Weekly Horoscope Aug 31-Sep 06: വാരഫലം, മകം മുതൽ തൃക്കേട്ടവരെ

Weekly Horoscope: ആദിത്യൻ ചിങ്ങം രാശിയിൽ പൂരം ഞാറ്റുവേലയിലാണ്. ചന്ദ്രൻ വെളുത്തപക്ഷം അഷ്ടമി മുതൽ ചതുർദ്ദശി വരെയുള്ള തിഥികളിൽ സഞ്ചരിക്കുന്നു.  ചൊവ്വ കന്നിരാശിയിൽ അത്തം നക്ഷത്രത്തിലാണ്. സെപ്തംബർ 4 ന് ചിത്തിരയിൽ പ്രവേശിക്കുന്നു. ബുധൻ ചിങ്ങം രാശിയിൽ മകം നക്ഷത്രത്തിലാണ്. ബുധന് മൗഢ്യവുമുണ്ട്. ശുക്രൻ കർക്കടകം രാശിയിൽ പൂയം - ആയില്യം നക്ഷത്രമണ്ഡലങ്ങളിലൂടെ കടന്നുപോകുന്നു.

വ്യാഴം മിഥുനം രാശിയിൽ പുണർതം നക്ഷത്രത്തിലാണ്. ശനി മീനം രാശിയിൽ ഉത്രട്ടാതിയിൽ വക്രഗതി തുടരുന്നു. രാഹു കുംഭം രാശിയിൽ പൂരൂരുട്ടാതിയിലും കേതു ചിങ്ങം രാശിയിൽ പൂരം നക്ഷത്രത്തിലും പിൻഗതി തുടരുന്നു.

ഈയാഴ് മലയാളികളുടെ ദേശീയോത്സവമായ പൊന്നിൻ തിരുവോണം കടന്നുവരുന്നു. സെപ്തംബർ 5ന്/ചിങ്ങം 20ന് വെള്ളിയാഴ്ചയാണ് തിരുവോണം. ചന്ദ്രസഞ്ചാരം ഈയാഴ്ച അനിഴം മുതൽ അവിട്ടം വരെയുള്ള നക്ഷത്രമണ്ഡലങ്ങളിലൂടെയാണ്.

Also Read: ചിങ്ങ മാസത്തെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ

ഈ ഗ്രഹസ്ഥിതിയെ അവലംബിച്ച് മകം മുതൽ തൃക്കേട്ടവരെയുള്ള നക്ഷത്രങ്ങളിൽ ജനിച്ചവരുടെ വാരഫലം ഇവിടെ അവതരിപ്പിക്കുന്നു.

മകം

സ്വശക്തിയിൽ വിശ്വാസം വർദ്ധിക്കും. മടിച്ചുനിന്ന ദൗത്യങ്ങൾ സധൈര്യം ഏറ്റെടുക്കും. അഭിമാനബോധത്തോടെ പ്രവർത്തിക്കാനാവും. പലരിലും സൽപ്രേരണ ചെലുത്തുന്നതാണ്. ആഘോഷങ്ങളിൽ മുഴുകുവാനാവും. സാമ്പത്തികമായി സംതൃപ്തിയുണ്ടാവും. വ്യക്തിപരമായ വിഷമങ്ങൾ മറക്കും. വാരാദ്യം ജോലിഭാരം കൂടാനിടയുണ്ട്. സഹപ്രവർത്തകരുടെ അഭാവം അധ്വാനം വർദ്ധിപ്പിക്കാം. വിദേശത്തുള്ള മകനിൽ നിന്നും സഹായം വന്നെത്തും. ദേഹസുഖക്കുറവിന് വൈദ്യസഹായം തേടാതിരിക്കരുത്. ചെലവ് അധികരിക്കുന്നതിൽ അസ്വസ്ഥതയുണ്ടാവില്ല.

Also Read:നിങ്ങളുടെ ഇന്നത്തെ ദിവസം, രാശി ഫലം

പൂരം

പുതിയ കാര്യങ്ങളോട് മുഖം തിരിച്ചേക്കും. പാരമ്പര്യത്തിൻ്റെ തനിമകളോട് കൂടുതൽ ആഭിമുഖ്യം പുലർത്തും. കുടുംബത്തിലെ മംഗളകർമ്മങ്ങൾക്ക് നേതൃത്വം വഹിക്കും. ചെറുപ്പക്കാരുടെ ജോലിക്കാര്യത്തിലെ അനിശ്ചിതത്വം ആഘോഷങ്ങളെ അല്പം മ്ളാനമാക്കാം. ആഘോഷവേളകളിലെ ഒത്തുചേരലുകൾ പുതിയ സംരംഭങ്ങൾ സംബന്ധിച്ചുള്ള പര്യാലോചനകൾ കൂടിയായി മാറും. ജന്മനക്ഷത്രത്തിൽ പിൻഗതി തുടരുന്ന കേതു സ്വസ്ഥതയെ ബാധിക്കാനിടയുണ്ട്. അതിനാൽ വാക്കിലും കർമ്മത്തിലും കരുതൽ വേണ്ടതാണ്. പ്രണയികൾക്കിടയിൽ അസ്വാരസ്യം ഉയരാം. പാരിതോഷികങ്ങൾ ലഭിക്കുന്നതാണ്.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

