Weekly Horoscope Oct 05-Oct 11: വാരഫലം, അശ്വതി മുതൽ ആയില്യംവരെ

Weekly Horoscope: ആദിത്യൻ കന്നിരാശിയിൽ അത്തം ഞാറ്റുവേലയിലാണ്. ചന്ദ്രൻ വാരാദ്യം വെളുത്തപക്ഷത്തിൽ. തിങ്കളും ഭാഗികമായി ചൊവ്വാഴ്ചയും ആയി 'ആശ്വിനപൗർണമി' വരും. തുടർന്ന്  കൃഷ്ണപക്ഷം ആരംഭിക്കുന്നു. ചതയം മുതൽ രോഹിണി വരെ നക്ഷത്രമണ്ഡലങ്ങളിലാണ് ചന്ദ്രസഞ്ചാരം.

ചൊവ്വ തുലാം രാശിയിൽ ചോതി നക്ഷത്രത്തിലാണ്. ബുധനും തുലാം രാശിയിൽ ചിത്തിര-ചോതി നക്ഷത്രങ്ങളിൽ സഞ്ചരിക്കുന്നു. ശുക്രൻ ചിങ്ങം രാശിയിലാണ്. ഒക്ടോബർ 9 ന് നീചക്ഷേത്രമായ കന്നിരാശിയിൽ പ്രവേശിക്കും. 

Also Read: നിങ്ങളുടെ ഇന്നത്തെ ദിവസം, രാശി ഫലം

ശനി മീനം രാശിയിൽ വക്രഗതി തുടരുന്നു. പൂരൂരുട്ടാതി നക്ഷത്രത്തിലാണ് ശനി. വ്യാഴം മിഥുനം രാശിയിൽ പുണർതം നക്ഷത്രത്തിലാണ്. രാഹുവും കേതുവും യഥാക്രമം കുംഭം-ചിങ്ങം രാശികളിൽ തുടരുന്നു. 

ഈ ഗ്രഹനിലയെ മുൻനിർത്തി അശ്വതി മുതൽ ആയില്യം വരെയുള്ള നാളുകാരുടെ വാരഫലം വിശകലനം ചെയ്യുന്നു.

Also Read:  ഒക്ടോബർ മാസഫലം, അശ്വതി മുതൽ രേവതി വരെ

അശ്വതി

ഊർജ്ജസ്വലമായ വാരമായിരിക്കും. ഔദ്യോഗിക ജീവിതത്തിൽ കാര്യങ്ങൾക്കൊത്ത് ഒഴുകാനാവും.  കരുതിയാൽ ഒഴുക്കിനെതിരേയും നീന്തൽ സാധ്യമാകുന്നതാണ്. ആരോടായാലും തനിക്ക് പറയാനുള്ളത് ഭംഗിയായി വിശദീകരിക്കും. ഭാവികാര്യങ്ങൾ ആസൂത്രണം ചെയ്യുവാൻ സന്നദ്ധതയുണ്ടാവും. തൃപ്തികരമായിരിക്കും, ധനസ്ഥിതി.  വ്യക്തിപരമായി അല്പം സുഖക്കുറവ് വന്നേക്കും. മൗനം വലിയ തോതിൽ രക്ഷ നൽകുന്നത് അനുഭവിച്ചറിയും. പ്രണയികൾക്കും ദമ്പതികൾക്കും ഏഴിലെ ചൊവ്വയും ശുക്രൻ്റെ നീചവും തടസ്സങ്ങളും അനൈക്യവും സൃഷ്ടിക്കുന്നതാണ്. ചൊവ്വ, വെള്ളി ദിവസങ്ങളിൽ കരുതലുണ്ടാവണം.

ഭരണി

ഔദ്യോഗികമായി ഗുണകരമായ വാരമാണ്. ചുമതലകൾ സമയബന്ധിതമായി പൂർത്തിയാക്കും. ആലോചനകളെ ക്രിയകളാക്കാൻ തടസ്സമുണ്ടാവില്ല. ഒപ്പമുള്ളവരുടെ സഹകരണം തുടരപ്പെടും. പുതിയതായി എന്തെങ്കിലും പഠിച്ചറിയാൻ അവസരം സംജാതമാകും. ആഢംബരച്ചെലവുകൾ അനിവാര്യമാവും.  അനുഭവങ്ങളിൽ നിന്നും പലതും പഠിക്കും. വിശ്രമിക്കാൻ സമയം കുറയും. ഉറക്കക്കുറവ് ക്ഷീണമേകും. ദാമ്പത്യത്തിലും പ്രണയത്തിലും സ്വൈരം കുറയാനിടയുണ്ട്. തർക്കങ്ങളിൽ 
നിശബ്ദത നയമാക്കുന്നത് ഗുണകരമാവും.

