'അമ്മ' ഭാരവാഹികളുടെ കൂട്ടരാജി സ്വാഗതാർഹം; അംഗങ്ങളെ ബോധിപ്പിക്കേണ്ട ചുമതല മോഹൻലാലിന്: ഭാഗ്യലക്ഷ്മി

കൊച്ചി: മലയാളം സിനിമയിലെ താര സംഘടനയായ 'അമ്മ'യിലെ ഭാരവാഹികളുടെ കൂട്ടരാജി സ്വാഗതാർഹമാണെന്ന് ചലച്ചിത്ര പ്രവർത്തക ഭാഗ്യലക്ഷ്മി. സംഘടനയിലെ അംഗങ്ങൾക്കുനേരെ ആരോപണം ഉയരുന്ന സാഹചര്യത്തിൽ രാജി വയ്ക്കേണ്ടതും, സത്യാവസ്ഥ പുറത്തുകൊണ്ടു വരേണ്ടതും ഉത്തരവാദിത്വം ആണെന്ന് ഭാഗ്യലക്ഷ്‌മി പറഞ്ഞു.

'കേരളത്തിലെ ഭൂരിഭാഗം ജനങ്ങളും ബഹുമാനിക്കുന്ന വ്യക്തിയാണ് മോഹൻലാൽ. രാജി വയ്ക്കേണ്ടത് അദ്ദേഹത്തിന്റെ ഉത്തരവാദിത്വമാണ്. തീരുമാനം ഉചിതവും സ്വാഗതാർഹവുമാണ്. അമ്മ സംഘടനയിൽ ഒരുപാട് അംഗങ്ങളുണ്ട്. അവർക്ക് എല്ലാവർക്കും സംഘടനയുടെ ഭാവിയും ഇനിയുള്ള നടപടികളും എന്താണെന്ന് ആശങ്കയുണ്ട്. അവരെ എല്ലാവരെയും ബോധിപ്പിക്കേണ്ട ചുമതല തീർച്ചയായും സംഘടനയുടെ പ്രസിഡന്റ് എന്ന നിലയിൽ മോഹൻലാലിനുണ്ട്.

ആ ഉത്തരവാദിത്വം നിറവേറ്റേണ്ടത് അദ്ദേഹത്തിന്റെ കടമയാണ്. തീർച്ചയായും സന്തോഷമുള്ള കാര്യമാണ്. സംഘടനയുടെ തലപ്പത്തിരിക്കുന്നവർ അവർ നിരപരാധിയാണെന്ന് അംഗങ്ങളെ ബോധ്യപ്പെടുത്തണം. ആരോപണ വിധേയനായവർ അന്വേഷണവുമായി സഹകരിക്കണം. ആരോപണം ഉന്നയിക്കുന്നവർ, അവർ പറയുന്ന കാര്യങ്ങളിൽ സത്യസന്ധത ഉണ്ടെങ്കിൽ കേടതിവരെ കൂടെനിന്ന് സഹകരിക്കണം', ഭാഗ്യലക്ഷ്മി പറഞ്ഞു. 

ഹേമ കമ്മറ്റി റിപ്പോർട്ടിന് പിന്നാലെ ഉടലെടുത്ത വിവാദങ്ങളുടെ പശ്ചാത്തലത്തിൽ, പ്രസിഡന്റ് മോഹൻലാൽ അടക്കമുള്ള മുഴുവൻ ഭാരവാഹികളും അമ്മയിൽ നിന്ന് രാജിവച്ചു. സംഘടനയുടെ 17 അംഗ ഭരണസമിതി പിരിച്ചുവിടുകയും ചെയ്തു.

പ്രസിഡന്റ് മോഹൻലാൽ, വൈസ് പ്രസിഡന്റ് ജയൻ ചേർത്തല, വൈസ് പ്രസിഡന്റ് ജഗദീഷ്, ജോയിന്റ് സെക്രട്ടറി ബാബുരാജ്, ട്രഷറർ ഉണ്ണി മുകുന്ദൻ, എക്സിക്യൂട്ടീവ് കമ്മിറ്റി അംഗങ്ങളായ അൻസിബ ഹസൻ, സരയു, വിനു മോഹൻ, ടിനി ടോം, അനന്യ, സുരേഷ് കൃഷ്ണ, കലാഭവൻ ഷാജോൺ, സുരാജ് വെഞ്ഞാറമൂട്, ജോമോൾ, ജോയ് മാത്യു, ടൊവിനോ തോമസ് എന്നിവരാണ് അമ്മയിൽ നിന്നും രാജിവച്ചത്. 

Read More

• ദുരനുഭവം പങ്കിട്ട് കൂടുതൽ സ്ത്രീകൾ രംഗത്ത്, ആരോപണ വിധേയർ ഇവരൊക്കെ
• നോ പറയാൻ സാഹചര്യം ഇല്ലാത്ത സ്ത്രീകളോട്, അത് നിങ്ങളുടെ തെറ്റല്ല: മഞ്ജു വാര്യർ
• എല്ലാത്തിനും പിന്നിൽ അവളുടെ പോരാട്ട വീര്യം; ഓർമ്മപ്പെടുത്തലുമായി ഗീതു മോഹൻദാസും മഞ്ജു വാര്യരും
• ആർക്കും രക്ഷപെടാനാവില്ല; ഉത്തരവാദികളെ ജനം മറുപടി പറയിപ്പിക്കും: ആഷിഖ് അബു
• ഉപ്പു തിന്നവർ വെള്ളം കുടിച്ചേ പറ്റു:ഷമ്മി തിലകൻ
• രഞ്ജിത്തിന്റേത് അനിവാര്യമായ രാജിയെന്ന് സംവിധായകൻ വിനയൻ
• പവർ ഗ്രൂപ്പിൽ പെണ്ണുങ്ങളും ഉണ്ടാകും, എത്രയോ തവണ എന്നെ മാറ്റി നിർത്തിയിട്ടുണ്ട്: ശ്വേത മേനോൻ
• ഒഴുകിയും തെന്നിയും മാറിയും, ആലോചിക്കാം, പഠിക്കാം എന്നൊന്നും പറഞ്ഞാൽ പോര, 'അമ്മ' ശക്തമായി ഇടപെടണം: ഉർവശി