Mars Transit 2024: ചൊവ്വ മേടം രാശിയിൽ, അശ്വതി മുതൽ രേവതി വരെ

2024 ജൂൺ 1 ന് (1199 ഇടവം 18) ന് ശനിയാഴ്ച ചൊവ്വ മീനം രാശിയിൽ നിന്നും മേടം രാശിയിലേക്ക് സംക്രമിക്കുന്നു. ജൂലൈ 12 വരെ, ഏതാണ്ട് 42 ദിവസങ്ങൾ, ചൊവ്വ മേടം രാശിയിൽ തുടരും. അനന്തരം ഇടവം രാശിയിൽ പ്രവേശിക്കുന്നതാണ്. ജൂൺ 1 മുതൽ 18 വരെ അശ്വതി നക്ഷത്രത്തിലും, അതിനു ശേഷം ഭരണി നക്ഷത്രത്തിലും ജൂലൈ  8 മുതൽ കാർത്തിക നക്ഷത്രത്തിലുമായിട്ടാണ് ചൊവ്വയുടെ മേടം രാശിയിലെ സഞ്ചാരം. 

ചൊവ്വയെ (Mars) 'കുജൻ' എന്നാണ് ജ്യോതിഷത്തിൽ സാധാരണ വിളിക്കുന്നത്. ഗ്രഹനിലയിലെ 'കു' എന്ന അക്ഷരം കുജൻ എന്നതിൻ്റെ ചുരുക്കെഴുത്താണ്. അംഗാരകൻ, ലോഹിതൻ, രുധിരൻ, ഭൂമിപുത്രൻ, വക്രൻ, മംഗളൻ തുടങ്ങി അനേകം പേരുകൾ ചൊവ്വയ്ക്കുണ്ട്. 

ഗ്രഹകുടുംബത്തിൽ സേനാനായകൻ്റെ സ്ഥാനമാണ് ചൊവ്വയ്ക്ക് നൽകപ്പെട്ടിട്ടുള്ളത്. തീക്ഷ്ണ ഗ്രഹമാണ്. സൂര്യൻ, ചന്ദ്രൻ, വ്യാഴം എന്നീ ഗ്രഹങ്ങളോട് ചൊവ്വയ്ക്ക് മൈത്രി അഥവാ ബന്ധുത്വമുണ്ട്. ശനിയോടും ശുക്രനോടും ഉദാസീനത അഥവാ സമഭാവനയാണുള്ളത്. ചൊവ്വയ്ക്ക് ശത്രുതയുള്ളത് ബുധനോടാണ്. 

രാശികളിൽ മേടം, വൃശ്ചികം എന്നിവ രണ്ടും ചൊവ്വയുടെ വീടുകളാണ് എന്നാണ് സങ്കല്പം. 'സ്വക്ഷേത്രം' എന്നായാൽ കൃത്യമായ ജ്യോതിഷ ഭാഷയായി. അതിൽ തന്നെ ചൊവ്വയുടെ മൂലക്ഷേത്രം എന്ന ഉയർന്ന പദവിയും മേടം രാശിയ്ക്കുണ്ട്. പ്രസ്തുത രാശിയിൽ സഞ്ചരിക്കുമ്പോൾ ചൊവ്വ കൂടുതൽ കരുത്തനാകും. ബലം വർദ്ധിക്കുന്തോറും ഏതു ഗ്രഹവും കൂടുതൽ ഗുണദാതാക്കളായി മാറും എന്നതാണ് ജ്യോതിഷതത്ത്വം. അതിനാൽ മൂലക്ഷേത്രമായ മേടം രാശിയിൽ സഞ്ചരിക്കുന്ന ചൊവ്വ, ബലശാലിയാവുകയാൽ  സദ്ഫലങ്ങൾ നൽകുന്ന ഗ്രഹമായി പരിണമിക്കുന്നു.

അവരവരുടെ കൂറിൻ്റെ അഥവാ ജന്മരാശിയുടെ 3, 6, 11 എന്നീ മൂന്നുരാശികളിൽ സഞ്ചാരിക്കുമ്പോഴാണ് കുജൻ വലിയ ഗുണം നൽകുന്നത്. ജന്മരാശിയിലും 8,12 എന്നീ ഭാവങ്ങളിലും സഞ്ചരിക്കുമ്പോൾ സ്വതേയുള്ള ചൊവ്വയുടെ ക്രൗര്യം വർദ്ധിക്കുന്നതാണ്. മറ്റു ഭാവങ്ങളിൽ അധികവും ഗുണദോഷ സമ്മിശ്രതയാണ് അനുഭവപ്പെടുക. 

