Horoscope August 2025: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ആഗസ്റ്റ് 16 വരെ ആദിത്യൻ കർക്കടകം രാശിയിലും തുടർന്ന് ചിങ്ങം രാശിയിലും സഞ്ചരിക്കുന്നു. ആയില്യം, മകം എന്നീ ഞാറ്റുവേലകൾ പൂർണ്ണമായും പൂരം ഞാറ്റുവേല ഭാഗികമായും ആഗസ്റ്റിൽ വരുന്നു. കൊല്ലവർഷത്തിലെ കർക്കടകം 16 മുതൽ ചിങ്ങം 15 വരെ വരെയാണ് ആഗസ്റ്റ് മാസം.

ആഗസ്റ്റ് മാസത്തിലെ വെളുത്തവാവ് ആഗസ്റ്റ് 9 നും കറുത്തവാവ് 22/23 തീയതികളിലും ആയി ഭവിക്കുന്നു. ശ്രാവണം, ഭാദ്രപദം എന്നീ ചാന്ദ്രമാസങ്ങളും ആഗസ്റ്റിലുണ്ട്. ചൊവ്വ കന്നിരാശിയിൽ സഞ്ചരിക്കുന്നു. ബുധൻ കർക്കടകം രാശിയിലാണ്. ആഗസ്റ്റ് 30 ന് ചിങ്ങം രാശിയിൽ പ്രവേശിക്കുന്നു. ആഗസ്റ്റ് 10 ന് ബുധൻ്റെ മൗഢ്യം തീരുകയാണ്. ശുക്രൻ മിഥുനം രാശിയിലാണ് മാസാദ്യം. 20 ന് കർക്കടകത്തിലേക്ക് സംക്രമിക്കും. 

വ്യാഴം മിഥുനം രാശിയിൽ തിരുവാതിര നക്ഷത്രത്തിലാണ്. ആഗസ്റ്റ് 13 ന് പുണർതത്തിൽ പ്രവേശിക്കും. ശനി മീനം രാശിയിൽ ഉത്രട്ടാതി നക്ഷത്രത്തിലാണ്. രാഹു കുംഭം രാശിയിൽ പൂരൂരുട്ടാതിയിലും കേതു ചിങ്ങം രാശിയിൽ പൂരം നക്ഷത്രത്തിലും സഞ്ചരിക്കുന്നു. ഈ ഗ്രഹനിലയെ മുൻനിർത്തി അശ്വതി മുതൽ രേവതി വരെയുള്ള ആഗസ്റ്റ് മാസത്തെ നക്ഷത്രഫലം ഇവിടെ അവതരിപ്പിക്കുന്നു.

Also Read: ചൊവ്വ മാറുന്നു, കന്നിരാശിയിലേക്ക്; അശ്വതി മുതൽ രേവതി വരെ

അശ്വതി

ആദിത്യൻ നാലും അഞ്ചും ഭാവങ്ങളിൽ സഞ്ചരിക്കുകയാൽ പ്രവൃത്തിയിൽ വെല്ലുവിളികൾ വരാം. സങ്കീർണ്ണമായ പ്രശ്നങ്ങളെ നേരിട്ടുകൊണ്ടും  പരിഹരിച്ചുകൊണ്ടും മാത്രമേ പുരോഗതി സാധ്യമാവുകയുള്ളൂ! കാര്യസാധ്യത്തിന് പരാശ്രയത്വം വേണ്ടിവരുന്നത് മനക്ലേശത്തിന് കാരണമാകുന്നതാണ്. കുജൻ ആറാമെടത്ത് സഞ്ചരിക്കുകയാൽ അധികാരവും സ്ഥാനമാനവും നിലനിർത്തുവാനാവും. എതിർപ്പുകളെ നിരാകരിച്ചുകൊണ്ട് മുന്നേറും. സാങ്കേതികജ്ഞാനം നേടാൻ സന്നദ്ധത വേണ്ടകാലമാണ്. അല്ലെങ്കിൽ കിടമത്സരങ്ങളിൽ പിന്തള്ളപ്പെടും. സ്ത്രീകളുടെ പിന്തുണയും സഹകരണവും പ്രതീക്ഷിക്കാം. നിക്ഷേപങ്ങളിൽ നിന്നും ആദായം മോശമാവില്ല. പരോക്ഷ ധനാഗമങ്ങൾ സാധ്യതയാണ്. പന്ത്രണ്ടിലെ ശനി സഞ്ചാരം ആലസ്യം, ആകസ്മിക യാത്രകൾ, കാര്യവിളംബം എന്നിവയ്ക്ക് കാരണമായേക്കാം.

ഭരണി

കാര്യനിർവഹണത്തിൽ അധികം ശ്രദ്ധവെക്കേണ്ട സാഹചര്യം ഉരുത്തിരിയുന്നതാണ്. ചുമതലകൾ പകരക്കാരെ ഏല്പിക്കുന്നതിൽ കരുതൽ വേണ്ടതുണ്ട്. സ്വസ്ഥാപനങ്ങളിൽ നിന്നും ധനലാഭം പതിവുപോലെയാവും. എന്നാൽ ചെലവധികരിക്കാം. സർക്കാരുമായി ബന്ധപ്പെട്ടുള്ള വിഷയങ്ങളിൽ കാര്യസാധ്യത്തിന് പുനർശ്രമങ്ങൾ ആവശ്യമായി വരും. സമീപനങ്ങൾ ഉദാരമാക്കുന്നത് ആരെങ്കിലും ചൂഷണം ചെയ്യുന്നുണ്ടോ എന്ന് പരിശോധിക്കുന്നത് നന്നായിരിക്കും. മക്കളുടെ കാര്യത്തിൽ കൈക്കൊണ്ട ചില നിലപാടുകൾ തെറ്റായിപ്പോയോ എന്ന് സംശയിക്കാം.  വ്യത്യസ്ത കാഴ്ചപ്പാടുകൾ ദാമ്പത്യത്തെ കലുഷമാക്കാനിടയുണ്ട്.  ദീർഘ യാത്രകൾക്ക് തയ്യാറെടുപ്പുകൾ തുടങ്ങുന്നതാണ്. കലാകാരന്മാർക്ക് മികച്ച അവസരങ്ങൾ പ്രതീക്ഷിക്കാം. വസ്തുവാങ്ങുന്ന കാര്യം പുനപ്പരിശോധിക്കും. രോഗഗ്രസ്തർക്ക് ആശ്വാസം ഭവിക്കും. 

