കണ്ടൽക്കാടുകളുടെ ഭംഗി ആസ്വദിച്ച് ആറുവരിയിലൂടെ ചീറിപ്പായാം; ബന്ദിയോട് മുതൽ പുത്തൂർ വരെ NH 66 ആകാശദൃശ്യങ്ങൾ

കാസർഗോഡിന്റെ മുഖച്ഛായ മാറ്റുന്ന തരത്തിലാണ് എൻ എച്ച് 66 ന്റെ നിർമ്മാണ് പ്രവർത്തനങ്ങൾ അതിവേഗം പുരോഗമിക്കുന്നത്. ബന്ദിയോട് മുതൽ പുത്തൂർ പുഴയ്ക്ക് കുറുകെയുള്ള പാലം വരെ നിർമ്മാണ പ്രവർത്തനങ്ങൾ ഏതാണ്ട് അവസാന ഘട്ടത്തിലേക്ക് എത്തിക്കഴിഞ്ഞു. ഊരാളുങ്കൽ ലേബർ സൊസൈറ്റിയാണ് ഈ മേഖലയിലെ നിർമ്മാണ പ്രവർത്തനങ്ങൾ നടത്തുന്നത്. മറ്റ് പ്രദേശങ്ങളിലെ നിർമ്മാണങ്ങളിൽ നിന്നും വ്യത്യസ്തമായി ബന്ദിയോട് മുതൽ പുത്തൂർ വരെയുള്ള ദൂരത്തിലെ ഏതാണ്ട് എല്ലാ മേഖലകളിലും ഒരേ പോലെയാണ് നിർമ്മാണം പൂർത്തികരിച്ചിരിക്കുന്നത്. 

റെയിൽ പാതയോട് ചേർന്നുള്ള ആറ് വരിപ്പാതയാണ് ഈ മേഖലകളിൽ ഏറെയും. കൂടാതെ മണ്ണൊലിപ്പ് തടയുന്നതിനായി ഈ മേഖലയിൽ കോൺക്രീറ്റ് വാളും ആറു വരിപ്പാതയുടെ ഭാഗമായി നിർമ്മിക്കുന്നുണ്ട്. ഈ മേഖലയിൽ അതിവേഗമാണ് നിർമ്മാണം പുരോഗമിക്കുന്നതെന്ന് വീഡിയോ തയ്യാറാക്കിയ വ്ളോഗർ അബുകീം 'ഹാക്സ് വൈബ്' (HaKZvibe)എന്ന തന്റെ യൂ ട്യൂബ് ചാനലിൽ പങ്കിട്ടിരിക്കുന്ന നിർമ്മാണ പ്രവർത്തനങ്ങളുടെ മനോഹരമായ ആകാശ ദൃശ്യങ്ങൾ ചൂണ്ടിക്കാട്ടിക്കൊണ്ട് വ്യക്തമാക്കുന്നു.

മേഖലയിലെ പ്രധാന പാലമായ കുമ്പള പാലത്തിന്രെ പ്രീകാസ്റ്റിംഗ് നടപടികൾ പൂർത്തിയായി വരികയാണ്. ഒപ്പം ഈ പ്രദേശത്ത് റോഡിൽ ആധുനിക സാങ്കേതിക വിദ്യയായ ബിറ്റുമിൻ ചെയ്യുന്ന പ്രവർത്തികളും നടന്നുവരുന്നു. കണ്ടൽക്കാടുകളുടെ സൗന്ദര്യ ആസ്വദിച്ച് ആറുവരി പാതയിലൂടെ സഞ്ചരിക്കാവുന്ന തരത്തിലാണ് കുമ്പള ഭാഗത്തെ പാതയുടെ നിർമ്മാണത്തിന്റെ ഘടന. 

കുമ്പള ടൗണിന്റെ മുഖം മാറ്റുന്ന തരത്തിലാണ് പ്രദേശത്തെ എൻ എച്ച് 66 ന്റെ നിർമ്മാണം മുന്നോട്ട് പോകുന്നത്. കുമ്പളയിൽ നിർമ്മാണ പ്രവർത്തനങ്ങൾ ഏതാണ്ട് അവസാന ഘട്ടത്തിലാണ്. ഇവിടെ സർവ്വീസ് റോഡുകളുടേയും ക്രാഷ് ബാരിയറുകളുടേയുമടക്കം നിർമ്മാണം പൂർത്തീകരിച്ചിട്ടുണ്ടെന്നും വ്ളോഗറായ അബുകീം വിശദമാക്കുന്നുണ്ട്. 

പാത മുന്നോട്ടുപോകുമ്പോൾ മൊഗ്രാലിലെ അണ്ടർ പാസിന്റെ പണികൾ പൂർത്തീകരിച്ച് വരികയാണെന്നും വീഡിയോയിൽ വ്യക്തമാക്കുന്നു. ഒപ്പം പുത്തൂർ പാലത്തിന്റെ പണികൾ ഏതാണ്ട് പകുതിയിലേറെ കഴിഞ്ഞിട്ടുണ്ടെന്നും ഇവിടെ ഗർഡറുകൾ പ്രീകാസ്റ്റ് ചെയ്യുന്ന പ്രവർത്തികളാണ് നടന്നുവരുന്നതെന്നും ആകാശ ദൃശ്യങ്ങൾ പങ്കുവെച്ചുകൊണ്ട് വ്ളോഗർ വിശദീകരിക്കുന്നു.

Read More

• പയ്യോളിയെ 'പൊളിയാക്കുന്ന' മൂരാട് പാലം; NH 66 പയ്യോളി മുതൽ വടകര വരെയുള്ള ആകാശദൃശ്യങ്ങൾ
• കേരളത്തിലെ ആദ്യ ആറുവരിപ്പാത ഉദ്ഘാടനത്തിനൊരുങ്ങുന്നു
• കേരളത്തിന്റെ മുഖച്ഛായ മാറ്റി NH 66; കോരിത്തരിപ്പിക്കുന്ന ആകാശദൃശ്യങ്ങൾ, വീഡിയോ