂർണമാവും. പാർട്ണർഷിപ്പ് ബിസിനസ്സിൽ നിന്നും ലാഭം വന്നുതുടങ്ങുന്നതാണ്.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

കന്നിക്കൂറിന് (ഉത്രം 2, 3, 4 പാദങ്ങൾ, അത്തം, ചിത്തിര 1, 2 പാദങ്ങൾ)

മിഥുനത്തിൽ ശുക്രൻ സഞ്ചരിച്ച കാലം പത്താമെടമാകയാൽ കന്നിക്കൂറുകാർക്ക് ഗുണകരമല്ല. ആഗസ്റ്റ് 20 ന് ശുക്രൻ പതിനൊന്നാമെടത്തിലേക്ക് മാറുന്നത് വളരെ ഗുണം ചെയ്യും. സുഖഭോഗം ഭവിക്കും. പ്രണയം വിജയകരമാവും. ആത്മവിശ്വാസം എല്ലാ രംഗത്തും സ്ഫുരിക്കുന്നതാണ്. വിലപിടിച്ച പാരിതോഷികം ലഭിക്കും. തൊഴിൽ വളർച്ച പ്രതീക്ഷിച്ചതിലും അധികമാവും. സൗഹൃദം മെച്ചപ്പെടുന്നതാണ്. ബന്ധുകലഹങ്ങൾ അവസാനിച്ചേക്കും. ബിസിനസ്സ് ശാഖകൾ തുടങ്ങുവാനാവും. ഉദ്യോഗത്തിൽ പദവി ഉയരും. വേതനവർദ്ധനവിനും സാധ്യത കാണുന്നു. കലാപ്രവർത്തനത്തിന് കൂടുതൽ സമയം മാറ്റിവെക്കാനാവും. പുതു വാഹനം വാങ്ങിയേക്കും. മനസ്സുഖം കുറയില്ല. ഗാർഹികാന്തരീക്ഷം പിന്തുണയ്ക്കുന്നതായിരിക്കും. സെപ്തംബർ 14 മുതൽ ശുക്രൻ പന്ത്രണ്ടാം ഭാവത്തിൽ സഞ്ചരിക്കും. നേട്ടങ്ങൾക്കു തന്നെയാവും മുൻതൂക്കം. മംഗളകർമ്മങ്ങൾക്കായി ചെലവുണ്ടായേക്കും. ശുഭകാര്യങ്ങൾക്ക്  യാത്രകൾ വേണ്ടിവരും. ഗൃഹം പുതുക്കാനായി തീരുമാനിക്കും. ക്ലേശിക്കുന്നവർക്ക് ധനസഹായം ചെയ്യുന്നതാണ്. വിദേശത്ത് ജോലി തേടുന്നവർക്ക് ഉചിതമായ അവസരം വന്നെത്തുന്നതായിരിക്കും.

തുലാക്കൂറിന് (ചിത്തിര 3, 4 പാദങ്ങൾ, ചോതി, വിശാഖം 1, 2, 3 പാദങ്ങൾ)

ശുക്രൻ ഭാഗ്യഭാവമായ ഒമ്പതാമെടത്തിൽ നിന്നും കർമ്മഭാവമായ പത്താമെടത്തിലേക്ക് സംക്രമിക്കുകയാണ്. ഇതേറ്റവും അനുകൂലപ്രദമെന്ന് പറയാനാവില്ല. തൊഴിലിടത്തിൽ അസംതൃപ്തി ഭവിക്കാം. പ്രതീക്ഷിച്ച കാര്യങ്ങൾ നടന്നേക്കില്ല. സേവനത്തിനനുസരിച്ചുള്ള വേതനം കിട്ടാൻ സമ്മർദ്ദം ചെലുത്തേണ്ട സ്ഥിതിവരാം. ആവശ്യങ്ങൾ 'വനരോദനമായി' കലാശിച്ചാൽ അത്ഭുതപ്പെടാനില്ല. സഹപ്രവർത്തകരുടെ സഹകരണം കുറയുന്നതായിരിക്കും. ബിസിനസ്സിൽ ലാഭവിഹിതം കരുതിയതിലും ന്യൂനമാവും. ചെലവിനങ്ങൾ ക്രമാതീതമായി വർദ്ധിക്കാനിടയുണ്ട്. യാത്രാക്ലേശം അനുഭവപ്പെടാം. തീർത്ഥാടനം / വിനോദയാത്ര നീട്ടിവെച്ചേക്കും. സെപ്തംബർ 14 മുതൽ ശുക്രൻ ലാഭഭാവമായ ചിങ്ങം രാശിയിൽ സഞ്ചരിക്കുന്നത് നാനാപ്രകാരേണയുള്ള അഭിവൃദ്ധിയുണ്ടാക്കും. പദവി/ സ്ഥാനം കിട്ടും. രാഷ്ട്രീയ വിജയം ഒരു സാധ്യതയാണ്. കുടുംബത്തിൽ സമാധാനം നിറയും. പ്രണയ തടസ്സങ്ങൾ അകലും. അവിവാഹിതർക്ക് വിവാഹ തീരുമാനം ഭവിക്കുന്നതാണ്. ആരോഗ്യപ്രശ്നങ്ങൾ കുറയും. മനസ്സുഖം വന്നുചേരും. വിരോധികൾ ഇണങ്ങരാവും.

