ഇടവമാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ: Monthly Horoscope for Edavam

കൊല്ലവർഷത്തിലെ പത്താം മാസമാണ് ഇടവം. കുത്താൻ മുക്രയിട്ടു വരുന്ന കാളയാണ് ഇടവം രാശിയുടെ സ്വരൂപം. ഈ രാശി Taurus എന്ന് ഇംഗ്ലീഷിൽ വിളിക്കപ്പെടുന്നു. മേയ് മാസം 15 മുതൽ ജൂൺ 14 വരെയാണ് ഇടവം മാസം വരുന്നത് (31 തീയതികൾ). രാശിചക്രത്തിലെ രണ്ടാം രാശിയായ ഇടവത്തെ എടവം എന്നും സംബോധന ചെയ്യുന്നു. 31 ഡിഗ്രി മുതൽ 60 ഡിഗ്രി വരെയാണ് രാശിചക്രത്തിൽ ഇടവം രാശിയുടെ വ്യാപതി.

ആദിത്യൻ ഇടവം രാശിയിൽ കാർത്തിക, രോഹിണി, മകയിരം ഞാറ്റുവേലകളിൽ സഞ്ചരിക്കുന്നു. ഇടവമാസം ഒന്നിന് ആയില്യം നക്ഷത്രമാണ്. മാസാന്ത്യമാകുമ്പോൾ ചന്ദ്രൻ ഒരു വട്ടം രാശിചക്രഭ്രമണം പൂർത്തിയാക്കി ഉത്രം നക്ഷത്രത്തിലെത്തുന്നു. ഇടവം 9 ന് വെളുത്തവാവും ഇടവം 23 ന് കറുത്തവാവും സംഭവിക്കുന്നു. 

വ്യാഴം ഇടവം രാശിയിൽ കാർത്തിക നക്ഷത്രത്തിലാണ്. വ്യാഴമൗഢ്യം ഇടവം 21 വരെ തുടരും. ശുക്രൻ മാസാദ്യത്തിൽ മേടം രാശിയിലാണ്. ഇടവം 5 ന് ഇടവം രാശിയിൽ പ്രവേശിക്കുന്നു. ഇടവം 29ന് മിഥുനം രാശിയിലേക്ക് സംക്രമിക്കുകയാണ്. ശുക്രനും മൗഢ്യാവസ്ഥയിൽ തുടരുന്നു. ശനി കുംഭം രാശിയിൽ പൂരൂരുട്ടാതിയിൽ സഞ്ചരിക്കുകയാണ്. രാഹു മീനം രാശിയിൽ രേവതി നക്ഷത്രത്തിലും കേതു കന്നി രാശിയിൽ അത്തം നക്ഷത്രത്തിലും അപ്രദക്ഷിണ ഗതിയായി സഞ്ചരിക്കുകയാണ്. 

ബുധൻ മേടം രാശിയിലാണ്. ഇടവം 17 ന് ഇടവം രാശിയിൽ പ്രവേശിക്കുന്നു. ഇടവം 21 ന് ബുധന് ക്രമമൗഢ്യം തുടങ്ങുന്നുണ്ട്. ചൊവ്വ മീനം രാശിയിലാണ്. ഇടവം 18 ന് മീനത്തിൽ നിന്നും മേടത്തിലേക്ക് വരുന്നു. ചൊവ്വ ഇടവമാസം 1 മുതൽ 18 വരെ രേവതിയിലും തുടർന്ന് അശ്വതിയിലും സഞ്ചരിക്കുന്നു. 

ഈ ഗ്രഹനിലയുടെ പശ്ചാത്തലത്തിൽ മൂലം മുതൽ രേവതി വരെയുള്ള 27 നാളുകാരുടെ ഇടവമാസത്തിലെ നക്ഷത്രഫലം ഇവിടെ വിശദീകരിക്കുന്നു.

അശ്വതി

മെയ് മാസം ഒന്നാം തീയതിയിലെ വ്യാഴമാറ്റത്തോടെ കാര്യങ്ങൾ അനുകൂലമായിട്ടുണ്ടെങ്കിലും ഗുണഫലങ്ങൾ അനുഭവത്തിലെത്താൻ അല്പം കൂടി കാത്തിരിക്കേണ്ടി വരും.  ഉദ്യോഗത്തിൽ സ്ഥാനലബ്ധിക്ക് അവസരമുണ്ടാകും.  നയപരമായ തീരുമാനങ്ങൾ കൈക്കൊള്ളുവാൻ കഴിയുന്നതാണ്. മേലധികാരികളിൽ നിന്നും അനുകൂലമായ സമീപനം പ്രതീക്ഷിക്കാം. ബിസിനസ്സിലെ പരിഷ്കാരങ്ങളും പരീക്ഷണങ്ങളും വിജയം കാണും. വിദ്യാർത്ഥികൾക്ക് മികച്ച പരീക്ഷാ വിജയം, ആഗ്രഹിച്ച വിഷയങ്ങളിൽ ഉപരിപഠനത്തിനവസരം എന്നിവ സിദ്ധിക്കും. സാമ്പത്തികമായി ഗുണമുണ്ടായേക്കും. ഊഹക്കച്ചവടത്തിൽ ലാഭം പ്രതീക്ഷിക്കാം. വീടുവെക്കാനാഗ്രഹിക്കുന്നവർക്ക് സാഹചര്യം ഒത്തുവരും. ദാമ്പത്യ സ്വപ്നങ്ങൾക്ക് ചിറകുമുളയ്ക്കുന്നതാണ്.

