New OTT Release: ഒടിടിയിൽ സിനിമകളുടെ പൂക്കാലം: ജനുവരിയിൽ എത്തുന്നത് 10 ചിത്രങ്ങൾ

New OTT Release: കോവിഡാനന്തരം ഒടിടി പ്ലാറ്റ്‌ഫോമുകൾക്ക് വലിയ രീതിയിൽ  പ്രചാരമേറിയിട്ടുണ്ട്. തിയേറ്റർ റിലീസ് പോലെ തന്നെ ആളുകൾ ഉറ്റുനോക്കുന്ന ഒന്നാണ് ഒടിടി റിലീസുകളും.   ഒടിടിയിലേക്കുള്ള മാറ്റം മലയാളസിനിമകളെ സംബന്ധിച്ചും ഭാഷാപരമായ തടസ്സങ്ങളെ മറികടന്ന് മുന്നേറാൻ ഏറെ സഹായിക്കുന്നുണ്ട്. സബ്‌ടൈറ്റിലുകളും വിവർത്തനങ്ങളും ലഭ്യമായതിനാൽ തന്നെ മലയാളം ചിത്രങ്ങൾ കാണാനും അവയെ വിലയിരുത്താനുമൊക്കെ ആഗോള തലത്തിലും ഏറെ പ്രേക്ഷകരുണ്ട്. 

വിവിധ ഒടിടി പ്ലാറ്റ്‌ഫോമുകളിലെ ജനുവരി റിലീസ് ചിത്രങ്ങൾ ഏതൊക്കെയെന്നു നോക്കാം. 

Kaathal: The Core OTT: കാതൽ 

മികച്ച നിരൂപകപ്രശംസയും ജനപ്രീതിയും നേടിയ ‘കാതല്‍: ദി കോർ’ ഒടിടിയിൽ എത്തിയിരിക്കുകയാണ്. മമ്മൂട്ടിയേയും ജ്യോതികയേയും കേന്ദ്ര കഥാപാത്രങ്ങളാക്കി ജിയോ ബേബി ഒരുക്കിയ കാതൽ, ഗേ ആയൊരു  വ്യക്തി സമൂഹത്തിൽ നേരിടുന്ന വെല്ലുവിളികളെ കുറിച്ചാണ് സംസാരിച്ചത്. നവംബര്‍ 23 നാണ് ചിത്രം തിയേറ്ററില്‍ എത്തിയത്. മികച്ച കളക്ഷൻ നേടാനും ചിത്രത്തിനു സാധിച്ചിരുന്നു. മമ്മൂട്ടി, ജ്യോതിക, ആര്‍.എസ്. പണിക്കര്‍, സുധി കോഴിക്കോട്, ചിന്നു ചാന്ദിനി, മുത്തുമണി തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചത്. ആദർശ് സുകുമാരനും പോൾസൺ സ്‌കറിയയുമാണ് കാതലിന്റെ തിരക്കഥ നിർവഹിച്ചിരിക്കുന്നത്.  ആമസോൺ പ്രൈമിലാണ് ‘കാതല്‍’ സ്ട്രീമിങ് ആരംഭിച്ചിരിക്കുന്നത്.

Neru OTT: നേര് 

മോഹൻലാൽ, അനശ്വര രാജൻ എന്നിവരെ കേന്ദ്രകഥാപാത്രങ്ങളാക്കി ജീത്തു ജോസഫ് സംവിധാനം ചെയ്ത 'നേരി'ന്റെ ഒടിടി റിലീസും ജനുവരിയിൽ ഉണ്ടാവും എന്നാണ് ലഭിക്കുന്ന റിപ്പോർട്ട്. ക്രിസ്മസ് റിലീസായി എത്തിയ ചിത്രം ബോക്സ് ഓഫീസിൽ വൻ വിജയം നേടി മുന്നേറി കൊണ്ടിരിക്കുകയാണ്. ഈ കോർട്ട് റൂം ഡ്രാമയിൽ പ്രിയാമണി, സിദ്ദിഖ്, ജഗദീഷ്, ശ്രീധന്യ എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.

