ശുക്രനും ബുധനും മിഥുനം രാശിയിലേയ്ക്ക്; മൂലം മുതൽ രേവതി വരെ

2024 ജൂൺ 12 ന് ശുക്രനും ജൂൺ 14 ന് ബുധനും (യഥാക്രമം കൊല്ലവർഷം 1199 ഇടവം 29 നും 31നും) ഇടവം രാശിയിൽ നിന്നും മിഥുനം രാശിയിലേക്ക് സംക്രമിക്കുന്നു. ജൂൺ 29 വരെ അതായത് മിഥുനം 15 വരെ ബുധനും, ജൂലായ് 6 വരെ അതായത് മിഥുനം 22 വരെ ശുക്രനും മിഥുനം രാശിയിൽ തുടരുന്നു. കാലം കുറഞ്ഞ ദിനമാണെങ്കിലും ശുക്രബുധന്മാരുടെ മിഥുനരാശിയിലെ സഞ്ചാരം അർത്ഥദീർഘമാണ്.

ബുധനും ശുക്രനും പരസ്പരം ബന്ധുക്കളായ അഥവാ മിത്രങ്ങളായ ഗ്രഹങ്ങളാണെന്ന് ജ്യോതിഷ നിയമം വ്യക്തമാക്കുന്നു. മിഥുനം രാശി ബുധൻ്റെ സ്വക്ഷേത്രമാണ്.
ഈ കാലയളവിൽ ബുധന് മൗഢ്യവുമില്ല. എന്നാൽ മിഥുനം രാശിയിൽ സഞ്ചരിക്കുന്ന ദിവസങ്ങളിൽ ശുക്രൻ മൗഢ്യത്തിലാണ്. അതിനാൽ മിഥുനം രാശിയിൽ ബലം കൂടുതൽ ബുധനാണെന്ന് പറയേണ്ടിവരും. 

ശുക്രൻ ജന്മരാശിയിലും 2,3,4,5,8,9,11,12 എന്നീ    ഒമ്പത് രാശികളിലും സഞ്ചരിക്കുമ്പോൾ ഗുണദാതാവാണ്. അതായത് അവരവർ ജനിച്ച കൂറിൻ്റെ 6,7,10 എന്നീ മൂന്ന് സ്ഥാനങ്ങളൊഴികെ എല്ലായിടത്തും ശുക്രൻ ശുഭഫലമേകും. ഈക്കാര്യത്തിൽ, ഈ ഉദാര മനസ്ഥിതിയിൽ മറ്റെല്ലാ ഗ്രഹങ്ങളും ശുക്രൻ്റെ പിന്നിലാണ് എന്നതാണ് സത്യം.

ഇനി ബുധൻ്റ ഗോചര ഫലം ചിന്തിക്കാം. 1,3,5,7,9,12 എന്നീ ആറിടങ്ങളിൽ സഞ്ചരിക്കുമ്പോൾ ബുധൻ അനിഷ്ടകാരിയാവും. 2,4,6,8,10,11 എന്നീ സ്ഥാനങ്ങളിൽ മാത്രമാണ് ബുധൻ ശുഭഫലദാതാവ് ആവുന്നത്. എന്നാൽ മിഥുനം ബുധൻ്റെ സ്വക്ഷേത്രമാകയാൽ ഗുണഫലങ്ങൾക്കാവും മുൻതൂക്കം വരിക.  

മിഥുനം രാശിയിൽ സഞ്ചരിക്കുന്ന ശുക്രബുധന്മാർക്കൊപ്പം ആദിത്യനും സഞ്ചരിക്കുന്നുണ്ട്. അതും ഫലത്തെ സ്വാധീനിക്കാം. ബുധന് ബന്ധു അഥവാ മിത്രൻ ആണ് ആദിത്യൻ. എന്നാൽ ശുക്രൻ്റെ ശത്രുഗ്രഹമാണ് ആദിത്യനെന്നത് പ്രത്യേകം ഓർമ്മിക്കണം. ഇങ്ങനെ പല നിലയ്ക്കും മിഥുനത്തിലെ ബുധൻ ശുഭഫലം തരുന്ന കാര്യത്തിൽ ഒരുപടി മുന്നിലാണ് എന്ന് മനസ്സിലാക്കാം. 