ഭരണി

നക്ഷത്രനാഥനായ ശുക്രൻ ഇടവം രണ്ടാം ആഴ്ച മുതൽ വ്യാഴയോഗത്തോടെ രണ്ടാം രാശിയിൽ സഞ്ചരിക്കുകയാൽ കുടുംബസൗഖ്യം പ്രതീക്ഷിക്കാം. പിണങ്ങിക്കഴിയുന്നവർക്ക് ഇണങ്ങാനാവും. സദസ്സുകളിൽ നല്ല വാക്കുകൾ പറഞ്ഞ് കൈയ്യടി നേടും. സമൂഹത്തിൽ ബഹുമാന്യത വർദ്ധിക്കും. പ്രണയികൾക്ക് ഹൃദയൈക്യം ദൃഢമാകുന്നതാണ്. കലാപരമായ സിദ്ധികൾ പന്തലിക്കാൻ സാഹചര്യം ഒത്തുവരും. പുതുവസ്ത്രാഭരണങ്ങൾ  പാരിതോഷികമായി ലഭിക്കുന്നതാണ്. നിലവിലെ ജോലിവിട്ട് മറ്റൊരു തൊഴിൽ തേടുന്നവർക്ക് അതിനുള്ള അവസരം സംജാതമാകും. ഇഷ്ടവിഷയത്തിൽ ഉന്നത വിദ്യാഭ്യാസത്തിന് പ്രവേശനം ലഭിക്കും. പിതൃസ്വത്ത് സംബന്ധിച്ച തർക്കങ്ങളിന്മേൽ അനുരഞ്ജനം സാധ്യമാകുന്നതാണ്.

കാർത്തിക

വ്യാഴവും ആദിത്യനും ജന്മനക്ഷത്രത്തിൽ സഞ്ചരിക്കുന്നതിനാൽ സകാരണമോ അകാരണമോ ആയ സമ്മർദ്ദങ്ങളെ അഭിമുഖീകരിക്കേണ്ടതായി വരും. ഏല്പിക്കപ്പെട്ട ദൗത്യങ്ങൾ സമയബന്ധിതമായി പൂർത്തീയാക്കാൻ കഴിയാത്തത് ഔദ്യോഗിക രംഗത്ത് പ്രശ്നങ്ങൾ സൃഷ്ടിക്കാം. സ്വന്തമായി സംരംഭങ്ങൾ നടത്തുന്നവർക്ക് ലോണിൻ്റെ തിരിച്ചടവ് സംബന്ധിച്ച പ്രശ്നങ്ങൾ തലവേദനയാകാം. കുടുംബജീവിതത്തിൽ സമ്മിശ്രമായ ഫലങ്ങളുണ്ടാവും. ജീവിത പങ്കാളിയ്ക്ക് ലഭിക്കേണ്ട ജോലിയുടെ നിയമനോത്തരവ് വൈകുന്നതാണ്. വിദേശത്തു കഴിയുന്ന മകന് നാട്ടിലെത്താൻ സാധിച്ചേക്കും. ധനപരമായി ഗുണമുള്ള കാലമാണ്. എന്നാൽ ദുർവ്യയത്തിനും സാധ്യത കാണുന്നുണ്ട്. ഉഷ്ണരോഗങ്ങൾ, മറ്റ് ആരോഗ്യപ്രശ്നങ്ങൾ ഇവ സാധ്യതകൾ.

രോഹിണി

പ്രതികൂല സാഹചര്യങ്ങളെ എതിരിട്ട് മുന്നേറാനാവും. അനായാസം നേടിയിരുന്നവ ക്ലേശിച്ചാവും നേടുക. ഉദ്യോഗസ്ഥർക്ക് അന്യനാട്ടിലേക്ക് സ്ഥലം മാറ്റം ഉണ്ടാവാൻ സാധ്യത കാണുന്നു. കുടുംബാംഗങ്ങളുടെ സഹകരണം ഉറപ്പിക്കാൻ ആവർത്തിച്ചുള്ള അഭ്യർത്ഥന വേണ്ടിവരാം. പുതിയ കാര്യങ്ങൾ പഠിക്കാനോ പുതിയ സാഹചര്യങ്ങളോട് ഇണങ്ങാനോ മനസ്സിന് താത്പര്യം ഉണ്ടാവില്ല. സ്വതന്ത്ര നിലപാടുകൾക്ക് സുഹൃത്തുക്കളുടെ പിന്തുണ ലഭിക്കാം. ആദർശവാദത്തെക്കാൾ പ്രായോഗികതയാണ് അനിവാര്യമെന്ന് മറന്നുപോയേക്കും. നിലവിലെ തൊഴിൽ ഉപേക്ഷിക്കുന്നത് ആശാസ്യമായേക്കില്ല. ഏജൻസി പ്രവർത്തനം കുറച്ചൊക്കെ ഗുണകരമാവും. പാരമ്പര്യ തൊഴിലുകളിൽ നിന്നും നേട്ടം കൈവരുന്നതായിരിക്കും.

