Chingam Month Horoscope: ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

Chingam Month Horoscope: 1200 കർക്കടകം 31ന്, 2025 ജൂലൈ 16 ന് ശനിയാഴ്ച രാത്രി 1 മണി 52 മിനിട്ടിന് സൂര്യൻ ചിങ്ങം രാശിയിൽ പ്രവേശിക്കുന്നു. പിറ്റേന്ന്, ആഗസ്റ്റ് 17ന്, ഞായറാഴ്ചയാണ് ചിങ്ങം ഒന്നാം തീയതി.

ആദിത്യൻ ചിങ്ങം രാശിയിൽ മകം, പൂരം, ഉത്രം ഞാറ്റുവേലകളിൽ സഞ്ചരിക്കുന്നു. ചിങ്ങം 6/7 തീയതികളിൽ കറുത്തവാവ് വരുന്നു. ചിങ്ങം 22നാണ് വെളുത്ത വാവ്. അന്നുരാത്രി ചതയം നക്ഷത്രത്തിൽ ചന്ദ്രഗ്രഹണവും ഭവിക്കുന്നുണ്ട്.  

ശുക്രൻ ചിങ്ങം 5ന് മിഥുനം രാശിയിൽ നിന്നും കർക്കടകം രാശിയിലേക്ക് പ്രവേശിക്കുന്നു. ചിങ്ങം 29 ന് ശുക്രൻ ചിങ്ങം രാശിയിലേക്കും സംക്രമിക്കുന്നു. ബുധൻ മാസാദ്യം കർക്കടകം രാശിയിലാണ്. ചിങ്ങം 14ന് ചിങ്ങം രാശിയിലേക്ക് പ്രവേശിക്കുന്നു. ചിങ്ങം 16 മുതൽ കന്നി 16 വരെ ഒരുമാസക്കാലം ബുധന് മൗഢ്യകാലമാണ്. ചിങ്ങം 30ന് ബുധൻ തൻ്റെ ഉച്ചരാശിയായ കന്നിയിലേക്ക് സംക്രമിക്കുന്നുണ്ട്.

ചൊവ്വ മാസാരംഭത്തിൽ കന്നിരാശിയിലാണ്. ചിങ്ങം 18 വരെ അത്തം നക്ഷത്രത്തിലും തുടർന്ന് ചിത്തിരയിലും സഞ്ചരിക്കുന്നു. ചിങ്ങം 28ന് ചൊവ്വ തുലാത്തിലേക്ക് പ്രവേശിക്കുകയാണ്. 

ശനി മീനം രാശിയിൽ ഉത്രട്ടാതി നക്ഷത്രത്തിൽ വക്രഗതി തുടരുന്നു. വ്യാഴം മിഥുനം രാശിയിൽ പുണർതം നക്ഷത്രത്തിൽ സഞ്ചരിക്കുന്നു. രാഹുവും കേതുവും യഥാക്രമം കുംഭം-ചിങ്ങം രാശികളിലാണ്. രാഹു പൂരരുട്ടാതി രണ്ടാം പാദത്തിലും കേതു പൂരം ഒന്നാം പാദത്തിലും പിൻഗതിയായി സഞ്ചരിക്കുന്നു.

ഈ ഗ്രഹനിലയെ മുൻനിർത്തി അശ്വതി മുതൽ രേവതി വരെയുള്ള 27 നാളുകാരുടെ 1201 ചിങ്ങമാസത്തിലെ നക്ഷത്രഫലം ഇവിടെ അപഗ്രഥിക്കുന്നു.

അശ്വതി

ആദിത്യൻ അഞ്ചിലും ചൊവ്വ ആറിലും ശനി പന്ത്രണ്ടിലും സഞ്ചരിക്കുകയാൽ ഗുണദോഷസമ്മിശ്രമായ കാലമാണ്. പുതിയ കാര്യങ്ങൾ പഠിക്കാൻ സമയം കണ്ടെത്തും. പ്രജ്ഞാശക്തി അവസരോചിതമായി പ്രവർത്തിക്കുന്നതാണ്.  ചുമതലകൾ നിർവഹിക്കുന്നതിൽ മേലധികാരികളുടെ ഇടപെടലുകൾ ഉണ്ടായേക്കാം. പുതിയ ജോലി തേടുന്നവർക്ക് അകലങ്ങളിൽ അവസരം ലഭിക്കാനിടയുണ്ട്. സുഹൃത്തുക്കളുടെ ഗാർഹിക പ്രശ്നങ്ങൾക്ക് പരിഹാരം നിർദ്ദേശിക്കുന്നതാണ്. ബിസിനസ്സിൽ പാർട്ണർഷിപ്പിന് മുതിരുന്നത് ഇപ്പോൾ ഗുണം ചെയ്തേക്കില്ല. പ്രണയികളുടെ ബന്ധം കൂടുതൽ ഹൃദയപൂർവ്വകമാവും. അറ്റകുറ്റപ്പണി കഴിഞ്ഞ വീട്ടിൽ താമസമാരംഭിക്കാൻ സാധിച്ചേക്കും. രോഗഗ്രസ്തർക്ക് ആശ്വാസം ലഭിക്കുന്നതാണ്. ഏഴരശ്ശനി അലച്ചിലിന് ഇടവരുത്താം.

ഭരണി

പഞ്ചമഭാവത്തിൽ ആദിത്യൻ സ്വക്ഷേത്ര ബലവാനാവുകയാൽ ബുദ്ധിശക്തിയാൽ നേട്ടങ്ങളുണ്ടാവും. സമ്പാദ്യം ഉയരുന്നതായിരിക്കും. തൊഴിലിൽ അഭ്യുദയം ഉണ്ടാവുന്ന കാലമാണ്. പ്രൊജക്ടുകൾക്ക് സ്വീകാര്യത കിട്ടും. നിഗമനങ്ങളും നിരീക്ഷണങ്ങളും ശരിയെന്ന് തെളിയിക്കപ്പെടും. കണക്കുകൂട്ടലുകൾ ശരിയായ് വരാം. മക്കൾക്ക് നാനാതരത്തിൽ ശ്രേയസ്സുണ്ടാവുന്നതാണ്. ജന്മനാട്ടിലേക്ക് പോകാനും പിതൃമാതൃ ബന്ധുക്കളെ സന്ദർശിക്കാനും സാഹചര്യം ഉരുത്തിരിയും. ഭൂമി/ വസ്തു/ ഗൃഹം ഇവ സംബന്ധിച്ച ചില തീരുമാനങ്ങൾ കൈക്കൊള്ളാനിടയുണ്ട്. എതിർക്കുന്നവരെ തമസ്കരിക്കാനുള്ള മനശ്ശക്തി നേടുന്നതാണ്. പഠിപ്പിൽ ഉന്നമനം ഉണ്ടാവും. ചെറിയ ആരോഗ്യപ്രശ്നങ്ങൾ വലയ്ക്കാം. ഏഴരശ്ശനി തടസ്സങ്ങളുടെ രൂപം കൈക്കൊള്ളാം.