Also Read:നിങ്ങളുടെ ഇന്നത്തെ ദിവസം, രാശി ഫലം

കാർത്തിക

സന്ദിഗ്ദ്ധതയും ചാഞ്ചല്യവും മനസ്സിനെ ഇടക്കിടെ ബാധിക്കാം. അതേസമയം തന്നെ ഏകോപനവും കർമ്മകുശലതയും പ്രകടിപ്പിക്കാനുമാവും. സർക്കാരിൽ നിന്നും ബിസിനസ്സ് തുടങ്ങാൻ അനുമതി ലഭിക്കുന്നതാണ്. ബന്ധുസഹായം പ്രതീക്ഷിക്കാം. തൊഴിൽ യാത്രകൾ വിജയപ്രദമാവും. സംഘടനാരംഗത്ത് സ്വാധീനം വർദ്ധിക്കുന്നതാണ്. സ്ഥിരപരിശ്രമത്തിൽ അലംഭാവമരുത്. മത്സരാധിഷ്ഠിതമായ കരാറുകളിൽ മുൻനിരയിലെത്തും. പുതിയ കൂട്ടുകെട്ടുകളിൽ കരുതലുണ്ടാവണം. എതിർപ്പുകളെ കേട്ടില്ലെന്ന് നടിക്കും. ഗാർഹിക സാഹചര്യം സമ്മിശ്രമായിരിക്കും. വാഹനത്തിൻ്റെ അറ്റകുറ്റത്തിന് പണച്ചെലവുണ്ടാവും. മകൻ്റെ ഉപരിപഠനത്തിനുള്ള വിദ്യാഭ്യാസ ലോൺ കൈവരുന്നത് ആശ്വാസമാകും. തീർത്ഥാടനത്തിന് അവസരം സംജാതമാകും.

രോഹിണി

കാര്യങ്ങൾ ഭംഗിയായി ആസൂത്രണം ചെയ്യാനും മികച്ച ഏകോപനത്തോടെ അവയെ ലക്ഷ്യത്തിലെത്തിക്കാനും കഴിയുന്നതാണ്. തൊഴിലിടത്തിൽ സമാധാനമുണ്ടാവും. ഒപ്പമുള്ളവരുടെ പിന്തുണ വലിയതായിരിക്കും. പ്രോജക്ടുകൾക്ക് മേലധികാരികളുടെ അംഗീകാരമുണ്ടാവും. കടബാധ്യതകളിൽ നല്ലൊരുപങ്കും വീട്ടാനായേക്കും. മങ്ങിയിരുന്ന സാമ്പത്തിക സ്രോതസ്സുകൾ വീണ്ടും ഫലവത്താകും. അവിവാഹിതരുടെ വിവാഹകാര്യത്തിൽ ശുഭതീരുമാനം ഭവിക്കുന്നതാണ്. കുടുംബ കാര്യങ്ങളിൽ വേണ്ടത്ര കരുതൽ കൈക്കൊള്ളാനാവും. മക്കളുടെ നിർബന്ധം, പഠന വൈമുഖ്യം ഇവ വിഷമിപ്പിക്കാനുള്ള സാധ്യത കാണുന്നു. ഗൃഹ/കെട്ടിട നിർമ്മാണം തടസ്സപ്പെടുന്നതാണ്. കൂട്ടുകച്ചവടത്തിൽ പലകാരണങ്ങളാൽ താത്പര്യം കുറഞ്ഞേക്കും.

മകയിരം

ചെയ്തുപോരുന്ന തൊഴിലിന് ഇണങ്ങുന്ന പുതിയ കാര്യങ്ങൾ പഠിക്കാൻ ആത്മാർത്ഥമായി ശ്രമിക്കുന്നതാണ്. കർമ്മരംഗം വിപുലീകരിച്ചേക്കും. ആസന്നമായ ഉത്സവകാലത്തെ മുൻനിർത്തി വിപണന തന്ത്രങ്ങൾ ആവിഷ്കരിക്കും. സ്വകാര്യ സ്ഥാപനത്തിലെ ഉദ്യോഗസ്ഥർക്ക് ജോലിഭാരം കൂടിയേക്കാം. ആവശ്യപ്പെട്ട വേതന വർദ്ധനവ് നടപ്പാക്കാത്തതിൽ സഹപ്രവർത്തകർക്കൊപ്പം പ്രതിഷേധം സമരരൂപേണ രേഖപ്പെടുത്താം. പ്രണയികൾ വിവാഹിതരാവാൻ തീരുമാനിക്കുന്നതാണ്. കുടുംബകാര്യങ്ങളിൽ ജീവിത പങ്കാളിയെ സഹായിക്കാൻ നേരം കിട്ടാത്തത്  അസ്വാരസ്യങ്ങൾക്ക് കാരണമാകാം. നീണ്ടവർഷമായി തുടരുന്ന ഗൃഹവായ്പ അടഞ്ഞു തീരുന്നത് സ്വാസ്ഥ്യമുണ്ടാക്കും. രോഗാരിഷ്ടകൾക്ക് ശമനം ഉണ്ടാകുന്നതാണ്.

തിരുവാതിര

പ്രവർത്തന മേഖലയിലെ ഉദാസീനത നീങ്ങുന്നതാണ്. ഉദ്യോഗസ്ഥർക്ക് പുതിയ ചുമതലകൾ ലഭിക്കാനിടയുണ്ട്. സ്വയം ചെയ്യുന്ന തൊഴിൽ പുഷ്ടിപ്പെടാൻ സാധ്യത കാണുന്നു. മാറ്റങ്ങൾ കൊണ്ടുവന്നത് ഫലപ്രദമാവും. അക്കാര്യത്തിന് വായ്പാ സഹായം പ്രയോജനപ്പെടുത്താം. ഏജൻസി ബിസിനസ്സിൽ നിന്നും ലാഭം പ്രതീക്ഷിക്കാം. അന്യദേശത്ത് പഠനാവസരം അവസാനനിമിഷം കൈവന്നേക്കും. തടസ്സപ്പെട്ടിരുന്ന യാത്ര തുടരാനാവും. പിണങ്ങിയ ബന്ധുക്കളുമായി ഇണങ്ങുന്നതിന് അവസരം ഒത്തുവരുന്നതാണ്. സാഹിത്യം, കല തുടങ്ങിയ മേഖലയുമായി ബന്ധപ്പെട്ടവർക്ക് അഭ്യുദയം ഭവിക്കും. ചിട്ടി, ഇൻഷ്വറൻസ് മുതലായവയിൽ നിന്നും ധനാഗമം വരാം. ദാമ്പത്യം സുഖകരമാവും. ജീവിതപങ്കാളിക്ക് ആഗ്രഹിച്ച ആഭരണം സമ്മാനിക്കും.