മകയിരം

ആവർത്തിത പരിശ്രമങ്ങൾ വിജയകരമാവും.  ഭാഗ്യാനുഭവങ്ങൾ തടസ്സമില്ലാതെ അനുഭവത്തിലെത്തും. ബിസിനസ്സിൽ വിപുലീകരണത്തിന് അനുകൂല സാഹചര്യം സംജാതമാകും. സർക്കാർ അനുമതി - ലൈസൻസ് ഇത്യാദി - ലഭിക്കുന്നതാണ്. പഴയ വാഹനം വിൽക്കാനും പുതിയത് വാങ്ങാനും കഴിയും. വിദ്യാർത്ഥികൾക്ക് സാങ്കേതിക പഠനത്തിന് ചേരാൻ സുഗമതയുണ്ടാവും.  അപ്രസക്ത കാര്യങ്ങൾക്കായി കൂടുതൽ സമയം ചെലവഴിച്ചേക്കും. അച്ഛനമ്മമാർക്ക് മകളുടെ വീട്ടിലേക്ക് താൽകാലികമായ താമസത്തിനായി  പോകേണ്ടിവരും. കലാപ്രവർത്തനത്തിൽ പ്രതീക്ഷിച്ചത്ര നേട്ടം കൊയ്യാനായേക്കില്ല. കൃഷികാര്യങ്ങളിൽ താല്പര്യമുണ്ടാകും. ഭൂമി സംബന്ധിച്ച ബിസിനസ്സിൽ ഏർപ്പെട്ടവർക്ക് നല്ലലാഭം കിട്ടുന്നതാണ്.

തിരുവാതിര

ക്ഷിപ്രഫലങ്ങളിൽ പ്രതീക്ഷ വെക്കേണ്ടതില്ല. വ്യാഴവും ആദിത്യനും പന്ത്രണ്ടിലാകയാൽ നല്ല കാര്യങ്ങൾ നടന്നുകിട്ടുക ദുഷ്കരമാവും. ഉന്നതരുമായുള്ള ബന്ധം വിശ്ളഥമാവാം. ഔദ്യോഗിക ജീവിതത്തിൽ കാര്യസാധ്യം പതുക്കെയാവും. അച്ഛനും മകനും തമ്മിൽ ഭിന്നപക്ഷങ്ങൾ ഉയരുന്നതാണ്. സ്വതന്ത്രമായ ജോലികളിൽ നിന്നും അത്യദ്ധ്വാനവും അതിലൂടെ ധനാർജ്ജനവും വന്നു ചേരും. തൊഴിൽപരമായോ വ്യക്തിപരമായോ ദീർഘ യാത്രകൾ ഉണ്ടാവുന്നതാണ്. ജന്മനാട്ടിലെ വസ്തുവിൽ നിന്നും ആദായമുണ്ടാവും. വിദ്യാർത്ഥികൾക്ക് നല്ല സന്ദർഭമാണ്. പഠന മികവ് അനുമോദിക്കപ്പെടും. പ്രണയികൾക്ക് കുടുംബത്തിൻ്റെ അംഗീകാരത്തോടെ വിവാഹത്തിൽ പ്രവേശിക്കാനാവും.

പുണർതം

അനുകൂലവും പ്രതികൂലവുമായ ഫലങ്ങൾ ആവർത്തിക്കുന്നതായിരിക്കും. ബിസിനസ്സിൽ നേട്ടങ്ങൾക്കാവും ആധിക്യം. മുൻനിശ്ചയിച്ച കാര്യങ്ങൾ നിർവഹിക്കാൻ പണം ഒരു തടസ്സമാവില്ല. നക്ഷത്രാധിപനായ വ്യാഴത്തിന് മൗഢ്യം ഉള്ളതിനാൽ മാസത്തിൻ്റെ ആദ്യ പകുതി വരെ എല്ലാക്കാര്യത്തിലും ശ്രദ്ധ കാട്ടുന്നത് ഉചിതം. ദാമ്പത്യത്തിൽ പിണക്കങ്ങളും ഇണക്കങ്ങളും തുടരപ്പെടുന്നതാണ്.  തൊഴിൽ തേടുന്നവർക്ക് അർഹതക്കൊത്ത അവസരം ഉണ്ടാവാം. കിടപ്പു രോഗികൾക്ക് ചികിൽസാമാറ്റത്താൽ ഗുണം അനുഭവപ്പെടും. ഊഹക്കച്ചവടത്തിൽ നഷ്ടം വരാനിടയുണ്ട്.  വിശ്വസ്ത സുഹൃത്തുക്കളുമായി കലഹിക്കാൻ സാധ്യതയുണ്ട്. സഹോദരരുമായുണ്ടായിരുന്ന പ്രശ്നങ്ങൾ രമ്യമായ തീർപ്പിലെത്താം.

മകം

തൊഴിലിൽ നേട്ടത്തിനവകാശമുണ്ട്. കൃത്യമായ ആസൂത്രണത്തോടെയും സമ്മർദ്ദങ്ങളില്ലാതെയും പലതും ചെയ്യാനാവും.  അന്യനാട്ടിൽ ജോലി ചെയ്യുന്നവർക്ക്  സ്വദേശത്തേക്ക് മാറ്റം ലഭിക്കുന്നതാണ്. സഹപ്രവർത്തകരുടെ മികച്ച പിന്തുണ ലഭിച്ചേക്കാം. ഓൺലൈൻ ബിസിനസ്സിൽ മുന്നേറ്റമുണ്ടാകും. പഠനത്തിലെ മികവ് അഭിനന്ദിക്കപ്പെടും. ഉപരിപഠന കാര്യത്തിൽ അദ്ധ്യാപകരുടെ അഭിപ്രായം തേടുന്നതായിരിക്കും. സാമ്പത്തികമായി തരക്കേടില്ലാത്ത കാലമാണ്. എന്നാൽ ധാരാളിത്തം ഒഴിവാക്കേണ്ടതുണ്ട്. ദാമ്പത്യത്തിൽ ചില അസ്വാരസ്യങ്ങൾ ഉയർന്നേക്കാം.  പരസ്പരം കുറ്റം പറയുന്ന പ്രവണത പരിഹാസ്യമാവും. വാഹനം, അഗ്നി, ആയുധം എന്നിവയുടെ ഉപയോഗത്തിലും രാത്രിയാത്രകളിലും  ഏറ്റവും കരുതൽ വേണം.