കാർത്തിക

നിലവിലെ സാഹചര്യങ്ങൾ തുടരുന്നതാണ്. വലിയ മാറ്റം തൊഴിൽ രംഗത്ത് പ്രതീക്ഷിക്കേണ്ടതില്ല. എന്നാൽ പ്രൈവറ്റ് സ്ഥാപനത്തിൽ ഉത്സവ സീസൺ പ്രമാണിച്ച് താത്കാലിക ജോലി / ദിവസ വേതന ജോലി ലഭ്യമാവും.  സംരംഭകർക്ക് ചില നേട്ടങ്ങൾ വന്നെത്തും.  ബാങ്കിൽ നിന്നും വായ്പ ലഭിക്കുവാനിടയുണ്ട്. കടബാധ്യത പരിഹരിക്കാൻ വഴി തെളിയുന്നതാണ്. പുതുസൗഹൃദങ്ങൾ ഉദയം ചെയ്യും.  ബന്ധുഭവനം സന്ദർശിച്ച് രോഗികൾക്ക് ആശ്വാസം പകരും. ജന്മനാട്ടിൽ വരാൻ അമിത തുക നൽകി ടിക്കറ്റെടുക്കുവാൻ നിർബന്ധിതരാവും. മകൻ്റെ ശാഠ്യത്തിന് വഴങ്ങി ഇരുചക്ര വാഹനം വാങ്ങാൻ ഒരുങ്ങും. ചിരകാലാഭിലാഷിതമായ ഗൃഹനിർമ്മാണം സംബന്ധിച്ച ചർച്ചകൾ കുടുംബത്തിൽ സജീവമായേക്കും.

രോഹിണി

ആദിത്യൻ നാലാം ഭാവത്തിൽ സ്വക്ഷേത്രത്തിൽ സഞ്ചരിക്കുകയാൽ മനസ്സിന് ദൗർബല്യം ഉണ്ടാവില്ല. എല്ലാവശങ്ങളും ആലോചിച്ച് നല്ല തീരുമാനങ്ങൾ കൈക്കൊള്ളാനാവും. തിരുത്തേണ്ടവ തിരുത്താനുള്ള ആർജ്ജവം കൈവരുന്നതാണ്. തൊഴിലിൽ നിന്നുള്ള ആദായം വിപുലമാവും. സ്വന്തം ഫ്ളാറ്റിൽ താമസമാരംഭിക്കാൻ കഴിഞ്ഞേക്കും. നാട്ടിലെ പൂർവ്വിക സ്വത്ത് വിറ്റ തുകയുപയോഗിച്ച് കടം വീട്ടുന്നതായിരിക്കും. മത്സരാധിഷ്ഠിതമായ വലിയ കരാർ പണികൾ നേടുന്നതാണ്. കുടുംബത്തിലെ സ്ത്രീകളുടെ ആവശ്യങ്ങൾക്ക് പൂർണ്ണപിന്തുണ  നൽകുന്നതായിരിക്കും. മാർക്കറ്റിംഗ് മേഖലയിൽ ഉണർവുണ്ടാവുന്നതാണ്. ബന്ധുവിൻ്റെ രോഗാവസ്ഥയറിഞ്ഞ് ചികിൽസയ്ക്ക് ഏർപ്പാടാക്കും. അനുരാഗത്തിൽ കയ്പുരസം അനുഭവപ്പെടാം.

മകയിരം

കാര്യതടസ്സവും ക്ലേശങ്ങളും കഴിഞ്ഞകാല കഥകളായി മാറുന്നതാണ്. ഗുണാനുഭവങ്ങളുടെ പുതിയ സൂര്യോദയം അനുഭവത്തിൽ വരും.  ഔദ്യോഗികമായി അനുകൂലമായ അന്തരീക്ഷമാവും. സ്വാധീനത വർദ്ധിക്കുന്നതാണ്.  തൊഴിൽ തേടുന്നവർക്ക് കാത്തിരുന്ന അവസരങ്ങൾ മുന്നിലെത്തും. ബിസിനസ്സിൽ കൂടുതൽ കരുത്താർജ്ജിക്കും. രാഷ്ട്രീയത്തിലും പൊതുപ്രവർത്തനത്തിലും മുന്നേറ്റമുണ്ടാവും.  ഗൃഹനിർമ്മാണം പൂർത്തിയാക്കി കേറിത്താമസം സാധ്യമായേക്കും.  ഉയർന്നതരം ഇലക്ട്രോണിക് ഉല്പന്നങ്ങൾ മാസവായ്പ വ്യവസ്ഥയിൽ സ്വന്തമാക്കുന്നതാണ്. പ്രണയികൾക്ക് വിവാഹ ജീവിതത്തിലേക്ക് പ്രവേശിക്കാൻ സാഹചര്യം സംജാതമാകും. ജീവിതശൈലീ രോഗങ്ങളുടെ കാര്യത്തിൽ കരുതൽ ആവശ്യമാണ്.

