ഇനി പരിപ്പ് കറിക്ക് സ്വാദേറും, മത്തൻ ഇല കൂടി ചേർക്കാം

പരിപ്പും പപ്പടവും നെയ്യും മലയാളികളുടെ ഊണിൻ്റെ സ്വാദ് വർധിപ്പിക്കുന്ന കോമ്പിനേഷനാണ്. എന്നാൽ സ്ഥിരം പരിപ്പ് കറി ഇനി ഒന്ന് മാറ്റി പിടിച്ചാലോ?. പറമ്പിൽ ധാരാളമായി കാണുന്ന മത്തനില ഒന്ന് പറിച്ചെടുക്കാം. വേവിച്ചെടുത്ത പരിപ്പിലേയ്ക്ക് ഇതു കൂടി ചേർത്ത് കിടിലൻ കറി റെഡിയാക്കാം.

പറമ്പിൽ മാത്രം കിട്ടുന്ന പച്ചക്കറികളും, കിഴങ്ങുകളും, ഇലകളും ഉപയോഗിച്ച് കറികൾ തയ്യാറാക്കിയിരുന്നവരാണ് മുത്തശ്ശിമാരും അമ്മമാരുമൊക്കെ. ചേമ്പിൻ താളും, മുരിങ്ങയിലയുമൊക്കെ അക്കാലത്ത് ഭക്ഷണത്തിൽ പ്രധാനികളായിരുന്നു. പോഷകസമൃദ്ധമായ ഇലക്കറികൾ ഇനി ഭക്ഷണത്തിൽ ഉൾപ്പെടുത്തൂ. വളരെ എളുപ്പത്തിൽ തയ്യാറാക്കാൻ സാധിക്കുന്ന ഈ മത്തൻ ഇല പരിപ്പ് കറി ഒരു തവണ ട്രൈ ചെയ്യാം. മലയാളി അടുക്കള പാചകം എന്ന യൂട്യൂബ് ചാനലാണ് മത്തൻ ഇല ചേർത്ത പരിപ്പ് കറിയുടെ റെസിപ്പി പരിചയപ്പെടുത്തി തരുന്നത്. 

ചേരുവകൾ

• മത്തൻ ഇല- 7 എണ്ണം
• പരിപ്പ്- 1/2 കപ്പ്
• വെളിച്ചെണ്ണ- 2 ടീസ്പൂൺ
• വെളുത്തുള്ളി- 2 എണ്ണം
• പച്ചമുളക്- 1
• മഞ്ഞൾപ്പൊടി-  1/2 ടീസ്പൂൺ
• മുളകുപൊടി-  1/2 ടീസ്പൂൺ
• ഉപ്പ്- ആവശ്യത്തിന്
• തേങ്ങ-  1/2 കപ്പ്
• സവാള- 1
• ജീരകം-  1/2 ടീസ്പൂൺ

തയ്യാറാക്കുന്ന വിധം

• മത്തൻ ഇല നന്നായി കഴുകി തുടച്ചെടുക്കാം.
• അത് ചെറിയ കഷ്ണങ്ങളായി അരിയാം.
• അര കപ്പ് പരിപ്പിലേക്ക് വെള്ളം ഒഴിച്ച് വേവിച്ച് മാറ്റി വയ്ക്കാം.  
• അടി കട്ടിയുള്ള ഒരു പാത്രം അടുപ്പിൽ വച്ച് ആവശ്യത്തിന് എണ്ണ ഒഴിച്ചു ചൂടാക്കാം.
• അതിലേക്ക് ഒരു പച്ചമുളക്, രണ്ട് വെളുത്തുള്ളി, എന്നിവ ചെറുതായി അരിഞ്ഞതു ചേർത്ത് വഴറ്റാം.
• ഇതിലേക്ക് അരിഞ്ഞു വച്ച മത്തൻ്റെ ഇല കൂടി ചേർക്കാം.
• അര ടീസ്പൂൺ മഞ്ഞൾപ്പൊടിയും അര ടീസ്പൂൺ മുളകുപൊടിയും ചേർത്തിളക്കാം.
• അതിലേക്ക് വേവിച്ച പരിപ്പും, കുറച്ച് വെള്ളവും, ആവശ്യത്തിന് ഉപ്പും ചേർത്ത് അടച്ചു വച്ച് വേവിക്കാം.
• അര കപ്പ് തേങ്ങ ചിരകിയതിലേക്ക് ഇടത്തരം വലിപ്പമുള്ള രണ്ട് സവാള ചെറുതായി അരിഞ്ഞതും, അര ടീസ്പൂൺ ജീരകവും ചേർത്ത് അരച്ച് അതിലേക്കു ചേർക്കാം.
• മറ്റൊരു പാൻ അടുപ്പിൽ വച്ച് ആവശ്യത്തിന് വെളിച്ചെണ്ണ ഒഴിച്ചു ചൂടാക്കാം.
• അതിലേക്ക് കടുകും, വറ്റൽമുളക്, കറിവേപ്പില എന്നിവയും ചേർത്തു വറുക്കാം.
• തിളച്ചു വരുന്ന കറിയിലേക്ക് ഇത് ചേർത്ത് അടുപ്പണയ്ക്കാം. ചോറിനൊപ്പം വിളമ്പി കഴിച്ചു നോക്കൂ.

Read More

• പച്ചരിയും ഉരുളക്കിഴങ്ങും മതി, രുചികരമായ ബ്രേക്ക്ഫാസ്റ്റ് ഇനി എളുപ്പത്തിൽ തയ്യാറാക്കാം
• Marble Cake in Cooker: പൂ പോലെ സോഫ്റ്റ് ഈ കുക്കർ മാർബിൾ കേക്ക്
• മസാല പരിപ്പ് പൊടി ഉണ്ടെങ്കിൽ ചോറിന് മറ്റൊരു കറി വേണ്ട
• ഇത്തിരി കുഞ്ഞൻ റവ കൊഴുക്കട്ട ഇങ്ങനെ കഴിക്കാം
• എണ്ണ മാങ്ങ അച്ചാർ; രുചി അറിഞ്ഞാൽ ഭരണി കാലിയാകുന്ന വഴി അറിയില്ല
• 10 രൂപയുടെ ബിസ്കറ്റ് കൊണ്ട് 5 മിനിറ്റിൽ കേക്ക്
• ബാക്കി വരുന്ന ചോറ് കളയരുതേ, ചായക്കൊപ്പം പലഹാരമാക്കാം
• നാവിൽ കൊതിയൂറും പാൽ കൊഴുക്കട്ട
• യീസ്റ്റ് ചേർക്കാതെ അഞ്ച് ദിവസം കൊണ്ട് തയ്യാറാക്കാം ഈ ലൂബിക്ക വൈൻ