വൃശ്ചികക്കൂറിന് (വിശാഖം 4-ാം പാദം, അനിഴം, തൃക്കേട്ട)

അഷ്ടമത്തിൽ സഞ്ചരിക്കുന്ന ശുക്രൻ ഒമ്പതാമെടത്തിലേക്ക് മാറുന്നു, ആഗസ്റ്റ് 20 ന്. വൃശ്ചികക്കൂറുകാർക്ക് പലനിലയ്ക്കും അനുകൂലമായിരിക്കും ശുക്രൻ്റെ ഭാഗ്യഭാവസഞ്ചാരം. തൊഴിൽ തേടുന്നവർക്ക് പുതിയ അവസരങ്ങൾ വന്നെത്തുന്നതാണ്. കലാപരമായ കഴിവുകൾ അംഗീകരിക്കപ്പെടും. മനസ്സിനിണങ്ങുന്ന വിഷയത്തിൽ അന്യനാട്ടിൽ ഉപരിപഠനത്തിന് അവസരം സംജാതമാകും.  ചിട്ടി,ഇൻഷ്വറൻസ്, നറുക്കെടുപ്പ് ഇവയിലൂടെ ധനാഗമം കൈവരുന്നതായിരിക്കും. പിതൃ-പുത്രബന്ധം കൂടുതൽ ഊഷ്മളവും ഗാഢവുമാവും. സ്വാശ്രയ ബിസിനസ്സിൽ സ്വാഭാവിക വളർച്ച പ്രതീക്ഷിക്കാവുന്ന കാലമായിരിക്കും. ഇഷ്ടവസ്തുക്കൾ നേടാനാവും. അനുരാഗം പുഷ്പിതമാവും. വാഹനയോഗമുണ്ട്. അകന്നുകഴിഞ്ഞ ഭാര്യാഭർത്താക്കന്മാർ ഒരുമിക്കുന്നതാണ്. കുടുംബത്തിൽ സംതൃപ്തിയും സമാധാനവും വന്നെത്തും. സുരക്ഷിതമായ ധനനിക്ഷേപങ്ങളും സാധ്യമായേക്കും. സെപ്തംബർ 14 മുതൽ ശുക്രൻ പത്താമെടത്തിൽ സഞ്ചരിക്കുകയാൽ ഉപജീവനരംഗത്തിൽ സമ്മർദ്ദങ്ങൾ വരാനിടയുണ്ട്. തൊഴിൽ മാറുന്നത്  ഉചിതമായേക്കില്ല. സർക്കാരുമായി ബന്ധപ്പെട്ട വിഷയങ്ങളിൽ കരുതലുണ്ടാവണം.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