ഡിസ്നി പ്ലസ് ഹോട്ട്സ്റ്റാർ ആണ് ചിത്രത്തിന്റെ സ്ട്രീമിംഗ് അവകാശം സ്വന്തമാക്കിയിരിക്കുന്നത്. ജനുവരി 23 മുതൽ ഡിസ്നി പ്ലസ് ഹോട്ട്സ്റ്റാറിൽ നേര് സ്ട്രീമിംഗ് ആരംഭിക്കും. 

Salaar OTT: സലാര്‍

പ്രഭാസ്, പൃഥ്വിരാജ് എന്നിവരെ കേന്ദ്രകഥാപാത്രങ്ങളാക്കി  പ്രശാന്ത് നീൽ സംവിധാനം ചെയ്ത സലാര്‍ ഒടിടിയിലേക്ക്. ഹോംബാലെ ഫിലിംസിന്റെ ബാനറിൽ വിജയ് കിരഗാണ്ടർ, കെ വി രാമ റാവു എന്നിവരാണ് നിർമാണം. പ്രഭാസ് ദേവയായും, പൃഥ്വിരാജ് വരദയായും എത്തിയ ചിത്രം ഖാൻസാർ എന്ന സാങ്കൽപ്പിക നഗരത്തെ ഇതിവൃത്തമാക്കിയാണ് പുരോഗമിക്കുന്നത്.  ഉറ്റ സുഹൃത്തുക്കളായ  ഇരുവരുടെയും സുഹൃത്ത് ബന്ധത്തിന്റെയും ഇരുവരും എങ്ങനെ കൊടും ശത്രുകളായി മാറുന്നു എന്നുമാണ് 'സലാർ പാർട്ട്‌ 1- സിസ് ഫയർ' പറയുന്നത്. പ്രഭാസിനും പൃഥ്വിരാജിനും പുറമെ ശ്രുതി ഹാസൻ, ജഗപതി ബാബു,ബോബി സിംഹ, ടിന്നു ആനന്ദ്, ഈശ്വരി റാവു, ശ്രീയ റെഡ്‌ഡി, രാമചന്ദ്ര രാജു എന്നിവരും ചിത്രത്തിലുണ്ട്.

ഛായാഗ്രഹണം ഭുവൻ ഗൗഡ, സംഗീത സംവിധാനം - രവി ബസ്രുർ, പ്രൊഡക്ഷൻ ഡിസൈനർ - ടി എൽ വെങ്കടചലപതി, ആക്ഷൻസ് – അൻമ്പറിവ്, കോസ്റ്റും – തോട്ട വിജയ് ഭാസ്കർ, എഡിറ്റർ - ഉജ്വൽ കുൽകർണി, വി എഫ് എക്സ് – രാഖവ് തമ്മ റെഡ്‌ഡി. 'സലാർ' കേരളത്തിലെ തീയേറ്ററുകളിൽ എത്തിച്ചത് പൃഥ്വിരാജ് പ്രൊഡക്ഷൻസും മാജിക്‌ ഫ്രെയിംസും ചേർന്നാണ്. 

നെറ്റ്ഫ്ളിക്സാണ് സലാറിന്റെ സ്ട്രീമിംഗ് അവകാശം സ്വന്തമാക്കിയിരിക്കുന്നത്. ജനുവരി 20ന് സലാർ നെറ്റ്ഫ്ളിക്സിൽ സ്ട്രീമിംഗ് ആരംഭിക്കും. 

Animal OTT: അനിമൽ 

രൺബീർ കപൂറിനെ നായകനാക്കി സന്ദീപ് റെഡ്ഡി വംഗ സംവിധാനം ചെയ്ത അനിമൽ ഒടിടിയിലേക്ക്. ചിത്രത്തിന്റെ ഒടിടി റിലീസ് തീയതി ഔദ്യോഗികമായി പ്രഖ്യാപിച്ചിരിക്കുകയാണ് അണിയറപ്രവർത്തകർ. തിയേറ്ററിൽ കണ്ട അനിമൽ പതിപ്പാവില്ല ഒടിടിയിൽ ലഭ്യമാകുക. ചിത്രത്തിന്റെ വിപുലീകരിച്ചതും ദൈർഘ്യമേറിയതുമായ പതിപ്പാണ് ഒടിടി പ്ലാറ്റ്ഫോമിൽ ലഭ്യമാവുക എന്ന് സംവിധായകൻ സന്ദീപ് റെഡ്ഡി വംഗ പറയുന്നു.