ഉത്രം

സന്തോഷാനുഭവങ്ങൾ അധികരിക്കും. വാഗ്ദാനങ്ങൾ പാലിക്കാൻ കഴിയുന്നതാണ്. വിദ്യാർത്ഥികൾക്ക് ഉപരിപഠനത്തിന് അന്യദിക്കിൽ പോകേണ്ടി വന്നേക്കും. രാഷ്ട്രീയക്കാർക്ക് ജനങ്ങളുടെ അംഗീകാരം ലഭിക്കുന്നതാണ്. ശത്രുക്കളുടെ പ്രവർത്തനത്തെ നന്നായി പ്രതിരോധിക്കുവാനാവും. പുതിയ സംരംഭങ്ങൾ ബാലാരിഷ്ടകൾ പിന്നിട്ട് ലാഭത്തിലായി തുടങ്ങും. തൊഴിലില്ലാത്തവർക്ക് പുതിയ വഴി കണ്ടെത്താനായേക്കും. സാമ്പത്തികമായി കരുതൽ വേണ്ട സമയമാണ്. ഊഹക്കച്ചവടത്തിൽ മെച്ചം വരും. ഗൃഹനിർമ്മാണം പൂർത്തീകരിക്കപ്പെടും. മകളുടെ വിവാഹാലോചനകൾ നീളാനിടയുണ്ട്. കുടുംബാംഗങ്ങളുമൊത്ത് തീർത്ഥാടനത്തിന് പോയേക്കും.  ദാമ്പത്യരംഗം അല്പം അശാന്തമാവാനിടയുണ്ട്. കടുത്ത വാക്കുകൾ പിന്നീട് മനക്ലേശമുണ്ടാക്കാം.

അത്തം

നേട്ടങ്ങളുണ്ടാവുമെങ്കിലും ഒരുപാട് വിയർപ്പൊഴുക്കേണ്ടി വരും. യാത്രകൾ വർദ്ധിക്കുന്നതാണ്. സമയനഷ്ടം, ഊർജ്ജനഷ്ടം ഇവ സാധ്യതകൾ. ചിലരുടെ യഥാർത്ഥ മുഖം തിരിച്ചറിയാൻ സന്ദർഭം വന്നെത്തും. പൂജകളിലും മംഗള കർമ്മങ്ങളിലും പങ്കെടുക്കുന്നതാണ്. സാമ്പത്തികമായി ചില വെല്ലുവിളികൾ ഉണ്ടാവും. എന്നാലും ക്രമേണ മെച്ചം പ്രതീക്ഷിക്കാം. പുതിയ ബിസിനസ്സ് തുടങ്ങുന്നത് പര്യാലോചിക്കും. ഉപരി പഠനത്തിന് മെച്ചപ്പെട്ട അവസരങ്ങൾ ലഭ്യമാകും.  മനസ്സിനിണങ്ങിയ കാര്യങ്ങൾ ചെയ്യാനും സാഹചര്യമുണ്ടാവും. വ്യാഴത്തിൻ്റെ അനുകൂലത അനുഭവത്തിലെത്താൻ മാസത്തിൻ്റെ രണ്ടാം പകുതി വരെ കാത്തിരിക്കേണ്ടതുണ്ട്. പ്രണയികൾക്കിടയിൽ ഇണക്കവും പിണക്കവും തുടരും. ഗുരുജനങ്ങളെ സന്ദർശിക്കാനും മാർഗനിർദ്ദേശങ്ങൾ കൈക്കൊള്ളാനും കഴിയും.

ചിത്തിര

നക്ഷത്രനാഥനായ ചൊവ്വയ്ക്ക് രാഹുയോഗം തുടരുകയാൽ കൂട്ടുകെട്ടുകളുടെ കാര്യത്തിൽ ജാഗ്രത വേണം. സ്വാശ്രയ ജോലികൾ വിജയമുണ്ടാവും. ബിസിനസ്സ് വിപുലീകരിക്കാനാവും. ചിട്ടി, ലോൺ, ഇൻഷ്വറൻസ്, ഊഹക്കച്ചവടം ഇവയിൽ നിന്നും ആദായത്തിന് വകയുണ്ട്. ഉദ്യോഗസ്ഥർക്ക് സ്വച്ഛന്ദമായി ജോലി ചെയ്യാൻ അവസരം ഉണ്ടാവും. ഭൂമിവില്പനയിലെ തടസ്സങ്ങളകലാം. അപ്രസക്ത കാര്യങ്ങൾ സമയനഷ്ടത്തിന് ഇടവരുത്തുന്നതാണ് എന്നതിനാൽ പ്രവൃത്തികളുടെ ആവശ്യകത വ്യക്തമായിരിക്കണം. നിഗൂഢമായ ലക്ഷ്യം നിറവേറപ്പെടും. കുടുംബ ജീവിതത്തിൽ സന്തോഷമനുഭവപ്പെടുന്നതാണ്. മകളുടെ വീട്ടിൽ താമസിക്കേണ്ട സാഹചര്യം ഉരുത്തിരിയാം. പിതാവിൻ്റെ ആരോഗ്യകാരത്തിൽ പ്രത്യേക ശ്രദ്ധ വേണം.