ഉത്രം

ഗവേഷണ വിഷയങ്ങളിൽ നിന്നും മനസ്സ് പിൻവാങ്ങും. പിതാവും പുത്രനും തമ്മിൽ കൂടുതൽ രമ്യതയുണ്ടാവും. പ്രണയികൾ വിവാഹ തീരുമാനത്തിലെത്തും. ഔദ്യോഗിക രംഗത്ത് ചുമതലകൾ പകരക്കാരെ ഏൽപ്പിക്കേണ്ടി വരാം. സുഹൃത്തുക്കളുമൊത്ത് മുൻകൂട്ടി തീരുമാനിക്കാത്ത യാത്രകൾ നടത്താനുള്ള സാധ്യതയുണ്ട്. പ്രതീക്ഷിച്ച സഹായം കിട്ടാത്തതിൽ വേദനയുണ്ടാവും. സാമ്പത്തിക വർദ്ധനവ് കടം തീർക്കാനായി ഉപയോഗിച്ചേക്കും. ബന്ധുകലഹത്തിൽ മൗനം പാലിക്കുന്നതാവും ഉചിതം. കരാറുകളിൽ പങ്കാളിയാവുമ്പോൾ വ്യവസ്ഥകൾ കൃത്യമായി അറിയാൻ ശ്രമിക്കേണ്ടതുണ്ട്.

അത്തം

ജന്മനക്ഷത്രത്തിൽ നിന്നും ചൊവ്വ മാറുന്നതിനാൽ കുറച്ചുനാളായി അനുഭവിക്കുന്ന സമ്മർദ്ദം കുറയാം. സ്വതസ്സിദ്ധമായ കഴിവുകൾ പ്രയോജനപ്പെടുത്താനായേക്കും. ദാമ്പത്യത്തിൽ അനുരഞ്ജന നിലപാടുകൾ ഗുണകരമാവും. ആലസ്യവും ഉന്മേഷവും വിട്ടകലാം. ഭാവിസംബന്ധിച്ച  തീരുമാനങ്ങൾ കൃത്യമായ ആലോചനയിലൂടെ സ്വീകരിക്കും. ബന്ധുസമാഗമത്തിൽ സന്തോഷിക്കാനും പഴയ സ്മരണകൾ പുതുക്കാനുമാവും. വാഹനം വാങ്ങുന്നതിനാവശ്യമായ നടപടികൾ കൈക്കൊള്ളും. മകൻ്റെ കാര്യത്തിൽ ശുഭവാർത്തയുണ്ടാവും.

ചിത്തിര

സ്വന്തം തീരുമാനങ്ങൾ പുനപ്പരിശോധിക്കാൻ സാധ്യത കാണുന്നു. വെല്ലുവിളികൾ ഏറ്റെടുക്കാതിരിക്കുകയാവും തൽകാലം അഭികാമ്യം. ഉപഭോക്താക്കളുടെ വലിയ തോതിലുള്ള സഹകരണം വ്യാപാരത്തിൽ ലാഭമുയർത്തും. ഭാവികാര്യങ്ങളിൽ സഹപ്രവർത്തകരുടെ അഭിപ്രായം കൂടി സ്വീകരിക്കാൻ തീരുമാനിക്കുന്നതാണ്. ഗാർഹികമായി സൗഖ്യമുണ്ടാവും. വിനോദയാത്ര മാറ്റിവെച്ചേക്കും. ഭൂമിവിൽപ്പനയിലെ തടസ്സം വിഷമത്തിന് കാരണമാകും. വിദ്യാർത്ഥികൾക്ക് വിദൂരപഠനത്തിലൂടെ പുതിയ കോഴ്സിന് പ്രവേശനം ലഭിക്കുന്നതാണ്. ആഴ്ചമധ്യം കൂടുതൽ ഗുണകരം.