ഈ അടിസ്ഥാന വിവരങ്ങളുടെ പശ്ചാത്തലത്തിൽ ചൊവ്വയുടെ മേടസംക്രമം/മേടരാശി സഞ്ചാരം മേടക്കൂറു മുതൽ ഇടവക്കൂറു വരെയുള്ള പന്ത്രണ്ട് രാശികൾക്കും അവയിലെ അശ്വതി മുതൽ രേവതി വരെയുള്ള 27 നക്ഷത്രങ്ങൾക്കും എന്തൊക്കെ അനുഭവങ്ങളാണ് നൽകുക എന്ന അന്വേഷണമാണ് ഇവിടെ പരിശോധിക്കുന്നത്.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

ജന്മരാശിയിൽ കുജൻ സഞ്ചരിക്കുന്നു. എന്നാൽ മൂലത്രികോണ രാശിയിലുമാണ്. അതിനാൽ ഗുണഫലങ്ങൾക്കാവും മുൻതൂക്കം. ആത്മശക്തി അധികരിച്ചേക്കും. ചിലപ്പോൾ അതുതന്നെ ആജ്ഞാശക്തിയായി വളർന്ന് ഒപ്പമുള്ളവർക്ക് ഉപദ്രവകാരിയാവാനും ഇടയുണ്ട്.  ശരീരോഷ്മാവ് കൂടിയിരിക്കുന്നതായി തോന്നും. അതിസാഹസങ്ങൾക്ക് മുതിരുന്നതാണ്. മത്സരങ്ങളിൽ എതിരാളികളെ തറപറ്റിക്കും. ദാമ്പത്യത്തിൽ സ്വസ്ഥത കുറയുന്നതാണ്. വീഴ്ച, മുറിവ് ഇവയ്ക്ക് സാധ്യതയുണ്ട്. പഴയ കടബാധ്യതകൾ ഓർമ്മിപ്പിക്കപ്പെടും. സഹോദരാനുകൂല്യം പ്രതീക്ഷിക്കാം. വൈകാരിക ക്ഷോഭങ്ങൾ നിയന്ത്രിക്കപ്പെടേണ്ടതുണ്ട്.

ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 3,4 പാദങ്ങൾ)

ചൊവ്വ പന്ത്രണ്ടാം ഭാവത്തിലാകയാൽ ഗുണദോഷസമ്മിശ്ര ഫലങ്ങൾക്കാവും മുൻതൂക്കം. വേണ്ടത്ര തയ്യാറെടുപ്പുകൾ നടത്താൻ സാവകാശം ലഭിക്കാത്ത യാത്രകൾ ഉണ്ടാവും. അനാവശ്യ കാര്യങ്ങൾക്ക് ഊർജ്ജവും സമയവും ചെലവഴിക്കേണ്ടതായി വന്നേക്കും. അന്യനാട്ടിൽ പഠനത്തിന് അവസരം ലഭിക്കുന്നതാണ്. ഭൂമി വ്യവഹാരം നീളാം. സഹോദരരുമായി പൊരുത്തക്കേടുകൾക്ക് ഇടയുണ്ട്. മേലധികാരികളുടെ നീരസത്തിന് പാത്രമാകുന്നതാണ്. തെരഞ്ഞെടുപ്പുകളിൽ അനുകൂലമല്ലാത്ത വിധി നേരിടാൻ സാധ്യതയുണ്ട്. ചെലവിൻ്റെ കാര്യത്തിൽ കർശന നിയന്ത്രണം വേണ്ടതാണ്.  തീരുമാനങ്ങൾ പുനപ്പരിശോധിച്ച് പ്രാവർത്തികമാക്കുകയാവും ഉചിതം.

മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

പതിനൊന്നാം ഭാവത്തിൽ ചൊവ്വ സഞ്ചരിക്കുകയാൽ വ്യവഹാരങ്ങളിൽ അനുകൂലവിധി വന്നു ചേരും. മത്സരങ്ങളിലും തെരഞ്ഞെടുപ്പുകളിലും വിജയം ഭവിക്കുന്നതാണ്. ന്യായമായ ആഗ്രഹങ്ങൾ നിറവേറപ്പെടും. സഹോദരർക്കും തനിക്കും പരസ്പരം ഗുണാനുഭവങ്ങൾ പ്രതീക്ഷിക്കാം. ശത്രുക്കളുടെ പ്രവർത്തനങ്ങളെ മറികടന്ന് ലക്ഷ്യത്തിലെത്തും. ഭൗതിക നേട്ടങ്ങൾ പലതുണ്ടാവും. വസ്തുവോ വീടോ വാങ്ങാൻ ആഗ്രഹിക്കുന്നവർക്ക് അതിനുള്ള സാഹചര്യം സംജാതമാകും. ബിസിനസ്സിൽ ആദായം ഉയരുന്നതാണ്. പരീക്ഷണങ്ങളിൽ സംതൃപ്തിയുണ്ടാവും. ഉദ്യോഗാർത്ഥികൾക്ക് നിരാശപ്പെടേണ്ടി വരില്ല.

കർക്കടകക്കൂറിന് (പുണർതം നാലാം പാദം,  പൂയം, ആയില്യം)

ചൊവ്വ രുചക യോഗം ചെയ്ത് പത്താം ഭാവത്തിൽ സഞ്ചരിക്കുകയാൽ കർമ്മരംഗം പുഷ്ടിപ്പെടുന്നതാണ്. ഉദ്യമശാലികൾക്ക് വെന്നിക്കൊടി പറപ്പിക്കാൻ അനുകൂലമായ സാഹചര്യം തെളിയും. മേലധികാരികൾ ചുമതലാബോധത്തിൽ തൃപ്തി രേഖപ്പെടുത്തും. തസ്തികകളുടെ പുനക്രമീകരണത്തിൽ നേട്ടമുണ്ടാകുന്നതാണ്. ഏജൻസികളിൽ നിന്നും കരാർ പണികളിൽ നിന്നും ആദായം വർദ്ധിക്കും. ഭൂമി വാങ്ങുക, വിൽക്കുക മുതലായവ ലാഭത്തിൽ കലാശിക്കുന്നതാണ്. സഹോദരരുമായി ചേർന്ന് നടത്തുന്ന വ്യാപാരം വളർച്ചയുടെ വഴിയിൽ നീങ്ങും. രാഷ്ട്രീയ പ്രവർത്തകർക്ക് അധികാര സോപാനത്തിലേക്ക് നടന്നുകയറാനാവും. സർക്കാരിൽ നിന്നും ലഭിക്കേണ്ട അനുമതിപത്രം, രേഖകൾ മുതലായവ വിളംബം വിനാ സാധകമാവുന്നതാണ്.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

ചിങ്ങക്കൂറുകാർക്ക് ഭാഗ്യഭാവത്തിലാണ് ചൊവ്വയുടെ സഞ്ചാരം. ഭാഗ്യനാഥനായ ഗ്രഹം ഭാഗ്യസ്ഥാനത്ത് നിൽക്കുകയാണ് എന്ന് സാങ്കേതികമായി പറയാം. അതിനാൽ ഭാഗ്യാനുഭവങ്ങൾ പുഷ്ടിപ്പെടും. അപ്രതീക്ഷിത നേട്ടങ്ങൾക്ക് സാധ്യതയുണ്ട്. പിതൃധനം അനുഭവത്തിൽ വരാം. തൽസംബന്ധമായ വ്യവഹാരങ്ങളിൽ വിജയം നേടും. ഭൂമിയുടെ വിൽപ്പനയിലെ തടസ്സം നീങ്ങുന്നതാണ്. ഉദ്യോഗത്തിൽ ഉയർച്ചയുണ്ടാകും. സംഘടനകളിൽ പ്രവർത്തിക്കുന്നവരുടെ സ്വാധീനശക്തി ഉയരും. സഹോദരരുടെ പിന്തുണ തൊഴിൽ വളർച്ചയ്ക്ക് സഹായകമാവും. കടബാധ്യതകൾക്ക് ആശ്വാസം ലഭിക്കാം. ദേവീ ക്ഷേത്രത്തിലെ നേർച്ചകൾക്കും സമർപ്പണങ്ങൾക്കും അവസരം സിദ്ധിക്കുന്നതാണ്.