Also Read: ചൊവ്വ മാറുന്നു, കന്നിരാശിയിലേക്ക്; അശ്വതി മുതൽ രേവതി വരെ

തിരുവാതിര

മൂന്നാംഭാവത്തിൽ സഞ്ചരിക്കുന്ന ആദിത്യൻ വേണ്ടുവോളം ആത്മവിശ്വാസം പകരും. ഉദ്യോഗസ്ഥർക്ക് മേലധികാരികളുടെയും സഹപ്രവർത്തകരുടെയും മുഴുപിന്തുണയും ലഭിക്കുന്നതാണ്. പുതിയ കാര്യങ്ങൾ അറിയാനും പ്രാവർത്തികമാക്കാനും ഊർജ്ജം ലഭിച്ചേക്കും. പ്രൈവറ്റ് സ്ഥാപനത്തിൽ നിയമനം കിട്ടും. വിദേശത്ത് ജോലി/ പഠനം എന്നിവയ്ക്കുള്ള തടസ്സം നീങ്ങുന്നതാണ്. കണ്ടകശ്ശനിക്കാലമെങ്കിലും സ്വാശ്രയ തൊഴിലിൽ മുന്നോട്ടു പോക്ക് സാധ്യമാവും. ജന്മരാശിയിലും രണ്ടിലും ഒക്കെയായി സഞ്ചരിക്കുന്ന ശുക്രൻ സുഖഭോഗങ്ങൾക്ക് കാരണമാകും. രാഷ്ട്രീയ കാര്യങ്ങളിൽ നിന്നും അകലം പാലിക്കുകയാവും ഉചിതം. അനുരാഗം പുഷ്ടിപ്പെടും. വിവാഹ തീരുമാനം കൈക്കൊള്ളുവാൻ ധൈര്യം വരും. വീട്ടുവാടക ഉയർത്തപ്പെടും. വിശ്രമിക്കാൻ സമയം കുറയുന്നതാണ്.

പുണർതം

പ്രധാന ചുമതലകൾ ഏറ്റെടുക്കാനും കൃത്യതയോടെ പൂർത്തിയാക്കാനും സാധിക്കുന്നതാണ്. ബാങ്ക് വായ്പയുടെ സഹായത്തോടെ സ്വാശ്രയ ബിസിനസ്സ് വിപുലീകരിക്കാൻ കഴിയും. പുതിയ പ്രൊജക്ടുകൾ സഹപ്രവർത്തകരുടെ നിർദ്ദേശങ്ങൾ കൈക്കൊണ്ട്  തയ്യാറാക്കും. ഭാവികാര്യങ്ങളെക്കുറിച്ച് വ്യക്തമായ തീരുമാനങ്ങൾ രൂപപ്പെടുന്നതാണ്. കുടുംബത്തിൽ സമാധാനമുണ്ടാവും. ദാമ്പത്യത്തിൽ ഐക്യം ദൃഢമാവും. ഉന്നത വ്യക്തികളുടെ പിന്തുണ ലഭിക്കുന്നതാണ്. മത്സരങ്ങൾ/ അഭിമുഖ പരീക്ഷകൾ എന്നിവയിൽ ശോഭിക്കാനാവും. പുതിയ വാഹനം വാങ്ങാൻ സാധ്യതയുണ്ട്. ഫ്ളാറ്റിൻ്റെ മോടിപിടിപ്പിക്കൽ പൂർത്തിയാവും. ചെറുപ്പക്കാരുടെ വിവാഹ കാര്യത്തിൽ മാതാപിതാക്കൾ ഊർജ്ജിതമായ അന്വേഷണം തുടരും. സാമ്പത്തികമായി സംതൃപ്തിയുണ്ടാവും.

പൂയം

നക്ഷത്രാധിപനായ ശനി വക്രസഞ്ചാരത്തിലാകയാൽ മുന്നോട്ടുവെച്ച കാൽ പിറകോട്ടെടുക്കാനിടവരും. പ്രവർത്തന മേഖല  മന്ദഗതിയിലാവാം. പുതിയ സംരംഭങ്ങൾ തുടങ്ങുവാൻ ഓരോ തടസ്സങ്ങൾ പ്രത്യക്ഷപ്പെടും. ഇപ്പോൾ നിലവിലെ തൊഴിൽ ഉപേക്ഷിക്കുന്നത് കരണീയമല്ല. ഭൂമിവ്യാപാരം ആദായകരമായേക്കും. സകുടുംബം  അവധിക്കാല ഉല്ലാസയാത്ര നടത്തുന്നതിന് സാഹചര്യം ഉണ്ടാവും. വാക്കുകൾക്ക് ആജ്ഞാശക്തി വരുന്നതാണ്. പാർട്ണർഷിപ്പിൽ ചെറിയ ആദായം ഉണ്ടാവും. ശുക്രൻ ജന്മരാശിയിൽ സഞ്ചരിക്കുകയാൽ മനസ്സ് പ്രണയാർദ്രമാവും. ജാമ്യം നിൽക്കുന്നതിൽ കരുതലുണ്ടാവണം. വിദ്യാഭ്യാസവായ്പ അനുവദിക്കപ്പെടും. അന്യദേശത്തു നിന്നും നാട്ടിലെത്താനാവും. ഫ്ളാറ്റ് വാങ്ങുന്ന കാര്യത്തിൽ കുടുംബത്തിൽ അനൈക്യം തലയെടുക്കുന്നതാണ്.

Also Read:നിങ്ങളുടെ ഇന്നത്തെ ദിവസം, രാശി ഫലം

ആയില്യം

രണ്ടിൽ ആദിത്യൻ സ്വക്ഷേത്ര ബലവാനായി സഞ്ചരിക്കുന്നു. വിദ്യാഭ്യാസത്തിൽ പുരോഗതിയുണ്ടാവും. തൊഴിലന്വേഷണം പാഴാവില്ല. കൃത്യമായ ആസൂത്രണം ജീവിത പുരോഗതിക്ക് തുണയാകും. കുടുംബത്തിൻ്റെ മനസ്സറിഞ്ഞ് പെരുമാറും.രാഷ്ട്രീയ എതിരാളികളെ നിഷ്പ്രഭമാക്കുംവിധമുള്ള കരുനീക്കങ്ങൾ നടത്താനാവും. ഒമ്പതിലെ ശനിയും എട്ടിലെ രാഹുവും ഭാഗ്യഭ്രംശങ്ങൾ ഉണ്ടാക്കിയേക്കാം. ചില തിരിച്ചടികൾ വന്നുകൂടായ്കയില്ല. അകാരണമായ ഭയം തോന്നുന്നതാണ്. സമയബന്ധിതമായി ദൗത്യങ്ങൾ പൂർത്തിയാക്കാൻ ക്ലേശമുണ്ടാവും. എങ്കിലും ആത്മവിശ്വാസം വേഗം തന്നെ പുലർത്തും. സ്വന്തം തൊഴിലിൽ വരുമാന മാർഗം ഉയർത്താൻ ഭാഗികമായി സാധിക്കും. സ്നേഹബന്ധം ദൃഢമാവുന്നതാണ്.