Also Read: സമ്പൂർണ വർഷഫലം; അശ്വതി മുതൽ രേവതി വരെ

ചോതി

ബൗദ്ധികമായി അല്പം പിരിമുറുക്കമുണ്ടാവും. കാര്യങ്ങൾ പരിഹരിക്കാൻ കൂടുതൽ ഊർജ്ജം ചെലവഴിക്കേണ്ടി വരുന്നതാണ്. അന്യനാട്ടിൽ കഴിയുന്നവർ  ആഘോഷങ്ങളുടെ ഭാഗമാകാനായി നാട്ടിലെത്തിച്ചേരാൻ  ഏറെ ക്ലേശിച്ചേക്കും. സുഹൃൽ സമാഗമത്തിലൂടെ മാനസികോർജ്ജം വീണ്ടെടുക്കുവാനാവും. സ്വർണപ്പണയം വീണ്ടെടുക്കുന്നതിലൂടെ ഗാർഹികമായ സ്വൈരക്കേടുകൾക്ക് പരിഹാരമാവും. പഠനകാര്യത്തിൽ വ്യക്തമായ മാർഗനിർദ്ദേശം കിട്ടും. പ്രണയികളുടെ ഇടയിൽ ഹൃദയൈക്യം ദൃഢമാകുന്നതാണ്. ചിലരുടെ വാക്കുകൾ മനസ്സിൽ മുറിവാകാം.

വിശാഖം

ധനപരമായി മോശമാവില്ല. എന്നാൽ കുറച്ചധികം ചെലവേർപ്പെടുന്നത് സ്വാഭാവികമായ രീതിയാവും. ഗൃഹനിർമ്മാണത്തെ സംബന്ധിച്ച ഏർപ്പാടുകൾ പുനരാലോചിക്കാൻ അവധിക്കാലം പ്രയോജനപ്പെടുത്തും. മകളുടെ ജോലിസ്ഥലത്തിനടുത്ത് താമസിക്കേണ്ടതായ സാഹചര്യം രൂപപ്പെടാനിടയുണ്ട്. മകൻ്റെ നവസംരംഭങ്ങൾ ബാലാരിഷ്ടയിൽ കിടന്ന് കുരുങ്ങുന്നതിൽ വിഷമമുണ്ടാവും. പൂർവ്വിക ഭൂമിയുടെ പ്രമാണത്തിലെ അവ്യക്തതകൾ ആശയക്കുഴപ്പം സൃഷ്ടിച്ചേക്കും. ചൊവ്വ, ബുധൻ, വെള്ളി ദിവസങ്ങൾക്ക് മേന്മയേറുന്നതാണ്.

അനിഴം

ഊർജ്ജവും ഉന്മേഷവും അനുഭവപ്പെടുന്ന വാരമാവും. തടസ്സങ്ങളെ തൃണവൽഗണിച്ച് മുന്നേറാനാവും. അനുഭവത്തിലൂടെ നേടിയ ജീവിതപാഠങ്ങൾ അത്യധികം ഗുണകരമായിരിക്കും. മുൻകൂട്ടി തീരുമാനിച്ചവ ഭംഗിയായി നിർവഹിക്കാം. ബന്ധുസമാഗമം ആഹ്ളാദമേകും. ചെലവിൻ്റെ കാര്യത്തിൽ ധാരാളിയായേക്കും. കലാപ്രവർത്തകർക്ക് അപ്രതീക്ഷിതമായ അവസരങ്ങൾ വീണുകിട്ടാം. ഗാർഹികാന്തരീക്ഷം സുഖപ്രദമായിരിക്കും. ഭൂമിയിൽ നിന്നും കുറച്ചാദായം വന്നെത്തുന്നതാണ്. ചൊവ്വ, ബുധൻ ദിവസങ്ങളിൽ അലച്ചിലനുഭവപ്പെടും.

തൃക്കേട്ട

ഉപജാപങ്ങളെ മറികടക്കുന്നതാണ്. കാര്യസാധ്യത്തിനായി സ്വാർത്ഥരാവേണ്ടതായി വന്നേക്കും. പുതിയ കാര്യങ്ങൾ പഠിച്ചറിയാനുള്ള ഔൽസുക്യം കൂടുന്നതാണ്. അവധിക്കാല യാത്രകൾ മുൻകൂട്ടി നിശ്ചയിച്ചതനുസരിച്ച് പൂർത്തിയാക്കും. പരാശ്രയ സാഹചര്യം വരാനിടയുണ്ട്. വ്യാപാരകാര്യങ്ങളിൽ ചെറിയ തൃപ്തിക്കുറവ് ഏർപ്പെടുന്നതാണ്. ജീവിത പങ്കാളിയുടെ നിർദ്ദേശങ്ങൾ തള്ളിക്കളയരുത്. നക്ഷത്രാധിപന് മൗഢ്യം ഉള്ളതിനാൽ ഏതുകാര്യവും ഇരുവട്ടം ആലോചിക്കുന്നത് ഗുണമേകും. ജോലി തേടുന്നവരുടെ പ്രതീക്ഷകൾ തുടരപ്പെടും. സാമ്പത്തികമായി തരക്കേടില്ലാത്ത കാലമായിരിക്കും.

Read More: നിങ്ങളുടെ ജീവിതപങ്കാളി എങ്ങനെയുള്ള ആളാവും?