ചോതി

ലക്ഷ്യബോധത്തോടെ പ്രവർത്തിക്കുന്നതാണ്. പുതിയ ആശയങ്ങൾ ആവിഷ്കരിക്കാൻ ശ്രമിച്ചുകൊണ്ടിരിക്കും. മനസ്സ് ഭാവനാത്മകമാവും. എന്നാൽ ആശയവിനിമയത്തിൽ തടസ്സങ്ങൾ നേരിടും. നിലവിലുള്ള പ്രശ്നപരിഹാരത്തിന് തല പുകയ്ക്കേണ്ടി വരുന്നതാണ്. ഗവേഷണത്തിൽ പ്രതീക്ഷിച്ച മുന്നേറ്റം കൈവന്നേക്കില്ല. ചെറുകിട സംരംഭങ്ങൾ ഗുണകരമാവും. കരാർപണികൾ നേടിയെടുക്കും.  ഉദ്യോഗസ്ഥർക്ക് ജോലിയിൽ പ്രൊമോഷൻ സാധ്യത കുറയാം. അന്യനാട്ടിൽ നിന്നും ജന്മനാട്ടിലേക്ക് സ്ഥലംമാറ്റം കിട്ടാൻ കിണഞ്ഞ് പരിശ്രമിക്കും. സർക്കാരിന് എതിരെയുള്ള കേസുകൾ പരാജയപ്പെടാം. പിതാവിൽ നിന്നും പ്രതീക്ഷിച്ച സഹായധനം വന്നെത്താൻ വൈകും. ദാമ്പത്യജീവിതത്തിൽ സംതൃപ്തിയുണ്ടാവും. സാമ്പത്തികമായ ഞെരുക്കത്തിന് അയവുണ്ടാവും.

വിശാഖം

തുലാക്കൂറുകാർക്ക് സമ്മിശ്രമായ അനുഭവം ആയിരിക്കും, ഇടവ മാസത്തിൽ ഭവിക്കുന്നത്. വൃശ്ചികക്കൂറുകാർക്ക് കൂടുതൽ നേട്ടം പ്രതീക്ഷിക്കാവുന്ന കാലഘട്ടമാണ്. സാമ്പത്തിക കാര്യങ്ങളിൽ സൂക്ഷ്മത വേണം. ദുരാരോപണങ്ങളെ നേരിട്ടേക്കും. വിദ്യാർത്ഥികൾക്ക് തുടർ വിദ്യാഭ്യാസത്തിന് പ്രതീക്ഷിച്ച അവസരങ്ങൾ വന്നുചേരുന്നതാണ്. അനുരാഗം വിവാഹത്തിലേക്ക് നയിക്കാം. ദൂരദിക്കുകളിൽ കഴിയുന്നവർക്ക് ജന്മനാട്ടിലെത്താൻ അവസരമുണ്ടാകും.  വീടുപണിയിലെ തടസ്സങ്ങൾ നീങ്ങുന്നതായിരിക്കും. ഓൺലൈൻ വ്യാപാരം ഗുണകരമായേക്കും. സുഹൃൽസംഗമത്തിന് മുൻകൈയ്യെടുക്കും. ചിന്താപരത കൂടുകയും പ്രവൃത്തിയിൽ നിരുന്മേഷത അനുഭവപ്പെടുകയും ചെയ്യുന്നതാണ്. സാമൂഹ്യമാധ്യമങ്ങളിലെ ഇടപെടലുകൾ കരുതലോടെയാവണം.

അനിഴം

ഏഴാം ഭാവത്തിലെ ഗുരുസ്ഥിതി ഗുണമായി പരിണമിക്കാൻ ഏതാനും ദിവസങ്ങൾ കൂടി വേണ്ടി വന്നേക്കാം. പാർട്ണർഷിപ്പിൽ നേട്ടങ്ങൾ കൈവരിച്ചേക്കും. പാരമ്പര്യമായി തുടർന്നുവരുന്ന കച്ചവടം ഗുണകരമാവുന്നതാണ്. ഔദ്യോഗിക യാത്രകൾ വേണ്ടതായി വരും. വിദേശത്ത് പഠന-തൊഴിൽ സംബന്ധമായി പോവാനുള്ള പ്രയത്നം വിജയിക്കുന്നതാണ്. യുവാക്കളുടെ വിവാഹാലോചനകൾക്ക് അല്പം കൂടി ഗതിവേഗമുണ്ടാകും. മക്കളുടെ കാര്യത്തിൽ ഏതെങ്കിലും തരത്തിലുള്ള ആശങ്കകൾക്ക് സാധ്യത കാണുന്നു. കടബാധ്യതകൾ സംബന്ധിച്ച് ചില ലഘുവ്യവസ്ഥകൾ നടപ്പിലാക്കപ്പെടാം. ജാമ്യം നിൽക്കുന്നതിൽ ജാഗ്രതയുണ്ടാവണം. കുടുംബാംഗങ്ങളെ ഒത്തിണക്കി നിർത്താൻ കൈക്കൊള്ളുന്ന പരിശ്രമങ്ങൾ ആദരിക്കപ്പെടും.

തൃക്കേട്ട

വിദ്യാഭ്യാസത്തിൽ ഉയർച്ചയുണ്ടാവും. ഗവേഷണം പൂർത്തിയാക്കുവാനും ഗവേഷണ പ്രബന്ധം പ്രസാധനം ചെയ്യാനും കഴിഞ്ഞേക്കും. ഉദ്യോഗാർത്ഥികൾക്ക് അന്യദേശത്ത് ജോലി തരപ്പെട്ടെന്ന് വരാം. മുഖ്യവരുമാനത്തിനൊപ്പം അനുബന്ധ ജോലികളിൽ നിന്നും ആദായം ലഭിക്കുന്നതാണ്. കൂട്ടുകാരുമായി ചേർന്ന് സംരംഭങ്ങൾക്ക് തുടക്കം കുറിച്ചേക്കും. സ്വന്തം മേഖലയിൽ വൈജ്ഞാനികമായ ആധിപത്യം ആദരിക്കപ്പെടും.  പൊതുപ്രവർത്തകർക്ക് ജനവിധി അനുകൂലമായേക്കും. കലാസാഹിത്യ മേഖലകളിൽ അംഗീകാരം സിദ്ധിക്കുന്നതാണ്. രേഖകളിലും പ്രമാണങ്ങളിലും ഒപ്പിടുമ്പോൾ ജാഗ്രത വേണ്ടതുണ്ട്. പ്രശ്നങ്ങളോടുള്ള സമീപനങ്ങളും പ്രതികരണങ്ങളും അതിവൈകാരികമായിരിക്കുന്നതാണ്. രാശിനാഥന് രാഹുയോഗം തുടരുകയാൽ നിരുന്മേഷത ഭവിക്കാം.