പുണർതം

തൊഴിലിടത്തിൽ കൂടുതൽ സമയം ചെലവഴിക്കേണ്ട സാഹചര്യം ഉണ്ടാവുന്നതാണ്. അധികാരികളുടെ നിർദ്ദേശങ്ങൾ അപ്രായോഗികമായി അനുഭവപ്പെടും. എന്നാൽ ചൂണ്ടിക്കാണിക്കാനാൻ മടിക്കും. വിദ്യാർത്ഥികൾ അലസരാവുന്നതാണ്. കുടുംബ പ്രശ്നങ്ങൾ തലവേദന സൃഷ്ടിക്കാനിടയുണ്ട്. വേതന വർദ്ധനവിനുള്ള അപേക്ഷയ്ക്ക് കൃത്യമായ മറുപടി ലഭിക്കണമെന്നില്ല. വാഹനം വാങ്ങാൻ ഇപ്പോൾ ഗ്രഹാനുകൂല്യം ഇല്ല എന്നറിയണം. മാസത്തിൻ്റെ രണ്ടാം പകുതിയിൽ കാര്യസാധ്യം സുഗമമാവും. പാരമ്പര്യമായി  ചെയ്തുപോരുന്ന തൊഴിലുകളിൽ വിജയിക്കാൻ കഴിയുന്നതാണ്. അന്യനാട്ടിൽ കഴിയുന്നവർക്ക് കുടുംബത്തിനൊപ്പം ചേരാനായേക്കും. സ്വതന്ത്രമായി ചെയ്യുന്ന ബിസിനസ്സിൽ വരുമാനം വർദ്ധിക്കുന്നതാണ്.

പൂയം

ജന്മത്തിലും രണ്ടിലുമായി ആദിത്യൻ സഞ്ചരിക്കുകയാൽ കർമ്മമേഖലയിൽ സമ്മർദ്ദങ്ങളുണ്ടാവും. കാര്യവിജയത്തിന് പരാശ്രയത്വം വേണ്ടി വരുന്നതാണ്. ചെറുപ്പക്കാരുടെ തൊഴിൽ അന്വേഷണം തടസ്സപ്പെടാം. അലച്ചിൽ, വഴിനടത്ത ഇവയുണ്ടാവുന്നതാണ്. പൊതു പ്രവർത്തനത്തിൽ വെല്ലുവിളികൾ ഉയർന്നേക്കും. സുഹൃത്തുക്കളുടെ പിന്തുണ ആശ്വാസമേകും. സർക്കാരിൽ നിന്നും അനുകൂലമായ നടപടികൾ പ്രതീക്ഷിക്കാം. ഊഹക്കച്ചവടത്തിൽ  നേട്ടങ്ങൾ നാമമാത്രമായിരിക്കും. ബിസിനസ്സ് സ്ഥാപനത്തിന് ശാഖ തുടങ്ങാനുള്ള ശ്രമം നീണ്ടുപോയേക്കാം. ഗൃഹനിർമ്മാണത്തിന് ധനം കണ്ടെത്തുവാൻ കഴിയുന്നതാണ്. ഓൺലൈൻ ബിസിനസ്സിലും മുന്നോട്ട് പോകുവാനാവും. ആരോഗ്യ കാര്യത്തിൽ അലംഭാവമരുത്.

ആയില്യം

ആദിത്യൻ, വ്യാഴം, രാഹു തുടങ്ങിയ ഗ്രഹങ്ങൾ അനിഷ്ടസ്ഥിതി തുടരുകയാൽ ലക്ഷ്യം നേടുക എളുപ്പമാവില്ല. അധികാരികൾ പ്രവർത്തനങ്ങൾ കണ്ടില്ലെന്ന് നടിച്ചേക്കും. ആവശ്യങ്ങൾ ബധിരകർണ്ണങ്ങളിലാവും പതിക്കുക. വരവിലും ചെലവ് അധികരിക്കുന്നതാണ്. ആഢംബരം നിയന്ത്രിക്കാൻ കഴിഞ്ഞേക്കില്ല. വഴിനടത്തയും അലച്ചിലുമേറുന്നതാണ്. പ്രണയികൾ ഭാവി സംബന്ധിച്ച തീരുമാനം കൈക്കൊള്ളും. സഹോദരനിൽ നിന്നും സാമ്പത്തിക സഹായം പ്രതീക്ഷിക്കാം. വിദേശത്തുകഴിയുന്ന വർക്ക് ആഘോഷങ്ങളിൽ പങ്കെടുക്കാൻ നാട്ടിലെത്താനാവും. കരാർ പണികൾ, ചെറുസംരംഭം ഇവ ലാഭകരമാവുന്നതാണ്. നവീന ഇലക്ട്രോണിക് ഉപകരണങ്ങൾ സ്വന്തമാക്കും. എതിർപ്പുകളെ പരാജയപ്പെടുത്താൻ കഴിഞ്ഞേക്കും. ആരോഗ്യപരമായി കരുതലുണ്ടാവണം.