മകം

ആദിത്യൻ ജന്മരാശിയിൽ കേതുവിനൊപ്പം സഞ്ചരിക്കുകയാൽ പലതരം സമ്മർദ്ദങ്ങളുണ്ടാവും. ചെറിയ കാര്യങ്ങൾ നേടാൻ സമയ / ഊർജ്ജ വ്യയം ഉണ്ടാവുന്നതാണ്. കൃത്യനിഷ്ഠ പലപ്പോഴും പാളിപ്പോവും. വ്യാഴം പതിനൊന്നാൽ സഞ്ചരിക്കുകയാൽ സാമ്പത്തിക കാര്യങ്ങളിൽ ഗുണം കുറയില്ല. ധനസ്രോതസ്സുകൾ തുറന്നു കിട്ടും. സ്വകാര്യ സ്ഥാപനത്തിൽ ജോലിയിൽ പ്രവേശിക്കുവാനാവും. ഉദ്യോഗസ്ഥരെ കാര്യതടസ്സങ്ങൾ വലയ്ക്കും. ഉത്സവാഘോഷങ്ങൾ മുൻനിർത്തി ബിസിനസ്സിൽ കൂടുതൽ ഉല്പന്നങ്ങൾ സമാഹരിക്കാൻ സാധിക്കുന്നതാണ്. ദാമ്പത്യത്തിൽ കലഹങ്ങൾ തലപൊക്കും. പിണക്കങ്ങൾ രാജിയായേക്കില്ല. പ്രണയികൾക്കും ഇച്ഛാഭംഗം സാധ്യതയാണ്. യാത്രകൾ ഗുണകരമാവുന്നതാണ്.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

പൂരം

ജന്മരാശിയിൽ ആദിത്യനും ജന്മനക്ഷത്രത്തിൽ കേതുവും രണ്ടാമെടത്തിൽ ചൊവ്വയും സഞ്ചരിക്കുകയാൽ പതിനൊന്നാം വ്യാഴത്തിൻ്റെ ഗുണാനുഭവങ്ങൾ കുറയാം. ന്യായമായവ നേടാൻ സമ്മർദ്ദം വേണ്ടതായി വന്നേക്കും. ധനവരവ് തടസ്സപ്പെടുന്നതാണ്. അദ്ധ്വാനഭാരം അധികരിക്കും. പുതിയ തൊഴിലിൽ പ്രവേശിക്കാനാവും. അഷ്ടമശനി ആരോഗ്യത്തെ ബാധിക്കാനിടയുള്ളതിനാൽ കരുതൽ വേണം. ഏഴിലെ രാഹു ജീവിത പങ്കാളിക്ക് ക്ലേശങ്ങളേകും. ചെറുപ്പക്കാരുടെ വിവാഹ കാര്യത്തിൽ അച്ഛനമ്മമാർ അന്വേഷണം തുടരേണ്ടതുണ്ട്. അനുരാഗപാതയിൽ കല്ലും മുള്ളും നിറയുന്നതാണ്. പ്രവാസം നയിക്കുന്നവർക്ക് നാട്ടിലെത്താനാവും. ജന്മനാട്ടിൽ ഗൃഹം നിർമ്മിക്കുക എന്ന സ്വപ്നം യാഥാർത്ഥ്യത്തിലേക്ക് കൂടുതലടുക്കും.

ഉത്രം

നേട്ടങ്ങളും കോട്ടങ്ങളും മാറിമാറി കടന്നുവരാം. നക്ഷത്രനാഥനായ ആദിത്യന് സ്വക്ഷേത്രബലം വരുന്നത് ആത്മവിശ്വാസമുണ്ടാക്കും. മാസാദ്യം മുഴുവൻ ജന്മനക്ഷത്രത്തിൽ ചൊവ്വ സഞ്ചരിക്കുന്നതിനാൽ ക്ഷോഭം ഉയരാനിടയുണ്ട്. രക്തസമ്മർദ്ദം പോലുള്ള രോഗങ്ങൾക്ക് ചികിൽസ വേണ്ടിവരാം. ചിങ്ങക്കൂറുകാർക്ക് ജോലിയിൽ ഉയർച്ച, ബിസിനസ്സിലൂടെ സാമ്പത്തികോന്നതി എന്നിവ സാധ്യതകൾ. മുൻപ് ശ്രമിച്ചിട്ടും പരാജയപ്പെട്ടവ ഇപ്പോൾ അനായാസം നേടാനിടയുണ്ട്.  ധനാഗമം സുഗമമായേക്കും. കന്നിക്കൂറുകാർക്ക് യാത്രകൾ കൂടുന്നതാണ്. ന്യായമായ കാര്യങ്ങൾ നേടാൻ സമ്മർദ്ദം ചെലുത്തേണ്ടി വരും. വീടുപണിയിൽ മന്ദഗതി ഭവിക്കാം. ദാമ്പത്യത്തിൽ ശീതസമരം രൂപപ്പെടും. കലാപ്രവർത്തകർക്ക് സ്വീകാര്യത കൈവരുന്നതാണ്. ബന്ധുസമാഗമങ്ങൾക്ക് നേതൃത്വം വഹിക്കും.

അത്തം

ആദിത്യനും കേതുവും പന്ത്രണ്ടിലും ബുധശുക്രന്മാർ പതിനൊന്നിലും ചൊവ്വ ജന്മനക്ഷത്രത്തിലും സഞ്ചരിക്കുകയാൽ പലതരം ചെലവുകൾ വന്നെത്തും. 
അവയിൽ ആഢംബര വസ്തുക്കൾ വാങ്ങുക മൂലമുള്ള വ്യയവും ഉണ്ടാവുന്നതാണ്. ക്ഷോഭവും അനാവശ്യമായ തിടുക്കവും നിയന്ത്രിക്കണം. പുതിയ സൗഹൃദങ്ങൾ ഉണ്ടാവും. ബന്ധുബലം വർദ്ധിക്കും. തൊഴിലിൽ പുതിയ വഴിത്താര സൃഷ്ടിക്കുന്നതാണ്. എന്നാൽ നിലവിലെ തൊഴിൽ ഉപേക്ഷിക്കുന്നത് കരണീയമല്ല. സമൂഹത്തിൽ ബഹുമാനിക്കപ്പെടും. കലാപ്രവർത്തനം അഭംഗുരമായി മുന്നേറുന്നതാണ്. ഉദ്യോഗസ്ഥർക്ക് കൂടുതൽ നേരം തൊഴിലിടത്തിൽ ചെലവഴിക്കേണ്ടി വന്നേക്കും. പ്രണയികൾക്ക് സന്തോഷം കുറയാം. ദാമ്പത്യത്തിൽ അനുരഞ്ജനപ്പാത അനുവർത്തിക്കണ്. സാഹസകർമ്മങ്ങൾ ഒഴിവാക്കേണ്ടതുണ്ട്.