മൂലം

അധികാരമുള്ള പദവികൾ ലഭിക്കാം. ഉദ്യോഗസ്ഥർക്ക് പ്രൊമോഷൻ സാധ്യത ശക്തമാണ്. കൃത്യമായ ആസൂത്രണത്തിലൂടെയും അധ്വാനത്തിലൂടെയും മറ്റുള്ളവർക്ക് ദുഷ്കരമായി തോന്നുന്ന പദവികൾ നേടും. കുടുംബത്തിൻ്റെ വിശേഷിച്ചും സഹോദരരുടെ സഹകരണം ഉണ്ടാവും. ബിസിനസ്സുകാർക്ക് വളർച്ചയുടെ കാലഘട്ടമാണ്. എന്നാൽ വമ്പിച്ച മുതൽ മുടക്കിന് കാലം അനുകൂലമല്ലെന്നത് മറക്കരുത്. വായ്പാ തിരിച്ചടവ് അനായാസമാകും. പ്രശ്നങ്ങളെ ബൗദ്ധികമായി സമീപിക്കുന്നതാണ്. സാമ്പത്തികമായ അപര്യാപ്തതയ്ക്ക് മാറ്റം വരുന്നതായിരിക്കും. ജീവിത പങ്കാളിയുടെ തൊഴിലന്വേഷണം സാർത്ഥകമാവുന്നതാണ്. കലാവാസനകൾ പരിപോഷിപ്പിക്കുന്നതിന് നേരം കണ്ടെത്തും.  പ്രേമകാര്യത്തിൽ തടസ്സമോ എതിർപ്പോ ഉണ്ടായേക്കും. വാഹനം ഉപയോഗിക്കുന്നതിൽ കൂടുതൽ ജാഗ്രത ആവശ്യമാണ്.

പൂരാടം

ജന്മനക്ഷത്രാധിപനായ ശുക്രൻ ഇടവമാസം മുഴുവൻ മൗഢ്യത്തിലാണ്. എന്നാൽ ഇടവം ആദ്യ ആഴ്ച സ്വക്ഷേത്രമായ ഇടവം രാശിയിൽ പ്രവേശിക്കുന്നുമുണ്ട്. അതിനാൽ ഗുണദോഷ സമ്മിശ്രമായ ഫലം പ്രതീക്ഷിക്കാം. ആദിത്യൻ ആറാം രാശിയിലാകയാൽ ആത്മവിശ്വാസമേറും. അധികാരത്തിനായുള്ള വടം വലിയിൽ വിജയിക്കുന്നതാണ്. പദവി നിർവഹണം സ്തുത്യർഹമാവും. സർക്കാരിൽ നിന്നും ലഭിക്കേണ്ട ലൈസൻസ്, രേഖകൾ തുടങ്ങിയവ കൈവശമെത്തിച്ചേരും. പിതൃബന്ധുക്കളുടെ സഹായം സിദ്ധിച്ചേക്കാം. ജന്മനാട്ടിൽ പോകാനും പഴയ ബന്ധങ്ങൾ പുതുക്കാനുമാവും. ഗാർഹികമായ സ്വൈരക്കേടുകൾ പതിയെ കുറഞ്ഞു തുടങ്ങുന്നതാണ്. ബിസിനസ്സിൽ നിന്നും തരക്കേടില്ലാത്ത ആദായം ഉണ്ടാവും. പഠനത്തിന് മികച്ച സ്ഥാപനത്തിൽ പ്രവേശനം കിട്ടുന്നതാണ്.

ഉത്രാടം

നക്ഷത്രാധിപനായ ആദിത്യൻ ഇടവം രാശിയിൽ ശുഭഗ്രഹങ്ങളായ വ്യാഴശുക്രന്മാരോട് ചേർന്ന് സഞ്ചരിക്കുകയാൽ കൂട്ടുകെട്ടുകൾ കൊണ്ട് ഗുണമുണ്ടാവും. പാർട്ണർഷിപ്പുകൾ വിജയത്തിലേക്ക് കടക്കുന്നതാണ്. എന്നാൽ വലിയ തോതിലുള്ള ഇൻവെസ്റ്റ്മെൻ്റിന് കാലം അനുകൂലമല്ല എന്നതോർക്കണം. ഉന്നതോദ്യോഗസ്ഥന്മാർ പിന്തുണയ്ക്കുകയാൽ കർമ്മരംഗം ശോഭനമാകുന്നതാണ്. വ്യവഹാരങ്ങളിൽ നിന്നുള്ള സമ്മർദ്ദത്തിന് അയവ് വരുന്നതാണ്. അനുബന്ധ ജോലികളും ആദായകരമായേക്കും. കുടുംബ ബന്ധങ്ങളിൽ ഉണ്ടായ ഉലച്ചിൽ മാറ്റാൻ ആത്മാർത്ഥമായ പരിശ്രമം നടത്തേണ്ടി  വരുന്നതാണ്. വയോജനങ്ങളുടെ സംരക്ഷണ വിഷയത്തിൽ സഹോദരരുമായി തർക്കത്തിലായേക്കും. സാമ്പത്തിക അച്ചടക്കം അനിവാര്യമായ ഘട്ടമാണ്.

