പയ്യോളിയെ 'പൊളിയാക്കുന്ന' മൂരാട് പാലം; NH 66 പയ്യോളി മുതൽ വടകര വരെയുള്ള ആകാശദൃശ്യങ്ങൾ

എൻ എച്ച് 66 ൽ പയ്യോളി മുതൽ വടകര വരെ രണ്ടര കിലോമീറ്റർ ദൂരത്തിലുള്ള മൂരാട് പാലത്തിന്റെ നിർമ്മാണം പുരോഗമിക്കുകയാണ്. പയ്യോളി ടൗണിന്റെ മുഖം മാറ്റുന്ന നിർമ്മാണ പ്രവർത്തനങ്ങളാണ് നിലവിൽ പുരോഗമിക്കുന്നത്. ഹ​രി​യാ​ന ആ​സ്ഥാ​ന​മാ​യു​ള്ള ഇ-​ഫൈ​വ് ഇ​ൻ​ഫ്രാ​സ്ട്ര​ക്ച​ർ പ്രൈ​വ​റ്റാണ് ക​രാ​ർ ​ജോ​ലി​ക​ൾ ഏ​റ്റെ​ടു​ത്തി​രി​ക്കു​ന്ന​ത്. പ്രദേശവാസികളുടെ കാലങ്ങളായുള്ള കാത്തിരിപ്പാണ് മുരാട് പാലത്തിനായുള്ളത്. 100 വർഷം പഴക്കമുള്ള ബ്രിട്ടീഷ് നിർമ്മിതമായ പഴയ പാലത്തിന് പകരമായാണ് എൽ എച്ച് 66 ന്റെ ഭാഗമായുള്ള പുതിയ മൂരാട് പാലം വരുന്നത്. 

പയ്യോളി മുതൽ വടകര വരെയുള്ള ദൂരത്തെ ആറുവരിപ്പാതയുടെ നിർമ്മാണവും ദ്രുതഗതിയിൽ തന്നെയാണ് മുന്നോട്ടുപോകുന്നത്. ഭാരത് മാല പദ്ധതിയിൽ ഉൾപ്പെടുത്തിയാണ് കേന്ദ്ര-സംസ്ഥാന സർക്കാരുകളുടെ പങ്കാളിത്തതോടെ ദേശീയപാത 66 അതിവേഗം പൂർത്തിയായിക്കൊണ്ടിരിക്കുന്നത്. 

എൻ എച്ച് 66 ന്റെ നിർമ്മാണത്തോടെ പയ്യോളി ടൗണിന് വലിയ രീതിയിലുള്ള മാറ്റങ്ങളാണ് ഉണ്ടായിരിക്കുന്നത്. രണ്ട് വ്യത്യസ്ത കമ്പനികളാണ് പയ്യോളി മുതൽ വടകര വരെയുള്ള ദൂരത്തെ നിർമ്മാണ പ്രവർത്തികൾ ഏറ്റെടുത്തിരിക്കുന്നത്. പയ്യോളി ഭാഗത്തെ നിർമ്മാണം അതിവേഗത്തിൽ പുരോഗമിക്കുമ്പോൾ വടകരയിൽ അതൽപ്പം മന്ദഗതിയിലാണെന്ന് നിർമ്മാണ പ്രവർത്തനങ്ങളുടെ വീഡിയോ പങ്കുവെക്കുന്ന വ്ളോഗർ അബുകീം തന്റെ വീഡിയോയിൽ പറയുന്നു. പയ്യോളി മുതൽ വടകര വരെയുള്ള നിർമ്മാണ പ്രവർത്തനങ്ങളുടെ ആകാശദൃശ്യങ്ങൾ പങ്കുവെച്ചുകൊണ്ടാണ് അബു കീമിന്റെ വിവരണം.

പയ്യോളി-വടകര പാതയിൽ മേൽപ്പാലങ്ങളുടെ പണികളാണ് ഇപ്പോൾ പുരോഗമിക്കുന്നത്. പല മേഖലകളിലും സർവ്വീസ് റോഡുകളുടെ നിർമ്മാണം പൂർത്തീകരിച്ചിട്ടുണ്ടെങ്കിലും ഇവയൊന്നും ഗതാഗതത്തിനായി തുറന്നു കൊടുത്തിട്ടില്ല. ഐനിക്കാട് മേഖലയിൽ ആറുവരിപ്പാത പൂർണ്ണമായും സജ്ജമായി കഴിഞ്ഞു. ഈ ഭാഗത്ത് സർവ്വീസ് റോഡിന്റേയും ക്രാഷ് ബാരിയറിന്റേയുമടക്കം നിർമ്മാണങ്ങൾ പൂർത്തിയായതായി വീഡിയോയിൽ കാണാം.

എന്നാൽ വടകരയിലേക്കെത്തുമ്പോൾ നിർമ്മാണ പ്രവർത്തനങ്ങൾ മന്ദഗതിയിലാണെന്നാണ് അബുകീം തന്റെ 'ഹാക്സ് വൈബ്' (HaKZvibe)എന്ന യൂട്യൂബ് ചാനലിൽ അഭിപ്രായപ്പെടുന്നത്. വടകരയിൽ പല മേഖലയിലും പ്രാഥമിക ഘട്ടത്തിൽ നിന്നും നിർമ്മാണം മുന്നോട്ട് പോകാത്ത അവസ്ഥയാണുള്ളതെന്നും വ്ളോഗർ പറയുന്നു.

Read More

• കേരളത്തിലെ ആദ്യ ആറുവരിപ്പാത ഉദ്ഘാടനത്തിനൊരുങ്ങുന്നു
• കേരളത്തിന്റെ മുഖച്ഛായ മാറ്റി NH 66; കോരിത്തരിപ്പിക്കുന്ന ആകാശദൃശ്യങ്ങൾ, വീഡിയോ