മകം

ആദിത്യൻ പന്ത്രണ്ടിലും ജന്മരാശിയിലും സഞ്ചരിക്കുകയാൽ കർമ്മഗുണം ക്ഷീണിക്കും. കായികാധ്വാനം ഏറും. ബൗദ്ധിക പരീക്ഷണങ്ങളിൽ തളരും. ലഘുസാധ്യത്തിന് ഊർജ്ജം കൂടുതൽ ചെലവഴിക്കേണ്ടി വരുന്നതാണ്. പ്രതീക്ഷിച്ച ജോലി കിട്ടിയാലും ദൂരസ്ഥലം, ശമ്പളക്കുറവ് തുടങ്ങിയവ ഉണ്ടാവും. എന്നാലും സാമാന്യമായ നേട്ടങ്ങൾ കരഗതമാവാതിരിക്കില്ല. ഗുരുശുക്രന്മാരുടെ പതിനൊന്നിലെ സഞ്ചാരം ധനലാഭം, ഭോഗസിദ്ധി, പ്രശസ്തി, അംഗീകാരം എന്നിവ നേടിത്തരുന്നതാണ്. സമൂഹത്തിൽ സ്വീകാര്യതയേറും. പ്രണയ ജീവിതം വിവാഹ ജീവിതത്തിലേക്ക് പരിണമിക്കാം. കുടുംബാന്തരീക്ഷത്തിൽ സ്വസ്ഥതയുണ്ടാവും. സാമ്പത്തിക കാര്യങ്ങളിൽ തൃപ്തി ഭവിക്കും. ജന്മകേതുവും അഷ്ടമശനിയും ആരോഗ്യത്തെ ബാധിക്കാമെന്നതിനാൽ കരുതലുണ്ടാവണം.

പൂരം

ഭൗതിക സാഹചര്യങ്ങൾ ഒട്ടൊക്കെ അനുകൂലമാവും. ധനാഗമത്തിൻ്റെ വഴികൾ വളരുന്നതാണ്. ഗൃഹം മോടി പിടിപ്പിക്കും. നവീനമായിട്ടുള്ള ഗൃഹോപകരണങ്ങൾ വാങ്ങുന്നതാണ്. ബിസിനസ്സിൽ നേട്ടങ്ങൾ ഉണ്ടാവും. വിപണിയറിഞ്ഞു കൊണ്ടുള്ള തന്ത്രങ്ങൾ ഉപഭോക്താക്കളെ ആകർഷിക്കും. ഉദ്യോഗസ്ഥർക്ക് സഹപ്രവർത്തകരുമായി മുഷിയേണ്ടതായി വന്നേക്കാം. ജോലിഭാരം അധികമാവുന്നതാണ്. ചുമതലകൾ കൂടും. കാര്യതടസ്സങ്ങളെ സഹജമായ പ്രായോഗിക ബുദ്ധികൊണ്ട് മറികടക്കുന്നതാണ്. രോഗഗ്രസ്തർക്ക് ആശ്വാസം ഭവിക്കും.  സകുടുംബ യാത്രകൾ ആസൂത്രണം ചെയ്യും. കടബാധ്യതകൾ കുറെശ്ശയായി പരിഹരിക്കാനാവും.  സൗഹൃദം അനുരാഗമായി മാറാനിടയുണ്ട്. ആത്മവിശ്വാസം ഉയരുന്നതായിരിക്കും.

Also Read: കർക്കടക മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ഉത്രം

ഗുണദോഷ സമ്മിശ്രത എല്ലാക്കാര്യത്തിലും പ്രകടമാവും. ഭാവിസംബന്ധിച്ച പ്രധാനപ്പെട്ട തീരുമാനങ്ങൾ കൈക്കൊള്ളാനിടയുണ്ട്. തൊഴിൽ മാറ്റത്തിന് ഗ്രഹാനുകൂല്യം ഇല്ല. അർഹതയുള്ള അവസരങ്ങൾ വൈകാതെ വന്നെത്തുമെന്ന് പ്രതീക്ഷിക്കാം.  നിലവിലെ ജോലിയിൽ ന്യായമായ പരിഗണന കിട്ടിയേക്കില്ല. തന്മൂലം ധനക്ലേശം വരാം. മേലധികാരികൾ വിരോധത്തോടെ പെരുമാറിയെന്നുവരാം. സ്വാശ്രയ ജോലികളിൽ സമാധാനമുണ്ടാവും. ധനപരമായി നേട്ടങ്ങൾക്ക് സാധ്യതയുണ്ട്. കുടുംബ ബന്ധങ്ങളിൽ അലോസരവും സന്തോഷവും നിഴലും നിലാവുമായി മാറിമറിയും. കേതു-ചൊവ്വ- രാഹു-ശനി തുടങ്ങിയവയുടെ വിപരീതസ്ഥിതി വ്യാഴം, ശുക്രൻ, ബുധൻ തുടങ്ങിയ ഗ്രഹങ്ങൾക്ക് തരാനാവുന്ന ഗുണാനുഭവങ്ങളെ ബാധിച്ചേക്കാം. കരുതൽ എല്ലാക്കാര്യത്തിലും ഉണ്ടാവേണ്ടതുണ്ട്.

അത്തം

ആഗസ്റ്റ് പകുതി വരെ ബുധ - ആദിത്യ സഞ്ചാരം പതിനൊന്നിലാകയാൽ നേട്ടങ്ങൾ കൂടും. സ്വാധികാരത്തിന് ഇളക്കമുണ്ടാവില്ല. തൊഴിൽ തേടുന്നവർക്ക് സാഹചര്യം അനുകൂലമാവും. വേതന വർദ്ധന, ആശിച്ച ദിക്കിലേക്ക് സ്ഥലംമാറ്റം ഇവ സാധ്യതകളായിപ്പറയാം. ബൗദ്ധികമായ പ്രവർത്തനങ്ങൾ, പഠനം, ഗവേഷണം തുടങ്ങിയവയിൽ സംതൃപ്തിയുണ്ടാവും. അദ്ധ്വാനം വിലമതിക്കപ്പെടും. നവസംരംഭങ്ങൾ ബാലാരിഷ്ടകളെ അതിജീവിക്കുന്നതാണ്. രണ്ടാം പകുതിയിൽ വെല്ലുവിളികളുണ്ടാവും. കാര്യസിദ്ധിക്ക് കൂടുതൽ ഊർജ്ജവും സമയവും ചെലവഴിക്കപ്പെടുന്നതാണ്. ഉദ്യോഗസ്ഥർക്ക് സ്വസ്ഥത കുറയാം. ചൊവ്വ ജന്മരാശിയിൽ സഞ്ചരിക്കുന്നത് ക്ഷോഭത്തിന് കാരണമാകുന്നതാണ്. തർക്കങ്ങളിൽ നിന്നും ഒഴിയുന്നത് ഉചിതം. ആരോഗ്യപാലനത്തിൽ ശ്രദ്ധയുണ്ടാവണം. വരവും ചെലവും സന്തുലിതമായിരിക്കും.