തിരുവോണം

നേട്ടങ്ങൾ കുറയില്ല. എന്നാൽ സമ്മർദ്ദങ്ങളെ നേരിടേണ്ടി വരുന്നതാണ്. സഹായ വാഗ്ദാനങ്ങൾ ലഭിച്ചേക്കും. പ്രായോഗികമായ വിധത്തിൽ തന്നെയാവും  എല്ലാക്കാര്യങ്ങളും മുന്നോട്ടു കൊണ്ടുപോവുന്നത്. അധ്വാനത്തിൻ്റെ കരുത്ത് വരുമാനത്തിൽ പ്രതിഫലിക്കും. ഭാവനാപരമായും കലാപരമായും ഉള്ള കഴിവുകൾ വെളിച്ചപ്പെടുന്നതാണ്. കുട്ടികളെ സംബന്ധിച്ച  കാര്യങ്ങളിൽ ആദ്യം തെല്ല് ആശങ്ക ഉയരാം. പിന്നീടവ പരിഹരിക്കപ്പെടും. സാമൂഹികമായ അംഗീകാരം ലഭിക്കുന്നതാണ്. ഊഹക്കച്ചവടത്തിൽ നിന്നും വരുമാനം പ്രതീക്ഷിക്കാം. സകുടുംബം അയൽ സംസ്ഥാനങ്ങളിൽ സന്ദർശനം നടത്തുവാനായേക്കും. ജീവകാരുണ്യ പ്രവർത്തനങ്ങളിൽ നിന്ന് സന്തോഷം ലഭിക്കുന്നതാണ്. പുതിയ സംഘടനകളോ പങ്കുചേരലുകളോ നടത്തിയേക്കും. വിമർശിക്കുന്നവരെ അതെ നാണയത്തിൽ തിരിച്ചടിക്കുന്നതാണ്. ആഡംബരവസ്തുക്കൾക്ക് ചെലവ് അധികരിക്കും  ആരോഗ്യപരമായി  ശ്രദ്ധ വേണ്ടതുണ്ട്.

അവിട്ടം

നക്ഷത്രനാഥനായ ചൊവ്വയ്ക്ക് രാഹു യോഗം ഉള്ളത് ആത്മസംഘർഷത്തിന് കാരണമാകാം. തീരുമാനങ്ങളിൽ അനിശ്ചിതത്വം വരാം. നിരുന്മേഷതയും സാധ്യതയാണ്. തറവാട്ടു വീട്ടിൻ്റെ അവകാശം സംബന്ധിച്ച തർക്കങ്ങളിൽ അനുകൂലമായ വിധിയുണ്ടാവും. പുതിയ വാഹനം വാങ്ങാൻ കഴിഞ്ഞേക്കും. മകൻ്റെ ശ്രേയസ്സിൽ സന്തോഷവും അഭിമാനവും അനുഭവപ്പെടുന്നതാണ്. ദാമ്പത്യസുഖം, ഭോഗാനുഭവങ്ങൾ, ആവശ്യത്തിന് വിശ്രമം ഇവയുണ്ടാവും. ഊഹക്കച്ചവടം, ഇൻഷ്വറൻസ് മുതലായവയിൽ നിന്നും ധനാഗമം വന്നെത്തും. നവസംരംഭങ്ങളിൽ നേട്ടങ്ങൾ അല്പം പതുക്കയാവും വരിക.  അറിയാത്ത വിഷയങ്ങളിൽ അഭിപ്രായം പറയാതിരിക്കുകയാവും നല്ലത്. വാതസംബന്ധമായ രോഗങ്ങൾ ഉപദ്രവിക്കാനിടയുണ്ട്.

ചതയം

വളരെയൊന്നും ആലോചിക്കാതെ തീരുമാനങ്ങൾ കൈക്കൊള്ളുന്നതിൻ്റെ ഫലം അനുഭവസ്ഥമാകും. പ്രവർത്തന സ്വാതന്ത്ര്യം പരിമിതപ്പെടാം. കർമ്മരംഗത്ത് ചെറിയ വിജയങ്ങൾ സ്വന്തമാകുന്നതാണ്. പുതുജോലി തേടുന്നവർക്ക് അർഹതയ്ക്കനുസരിച്ച ജോലി ലഭിക്കാം. മോട്ടിവേഷണൽ ക്ളാസ്സുകൾ ഗുണം ചെയ്തില്ലെന്നു വരാം. എന്നാൽ പുതിയ ഭാഷയോ സാങ്കേതികവിദ്യയോ പഠിക്കാൻ താല്പര്യമേറും. ക്ഷമ പരീക്ഷിക്കപ്പെടും. സഹോദരസൗഖമുണ്ടാകുന്നതാണ്. ചെലവിലെ ധാരാളിത്തം തിരിച്ചടിയായേക്കാം. ബിസിനസ്സ് കാലോചിതമായി പരിഷ്കരിക്കുന്നതിൽ വൈമുഖ്യം ഉണ്ടാവും. മകളുടെ വിവാഹാലോചന സഫലമടയും. മംഗളകർമ്മത്തിന് മാനസികമായ ഒരുക്കം തുടങ്ങുന്നതാണ്. ആരോഗ്യപ്രശ്നങ്ങൾക്ക് വൈദ്യസഹായം അനിവാര്യമായേക്കാം.