3 മണിക്കൂറും 21 മിനിറ്റും ദൈർഘ്യമുള്ളതായിരുന്നു അനിമലിന്റെ തിയേറ്റർ പതിപ്പ്. റിപ്പോർട്ടുകൾ പ്രകാരം ചിത്രത്തിന്റെ ഓൺലൈൻ പതിപ്പ് എട്ട് മിനിറ്റ് അധിക ദൈർഘ്യമുള്ളതായിരിക്കും, മൊത്തം 209 മിനിറ്റോളമുണ്ടാകും ഒടിടി പതിപ്പ് എന്നാണ് റിപ്പോർട്ട്. 

ത്രിപൃതി ദിമ്രി, ബോബി ഡിയോൾ, അനിൽ കപൂർ എന്നിവരും അഭിനയിച്ച ചിത്രം ടോക്സിക്കായൊരു അച്ഛൻ-മകൻ ബന്ധത്തെ കുറിച്ചാണ് സംസാരിച്ചത്. സ്ത്രീവിരുദ്ധതയും അമിതമായ വയലൻസും നിറഞ്ഞ ചിത്രത്തിനെതിരെ വലിയ രീതിയിൽ വിമർശനങ്ങളും ഉയർന്നിരുന്നു. എന്നാൽ നെഗറ്റീവ് റിവ്യൂകളും വിവാദങ്ങളും അവഗണിച്ച് ബോക്സ് ഓഫീസിൽ നിന്നും 900 കോടിയിലധികമാണ് അനിമൽ കളക്റ്റ് ചെയ്തത്.

റിപ്പബ്ലിക് ദിനത്തോട് അനുബന്ധിച്ചാണ് അനിമൽ പ്രീമിയർ. ജനുവരി 26 മുതൽ  നെറ്റ്ഫ്ലിക്സിൽ അനിമൽ  സ്ട്രീമിംഗ് ആരംഭിക്കും. 

Antony OTT: ആന്റണി

ജോഷി- ജോജു ജോർജ് ചിത്രം 'ആന്റണി' ഒടിടിയിൽ എത്തി.  'പൊറുഞ്ചു മറിയം ജോസ്' എന്ന ചിത്രത്തിന് ശേഷം ജോഷിയും ജോജു ജോർജും ഒന്നിച്ച ചിത്രമാണ് ആന്റണി. ചിത്രത്തിൽ കല്യാണി പ്രിയദർശൻ,  നൈല ഉഷ, ചെമ്പൻ വിനോദ് ജോസ്, വിജയരാഘവൻ, ആശ ശരത്ത് എന്നിവരും ചിത്രത്തിലുണ്ട്. 

ഐൻസ്റ്റീൻ മീഡിയ, നെക്സ്റ്റൽ സ്റ്റുഡിയോ, അൾട്രാ മീഡിയ എന്റർടൈൻമെന്റ് എന്നീ ബാനറുകളുടെ കീഴിൽ ഐൻസ്റ്റീൻ സാക് പോളാണ് ആന്റണി നിർമിച്ചിരിക്കുന്നത്. രചന - രാജേഷ് വർമ്മ, ഛായാഗ്രഹണം - രണദിവെ, എഡിറ്റിംഗ് - ശ്യാം ശശിധരന്‍, സംഗീത സംവിധാനം - ജേക്സ് ബിജോയ്. 

ആമസോൺ പ്രൈമിലാണ് ചിത്രത്തിന്റെ സ്ട്രീമിംഗ് ആരംഭിച്ചിരിക്കുന്നത്.

Tholvi F.C. OTT:  തോൽവി എഫ്.സി

2023 നവംബറിൽ തിയേറ്ററുകളിലെത്തിയ ചിത്രമാണ് ജോർജ്ജ് കാര സംവിധാനം ചെയ്ത ‘തോൽവി എഫ്.സി.’ (ലോസേഴ്സ് എഫ്.സി.) ഷറഫുദ്ദീൻ,  ജോണി ആന്റണി, ജോർജ്ജ് കോര, ആശാ മടത്തിൽ ശ്രീകാന്ത്, മീനാക്ഷി രവീന്ദ്രൻ എന്നിവരാണ് ചിത്രത്തിലെ പ്രധാന അഭിനേതാക്കൾ.  ആമസോൺ പ്രൈം വീഡിയോയിൽ 2024 ജനുവരി 3 മുതൽ  തോൽവി എഫ്.സി സ്ട്രീമിംഗ് ആരംഭിച്ചിരിക്കുകയാണ്.