ചിത്തിര

കന്നിക്കൂറുകാർക്ക് മാസത്തിൻ്റെ ആദ്യ പകുതിയും ചിങ്ങക്കൂറുകാർക്ക് മാസത്തിൻ്റെ രണ്ടാം പകുതിയും ഗുണമേറുന്നവയാവും. തൊഴിൽ രംഗത്ത് വെല്ലുവിളികൾ വരാം. ആലോചിച്ച് തീരുമാനങ്ങൾ കൈക്കൊള്ളാൻ മറക്കരുത്. തിടുക്കം ഒഴിവാക്കേണ്ടതുണ്ട്. പുതുസംരംഭങ്ങൾക്ക് മുതിരുമ്പോഴും എല്ലാവശങ്ങളും പരിഗണിക്കണം. വായ്പയിലൂടെ ലഭിക്കുന്ന ധനം കൃത്യമായ ആവശ്യങ്ങൾക്ക് വേണം ചെലവഴിക്കാൻ. അക്കാര്യത്തിൽ വ്യതിചലനം പാടില്ല. ഭൂമി സംബന്ധിച്ച വ്യവഹാരത്തിന് ചെലവധികരിച്ചേക്കും. വിദേശത്ത് തൊഴിൽ സാധ്യത തെളിയുന്നതാണ്. ബന്ധങ്ങൾ ദൃഢമാകും. സുഹൃത്തുക്കളുടെ പിന്തുണ ശക്തി പകരുന്നതാണ്. കുടുംബകാര്യങ്ങളിൽ ഏകപക്ഷീയമായ തീരുമാനങ്ങൾ നടപ്പിലാക്കുന്ന പ്രവണത ഇനിയും തുടരരുത്. കൂടിച്ചേരലുകൾ മാനസികോല്ലാസം പകരും.

ചോതി

തൊഴിൽ മുന്നേറ്റം സാധ്യമാകും. പ്രയത്നഫലം ദ്വിഗുണീഭവിക്കും. ആത്മവിശ്വാസം വളരുന്നതാണ്. തൊഴിലന്വേഷണം നേട്ടത്തിൽ കലാശിക്കും. കർമ്മരംഗത്ത് സ്വാധികാരം സ്ഥാപിക്കാനാവും. സംരംഭകർക്ക് നിശ്ചയിച്ച ലക്ഷ്യത്തിലേക്കടുക്കാൻ സാഹചര്യം അനുകൂലമായേക്കും. പഠനത്തിൽ പുരോഗതിയുണ്ടാവും. കലാപ്രവർത്തനത്തിൽആശിച്ച മാതിരി അവസരങ്ങൾ സംജാതമാകുന്നതാണ്. സമൂഹത്തിൽ സ്വാധീനമേറും.  ഗൃഹനിർമ്മാണത്തിലെ തടസ്സങ്ങൾ മാറിക്കിട്ടും. വായ്പകൾ പ്രയോജനപ്പെടുത്തും. മകളുടെ വിവാഹക്കാര്യത്തിൽ തീരുമാനം വരുന്നതാണ്.  ഭാഗ്യാനുഭവങ്ങൾ പുഷ്ടിപ്പെടും. നറുക്കെടുപ്പ്,  ചിട്ടി മുതലായവയിൽ നിന്നും പണം വന്നെത്തും.  പന്ത്രണ്ടിലെ ചൊവ്വ അലച്ചിലിനും ക്ഷോഭത്തിനും ഇടവരുത്താം. യാത്രകളിൽ കരുതൽ വേണ്ടതുണ്ട്.

വിശാഖം

മുന്നേറാനുള്ള അനുകൂല സാഹചര്യം നിലവിലുണ്ട്. ശരിയായ ആസൂത്രണവും മുന്നൊരുക്കവും നടത്തിയാൽ അല്പമായ അധ്വാനം കൊണ്ടുതന്നെ മുന്നേറാനാവും. തൊഴിൽ മേഖലയിൽ സൗഹൃദാന്തരീക്ഷം ഉണ്ടാവും. സ്വകാര്യ സ്ഥാപനത്തിൽ ജോലി ചെയ്യുന്നവർക്ക്  വേതനവർദ്ധന പ്രതീക്ഷിക്കാം. വ്യാപാരികൾക്കും വ്യവസായികൾക്ക് ലാഭം ഉയരുന്നതാണ്. പ്രശ്നങ്ങളിൽ ഒറ്റപ്പെടുകയില്ല. പിന്തുണക്കുന്നവർ കൂടുവാനിടയുണ്ട്. മകൻ്റെ വിവാഹക്കാര്യത്തിലെ അവ്യക്തത നീങ്ങുന്നതാണ്. പൂർവ്വിക സ്വത്തിൽ നിന്നും ആദായമുണ്ടാവും. ഇൻഷ്വറൻസ്, നറുക്കെടുപ്പ്, ഊഹക്കച്ചവടം ഇവയിൽ നിന്നും ധനലഭിക്കുന്നതാണ്. സുഹൃത്തുക്കളുമൊത്തുള്ള അവധിക്കാല വിനോദയാത്രയ്ക്ക് ഒരുക്കം നടത്തും. അപ്രസക്ത കാര്യങ്ങളിൽ നിന്നും വിട്ടുനിൽക്കാൻ ശ്രമിക്കണം.

Also Read: ജൂലൈ മാസത്തെ നക്ഷത്രഫലം, അശ്വതി മുതൽ രേവതി വരെ

അനിഴം

കഴിഞ്ഞ ഒന്നുരണ്ടു മാസങ്ങളെ അപേക്ഷിച്ച് മെച്ചപ്പെട്ട അനുഭവങ്ങൾ വന്നെത്തുന്നതാണ്. വിശേഷിച്ചും കർമ്മരംഗത്ത്. അടഞ്ഞ അവസരങ്ങൾ തുറക്കപ്പെടാം. വിരോധികൾ കളം വിടാനിടയുണ്ട്. സ്വന്തം കഴിവ് സ്വയം തിരിച്ചറിയും. വ്യവഹാരങ്ങളിൽ പരാജയമുണ്ടാവില്ല. ഭൂമിയിൽ നിന്നും ആദായം കൈവരുന്നതായിരിക്കും. ഏജൻസി പ്രവർത്തനങ്ങളിൽ കരുതിയതിലും ലാഭം ഭവിക്കും. കൂട്ടുബിസിനസ്സിൽ നിന്നും പിന്മാറുന്നതാണ്. ഭൗതിക താത്പര്യങ്ങളെയും ആത്മീയ സാധനകളേയും ഇണക്കുന്നതിൽ വിജയിക്കുന്നതാണ്.   വാഹനം, വീട്, ബന്ധുക്കൾ എന്നിവ സംബന്ധിച്ച ഓരോരോ പ്രശ്നങ്ങൾ വന്നുകൊണ്ടിരിക്കും. അവയും ജീവിതത്തിൻ്റെ ഭാഗമാണെന്ന സമചിത്തത അനിവാര്യമാണെന്ന ബോധം പുലർത്തേണ്ടതുണ്ട്.