ചിത്തിര

തുലാക്കൂറുകാർക്ക് നേട്ടങ്ങൾക്കാവും മുൻതൂക്കം. പതിനൊന്നിലെ ആദിത്യൻ തൊഴിൽരംഗത്ത് വിജയിക്കാൻ വഴിയൊരുക്കും.  ഉന്നതരുടെ പിന്തുണ കരുത്താകും. മത്സരങ്ങളിൽ വിജയിക്കുന്നതാണ്. ആഗ്രഹിച്ച ജോലിയിൽ പ്രവേശിക്കാൻ തടസ്സങ്ങളുണ്ടാവില്ല. ഒമ്പതിലെ വ്യാഴം ഭാഗ്യപുഷ്ടിയുണ്ടാക്കും. പ്രൊമോഷൻ, ഇൻക്രിമെൻ്റ്, ബോണസ് എന്നിവ സാധ്യതകളായി പറയാം. വിദ്യാർത്ഥികൾക്ക്  പഠനത്തിൽ മുഴുശ്രദ്ധയും അർപ്പിക്കാനാവും. പ്രണയികൾക്ക് ആഹ്ളാദിക്കാൻ സന്ദർഭം ഒത്തുവരും. വിവാഹ കാര്യത്തിലെ അനിശ്ചിതത്വം നീങ്ങുന്നതാണ്.  കുടുംബത്തിൻ്റെ  സഹകരണം ജീവിത യാത്രയിൽ വിലപ്പെട്ടതായി അനുഭവപ്പെടും.  ഭൂമി വിൽക്കാൻ തടസ്സങ്ങളുണ്ടാവും.  യാത്രാക്ലേശത്തിന് സാധ്യത കാണുന്നു. ശത്രുഭയം ഉണ്ടാവാം. ചെലവുകൾ ദുർവ്യയമാവാനിടയുണ്ട്.

ചോതി

തൊഴിൽ രംഗത്ത് പുരോഗതി പ്രകടമാവും. മനസ്സിൻ്റെ ചാഞ്ചാട്ടം മാറുന്നതാണ്.  നിലവിലെ ജോലിയിൽ തുടരാൻ തീരുമാനിച്ചേക്കും. പ്രൈവറ്റ് സ്ഥാപനങ്ങളിൽ ജോലിചെയ്യുന്നവർക്ക് സ്ഥാനക്കയറ്റം, ഇൻക്രിമെൻ്റ് ഇത്യാദികൾക്ക് സാധ്യതയുണ്ട്. ഭാഗ്യപരീക്ഷണങ്ങളിൽ വിജയമുണ്ടാവും . ചിട്ടി, നറുക്കെടുപ്പ്, ഇൻഷ്വറൻസ് ഇവകളിൽ നിന്നും ചെറിയ ആദായമെങ്കിലും പ്രതീക്ഷിക്കാം. വിവിധ കലാമേഖലകളിൽ പ്രവർത്തിക്കുന്നവർക്ക് കൂടുതൽ അവസരങ്ങൾ തുറന്നുകിട്ടാനിടയുണ്ട്. ഭൂമിവില്പനയിൽ തടസ്സമുണ്ടായേക്കാം. സഹോദരരുമായി കലഹമുണ്ടാക്കാതെ കഴിക്കണം. മക്കളുടെ ഭാവികാര്യങ്ങളിൽ ശ്രദ്ധാപൂർവ്വം തീരുമാനങ്ങൾ കൈക്കൊള്ളേണ്ടതുണ്ട്. ഗവേഷണത്തിനായി യാത്ര ചെയ്യേണ്ടതായി വരുന്നതാണ്.

വിശാഖം

ധാരാളം അവസരങ്ങൾ സംജാതമാകുന്ന കാലഘട്ടമാണ്. ഉദ്യോഗത്തിലുള്ളവർക്ക് അധികാരമുള്ള ചുമതലകൾ കിട്ടാം. തൊഴിൽ രംഗത്തും വ്യക്തിജീവിതത്തിലും സമ്മർദ്ദം കുറയുന്നതാണ്. വാഗ്ദാനങ്ങൾ ഭംഗിയായി നിർവഹിക്കാൻ കഴിഞ്ഞേക്കും. ജോലിയിൽ നിന്നും വിരമിച്ചവർക്കും തുടർ അവസരങ്ങൾ തേടി വരാം. പന്ത്രണ്ടിലെ ചൊവ്വ പ്രവാസ സാധ്യതകൾ സൃഷ്ടിച്ചേക്കും. മകളുടെ ഒപ്പം ജോലിസ്ഥലത്തിനടുത്ത് താമസം മാറാനിടയുണ്ട്. മകൻ്റെ പഠിപ്പിൽ ഉൽക്കണ്ഠകൾ ഉണ്ടാവാം.  രാഹുവിൻ്റെ പഞ്ചമസ്ഥിതി ചില മാനസിക ക്ലേശങ്ങൾ സൃഷ്ടിക്കും. വീടു പണിയിൽ മന്ദഗതി ഉണ്ടാവുന്നതാണ്. ബന്ധുക്കളിൽ നിന്നും ധനസഹായം പ്രതീക്ഷിക്കാം. ജീവിത പങ്കാളിയുടെ ആരോഗ്യ കാര്യത്തിൽ കരുതൽ വേണം. 

