'മോദി തന്നെ നയിക്കും'; അതോർത്ത് കേജ്രിവാളിന് ആശങ്ക വേണ്ടെന്ന് അമിത് ഷാ

ഹൈദരാബാദ്: 75 വയസ്സായാലും രാജ്യത്തിന്റെ പ്രധാനമന്ത്രിയായി നരേന്ദ്ര മോദി തന്നെ തുടരുമെന്ന് കേന്ദ്ര ആഭ്യന്തരമന്ത്രി അമിത് ഷാ. 75 വയസ്സാവുമ്പോൾ മോദി ഒഴിയുമെന്ന ഡൽഹി മുഖ്യമന്ത്രി അരവിന്ദ് കേജ്രിവാളിന്റെ പരാമർശത്തിലായിരുന്നു ഷായുടെ പ്രതികരണം. തുടർന്നും മോദി തന്നെ നയിക്കും. 75 വയസ്സായാൽ ഒഴിയണമെന്ന് ബിജെപിയുടെ ഭരണഘടനയിലില്ലെന്നും അമിത് ഷാ വ്യക്തമാക്കി. പ്രധാനമന്ത്രി നരേന്ദ്ര മോദി 75 വയസിൽ വിരമിക്കുമെന്നും ആഭ്യന്തര മന്ത്രി അമിത് ഷാ ആ റോളിലേക്ക് ചുവടുവെക്കുമെന്നുമായിരുന്നു ഡൽഹി മുഖ്യമന്ത്രി അരവിന്ദ് കെജ്‌രിവാളിന്റെ പരാമർശങ്ങൾ. 

“നരേന്ദ്ര മോദിക്ക് 75 വയസ്സ് തികയുന്നതിൽ സന്തോഷിക്കേണ്ടതില്ലാത്ത അരവിന്ദ് കെജ്‌രിവാളിനോടും കമ്പനിയോടും ഇന്ത്യാ സഖ്യത്തോടും ഞാൻ ഇത് പറയാൻ ആഗ്രഹിക്കുന്നു. ബിജെപിയുടെ ഭരണഘടനയിൽ അത്തരത്തിലുള്ള ഒരു കാര്യവും പരാമർശിച്ചിട്ടില്ല. മോദി ജി ഈ കാലാവധി പൂർത്തിയാക്കാൻ പോകുകയാണ്, മോദി ജി ഭാവിയിലും രാജ്യത്തെ നയിക്കും. ബിജെപിക്കുള്ളിൽ ആശയക്കുഴപ്പമില്ല". ഷാ പറഞ്ഞു. 

“ഞങ്ങൾ 400 സീറ്റുകൾ കടക്കുമെന്നും മോദി ജി മൂന്നാം തവണയും പ്രധാനമന്ത്രിയാകുമെന്നും ഇന്ത്യൻ സഖ്യ നേതാക്കൾക്ക് അറിയാം, അതിനാലാണ് അവർ ഇത്തരം തെറ്റിദ്ധാരണകൾ പ്രചരിപ്പിക്കുന്നത്. ബിജെപിയുടെ ഭരണഘടനയിൽ അത്തരമൊരു വ്യവസ്ഥ ഇല്ലെന്ന് വ്യക്തമാക്കാൻ ഞാൻ ആഗ്രഹിക്കുന്നു. 2029 വരെ മോദിജി രാജ്യത്തെ നയിക്കും, വരാനിരിക്കുന്ന തിരഞ്ഞെടുപ്പും മോദിജി നയിക്കും. ഇന്ത്യാ സഖ്യത്തിന് നല്ല വാർത്തകളൊന്നുമില്ല. എഎൻഐയോട് സംസാരിച്ച അദ്ദേഹം പറഞ്ഞു.  

മദ്യ നയക്കേസിൽ ഇടക്കാല ജാമ്യം നേടി ജയിലിൽ നിന്നും പുറത്തിറങ്ങിയതിന് പിന്നാലെയായിരുന്നു ഇന്ന് പ്രധാനമന്ത്രി നരേന്ദ്ര മോദിയെ കടന്നാക്രമിച്ച് ഡൽഹി മുഖ്യമന്ത്രി അരവിന്ദ് കേജ്രിവാൾ രംഗത്തെത്തിയത്. ആം ആദ്മി പാർട്ടിയുടെ തകർച്ചയാണ് മോദിയും ബിജെപിയും ആഗ്രഹിക്കുന്നതെന്നും നേതാക്കളെ ജയിലിലടച്ചതുകൊണ്ട് തകരുന്ന പ്രസ്ഥാനമല്ല ആം ആദ്മിയെന്ന് പ്രധാനമന്ത്രി മനസ്സിലാക്കണമെന്നും കേജ്രിവാൾ പറഞ്ഞു. ഒരു രാജ്യം ഒരു നേതാവെന്ന അപകടകരമായി ദൗത്യമാണ് മോദിയുടെ മനസ്സിലുള്ളതെന്നും പ്രധാനമന്ത്രിയെ രൂക്ഷമായി വിമർശിച്ചുകൊണ്ട് കേജ്രിവാൾ പറഞ്ഞു. 

“മോദി ജി ഞങ്ങളെ തകർക്കാൻ ആഗ്രഹിക്കുന്നു... ആം ആദ്മി പാർട്ടി മാത്രമേ രാജ്യത്തിന് ശോഭനമായ ഭാവി നൽകാൻ പോകുന്നുള്ളൂ എന്ന് അദ്ദേഹത്തിനും അറിയാം..ബിജെപി എന്നെ ജയിലിലേക്ക് അയച്ചു, താൻ അഴിമതിക്കെതിരെ പോരാടുകയാണെന്ന് പ്രധാനമന്ത്രി പറയുന്നു. എന്നാൽ ബിജെപി അവരുടെ പാർട്ടിയിലെ എല്ലാ അഴിമതിക്കാരെയും സംരക്ഷിക്കുകയാണ് ചെയ്യുന്നത്. " കേജ്രിവാൾ പറഞ്ഞു. 

Read More

• സെക്സ് വീഡിയോ വിവാദം: ബിജെപി നേതാവ് ദേവരാജെ ഗൗഡ അറസ്റ്റിൽ
• 'പ്രധാനമന്ത്രിയായി മോദിക്ക് ഇനിയൊരു തിരിച്ച് വരവുണ്ടാകില്ല'; രാഹുൽ ഗാന്ധി
• ഡൽഹി മദ്യനയ കേസിൽ അരവിന്ദ് കേജ്‌രിവാളിന് ഇടക്കാല ജാമ്യം
• അദാനിയും അംബാനിയും നിറയുന്ന രാഹുൽ- മോദി പോർവിളികൾ
• അധികാരത്തിലെത്തിയാൽ 50% സംവരണ പരിധി ഉയർത്തും: എൻഡിഎ 150 കടക്കില്ലെന്ന് രാഹുൽ ഗാന്ധി