തൃക്കേട്ട

അനുകൂല സാഹചര്യങ്ങൾ മങ്ങിമയങ്ങിയിട്ടാണെങ്കിലും പ്രത്യക്ഷപ്പെടുന്നതാണ്. അവയെ തെളിമയുള്ളതാക്കി പ്രയോജനപ്പെടുത്താൻ മനസ്സിന് സന്നദ്ധതയും ഉണർവ്വും വേണ്ടതുണ്ട്. കാര്യനിർവഹണത്തിൽ ആലസ്യം ഒഴിവാക്കണം. പിന്നീട്, നാളെ, മറ്റൊരിക്കൽ മുതലായ പദാവലികൾ ജീവിതനിഘണ്ടുവിൽ നിന്നും കളയേണ്ട സന്ദർഭമാണിത്. തേടുന്നവർക്ക്, തൊഴിൽ കിട്ടും. വായ്പകൾക്ക് അർഹതയുണ്ടാവും.  ഉയർന്ന പരീക്ഷകൾക്ക് നല്ല തയ്യാറെടുപ്പ് നടത്തുന്നതാണ്. ബിസിനസ്സിൽ ഉപഭോക്താക്കളുടെ ആവശ്യങ്ങൾ കണ്ടറിയുന്നതിനും അതനുസരിച്ച് നീക്കങ്ങൾ നടത്താനും കഴിയും. കടം കൊടുത്ത പണം ഭാഗികമായെങ്കിലും മടക്കിക്കിട്ടും. പിഞ്ഞിപ്പോയ ബന്ധങ്ങൾ വീണ്ടും തുന്നിച്ചേർക്കപ്പെടാം. അനുരഞ്ജനത്തിലൂടെ കുടുംബത്തിൽ വീണ്ടും സ്വൈരദീപം തെളിഞ്ഞുതുടങ്ങും.

മൂലം

ഗ്രഹങ്ങളിൽ വ്യാഴം, രാഹു എന്നിവ ഇഷ്ടഭാവങ്ങളിലാണ്. കണ്ടകശനി, ആദിത്യൻ്റെ അഷ്ടമസ്ഥിതി മുതലായവ മൂലമുള്ള ദോഷങ്ങളെ പ്രതിരോധിക്കാൻ അവമതിയാകും. ഉദ്യോഗസ്ഥർക്ക് സഹപ്രവർത്തകരുടെ സഹകരണം ലഭിക്കുകയില്ല. സ്വകാര്യ സ്ഥാപനങ്ങളിൽ അനുകൂലമല്ലാത്ത ഷിഫ്റ്റിൽ ജോലി ചെയ്യേണ്ടി വരാം. പിതാവിൻ്റെ ആരോഗ്യസ്ഥിതിയിൽ ഉത്കണ്ഠയുണ്ടാവും. പഴയ കടബാധ്യത വലയ്ക്കാനിടയുണ്ട്. ചിലപ്പോൾ ഭാഗ്യാനുഭവങ്ങൾ 'കപ്പിനും ചുണ്ടിനും ഇടയിൽ' നഷ്ടപ്പെടാം. മാസത്തിൻ്റെ രണ്ടാം പകുതിയിൽ നേട്ടങ്ങൾക്ക് സാധ്യത കാണുന്നു. സ്ഥാനലബ്ധി പ്രതീക്ഷിക്കാം. കാര്യനിർവഹണം സുഗമമാവുന്നതാണ്. കുടുംബത്തിൻ്റെ ആവശ്യങ്ങൾ നിറവേറ്റാൻ കഴിയുന്നതായിരിക്കും. ധനപരമായി സമ്മർദ്ദം അനുഭവപ്പെടില്ല.

പൂരാടം

പുരോഗതി പ്രതീക്ഷിച്ചിടത്ത് കഷ്ടിച്ച് കാര്യങ്ങൾ നടന്നുപോകും എന്ന സ്ഥിതിയുണ്ടാവും. മേലധികാരികൾ കൃത്യനിർവഹണത്തിൽ സമ്മർദ്ദം ചെലുത്താം. മനസ്സിന് സ്വസ്ഥത കുറയാനിടയുണ്ട്. ആരോഗ്യപ്രശ്നങ്ങൾ ഉപദ്രവിക്കാം. കടബാധ്യതകൾ സ്വൈരം കെടുത്തിയേക്കും. സ്വന്തം ബിസിനസ്സിൽ ലാഭം കുറയുന്നതാണ്. കെടുകാര്യസ്ഥത മൂലം നഷ്ടം വരാനുമിടയുണ്ട്.  ബന്ധുക്കൾ തമ്മിലുള്ള പ്രശ്നങ്ങളിൽ ഇടപെടരുത്.  വീട്ടിലെ ജീർണ്ണോദ്ധാരണം നീണ്ടുപോകാം. പൊതുവേ പലനിലയ്ക്കും ചെലവധികരിക്കുന്നതാണ്. മാസത്തിൻ്റെ രണ്ടാം പകുതി മുതൽ ഗുണാനുഭവങ്ങൾ പ്രതീക്ഷിക്കാം. തൊഴിൽ തേടുന്നവർക്ക് ഉചിതമായ ജോലി കിട്ടിയേക്കും. ഗാർഹികാന്തരീക്ഷം സമാധാനമുള്ളതാവും. ഭാഗ്യപുഷ്ടിയുള്ള കാലമായിരിക്കും. നവ സംരംഭങ്ങൾ തടസ്സമില്ലാതെ തുടങ്ങുവാനാവും. ന്യായമായ ധനം കൈവശമെത്തുന്നതാണ്.