അനിഷ്ടപ്രദമായ ഏഴാമെടത്തിൽ നിന്നും ഇഷ്ടഭാവങ്ങളായ എട്ടിലേക്കും ഒമ്പതിലേക്കും സഞ്ചരിക്കുകയാണ് ശുക്രൻ. പിണങ്ങിയവർക്ക് ഇണങ്ങാനവസരം ഉണ്ടാവും. പ്രണയം സഫലമാവുന്നതാണ്. കൂട്ടുകച്ചവടത്തിലെ അപസ്വരങ്ങൾ പരിഹരിച്ച് ഐക്യത്തോടെ വീണ്ടും മുന്നോട്ടു പോകാൻ കഴിഞ്ഞേക്കും. ആഘോഷങ്ങൾ മഹനീയമായ അനുഭവമായി മാറും. ധനസംബന്ധിയായ തടസ്സങ്ങൾ നീങ്ങി കാര്യങ്ങൾ സുഗമമാവും. സൗഹൃദം പുഷ്ടിപ്പെടും. രോഗക്ലേശിതർക്ക് ചികിൽസാ മാറ്റത്തിലൂടെ പൂർവ്വസ്ഥിതി കൈവരിക്കാനാവും. ഗവേഷണ പ്രബന്ധം എഴുതാനാവശ്യമായ വസ്തുതകൾ  ശേഖരിക്കുന്നതാണ്. രാഷ്ട്രീയ സ്വാധീനം ഉയർന്നേക്കും. നവസംരംഭങ്ങൾ ജനപ്രീതിനേടും. ഗൃഹനവീകരണം പൂർത്തിയായി കയറിത്താമസം സാധ്യമാവുന്നതാണ്. ചിട്ടി, നറുക്കെടുപ്പ് ഇവകളിൽ നിന്നും ആദായം വന്നെത്തും. മക്കളെ സംബന്ധിച്ച ഉൽക്കണ്‌ഠകൾക്ക് ശുഭപരിണാമം പ്രതീക്ഷിക്കാം. സഹോദരാനുകൂല്യം, ബന്ധുപ്രീതി, മാതൃപിതൃക്കൾക്ക് ആരോഗ്യ സൗഖ്യം എന്നിവയും ഫലങ്ങളിലുൾപ്പെടും.

Also Read: സമ്പൂർണ വർഷഫലം; അശ്വതി മുതൽ രേവതി വരെ

മകരക്കൂറിന് (ഉത്രാടം 2, 3, 4 പാദങ്ങൾ, തിരുവോണം, അവിട്ടം 1,2 പാദങ്ങൾ)

ശുക്രൻ ആറാമെടത്തിൽ നിന്നും ഏഴിലേക്കും പിന്നീട് എട്ടിലേക്കും മാറുന്നു. സമ്മിശ്രമായ ഫലങ്ങളാവും പ്രായേണ വരിക. ദേഹസ്വാസ്ഥ്യം കുറയാം. പണച്ചെലവ് അധികരിക്കുന്നതാണ്. പുതിയ കാര്യങ്ങൾ തുടങ്ങാൻ തീരുമാനിച്ചിട്ടുണ്ടെങ്കിൽ അവ മാറ്റിവെക്കപ്പെടാം. വിവാദങ്ങളിൽ നിന്നും അകന്നുനിൽക്കുക ഉചിതം. പൊതുപ്രവർത്തകർ ആരോപണങ്ങളെ നേരിടുന്നതാണ്. സാമ്പത്തിക കാര്യങ്ങളിൽ അമളി പിണയാനിടയുള്ളതിനാൽ കരുതൽ വേണം. ഗൃഹനിർമ്മാണത്തിൽ തടസ്സങ്ങളുണ്ടാവും. പ്രണയികൾക്കിടയിൽ പിണക്കം ഏർപ്പെടാനിടയുണ്ട്. ദാമ്പത്യത്തിലും അലോസരങ്ങൾക്ക് സാധ്യത. പാർട്ണർഷിപ്പ് ബിസിനസ്സിൽ താല്പര്യം കുറയുന്നതാണ്. സെപ്തംബർ 14 മുതൽ ശുക്രൻ അഷ്ടമരാശിയിൽ സഞ്ചരിക്കുന്നത് ഗുണാനുഭവങ്ങൾക്ക് കാരണമാകും. സുഖഭോഗമുണ്ടാവും. പാരിതോഷികങ്ങൾ ലഭിക്കാം. ആദായം വർദ്ധിക്കുന്നതാണ്. വിനോദ യാത്രകൾക്ക് അവസരം ലഭിക്കും. ഇഷ്ടജനങ്ങളുമായി കൂടിച്ചേരാനാവും. കലാപ്രവർത്തനത്താൽ പെരുമ പുലരും.