പൂരൂരുട്ടാതി

ശനി ജന്മനക്ഷത്രത്തിൽ സഞ്ചരിക്കുകയാൽ കാര്യവിളംബം ഭവിക്കാം. ചില അനാവശ്യ സമ്മർദ്ദങ്ങൾ ഉണ്ടായേക്കും. രാഹുവും ചൊവ്വയും ആദിത്യനും പ്രതികൂല ഭാവത്തിലാകയാൽ പ്രധാന തീരുമാനങ്ങൾ കൈക്കൊള്ളുമ്പോൾ സവിശേഷ ശ്രദ്ധയുണ്ടാവണം. പൊതു പ്രവർത്തകർക്ക് പരാജയഭീതിയുണ്ടാകാം. പാളിച്ചകൾ വിലയിരുത്തുന്നതിൽ സൂക്ഷ്മത പുലർത്തും. ശത്രുക്കളുടെ പ്രവർത്തനങ്ങളെ കരുതിയിരിക്കണം. ബന്ധുക്കളുമായി സഹകരണം കുറയുന്നതാണ്. ഉദ്യോഗസ്ഥർക്ക് ദുർഘടമായ ഉത്തരവാദിത്വങ്ങൾ ഏറ്റെടുക്കേണ്ടി വരും. ഗാർഹികജീവിതം  സമാധാന ഭരിതമാകും. വിദ്യാർത്ഥികൾക്ക് ഇഷ്ടവിഷയങ്ങളിൽ ഉപരിപഠനം നടത്താൻ മറുനാടുകളെ ആശ്രയിക്കേണ്ടി വരുന്നതാണ്. കൃഷികാര്യങ്ങളിൽ ശ്രദ്ധയേറിയേക്കും.

ഉത്രട്ടാതി

ഗ്രഹങ്ങളുടെ പ്രാതികൂല്യം ഉണ്ട്.  എന്നാൽ സൂര്യൻ മൂന്നാം ഭാവത്തിലാകയാൽ നേട്ടങ്ങളും വന്നെത്തും. മൂന്നാമെടത്തിലെ വ്യാഴം തടസ്സങ്ങൾക്ക് കാരണമാകും. കാര്യവിഘ്നമോ കാര്യവിളംബമോ ഉണ്ടാവുന്നതാണ്. നിലവിലെ തൊഴിലിൽ തന്നെ തുടരുന്നതാണ് ഉചിതം. തൊഴിൽ മാറ്റത്തിന് സാഹചര്യം ഹിതകരമല്ല. ബിസിനസ്സിന് വായ്പ ലഭിക്കാം. സർക്കാരിൽ നിന്നും ലൈസൻസ്, മറ്റു രേഖകൾ ഇവയും തടസ്സമില്ലാതെ ലഭിക്കുന്നതാണ്. ഉദ്യോഗസ്ഥരുടെ ശുഷ്കാന്തി മേലധികാരികളുടെ പ്രശംസ നേടും.  വിദേശത്ത് പോകാൻ അവസരം വന്നുചേരും. ചില പരാതികളും പരിഭവങ്ങളും - തൊഴിൽപരമായും വ്യക്തിപരമായും ഒക്കെ- അപരിഹാര്യമായി തുടരുന്നത് സങ്കടകരമാവും. മകളുടെ / മകൻ്റെ വിദ്യാഭ്യാസ പുരോഗതിയിൽ ഏറെ സന്തോഷിക്കും.

രേവതി

നക്ഷത്രത്തിൽ രാഹുവും മാസത്തിൻ്റെ തുടക്കത്തിൽ ചൊവ്വയും തുടരുന്നതിനാൽ പല കാര്യങ്ങളും അവ്യവസ്ഥിതമാവും. നേട്ടങ്ങൾ സ്വന്തമാവാൻ ഭഗീരഥ പ്രയത്നം തന്നെ ആവശ്യമായി വരും. വീടുവിട്ടു നിൽക്കേണ്ട സാഹചര്യം സംജാതമായേക്കും. ആദിത്യൻ്റെ ആനുകൂല്യം ചില ഗുണങ്ങൾ സമ്മാനിക്കാതിരിക്കില്ല. കരാറു പണികളിൽ നിന്നും ആദായം കൂടും. ഏജൻസികളുടെ പ്രവർത്തനത്തിലും  ലാഭമധികരിച്ചേക്കും. അധികാര മത്സരങ്ങളിൽ നേട്ടമുണ്ടാക്കുന്നതാണ്. പിതാവിൻ്റെ കുടുംബത്തിലുള്ളവരുമായി കൂടുതൽ ഇണങ്ങാൻ അവസരമുണ്ടാകും. അനുരാഗികൾക്ക് മോശം സമയമല്ല. കലാപ്രവർത്തനത്തിൽ സന്തോഷമനുഭവിക്കും. പുതിയ തലമുറയുടെ വരവ് കുടുംബാന്തരീക്ഷത്തെ മെച്ചപ്പെടുത്തിയേക്കും. സമയനിഷ്ഠ പാലിക്കുന്നതിലെ ഉദാസീനത ഉപേക്ഷിക്കേണ്ടതാണ്.

Check out more Horoscope columns here 

• വാരഫലം, അശ്വതി മുതൽ ആയില്യം വരെ; May 12-May 18, 2024, Weekly Horoscope
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 May 06 to May 12
• സമ്പൂര്‍ണ വാരഫലം, അശ്വതി മുതൽ രേവതി വരെ; May 05-May 11, 2024, Weekly Horoscope
• Weekly Horoscope (May 5 - May 11, 2024): ഈ ആഴ്ച നിങ്ങൾക്കെങ്ങനെ?