Perilloor Premier League OTT: പേരില്ലൂർ പ്രീമിയർ ലീഗ്

ഡിസ്നി+ ഹോട്ട്സ്റ്റാർ ഒർജിനൽസ് മലയാളത്തിന്റെ വെബ് സീരീസാണ് പേരില്ലൂർ പ്രീമിയർ ലീഗ്.  പ്രവീൺ ചന്ദ്രൻ സംവിധാനം ചെയ്ത ചിത്രത്തിൽ നിഖില വിമൽ, സണ്ണി വെയ്ൻ, അജു വർഗീസ്, വിജയ രാഘവൻ എന്നിവരാണ് പ്രധാന കഥാപാത്രങ്ങളായി എത്തുന്നത്. 'കുഞ്ഞിരാമായണം', 'പത്മിനി' തുടങ്ങിയ ചിത്രങ്ങളുടെ തിരക്കഥാകൃത്തായ ദീപു പ്രദീപിന്റേതാണ് തിരക്കഥ.  ഇ4 എന്റർടെയ്ൻമെന്റിന്റെ ബാനറിൽ മുകേഷ് ആർ മേത്തയും സിവി സാരഥിയും ചേർന്നാണ് ഈ വെബ് സീരിസിന്റെ നിർമാണം. അനൂപ് വി ഷൈലജയും അമീലും ചേർന്നാണ് ഛായാഗ്രഹണം നിർവ്വഹിക്കുന്നത്, മുജീബ് മജീദാണ് സംഗീതം. ഡിസ്നി പ്ലസ് ഹോട്ട്സ്റ്റാറിൽ ആണ് പേരില്ലൂർ പ്രീമിയർ ലീഗ് സ്ട്രീം ചെയ്യുന്നത്. 

Udal OTT : ഉടൽ

രതീഷ് രഘുനന്ദൻ സംവിധാനം ചെയ്ത് ഗോകുലം ഗോപാലൻ നിർമ്മിച്ച് നിരൂപക പ്രശംസ നേടിയ ഡ്രാമ ത്രില്ലറായ ഉടൽ ഒടുവിൽ ഒടിടിയിൽ എത്തിയിരിക്കുകയാണ്.  ധ്യാൻ ശ്രീനിവാസൻ നായകനാകുന്ന ചിത്രത്തിൽ ദുർഗ കൃഷ്ണയും ഇന്ദ്രൻസുമാണ് മറ്റു ശ്രദ്ധേയ കഥാപാത്രങ്ങളെ അവതരിപ്പിച്ചിരിക്കുന്നത്.  സൈന പ്ലേ ഒടിടിയിലാണ് ചിത്രം സ്ട്രീമിംഗ് ആരംഭിച്ചിരിക്കുന്നത്. 

Hodu OTT: ഹോഡു

അനുഷ് മോഹൻ രചനയും സംവിധാനവും നിർവഹിച്ച 'ഹോഡു' ഒടിടിയിലേക്ക്. കെഎൽ 01 സിനിമാസ് അവതരിപ്പിക്കുന്ന ചിത്രം നിർമ്മിച്ചിരിക്കുന്നത് വിനീഷ് അമരവിള്ള. രൂപേഷ് പീതാംബരൻ, ഹരികൃഷ്ണൻ സനു, വിസാക് എന്നിവരാണ് ചിത്രത്തിലെ പ്രധാന കഥാപാത്രങ്ങൾ. 'ഹോഡു' 2024 ജനുവരി 22 മുതൽ ഐസ്ട്രീമിൽ സ്ട്രീമിംഗ് ആരംഭിക്കും. 