ശുക്രബുധന്മാരുടെ മിഥുനം രാശിയിലെ സഞ്ചാരത്തെ മുൻനിർത്തി മേടം മുതൽ മീനം വരെയുള്ള പന്ത്രണ്ടു കൂറുകളിൽ ജനിച്ച മൂലം മുതൽ രേവതി വരെയുള്ള ഒന്‍പത് നക്ഷത്രക്കാരുടെ അനുഭവങ്ങൾ എപ്രകാരമാവുമെന്ന് ഇവിടെ വിശകലനം ചെയ്യുന്നു.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

ഏഴാം ഭാവമായ മിഥുനത്തിലാണ് ബുധശുക്ര സഞ്ചാരം. സമ്മിശ്രമായ ഫലങ്ങളാണുണ്ടാവുക. പല കാലമായി തുടർന്നു വരുന്ന കൂട്ടുബിസിനസ്സിൽ തർക്കങ്ങളോ ഭിന്നതകളോ വരാം. തൊഴിൽ സംബന്ധിച്ച യാത്രകൾ വർദ്ധിക്കുമെങ്കിലും പ്രയോജനം കുറവായിരിക്കും.  വിദേശത്ത് പോകാൻ തയ്യാറെടുത്തിരിക്കുന്നവർക്ക് അതിനുള്ള അവസരം സംജാതമാകുന്നതാണ്. ഊഹക്കച്ചവടത്തിൽ നഷ്ടം വരാനിടയുണ്ട്. കുടുംബ ബന്ധങ്ങളുടെ ദാർഢ്യം കുറയാം. വിശേഷിച്ചും ദാമ്പത്യത്തിൽ.  പ്രണയികൾക്കും അനുകൂലമായ കാലമല്ല. ആശയ വിനിമയ ശേഷി വാദപ്രതിവാദങ്ങളിൽ വിജയിക്കാൻ കാരണമാകും. ബന്ധുക്കളുടെ പിന്തുണ പ്രചോദനമേകുന്നതാണ്. സർക്കാർ ഉദ്യോഗസ്ഥർക്ക് പുതിയ  ചുമതലകൾ ലഭിച്ചേക്കാം. സ്വകാര്യ സ്ഥാപനത്തിലെ ജോലിയിൽ അതൃപ്തി അനുഭവപ്പെടുന്നതാണ്. ആരോഗ്യ പരിശോധനകളിൽ അലംഭാവമരുത്.

മകരക്കൂറ് (ഉത്രാടം മുക്കാൽ, തിരുവോണം, അവിട്ടം ആദ്യ പകുതി)

ശുക്രനും ബുധനും ആറാമെടമായ മിഥുനം രാശിയിൽ സഞ്ചരിക്കുന്നു. അതിനാൽ ശുക്രൻ അനിഷ്ടഭാവത്തിലാണ് എന്നുപറയാം. ബുധൻ കൂടുതൽ കരുത്തിലുമാണ്. ഗുണത്തോടൊപ്പം ചില പ്രതികൂലതകളും നേരിടേണ്ടി വരുന്നതാണ്. പ്രണയത്തിൽ പരാജയമോ പ്രതിസന്ധികളോ ഉണ്ടാവാം. സാമ്പത്തിക ഞെരുക്കം അനുഭവപ്പെടാനിടയുണ്ട്.  സ്ത്രീകളുടെ വിരോധത്തിന് സാധ്യത കാണുന്നു. ഊഹക്കച്ചവടത്തിൽ നഷ്ടം വരാം. ബുധൻ നൽകുന്ന ഗുണങ്ങളിൽ പ്രധാനം  ബന്ധുക്കളുടെ പിന്തുണയാണ്. വിദ്യാഭ്യാസ പരമായി ഉയർച്ചയുണ്ടാകും. ആഗ്രഹിച്ച വിഷയങ്ങളിൽ ഉപരിപഠനത്തിന് പോകാനാകും. വ്യാപാരത്തിൽ നവീകരണത്തിലൂടെ നേട്ടങ്ങളുണ്ടാക്കും. വ്യവഹാരങ്ങളിൽ വിജയിക്കുന്നതാണ്.