അനിഴം

പത്താം ഭാവത്തിലെ ആദിത്യനും പതിനൊന്നിലെ ചൊവ്വയും പ്രവർത്തന മേഖലയിൽ വിജയം കൊണ്ടുവരും. തൊഴിലന്വേഷകർ നിരാശപ്പെടേണ്ടി വരില്ല. ആശാവഹമായ പുരോഗതി ബിസിനസ്സിൽ ദൃശ്യമാവുന്നതാണ്. ഉദ്യോഗസ്ഥരുടെ നിലപാടുകൾ സഹപ്രവർത്തകർക്ക് സ്വീകാര്യമാവും. കുടുംബത്തിൽ അംഗീകാരം ലഭിക്കും. എതിർക്കുന്നവരെ തമസ്കരിക്കും. ഉത്സവാഘോഷങ്ങളിൽ തൃപ്തിയുണ്ടാവും. മക്കളുടെ കാര്യത്തിൽ ശ്രദ്ധയുണ്ടാവണം. അവരുടെ ശാഠ്യങ്ങൾ സ്വസ്ഥത ഇല്ലാതാക്കാം. ഊഹക്കച്ചവടത്തിൽ ചെറിയ നഷ്ടം വരാം. ബന്ധുക്കളുടെ പ്രശ്നങ്ങൾ പരിഹരിക്കാൻ മുൻകൈയെടുക്കും.  കടബാധ്യതകൾ കൂടാതിരിക്കാൻ സാമ്പത്തിക അച്ചടക്കം അനിവാര്യമാണ്. വ്യാപാര യാത്രകൾ ഫലപ്രദമാവും. ചെറുപ്പക്കാരുടെ വിവാഹകാര്യത്തിൽ തീരുമാനം നീളാം.

തൃക്കേട്ട

പത്താം ഭാവത്തിൽ സ്വക്ഷേത്രബലവാനായ ആദിത്യൻ്റെ സഞ്ചാരം  കർമ്മപുഷ്ടിയെ കാണിക്കുന്നു. തൊഴിൽ തേടുന്നവർക്ക് പുതുജോലിയിൽ പ്രവേശിക്കാനാവും. പതിനൊന്നിലെ ചൊവ്വ കർമ്മം ലാഭകരമാവും എന്നും വ്യക്തമാക്കുന്നു. ശത്രുവിജയം സാധ്യമാവുന്നതാണ്.  ഭൂമി വിൽക്കാനും നല്ല ലാഭം കിട്ടാനും സാധ്യത കാണുന്നു. സഹോദരാനുകൂല്യവും വന്നെത്തുന്ന കാലമാണ്. പ്രണയപുഷ്പം വിടർന്ന് സൗരഭ്യം ചൊരിയാൻ സാധ്യതയുണ്ട്. വ്യാഴാനുകൂല്യമില്ലാത്തതിനാൽ ചില കഷ്ടനഷ്ടങ്ങളും കൂടി വന്നേക്കാം. നാലാം ഭാവത്തിലെ രാഹുസ്ഥിതി സുഹൃത്തുക്കളുടെ കാര്യത്തിൽ കരുതൽ പുലർത്തണം എന്നതിൻ്റെ സൂചനയാണ്. യാത്രകൾ പുതിയ അനുഭവങ്ങൾ സൃഷ്ടിക്കും. ഓഫീസോ വീടോ വാഹനമോ മോടിപിടിപ്പിക്കാൻ പണച്ചെലവുണ്ടാവുന്നതാണ്.

Also Read: 'അച്ഛനെയാണെനിക്കിഷ്ടം...' അച്ഛനും മക്കളും ജ്യോതിഷവും

മൂലം

ആദിത്യൻ ഭാഗ്യഭാവത്തിൽ സ്വക്ഷേത്രസ്ഥനാവുന്നത് ഭാഗ്യപുഷ്ടിക്ക് കാരണമാവാം. നിഷേധിക്കപ്പെട്ട അവസരങ്ങൾ തിരികെ ലഭിക്കാനിടയുണ്ട്. 
പുതിയ ജോലിയിൽ പ്രവേശിക്കുന്നതാണ്.  തൊഴിലിടത്തിൽ അംഗീകാരം കൈവരും. ബഹുകർമ്മങ്ങളിൽ മുഴുകുമ്പോഴും പ്രസരിപ്പ് നിലനിർത്തും. നറുക്കെടുപ്പ്, ചിട്ടി,ഇൻഷ്വറൻസ് ഇവകളിൽ ആദായം പ്രതീക്ഷിക്കാം. ജീവകാരുണ്യ പ്രവർത്തനത്തിന് സമയം കണ്ടെത്തും. ഭാവിയിൽ പ്രയോജനം ചെയ്യുന്ന നിക്ഷേപങ്ങൾ നടത്താനായേക്കും. ജീവിത പങ്കാളിയുടെ ഓൺലൈൻ ബിസിനസ്സ് വിപുലീകരിക്കാൻ ശ്രമിക്കുന്നതാണ്. ഗവേഷകർക്കും ശാസ്ത്രജ്ഞർക്കും തിളക്കമുള്ള നേട്ടങ്ങൾ കൈവരിക്കാനാവും. പിതാവിന് പ്രശസ്തിയുണ്ടാവുന്ന കാലമായിരിക്കും. കുടുംബ ക്ഷേത്രത്തിൽ സമർപ്പണങ്ങൾ നിർവഹിക്കാനാവും.

പൂരാടം

ഗ്രഹങ്ങളുടെ അനുകൂലസ്ഥിതിയാൽ ജീവിതത്തിൽ പുരോഗതിയുണ്ടാവും. കഷ്ടസ്ഥിതിയിൽ നിന്നും സന്തോഷ സാഹചര്യങ്ങളിലേക്ക് ഉയർത്തപ്പെടുന്നതാണ്. ജോലിയിൽ അഭ്യുദയം സ്വാഭാവികമാവും. തൊഴിൽ തേടിയുള്ള അലച്ചിൽ അവസാനിക്കും. ബിസിനസ്സ് രംഗം സക്രിയമാവുന്നതാണ്. ധനപരമായ സമ്മർദ്ദങ്ങൾ കുറഞ്ഞു തുടങ്ങും. പ്രണയജീവിതം സാഫല്യത്തിലേക്ക് കടക്കാം. അവിവാഹിതർക്ക് വിവാഹം സിദ്ധിക്കുന്നതാണ്. പിതാവിന് തൊഴിൽ / കല എന്നിവയിൽ ഉയർച്ച കൈവരും. പൊതുപ്രവർത്തനത്തിൽ ആദരിക്കപ്പെടും. ഗൃഹനിർമ്മാണം അവസാന ഘട്ടത്തിലേക്ക് നീങ്ങുന്നതാണ്. ഭാഗ്യാനുഭവങ്ങൾ ശ്രേയസ്സിനിടയേകും. കുടുംബ ജീവിതം സുഖകരമായി തുടരാനാവും. ഭൗതിക ചര്യകൾക്കൊപ്പം ആത്മീയ ഉണർവ്വും പ്രതീക്ഷിക്കാം.