Conjuring Kannappan: കോൺജറിംഗ് കണ്ണപ്പൻ ഒടിടിയിൽ

തമിഴ് നടൻ സതീഷ് കേന്ദ്രകഥാപാത്രമായി എത്തിയ കോൺജറിംഗ് കണ്ണപ്പൻ ഒടിടിയിൽ. ഹൊറർ കോമഡി ചിത്രമാണിത്. ആർ സേവ്യർ ആണ് സംവിധായകൻ. തമിഴ് ചിത്രം തെലുങ്ക്, മലയാളം, കന്നഡ ഭാഷകളിലും ചിത്രം ലഭ്യമാണ്. നെറ്റ്ഫ്ളിക്സിലാണ് ചിത്രം സ്ട്രീമിംഗ് ആരംഭിച്ചിരിക്കുന്നത്. 

Philip's OTT: ഫിലിപ്‍സ് 

മുകേഷ് പ്രധാന കഥാപാത്രമായി എത്തിയ 'ഫിലിപ്‍സ്' ഇപ്പോൾ ഒടിടിയില്‍ കാണാം.  ആല്‍ഫ്രഡ് കുര്യന്‍ ജോസഫ് സംവിധാനം ചെയ്ത ഫിലിപ്സ്  മുകേഷിന്‍റെ കരിയറിലെ മുന്നൂറാമത്തെ ചിത്രമായിരുന്നു. ഇന്നസെന്റ് അവസാനമായി അഭിനയിച്ച ചിത്രമെന്ന പ്രത്യേകതയും ചിത്രത്തിനുണ്ട്. നോബിൾ ബാബു തോമസ്, നവനി ദേവാനന്ദ്, ക്വിൻ വിബിൻ, ശ്രീധന്യ, അജിത് കോശി, അൻഷാ മോഹൻ, ചാർലി, സച്ചിൻ നാച്ചി,  എന്നിവരാണ് ചിത്രത്തിലെ മറ്റു പ്രധാന അഭിനേതാക്കൾ. 

ലിറ്റിൽ ബിഗ് ഫിലിംസിന്റെ ബാനറിൽ സുവിൻ കെ വർക്കി, പ്രശോഭ് കൃഷ്ണ എന്നിവരാണ് ചിത്രം നിർമ്മിച്ചിരിക്കുന്നത്. ഹെലൻ എന്ന ചിത്രത്തിന്റെ അണിയറപ്രവർത്തകർ വീണ്ടും ഒന്നിക്കുന്ന ചിത്രം കൂടിയാണ് ഫിലിപ്സ്. മാത്തുക്കുട്ടി സേവ്യറും ആൽഫ്രഡും ചേർന്നാണ് തിരക്കഥ. ഛായാഗ്രഹണം ജെയ്സൺ ജേക്കബ് ജോൺ, എഡിറ്റിംഗ് നിധിൻ രാജ് അരോൾ.

നവംബര്‍ 24 നായിരുന്നു ചിത്രം തിയേറ്ററുകളിലെത്തിയത്. ആമസോണ്‍ പ്രൈം, മനോരമ മാക്സ് എന്നി പ്ലാറ്റ്ഫോമുകളിലാണ് ഫിലിപ്സ് സ്ട്രീമിംഗ് ആരംഭിച്ചിരിക്കുന്നത്. ഇന്ത്യയ്ക്ക് പുറത്തുള്ളവർക്ക് സിംപ്ലി സൗത്തിലൂടെയും ചിത്രം കാണാം.

Read More Entertainment Stories Here

• Animal OTT: തിയേറ്ററിൽ കണ്ടതിലും 8 മിനിറ്റ് അധികം; രൺബീറിന്റെ അനിമൽ ഒടിടിയിലേക്ക്
• മലൈക്കോട്ടൈ എവിടെയാണ് എന്നറിയാമോ?
• സൂര്യന്റെ തീ, ഈ കോട്ട ചാമ്പലാക്കും; ദൃശ്യവിരുന്നൊരുക്കി 'മലൈക്കോട്ടൈ
• ആനയുടെ തലവട്ടം കണ്ടാൽ ജയറാമിനറിയാം ആരാണ് ആ കേമനെന്ന്: വീഡിയോ
• ലഗേജ് എത്താൻ വൈകി; കാത്തിരിപ്പുസമയം ആഘോഷമാക്കി ശിവമണിയുടെ പെർഫോമൻസ്
• ഗേറ്റ് എവിടെക്കണ്ടാലും ആടിക്കോണം, പ്രായമൊന്നും നോക്കരുതെന്ന് അംബിക; വീഡിയോ