ഉത്രാടം

കണക്കുകൂട്ടലുകളിൽ ചിലതൊക്കെ തെറ്റിയെന്നുവരാം. തൊഴിലിടത്തിൽ സ്വാതന്ത്ര്യം കുറയും.  സ്ഥലം മാറ്റത്തിനുള്ള  അപേക്ഷ പരിഗണിക്കപ്പെടില്ല. സ്വന്തം സ്ഥാപനങ്ങൾ നടത്തിക്കൊണ്ട് പോവുക ക്ലേശകരമാവും. കരാർ വ്യവസ്ഥകളിൽ ജോലി ചെയ്യുന്നവർക്ക് അവ പുതുക്കിക്കിട്ടുന്ന കാര്യത്തിൽ ആശങ്കയുണ്ടാവും. ജോലിയിൽ നിന്നും വിരമിച്ചവർക്ക് ആനുകൂല്യം ലഭിക്കാൻ തുടർ ശ്രമം വേണ്ടി വന്നേക്കും. സുഹൃത്തുക്കളുമായുള്ള ബന്ധം അത്ര രമ്യമാവണമെന്നില്ല. മാസത്തിൻ്റെ രണ്ടാം പകുതിയിൽ കാര്യങ്ങൾ മെച്ചപ്പെടുന്നതാണ്. ജോലിയിലെ സമ്മർദത്തിന് അയവുവരാം. കുടുംബകാര്യങ്ങളിൽ കൂടുതൽ ശ്രദ്ധ പുലർത്തുവാനാവും. രോഗക്ലേശിതർക്ക് ഫലപ്രദമായ ചികിൽസ ലഭിക്കുന്നതായിരിക്കും. വിദേശത്തുള്ളവർക്ക് നാട്ടിലേക്ക് മടങ്ങാനുള്ള അവസരം സംജാതമാകുന്നതാണ്.

തിരുവോണം

ആദിത്യൻ ഏഴിലും എട്ടിലും സഞ്ചരിക്കുന്നു. സ്വന്തം തൊഴിലിൽ പുരോഗതി നാമമാത്രമാവും. കാര്യസാധ്യം എളുപ്പമായേക്കില്ല. തുടർ ശ്രമങ്ങൾ ഏതുകാര്യത്തിനും ആവശ്യമായി വന്നേക്കും. സർക്കാരിൽ നിന്നും ലഭിക്കേണ്ട അനുമതി/ ലൈസൻസ് മുതലായവയ്ക്കായി അലച്ചിൽ വന്നെത്തും. പണച്ചെലവ് നിയന്ത്രിക്കാനാവില്ല. സ്വന്തം കാര്യങ്ങളിൽ മറ്റുള്ളവർ തീരുമാനമെടുക്കുന്ന സ്ഥിതി വരാം. സമയബന്ധിതമായി ചുമതലകൾ നിർവഹിക്കുന്നത് ക്ലേശകരമായിത്തോന്നും. നേട്ടങ്ങൾ ഉണ്ടാവുമെങ്കിലും അവയ്ക്ക് തിളക്കം കുറവായിരിക്കും. വിദേശത്ത് പോകാനാഗ്രഹിക്കുന്നവർക്ക് അതിനവസരം സംജാതമാകുന്നതാണ്. കുടുംബത്തിൻ്റെ പിന്തുണ പ്രശ്നങ്ങളിൽ കരുത്തുപകരും. മക്കൾക്ക് ശ്രേയസ്സുണ്ടാവും. പ്രണയികൾക്ക് ആഹ്ളാദിക്കാൻ സന്ദർഭം വന്നെത്തും.

അവിട്ടം

മകരക്കൂറുകാർക്ക് ലക്ഷ്യത്തിലെത്താൻ കൂടുതൽ സഞ്ചരിക്കേണ്ടി വരുന്നതാണ്. പരാശ്രയത്വം മനസ്സ് മടുപ്പിക്കും. പുതിയ സംരംഭങ്ങൾ തടസ്സപ്പെടുന്നതാണ്. അധികാരികൾ അനുകൂല നിലപാടുകൾ കൈക്കൊള്ളണമെന്നില്ല. മകൻ്റെ നിർബന്ധ ശീലം ഗാർഹികാന്തരീക്ഷത്തെ തെല്ല് കലുമാക്കാനിടയുണ്ട്. വഴിനടത്ത മൂലം ക്ലേശങ്ങളേർപ്പെടാം. ധനാഗമം ഒച്ചിൻ്റെ വേഗത്തിലായിരിക്കും. വിശ്വസ്തരിൽ നിന്നും പ്രതീക്ഷിച്ച പെരുമാറ്റം ഉണ്ടായില്ലെന്ന് വരാം. കുംഭക്കൂറുകാർക്ക് മാസത്തിൻ്റെ ആദ്യപകുതിയിൽ നേട്ടങ്ങൾക്ക് സാധ്യത കാണുന്നു. ഊഹക്കച്ചവടം കൊണ്ട് മെച്ചം വന്നെത്തുന്നതായിരിക്കും. കടബാധ്യതകൾ ഭാഗികമായി പരിഹരിക്കും. കുത്തഴിഞ്ഞുകിടക്കുന്ന സ്ഥാപനത്തെ ഒരുവിധം നേരെയാക്കുന്നതാണ്. രണ്ടാം പകുതി ഗുണദോഷസമ്മിശ്രമായിരിക്കും.