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,23 പാദങ്ങൾ)

പഞ്ചമ ഭാവത്തിൽ നിന്നും ഷഷ്ഠസപ്തമ ഭാവങ്ങളിലേക്കാണ് ശുക്രൻ സംക്രമിക്കുന്നത്. 6, 7, 10 എന്നീ  മൂന്നുഭാവങ്ങളിൽ മാത്രമാണ് ശുക്രൻ ഗോചരസഞ്ചാരത്തിൽ പ്രതികൂലനാവുന്നത്. ഇഷ്ടകാര്യങ്ങളിൽ വിളംബമോ വിഘാതമോ അനുഭവപ്പെടും. പരിശ്രമങ്ങൾ ആവർത്തിച്ചാൽ മാത്രമാണ് ലക്ഷ്യപ്രാപ്തിയിലെത്തുക. സുഹൃത്തുക്കൾ മറുകണ്ടം ചാടിയെന്നു വരാം. പങ്കാളിത്ത കച്ചവടത്തിൽ വിരക്തിയുണ്ടാവും. നല്ലലാഭം കിട്ടേണ്ടിടത്ത് നാമമാത്രമായ അനുഭവങ്ങളാവും കൈവരിക. നീതിയുടെ പക്ഷത്ത് നിലയുറപ്പിച്ചാലും ദുഷ്പ്പേരുണ്ടായേക്കും. ചെറുപ്പക്കാരുടെ വിവാഹാലോചനകൾ അല്പം മന്ദഗതിയിലാവും. ഭൂമികച്ചവടത്തിൽ കബളിപ്പിക്കപ്പെടാനിടയുള്ളതിനാൽ ജാഗ്രത അനിവാര്യം. അല്പലാഭം കൊണ്ട് സന്തോഷപ്പെടേണ്ടതായി വരും. പുതുസംരംഭങ്ങൾ ആരംഭിക്കരുത്. വാക്കും കർമ്മവും പൊരുത്തപ്പെടുത്താൻ ശ്രദ്ധ പുലർത്തണം. യാത്രകളിലും കരുതലുണ്ടായിരിക്കണം.

മീനക്കൂറിന് (പൂരൂരുട്ടാതി നാലാം പാദം, ഉത്രട്ടാതി, രേവതി)

നാലാമെടത്തിൽ നിന്നും അഞ്ചിലേക്കും ആറിലേക്കും ശുക്രൻ സഞ്ചരിക്കുകയാൽ അനുകൂലഫലങ്ങൾക്ക് മുൻതൂക്കമുണ്ടാവും. ഭാവനാപരമായും സൃഷ്ടിപരമായും നല്ലകാലമാണ്. രചനകൾ സഹൃദയരുടെ ശ്രദ്ധ നേടുന്നതായിരിക്കും.  അഭിനയം, സംഗീതം, ചിത്രകല, പരസ്യമേഖല, കോസ്റ്റ്യൂം ബിസിനസ്സ് എന്നീ രംഗത്തുള്ളവർക്ക് ഗുണം ഉണ്ടാവുന്ന കാലമാണ്. മക്കൾക്കും മക്കളെക്കൊണ്ടും അഭിവൃദ്ധി പ്രതീക്ഷിക്കാം. പഠിതാക്കൾക്ക് ഏകാഗ്രതയുണ്ടാവും. മത്സരങ്ങളിൽ / അഭിമുഖങ്ങളിൽ വിജയിക്കുവാനാവും. പ്രൈവറ്റ് സ്ഥാപനത്തിൽ സ്വതന്ത്ര ചുമതല കൈവരുന്നതാണ്. വിദേശത്ത് പോകാൻ ആഗ്രഹിക്കുന്നവർക്ക് കാര്യസാദ്ധ്യം പ്രതീക്ഷിക്കാം. കടം കൊടുത്ത തുക തിരികെ ലഭിക്കാൻ സാധ്യത കാണുന്നു. സെപ്തംബർ 14 മുതൽ ശുക്രൻ ആറാമെടത്തിൽ സഞ്ചരിക്കും. ആരോഗ്യകാര്യത്തിൽ ശ്രദ്ധ വേണം. ജീവിതശൈലീ രോഗങ്ങൾ ഉപദ്രവിക്കാനിടയുണ്ട്. ദുരാരോപണങ്ങളെ കരുതലോടെ നേരിടാൻ തയ്യാറാവണം. ആഢംബരച്ചെലവുകൾ കടബാധ്യതയിലേക്ക് നയിക്കാം. ബന്ധുത്വം, സൗഹൃദം എന്നിവയിൽ ജാഗ്രത വേണ്ടതുണ്ട്.

Also Read: 'അച്ഛനെയാണെനിക്കിഷ്ടം...' അച്ഛനും മക്കളും ജ്യോതിഷവും