കാർത്തിക

പ്രതാപശാലിയാണെന്ന് തോന്നും. ഭൂതകാല മഹിമകളിലാവും മനസ്സ്. തീരുമാനങ്ങളിൽ സ്ഥിരത്വം കുറയുന്നതാണ്. കാര്യനിർവഹണത്തിന് പരാശ്രയത്വമുണ്ടാവും. സാമ്പത്തിക രംഗം മെച്ചപ്പെടുമെന്ന് പറയാനാവില്ല. അമിത ചിലവുകൾ കുറയ്ക്കാൻ തയ്യാറാകേണ്ടതുണ്ട്. ഒപ്പമുള്ളവരെ പഴിക്കുന്നത് ശത്രുത വളർത്തിയേക്കാം. നിസ്സാര കാര്യങ്ങളിൽ അനാവശ്യമായ ഉത്കണ്ഠ വരാം. ദേഹാരോഗ്യം പോലെ മാനസികാരോഗ്യവും പ്രധാനമെന്നറിയണം. എന്നാൽ അശ്രദ്ധ ഒഴിവാക്കപ്പെടണം. വാരമധ്യത്തിലെ മൂന്നാലു ദിവസങ്ങൾ കൂടുതൽ മേന്മയുള്ളതായിരിക്കും. 

Also Read: ചൊവ്വ തുലാം രാശിയിൽ, അശ്വതി മുതൽ രേവതിവരെ

രോഹിണി

പരോപകാരത്താൽ ധന്യത അനുഭവപ്പെടും. മനസ്സമാധാനം അഭംഗുരമായി തുടരും. ജോലിസ്ഥലത്ത് കാര്യവിജയമുണ്ടാവും. പുതിയ സൗഹൃദം ഉടലെടുക്കാം.  വാക്കുകൾ ആദരവ് നേടിത്തരുന്നതാണ്. മക്കളുടെ കാര്യത്തിൽ ചില ഉൽക്കണ്ഠകൾ ഉണ്ടാവാനിടയുണ്ട്. പഠനത്തിന് സാങ്കേതിക സഹായം കൂടുതലായി വേണ്ടി വന്നേക്കാം. കൃത്യാന്തരങ്ങൾ കാരണം കടമകൾ നിർവഹക്കാൻ തടസ്സമുണ്ടാവും. ബിസിനസ്സുകാർക്ക് ഗ്രൂപ്പായി നടത്തുന്ന ചിട്ടിയിൽ നിന്നും ആദായം കൈവരാം. കലാപരിപാടികൾക്ക് അവസരം കിട്ടിത്തുടങ്ങും. ഒരേ മേഖലയിൽ നിന്നും വെല്ലുവിളികൾ ഉയരുന്നതാണ്.

മകയിരം

പഴയകാര്യങ്ങൾ ഓർമ്മയിൽ വന്നുകൊണ്ടിരിക്കും. ചിലപ്പോൾ നഷ്ടബോധം അനുഭവപ്പെടാം. ഭാവിയെക്കുറിച്ച്  ആശങ്കയുണ്ടാവുന്നതാണ്. ഉദ്യോഗസ്ഥർക്ക് സ്ഥലംമാറ്റക്കാര്യത്തിൽ ആശയക്കുഴപ്പം തുടരുന്നതാണ്. ചെറുയാത്രകൾ സന്തോഷകരമാവും. മംഗളകർമ്മങ്ങളിൽ പങ്കെടുക്കുന്നതാണ്. സുഹൃത്തുക്കളുടെ പിന്തുണയിൽ സന്തോഷിക്കും. ആരംഭിച്ച കാര്യങ്ങൾ വേഗത്തിൽ പൂർത്തിയാക്കാൻ സമ്മർദ്ദമുണ്ടാവും. ബിസിനസ്സിൽ ലാഭം കുറയുന്നതായി തോന്നും.  സാമൂഹ്യമാദ്ധ്യമങ്ങളിൽ സക്രിയമായ സാന്നിദ്ധ്യം പുലർത്തും.

