Jammu Kashmir Terror Attack: കശ്മീരിൽ പൊട്ടാതെ കിടന്ന 42 പാക് ഷെല്ലുകൾ സൈന്യം നിർവീര്യമാക്കി

Jammu Kashmir Terrorist Attack: ശ്രീനഗർ: ജമ്മു കശ്മീരിൽ പാക്കിസ്ഥാന്റെ പൊട്ടാത്ത 42 ഷെല്ലുകൾ സൈന്യം നീർവീര്യമാക്കി. നേരത്തെ, ഇന്ത്യയ്ക്ക് നേരെയുള്ള പാക് ആക്രമണത്തിൽ പതിച്ചവയാണ് ഈ ഷെല്ലുകൾ. കശ്മീരിലെ പൂഞ്ചിലെ അതിർത്തിമേഖലകളായ ജുല്ലാസ്, സലോത്രി, ധരതി, സലാനി എന്നിവിടങ്ങളിൽ നടത്തിയ തിരച്ചിലിലാണ് ഷെല്ലുകൾ കണ്ടെത്തിയത്. 

അതിർത്തി മേഖലകളിൽ നിന്ന് കണ്ടെത്തിയ പൊട്ടാത്ത ഷെല്ലുകൾ സുരക്ഷിതമായി നിർവീര്യം ചെയ്‌തെന്ന് പ്രതിരോധ പബ്ലിക് റിലേഷൻസ് ഓഫീസർ ലെഫ്റ്റനന്റ് കേണൽ സുനീൽ ബർട്ട്വാൾ പറഞ്ഞു. ജനങ്ങളുടെ ജീവന് അപകടം ഉണ്ടാകാതിരിക്കാൻ എല്ലാ സുരക്ഷാ മാനദണ്ഡങ്ങളും പാലിച്ച് കൃത്യതയോടെയാണ് ഇവ നിർവീര്യമാക്കിയത്. ജമ്മു കശ്മീർ പോലീസുമായി ചേർന്നാണ് സൈന്യത്തിലെ ബോംബ് നിർമാർജന സംഘങ്ങൾ സ്‌ഫോടക വസ്തുക്കൾ നിർവീര്യമാക്കിയതെന്ന് അദ്ദേഹം പറഞ്ഞു. 

കഴിഞ്ഞ അഞ്ച് ദിവസത്തിനുള്ളിൽ പൊട്ടാത്ത എൺപതോളം ഷെല്ലുകളാണ് സൈന്യം നിർവീര്യമാക്കിയത്. പൂഞ്ചിൽ നിന്ന് മാത്രം 42 എണ്ണമാണ് കണ്ടെത്തിയത്. രജൗരിയിൽ 19-ഉം പർഗ്വാൾ നിന്ന് ആറെണ്ണവും രാജ്യാന്തര അതിർത്തിയിൽ നിന്ന് 12 സ്‌ഫോടക വസ്തുക്കളുമാണ് കണ്ടെത്തിയത്. 

അതേസമയം, ഇന്ത്യ-പാക് വെടിനിർത്തലിന് സമയപരിധി നിശ്ചയിച്ചിട്ടില്ലെന്ന് സൈന്യം വ്യക്തമാക്കി. ഇരു രാജ്യങ്ങളുടെയും ഡയറക്ടർ ഓഫ് മിലിട്ടറി ഓപ്പറേഷൻസ് (ഡിജിഎംഒമാർ) തമ്മിൽ കഴിഞ്ഞാഴ്ച ഉണ്ടാക്കിയ ധാരണയ്ക്ക് കാലാവധി ഇല്ലെന്ന്  സൈന്യം വ്യക്തമാക്കി. ഇരു രാജ്യങ്ങളും തമ്മിലുള്ള വെടിനിർത്തൽ കരാർ ഞായറാഴ്ച അവസാനിക്കുമെന്ന റിപ്പോർട്ടുകളെ തുടർന്നാണ് ഇക്കാര്യത്തിൽ സൈന്യത്തിന്റെ ഭാഗത്ത് നിന്നുള്ള ഔദ്യോഗിക വിശദീകരണം. 

ഓപ്പറേഷൻ സിന്ദൂറിന്റെ കൂടുതൽ ദൃശ്യങ്ങളും സൈന്യം പുറത്തുവിട്ടു. ഓപ്പറേഷൻ സിന്ദൂറിലെ സേനയുടെ പോരാട്ട വീര്യം, ലക്ഷ്യം ഭേദിച്ചതിന്റെ കൂടുതൽ തെളിവുകൾ പങ്കിട്ടാണ് സൈന്യം ഈ പുതിയ വീഡിയോ പുറത്ത് വിട്ടത്. ഇന്ത്യൻ ആക്രമണത്തിൽ പാക് സൈനിക പോസ്റ്റ് തകരുന്നത് ദൃശ്യങ്ങളിൽ വ്യക്തമാണ്.

Read More

• ഇന്ത്യ-പാക് വെടിനിർത്തൽ ധാരണ; സമയപരിധി നിശ്ചയിച്ചിട്ടില്ലെന്ന് സൈന്യം
• ലഷ്‌കർ ഭീകരൻ സൈഫുള്ള ഖാലിദ് അജ്ഞാതരുടെ വെടിയേറ്റ് കൊല്ലപ്പെട്ടു
• ഓപ്പറേഷൻ സിന്ദൂർ; കൂടുതൽ ദൃശ്യങ്ങൾ പുറത്തുവിട്ട് സൈന്യം
• ഓപ്പറേഷൻ സിന്ദൂർ; വിദേശകാര്യ മന്ത്രിയോട് ചോദ്യങ്ങളുമായി രാഹുൽ ഗാന്ധി
• രാഷ്ട്രത്തിന് വേണ്ടി എന്തെങ്കിലും ചെയ്യേണ്ടത് കടമ; പാർട്ടിയ്ക്കും സർക്കാരിനുമിടയിലെ വിഷയങ്ങളെപ്പറ്റി അറിയില്ല: ശശി തരൂർ
• വിദേശത്തേക്കുള്ള പ്രതിനിധി സംഘം; കോൺഗ്രസ് നിർദേശിച്ച പേരുകൾ വെട്ടി, ഇടം നേടി തരൂർ