കുംഭക്കൂറിന് (അവിട്ടം രണ്ടാം പകുതി, ചതയം, പൂരൂരുട്ടാതി മുക്കാൽ)

ബുധശുക്രന്മാർ അഞ്ചാം ഭാവത്തിൽ സഞ്ചരിക്കുന്നു. വിവേകപൂർവ്വമുള്ള തീരുമാനങ്ങൾ കൈക്കൊള്ളാൻ സാധിക്കുന്നതാണ്. ഗൃഹത്തിൽ മുതിർന്നവരും പുതിയ  തലമുറയുമായുള്ള ഭിന്നതകൾക്ക് താൽകാലികമായെങ്കിലും വിരാമമാവും. പാഴ് ച്ചെലവുകൾ കൂടാം. അതിനാൽ സാമ്പത്തിക കാര്യങ്ങളിൽ ശ്രദ്ധ വേണം. വിജ്ഞാന സമ്പാദനത്തിന് കൂടുതൽ നേരം കണ്ടെത്തും. ജീവകാരുണ്യ പ്രവർത്തനങ്ങൾ ഏറ്റെടുക്കുന്നതാണ്. ഗൃഹത്തിൽ മംഗളകർമ്മങ്ങൾ നടക്കാം. പഠനാവശ്യത്തിനുള്ള ലോൺ അപേക്ഷ അനുവദിക്കപ്പെടും. ഓൺലൈൻ ബിസിനസ്സുകളിൽ നിന്നും ലാഭം പ്രതീക്ഷിക്കാം. കുടുംബയോഗം  സംഘടിപ്പിക്കുന്നതിൽ വിജയിക്കുന്നതാണ്. വിദേശ യാത്രകൾക്ക് അവസരം സിദ്ധിക്കും.

മീനക്കൂറ് (പൂരൂരുട്ടാതി നാലാം പാദം, ഉത്രട്ടാതി, രേവതി)

 ബുധനും ശുക്രനും നാലാം ഭാവത്തിൽ സഞ്ചരിക്കുന്നു. പുതിയ വാഹനം വാങ്ങാൻ യോഗമുണ്ട്. ഗൃഹനിർമ്മാണം പൂർത്തിയാവും.  വസ്ത്രാഭരണങ്ങളോ ഇഷ്ടവസ്തുക്കളോ പാരിതോഷികമായി ലഭിച്ചേക്കാം.  സമൂഹത്തിൻ്റെ അംഗീകാരം കിട്ടുന്നതാണ്. കവികൾക്കും കലാകാരന്മാർക്കും അവരുടെ സർഗവാസനകൾ പ്രകടിപ്പിക്കാനവസരം സിദ്ധിക്കുന്നതാണ്. മാതൃബന്ധുക്കളുടെ സഹകരണത്തോടെ ചില കുടുംബ പ്രശ്നങ്ങൾ പരിഹരിക്കാൻ കഴിയും. തൊഴിലിടം സമാധാനപൂർണമാകുന്നതാണ്. ഉദ്യോഗസ്ഥർക്ക് പുതിയ പദവികൾ ലഭിക്കാം. പ്രണയ ബന്ധം ദൃഢമാകും. പിണങ്ങിക്കഴിഞ്ഞിരുന്ന ദമ്പതികൾക്ക് വീണ്ടും ഇണങ്ങാനാവും. കുട്ടികളുടെ വിദ്യാഭ്യാസകാര്യത്തിൽ വ്യക്തമായ ദിശാബോധമുണ്ടാകും.

Read More

• Daily Horoscope June 5, 2024: നിങ്ങളുടെ ഇന്നത്തെ ദിവസം, രാശി ഫലം
• ശുക്രനും ബുധനും മിഥുനം രാശിയിലേയ്ക്ക്; അശ്വതി മുതൽ ആയില്യം വരെ
• ശുക്രനും ബുധനും മിഥുനം രാശിയിലേയ്ക്ക്; മകം മുതൽ തൃക്കേട്ട വരെ
• 2024 ജൂൺ മാസത്തിലെ സമ്പൂർണ നക്ഷത്രഫലം, അശ്വതി മുതൽ രേവതി വരെ
• ഇടവമാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ: Monthly Horoscope for Edavam
• എന്താണ് വസുപഞ്ചകം അഥവാ പഞ്ചകദോഷം?
• ദേവഗണത്തിലെ നക്ഷത്രങ്ങൾ
• അക്കങ്ങളിൽ തെളിയും ഭാവികാലം
• മകയിരം നക്ഷത്രക്കാർ പ്രണയലോലരാണ്