തിരുവാതിര

വാരാദ്യ ദിവസങ്ങളിൽ സ്വസ്ഥത കുറയും. കാര്യസാധ്യത്തിനായി അലച്ചിലുണ്ടാവും. പണം കൂടുതൽ ചെലവാകുന്നതാണ്. ബുധൻ മുതൽ കാര്യങ്ങൾ വരുതിയിലാകും. ബന്ധുക്കളുടെ തീരുമാനങ്ങളോട് വിയോജിപ്പറിയിക്കും. കരാർപണിയിൽ കിട്ടേണ്ട കുടിശിക ഭാഗമായി കിട്ടും. സഹോദരന് സാമ്പത്തിക സഹായം ചെയ്യേണ്ടി വരുന്നതാണ്. ചികിൽസാ മാറ്റത്താൽ രോഗോപദ്രവത്തിന് ശമനം കണ്ടുതുടങ്ങും. ഗൃഹത്തിൽ കുളിമുറി, ഡ്രെയിനേജ് ഇവ സംബന്ധിച്ച അറ്റകുറ്റപ്പണി വേണ്ടിവരുന്നതാണ്. മകൻ്റെ ശാഠൃശീലം മനക്ലേശമുണ്ടാക്കാം.

Also Read: നിങ്ങളുടെ ജീവിതപങ്കാളി എങ്ങനെയുള്ള ആളാവും?

പുണർതം

പാരമ്പര്യ തൊഴിലുകളിൽ വിജയിക്കാനാവും. പുതിയ ജോലി തേടുന്നവർക്ക് കാത്തിരിക്കേണ്ടി വരുന്നതാണ്. തിടുക്കത്തിൽ തീരുമാനങ്ങൾ കൈക്കൊള്ളുന്നത് ദോഷത്തിനിടവരുത്തും. ബന്ധുക്കളുടെ ആവശ്യങ്ങൾ സാധിച്ചുകൊടുക്കും. കുടുംബ ജീവിതത്തിൽ സാമാന്യമായ സംതൃപ്തി പ്രതീക്ഷിക്കാം. ചെറുപ്പക്കാർക്ക് തൊഴിലിടത്തിൽ സമ്മർദ്ദങ്ങൾ ഉയരാം. പ്രണയജീവിതത്തിൽ അസംതൃപ്തി വരും. വാരാദ്യ ദിവസങ്ങളിൽ പുതുകാര്യങ്ങൾ തുടങ്ങരുത്.  പഴയ കൈവായ്പ മടക്കിക്കിട്ടിയേക്കും.

പൂയം

ഗൗരവമുള്ള ചർച്ചകളിൽ പങ്കെടുക്കുകയും ചിന്തിക്കത്തക്ക അഭിപ്രായം പറയുകയും ചെയ്യും. ആത്മവിശ്വാസം കുറയാം. എന്നാൽ ഒപ്പമുള്ളവരിൽ വിശ്വാസം ജനിപ്പിക്കും. വീട്ടുകാര്യങ്ങളിൽ ശ്രദ്ധ കുറയാം. മകൻ്റെ പഠിപ്പിൽ ആശങ്കയുണ്ടാവും. പുതുവാഹനം വാങ്ങാൻ അനുകൂല സമയമല്ല. സഹായ വാഗ്ദാനങ്ങൾ ജലരേഖകളായേക്കും. പണം ചെലവാക്കുന്നതിൽ  പുലർത്തും. ഏജൻസി പ്രവർത്തനം തുടങ്ങാൻ ചിലരുടെ സഹായം സിദ്ധിക്കുന്നതാണ്. ചൊവ്വ, ബുധൻ ദിവസങ്ങളിൽ സ്വൈരക്കേടുണ്ടാവാം.

ആയില്യം

നക്ഷത്രാധിപനായ ബുധന്  ചൊവ്വയുമായി യോഗം വരുന്നതിനാൽ അനാവശ്യ കാര്യങ്ങളിൽ കലഹമേർപ്പെടാം.  ചിന്താപരത കൂടുകയാൽ മനസ്സുഖം കുറയുന്നതായി രിക്കും. വീണ്ടുവിചാരമില്ലാതെ പ്രവർത്തിക്കരുത്. സ്ത്രീകളുടെ സഹായം ലഭിക്കുന്നതാണ്. കർമ്മമേഖല ഉണരുവാൻ സാധ്യതയുണ്ട്. പ്രൈവറ്റ് സ്ഥാപനത്തിൽ വേതന വർദ്ധനയ്ക്ക് പരിഗണന ലഭിക്കാം. കഴിവതും പണയപ്പലിശ മുടങ്ങാതിരിക്കാൻ ശ്രദ്ധിക്കും. വൈദ്യപരിശോധനകളിൽ അമാന്തമരുത്. ആത്മീയ കാര്യങ്ങൾക്ക് നേരം കണ്ടെത്തുന്നതാണ്. പുതിയ തലമുറയോട് പൊരുത്തപ്പെടാൻ വിഷമിക്കും.

Read More: കന്നി മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