സ്ഥിരം ചമ്മന്തിയിൽ അൽപ്പം വെള്ളരി കൂടി ചേർത്തു നോക്കൂ

ദോശയ്ക്കും ഇഡ്ഡലിക്കും, എന്തിനേറെ പറയുന്നു ചപ്പാത്തിക്കൊപ്പവും ചമ്മന്തി കഴിക്കുന്നവരുണ്ട്. സമ്പാറും ചമ്മന്തിയും ചേർന്ന രാവിലത്തെ ബ്രേക്ക്ഫാസ്റ്റ് കോമ്പിനേഷൻ ഇഷ്ട്ടപ്പെടുന്നവരാണോ നിങ്ങൾ?. സാധാരണ തേങ്ങയാണ് ഇതിലെ താരമായി വരാറുള്ളത്. ഇനി ചമ്മന്തി തയ്യാറാക്കുമ്പോൾ അൽപ്പം വെള്ളരി കൂടി അരച്ചു ചേർത്തു നോക്കൂ. വെറു പത്ത് മിനിറ്റിൽ തയ്യാറാക്കാൻ സാധിക്കുന്ന അടിപൊളി കോമ്പിനേഷനാണ് ഇത്. മാളവിക  തൻ്റെ ഇൻസ്റ്റഗ്രാം പേജിലൂടെയാണ് ഈ സ്പെഷ്യൽ ചമ്മന്തി റെസിപ്പി പരിചയപ്പെടുത്തി തരുന്നത്.

ചേരുവകൾ

• വെള്ളരി 
• തേങ്ങ
• മല്ലിയില
• പച്ചമുളക്
• ഇഞ്ചി
• കടല
• കടലപരിപ്പ്
• ഉപ്പ്
• നാരങ്ങ 
• വെള്ളം
• കടുക്
• എണ്ണ
• വറ്റൽമുളക്
• കറിവേപ്പില
• കായപ്പൊടി

View this post on Instagram

A post shared by Malvika Hada Kumar | Recipe Developer (@thespicystory)

തയ്യാറാക്കുന്ന വിധം
വെള്ളരി ചെറിയ കഷ്ണങ്ങളായി അരിഞ്ഞതിലേയ്ക്ക് അൽപ്പം തേങ്ങ ചിരകിയതും, മല്ലിയിലയും, പച്ചമുളക് നീളത്തിൽ മുറിച്ചതും, ചെറിയ കഷ്ണം ഇഞ്ചി അരിഞ്ഞതും, നിലക്കടലയും കടലപരിപ്പും വറുത്തതും, ആവശ്യത്തിന് ഉപ്പും, ഒരു നാരങ്ങയുടെ പകുതി പിഴിഞ്ഞതും ചേർത്ത് അരയ്ക്കുക. അടി കട്ടിയുള്ള ഒരു പാത്രം അടുപ്പിൽ വെച്ച് അൽപ്പം എണ്ണയൊഴിച്ചു ചൂടാക്കി കടുക് പൊട്ടിക്കുക. അതിലേയ്ക്ക് രണ്ട് വറ്റൽമുളകും, കറിവേപ്പിലയും, കായപ്പൊടിയും ചേർത്ത് വറുക്കുക. വെള്ളരിയും തേങ്ങയും  അരച്ചതിലേയ്ക്ക് ഇത് ചേർത്തിളക്കുക.