ചതയം

തൊഴിൽപരമായി ഉയർച്ചയുണ്ടാവുന്ന കാലമായിരിക്കും. ബിസിനസ്സുകാർക്ക് വലിയ ഓർഡറുകൾ ലഭിക്കുന്നതാണ്. ഉപഭോക്താക്കളെ ആകർഷിക്കാൻ കഴിയുന്ന പദ്ധതികൾ ആവിഷ്കരിക്കും. കൂടുതൽ നേരം അദ്ധ്വാനിക്കും. അഭിമുഖങ്ങളിലും മത്സരങ്ങളിലും വിജയിച്ചേക്കും. സാഹിത്യകാരന്മാർ കൂടുതൽ ഭാവനാവിലാസം പുലർത്തുന്നതാണ്. വേണ്ടപ്പെട്ടവരുടെ വിരോധം തീർക്കാൻ ആത്മാർത്ഥമായ ശ്രമങ്ങൾ നടത്തും. ആസൂത്രണ മികവ് അംഗീകരിക്കപ്പെടും. ആത്മീയ കാര്യങ്ങളിലും താല്പര്യമുണ്ടാവും. ചൊവ്വ അഷ്ടമത്തിൽ സഞ്ചരിക്കുകയാൽ ഭൂമിവ്യാപാരം തടസ്സപ്പെടാനിടയുണ്ട്. പുതിയ തലമുറയെ മനസ്സിലാക്കാൻ ശ്രമിക്കുന്നതാണ്. മകൻ്റെ ജോലിക്കാര്യത്തിൽ ശുഭവാർത്ത വന്നെത്തും. ജീവിതശൈലീരോഗങ്ങൾ നിയന്ത്രിക്കാനാവും.

പൂരൂരുട്ടാതി

ബൗദ്ധികമായ ഉണർവ്വോടുകൂടി  പ്രവർത്തിക്കും.  പ്രശ്നങ്ങളെ സമചിത്തതയോടെ നേരിടുന്നതാണ്. ചുമതലകൾ സത്യസന്ധതയോടെ നിർവഹിക്കും. പുതിയ ജോലിക്കായുള്ള ശ്രമം ഫലം കാണുന്നതാണ്. വിദേശത്ത് ഗവേഷണത്തിന് അപേക്ഷിക്കും. സാമ്പത്തിക പിരിമുറുക്കത്തിന് തത്കാലം അയവുണ്ടാവും. പൂർവ്വിക സ്വത്തുക്കൾ സംബന്ധിച്ച വ്യവഹാരത്തിൽ നിന്നും പിന്മാറിയേക്കും. പുതിയ സംരംഭങ്ങളുടെ സാങ്കേതിക കാര്യങ്ങൾ മനസ്സിലാക്കാനായി പരിശ്രമം തുടരുന്നതാണ്. ആഗസ്റ്റ് പകുതിക്കുശേഷം അലച്ചിലും കർമ്മരംഗത്ത് ഉന്മേഷക്കുറവും വരാം. ആരോഗ്യപ്രശ്നങ്ങൾക്ക് ഉടൻ വൈദ്യസഹായം തേടേണ്ടതുണ്ട്. കാര്യാലോചനകളിൽ ഉറച്ച നിലപാട് സ്വീകരിക്കുന്നതിനാൽ ശത്രുക്കൾ സംഘടിക്കാം. 

ഉത്രട്ടാതി

ആദിത്യൻ അഞ്ചിലും ആറിലും സഞ്ചരിക്കുകയാൽ വാഗ്ദാനങ്ങൾ പാലിക്കാൻ വിളംബമുണ്ടാവും.  മേലധികാരികളുടെ നിർദ്ദേശങ്ങളിൽ ചിലതെങ്കിലും പ്രാവർത്തികമാക്കാൻ കഴിഞ്ഞേക്കില്ല. ഉപജാപങ്ങളെ നേരായ വഴികളിലൂടെ നേരിടുന്നതാണ്. പൊതുപ്രവർത്തകർക്ക് എതിർപ്പേറും. ജന്മനാട്ടിലെ ക്ഷേത്ര ജീർണ്ണോദ്ധാരണത്തിന് സക്രിയമായ പങ്കുവഹിക്കുന്നതാണ്. ജീവിത പങ്കാളിയുടെ നിർദ്ദേശങ്ങൾ സ്വീകാര്യമാവും. മകളുടെ വിവാഹകാര്യത്തിൽ തീരുമാനം നീളാനിടയുണ്ട്. കുടുംബ സമേതം വിനോദയാത്രകൾ ആസൂത്രണം ചെയ്യും.  സാമൂഹ്യമാധ്യമങ്ങളിൽ പങ്കിടുന്ന അഭിപ്രായങ്ങൾക്ക് സ്വീകാര്യത ലഭിച്ചേക്കാം. സുഹൃദ്ബന്ധങ്ങൾ ദൃഢമാവും. പ്രണയകാര്യത്തിൽ വീട്ടുകാരുടെ നിലപാട് എന്താവുമെന്ന ചിന്ത ഉറക്കം കെടുത്തിയേക്കാം.

രേവതി

കാര്യനിർവഹണത്തിലെ സഹജമായിട്ടുള്ള കുശലതയും ചടുലതയും അല്പം മങ്ങാനിടയുണ്ട്. പരാശ്രയത്വം ഏറും. സ്വന്തം ബിസിനസ്സിൻ്റെ വളർച്ച അല്പം മന്ദഗതിയിലാവും. കൂടുതൽ മുതൽമുടക്കുന്നതിൽ ജാഗ്രത വേണം. വായ്പയുടെ തിരിച്ചടവിന് ക്ലേശിക്കുന്നതാണ്. ഏഴിലെ ചൊവ്വയുടെ സഞ്ചാരം ദാമ്പത്യത്തെ ക്ലേശിപ്പിക്കാം. പ്രണയികൾക്കിടയിൽ ഹൃദയൈക്യം കുറയും. പരീക്ഷക്കുള്ള തയ്യാറെടുപ്പിൽ വിദ്യാർത്ഥികൾക്ക് ആലസ്യം ഉണ്ടാവാം. മാസത്തിൻ്റെ രണ്ടാം പകുതിക്കുമേൽ ഉദ്യോഗസ്ഥർ മേലധികാരികളുടെ വിശ്വാസ്യത നേടുന്നതായിരിക്കും. ഗൃഹനിർമ്മാണത്തിൽ ത്വരിതഗതി പ്രതീക്ഷിക്കാം. സഹോദരരിൽ നിന്നും ധനലാഭം ഉണ്ടായേക്കും. മാതാപിതാക്കൾക്ക് മകളുടെ ജോലിസ്ഥലത്തേക്ക് താമസം മാറ്റേണ്ടി വരാം. പുതുതലമുറയുടെ സഹവാസം ബാല്യകാലസ്മൃതികളിലേക്ക് നയിക്കാം.

Read More: നിങ്ങളുടെ ജീവിതപങ്കാളി എങ്ങനെയുള്ള ആളാവും?