ഉത്രാടം

ഉണർവ്വും ഉന്മേഷവും ഉണ്ടാവും. വിദ്യാർത്ഥികൾക്ക് പഠനത്തിൽ ശോഭിക്കാൻ കഴിയും. തൊഴിലന്വേഷണം സാർത്ഥകമാവും. ദിവസ വേതനക്കാർക്ക് എന്നും ജോലി ലഭിക്കുന്നതായിരിക്കും. പുതിയ ബിസിനസ്സ് / ശാഖ പ്രവർത്തിച്ചു തുടങ്ങും. ബാങ്ക് ധനസഹായം പ്രതീക്ഷിച്ച സമയത്തുതന്നെ  എത്തിച്ചേരുന്നതാണ്. ഉന്നതോദ്യോഗസ്ഥന്മാരുടെ ഒത്താശ പ്രോൽസാഹനമാവും. ആരോഗ്യപ്രശ്നങ്ങളാൽ വലഞ്ഞവർക്ക് ചികിൽസാ മാറ്റത്തിലൂടെ ആശ്വാസം ലഭിച്ചുതുടങ്ങുന്നതാണ്. ദൗത്യങ്ങൾ മുഴുമനസ്സോടെ ഏറ്റെടുക്കും. ഉപാസനാദികൾക്ക് ഭംഗം വരാനിടയുണ്ട്. സഹോദരാനുകൂല്യം കുറയാം. ഭൂമി സംബന്ധിച്ച വ്യവഹാരങ്ങൾ നീളുന്നന്നത് മനക്ലേശമുണ്ടാക്കും. പ്രണയികൾക്ക് അല്പം തിക്താനുഭവങ്ങൾ വരാം. ദാമ്പത്യസൗഖ്യത്തിന് അനുരഞ്ജനം അനിവാര്യമാണ്.

തിരുവോണം

പരിശ്രമങ്ങൾ ഭാഗികമായി വിജയം കാണുന്നതാണ്. തൊഴിൽ രംഗത്ത് സഹകരണം കുറയും. പ്രതീക്ഷിച്ച സഹായം വൈകുന്നതാണ്. ലക്ഷ്യപ്രാപ്തിക്ക് ആവർത്തിത ശ്രമങ്ങൾ വേണ്ടിവന്നേക്കും. ഭാഗ്യാനുഭവങ്ങൾ പലപ്പോഴും 'ചുണ്ടിനും കപ്പിനുമിടയിൽ' വഴുതാനിടയുണ്ട്. ആഘോഷങ്ങളിൽ പങ്കുചേരാൻ ജന്മനാട്ടിലേക്ക് പോകുന്നതാണ്. പ്രവാസികൾക്ക് നാട്ടിലെത്താനായി അമിത യാത്രക്കൂലി  നൽകേണ്ടി വന്നേക്കാം. ദേഹസുഖവും മനസ്സുഖവും ഏറിയും കുറഞ്ഞുമിരിക്കും. അപരിചിതരുമായുള്ള വലിയ സാമ്പത്തിക ഇടപാടുകൾ നഷ്ടത്തിൽ കലാശിക്കാം.  പരീക്ഷയുടെ ഫലം താമസിക്കുന്നത് ഉന്നത പഠനത്തിന് ചേരുന്നതിന് തടസ്സമാകും. ബിസിനസ്സുകാർക്ക് ധനലാഭം ഉണ്ടാവുന്നതാണ്. പിതൃസ്വത്തിൻ്റെ ഓഹരി ലഭിച്ചേക്കും. 

അവിട്ടം

സ്ഥിതിഗതികൾ അനുകൂലമാവാൻ അത്യദ്ധ്വാനം വേണ്ടിവരുന്നതാണ്. സ്വകാര്യ സ്ഥാപനത്തിൽ പുതിയ സംവിധാനങ്ങൾ നിലവിൽ വരാം. അവയുമായി പൊരുത്തപ്പെടുക എളുപ്പമായേക്കില്ല. വിദ്യാഭ്യാസത്തിൽ ഏകാഗ്രതയുണ്ടാവും. ബിസിനസ്സിൽ ഉപഭോക്താക്കളെ ലക്ഷ്യമിട്ട് നടത്തുന്ന യത്നങ്ങൾ ഭാഗികമായി ഫലം കാണും. ആരോഗ്യസംരക്ഷണത്തിൽ അലംഭാവമരുത്. ഭക്ഷണ ക്രമീകരണം വേണ്ടി വന്നേക്കും. കടം വാങ്ങി വ്യാപാരം പുഷ്ടിപ്പെടുത്താൻ ശ്രമിക്കുന്നതാണ്. മകളുടെ ജോലിക്കാര്യത്തിൽ ശുഭവാർത്തയെത്താം. കുംഭക്കൂറുകാർക്ക് അഷ്ടമ കുജൻ കലഹസാധ്യതകൾ സൃഷ്ടിക്കാം. സംയമനം അനിവാര്യമാണ്. വിദേശത്തുള്ള മകൻ്റെ ധനസഹായം വന്നെത്തും. സാമൂഹ്യ മാദ്ധ്യമങ്ങളിൽ 'കണ്ണും കാതും' നൽകി നേരം പാഴാക്കുന്ന പ്രവണതയെ വീട്ടിൽ വിമർശിക്കപ്പെടാം.