കന്നിക്കൂറിന് (ഉത്രം 2, 3, 4 പാദങ്ങൾ, അത്തം, ചിത്തിര 1,2 പാദങ്ങൾ)

കന്നിക്കൂറുകാർക്ക് ദുഃസ്ഥാനമായ അഷ്ടമത്തിൽ അഥവാ എട്ടാം ഭാവത്തിലാണ് ചൊവ്വ സഞ്ചരിക്കുന്നത്. അനിഷ്ടഫലങ്ങളാണ് പ്രായേണ സംഭവിക്കുക. എന്നാൽ ചൊവ്വ ബലവാനാവുകയാൽ ദുരിതം കുറയും. ദുർഘടങ്ങൾക്കിടയിൽ ചില നേട്ടങ്ങൾക്കും സാധ്യതയുണ്ട്. ശത്രുക്കളായിരുന്നവർ മിത്രങ്ങളായേക്കും. ഭൂമി വില്പനയിൽ പ്രതീക്ഷിച്ച ലാഭം കിട്ടിക്കൊള്ളണം എന്നില്ല. പ്രമാണങ്ങളിലും രേഖകളിലും ഒപ്പുവെക്കുമ്പോൾ അവയിൽ പറയുന്ന കാര്യങ്ങൾ വായിച്ചറിയുന്നത് നന്ന്. ആരോഗ്യ പരിശോധനകളിൽ അലംഭാവമുണ്ടാവരുത്.  പ്രധാന കാര്യങ്ങളിൽ വിദഗ്ദ്ധോപദേശം കൈക്കൊള്ളണം. സാഹസകർമ്മങ്ങൾ ഒഴിവാക്കുകയും ചെയ്യേണ്ടതുണ്ട്.

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1, 2, 3 പാദങ്ങൾ)

ഏഴാം ഭാവത്തിലാണ് ചൊവ്വയുടെ സഞ്ചാരം എന്നതിനാൽ പ്രണയികൾക്ക് അനുകൂലമല്ലാത്ത സാഹചര്യം സംജാതമാകാം. ദാമ്പത്യത്തിലും അലോസരങ്ങൾക്ക് സാധ്യതയുണ്ട്. അവിവാഹിതരുടെ സ്വപ്നങ്ങൾ തടസ്സപ്പെടുന്നതാണ്. കൂട്ടുബിസിനസ്സിൽ തർക്കങ്ങൾ ഉടലെടുക്കാനിടയുണ്ട്. നീണ്ട യാത്രകൾക്ക് സാധ്യത കാണുന്നു. വിദേശത്ത് പോകാൻ കാത്തിരിക്കുന്നവർക്ക് ആഗ്രഹസാഫല്യം ഉണ്ടായേക്കും. തുടർ പഠനത്തിന് അന്യനാട്ടിൽ അവസരം സിദ്ധിക്കുന്നതാണ്. വ്യവഹാരങ്ങളിൽ തീർപ്പുണ്ടാവാൻ കാത്തിരിപ്പ് തുടരേണ്ടതായി വന്നേക്കും. കായിക മത്സരങ്ങളിൽ ഏർപ്പെട്ടവർക്ക് നേട്ടങ്ങൾ സംഭവിക്കുന്നതാണ്.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

രാശിനാഥനായ ചൊവ്വ ഉപചയത്തിൽ സ്വക്ഷേത്രബലവാനായി സഞ്ചരിക്കുകയാൽ പല നേട്ടങ്ങൾ വന്നെത്തും. ആത്മവിശ്വാസം അധികരിക്കും. തൊഴിൽ രംഗത്ത് മുന്നേറ്റത്തിന് സാധ്യതയുണ്ട്. ഉദ്യോഗസ്ഥർക്ക് അർഹമായ സ്ഥാനക്കയറ്റം, ശമ്പളവർദ്ധന എന്നിവ സ്വാഭാവികമായി തന്നെ ലഭിക്കുന്നതാണ്. എതിരാളികളെ നിഷ്പ്രഭമാക്കുവാൻ സാധിച്ചേക്കും. കടബാധ്യതകൾ പരിഹരിക്കുവാൻ വഴി തെളിയുന്നതാണ്. ഭൂമിയിൽ നിന്നും ആദായം അധികരിക്കും. വ്യവഹാരങ്ങളിൽ  ന്യായമായ പരിഹാരം പ്രതീക്ഷിക്കാം. തെരഞ്ഞെടുപ്പുകളിൽ മികച്ച വിജയം നേടുന്നതാണ്. സഹോദരരുടെ പിന്തുണയുണ്ടാവുന്നതായിരിക്കും. കിടപ്പ് രോഗികൾക്ക് ആശ്വാസിക്കാറാവും. ധനപരമായി ഗുണം പ്രതീക്ഷിക്കാം.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