ചതയം

കാര്യനിർവഹണത്തിലും ചുമതലകളിലും കൂടുതൽ സൂക്ഷ്മത വേണം. വെല്ലുവിളികളെ മുൻപിൻ ആലോചനകൾ കൂടാതെ ഏറ്റെടുക്കരുത്. സാമ്പത്തിക കബളിപ്പിക്കലുകൾക്ക് വിധേയരാവാനിടയുണ്ട്. അക്കാര്യത്തിൽ തികഞ്ഞ  ജാഗ്രത വേണം. പ്രണയികൾക്ക് ഭാവിയെ സംബന്ധിച്ച തീരുമാനങ്ങളിൽ കുഴമറിച്ചിലുണ്ടാവും. വിദൂര വിദ്യാഭ്യാസം പോലുള്ള കോഴ്സുകളിൽ ചേരുന്നതാണ്. കലാസാഹിത്യ പ്രവർത്തനത്തിന് ധാരാളം സമയം കണ്ടെത്തുവാനാവും. ധനമാർഗം അത്ര സുഗമമാവില്ല. എങ്കിലും ന്യായമായ ആവശ്യങ്ങൾ തടസ്സപ്പെടില്ല. കുടുംബത്തിനൊപ്പം വിനോദയാത്രകൾ ആസൂത്രണം ചെയ്യും. സുഖാനുഭവങ്ങൾ കുറയില്ല. മകൻ്റെ ശാഠ്യത്തിന് വഴങ്ങി ഏറ്റവും പുതിയ ഇലക്ട്രോണിക് ഉല്പന്നം മാസവായ്പയായി വാങ്ങുന്നതാണ്

പൂരൂരുട്ടാതി

ജന്മനക്ഷത്രത്തിൽ രാഹു സഞ്ചരിക്കുന്നതും രണ്ടാം നക്ഷത്രത്തിൽ ശനി സഞ്ചരിക്കുന്നതും പലവിധത്തിലുള്ള സമ്മർദ്ദങ്ങൾക്ക് കാരണമാകാം. കൂട്ടുകച്ചവടത്തിൽ സന്ദിഗ്ദ്ധതയുണ്ടാവും. തീരുമാനങ്ങൾ തെറ്റുന്നതിൽ ആശങ്കയുയരും. കുടുംബത്തിൽ ചിലപ്പോൾ ഒറ്റപ്പെട്ടെന്നു വന്നേക്കാം. വിദ്യാർത്ഥികളെ പഠനവൈകല്യം ബാധിക്കാനിടയുണ്ട്. പഴയ കടബാധ്യതകൾ വീട്ടേണ്ട സാഹചര്യം ഉരുത്തിരിഞ്ഞേക്കും.  അല്പലാഭങ്ങളും നൈമിഷിക സന്തോഷങ്ങളും കൂടുതൽ മനോഹരമായി തോന്നുന്ന കാലമാണ്. അന്യദേശത്ത് തൊഴിൽ സാധ്യതയുണ്ടാവും.  പ്രതികാരബുദ്ധി ഉപേക്ഷിക്കണം. വാക്കുകളിൽ ജാഗ്രത കുറയരുത്. അപ്രതീക്ഷിത സഹായങ്ങൾ പ്രതീക്ഷിക്കാം. പുതിയ തലമുറയെ മനസ്സിലാക്കാൻ ശ്രമിക്കേണ്ടതുണ്ട്. ആദ്ധ്യാത്മികചര്യ സമാധാനമേകുന്നതാണ്.

ഉത്രട്ടാതി

ആദിത്യൻ ആറാം ഭാവത്തിൽ പ്രാബല്യത്തോടെ നിൽക്കുകയാൽ കാര്യതടസ്സങ്ങൾ അകലുന്നതാണ്. ഭൗതിക സാഹചര്യങ്ങൾ മെച്ചപ്പെട്ടേക്കും. സ്ഥാനക്കയറ്റം / ശമ്പള വർദ്ധനവ് ഇവ നല്ല സാധ്യതകളാണ്. സംഘടനകളിൽ നേതൃപദത്തിലെത്തും. അഭിപ്രായ ധീരത ശത്രുക്കളെ സൃഷ്ടിച്ചേക്കാം. എന്നാൽ അതിൽ കൂസുകയില്ല. വ്യാപാരത്തിൽ തരക്കേടില്ലാത്ത ലാഭം പ്രതീക്ഷിക്കാം. സമൂഹത്തിൽ സ്വാധീനമേറും. ഫ്ളാറ്റ് വാങ്ങിക്കുന്നതിന് തയ്യാറെടുക്കും. ഊഹക്കച്ചവടത്തിൽ നഷ്ടം വരാനിടയുണ്ട്. സാഹസിക യാത്രകൾക്ക് മുതിരരുത്. ഏഴാം ഭാവത്തിൽ ചൊവ്വ സഞ്ചരിക്കുന്നത് പ്രണയം/ ദാമ്പത്യം എന്നിവകളെ ബാധിക്കാനിടയുണ്ട്. തെറ്റിദ്ധാരണ ബന്ധങ്ങളെ കലുഷമാക്കാം. ആശയം വിനിമയം ചെയ്യുന്നതിൽ സുതാര്യത പുലർത്താൻ ശ്രദ്ധയുണ്ടാവണം.

രേവതി

മാസമദ്ധ്യം മുതൽ ഒരുമാസം നക്ഷത്രാധിപനായ ബുധന് മൗഢ്യം വരുന്നുണ്ട്. ആലോചിക്കാതെ തീരുമാനങ്ങൾ കൈക്കൊള്ളരുത്. എങ്കിലും അഭിലാഷങ്ങൾ സഫലമാവുന്ന കാലമാണ്. ഉന്നതരുടെ ബന്ധം ഉയർച്ചക്ക് വഴിതുറക്കാം. വരുമാനമാർഗത്തിലെ തടസ്സങ്ങൾ മാറിക്കിട്ടിയേക്കും. മത്സരങ്ങളിൽ വിജയിക്കുവാൻ കഴിയുന്നതാണ്. സ്വകാര്യ സ്ഥാപനത്തിൽ ജോലി ചെയ്യുന്നവർക്ക് പ്രൊമോഷൻ ലഭിക്കാം. ബിസിനസ്സ് ആശയങ്ങൾ സാക്ഷാൽകരിക്കാൻ അന്വേഷണം തുടരുന്നതാണ്. വലിയ സാമ്പത്തിക മുടക്കുകൾക്ക് തത്കാലം മുതിരാതിരിക്കുക. രാഹുവും ശനിയും ചൊവ്വയും അനിഷ്ടഭാവങ്ങളിലാണ് എന്നത് മറക്കരുത്. കുടുംബത്തിനൊപ്പം യാത്രകൾക്ക് അവസരമുണ്ടാവും. മക്കളുടെ കാര്യത്തിൽ ശുഭവാർത്ത
വന്നുചേരുന്നതാണ്. സുഹൃൽ സമാഗമം സന്തോഷമേകും.

Read More: സമ്പൂർണ വർഷഫലം; അശ്വതി മുതൽ രേവതി വരെ