അഞ്ചാം ഭാവത്തിലാണ് ചൊവ്വയുടെ സഞ്ചാരം. അമിത വികാരക്ഷോഭവും അമിതോത്സാഹവും എടുത്തുചാട്ടത്തോളം ചെല്ലുന്ന സാഹസികതയും ഉണ്ടായേക്കും. മക്കളുടെ പഠനത്തിൽ ശ്രദ്ധ വേണം. അഞ്ചാം ഭാവാധിപൻ അഞ്ചിൽ സഞ്ചരിക്കുകയാൽ ബൗദ്ധികനേട്ടങ്ങളും പ്രതീക്ഷിക്കാം. പ്രസംഗം, എഴുത്ത് എന്നിവയിൽ മികവ് നേടുന്നതാണ്. പുതിയ കാര്യങ്ങൾ പഠിക്കാനും  അവ പ്രയോഗിച്ച് നോക്കാനും ഉള്ള സന്നദ്ധത ഉണ്ടാവും. സ്വർണാദി  ദ്രവ്യങ്ങൾ വാങ്ങുവാൻ ഇടയുണ്ട്. കാര്യനിർവഹണത്തിൽ കൃത്യത വർദ്ധിക്കും. പ്രവേശന പരീക്ഷകളിലും അഭിമുഖങ്ങളിലും വിജയിക്കുന്നതാണ്. ഇളയ സഹോദരരാൽ ഗുണാനുഭവങ്ങൾക്ക് സാധ്യത കാണുന്നു. പിടിവാശി/നിർബന്ധ ബുദ്ധി എന്നിവ ചിലപ്പോൾ ശത്രുക്കളെ സൃഷ്ടിക്കാനോ വേണ്ടപ്പെട്ടവർക്ക് മനക്ലേശത്തിനോ ഇടവരുത്തിയേക്കാം.

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1, 2 പാദങ്ങൾ)

ചൊവ്വ നാലാം ഭാവത്തിൽ സഞ്ചരിക്കുന്നു. പെട്ടെന്ന് കോപിക്കുകയും പരുഷവാക്കുകൾ പറയുകയും ചെയ്യുന്ന ശീലമേറും. ഇഷ്ടജനങ്ങളുമായി പിണങ്ങാനിടയുണ്ട്. ഇലക്ട്രിക്/ഇലക്ട്രോണിക് ഉല്പന്നങ്ങൾ വാങ്ങാനോ നവീകരിക്കാനോ സാധ്യതയുണ്ട്. വാഹനങ്ങളുടെ അറ്റകുറ്റപ്പണി, പുതുവാഹനം വാങ്ങുക എന്നിവയും നടക്കാം. വസ്തുവിൻ്റെ വേലി കെട്ടുക, പ്രമാണത്തിനുള്ള ചെലവ്, കരമടയ്ക്കൽ ഇത്യാദികളും സംഭവ്യതകൾ. റിയൽ എസ്റ്റേറ്റ് വ്യാപാരം ലാഭകരമാകുന്നതാണ്. മാതാവിൻ്റെ രോഗകാര്യത്തിൽ ഗുണകരമായ മാറ്റം വരാം. മാതൃബന്ധുക്കൾ സഹായിക്കാനുണ്ടാവും. വളർത്തുമൃഗങ്ങളെ പരിചരിക്കുന്നതിൽ കരുതൽ വേണം. പൊതുവേ ഗുണദോഷ സമ്മിശ്രമായ കാലമായിരിക്കും.

കുംഭക്കൂറിന് (അവിട്ടം 3, 4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

കുംഭക്കൂറിൽ ജനിച്ചവർക്ക് ചൊവ്വ അനുകൂലമായിട്ടുള്ള മൂന്നാം ഭാവത്തിൽ സഞ്ചരിക്കുന്നു. അതിനാൽ  ഐശ്വര്യപ്രദവും പുരോഗതിക്ക് വഴിവെക്കുന്നതുമായ ഫലങ്ങൾ ചൊവ്വയിൽ നിന്നും  പ്രതീക്ഷിക്കാം. ന്യായമായ ആഗ്രഹങ്ങൾ തടസ്സം കൂടാതെ നടന്നു കിട്ടുന്നതാണ്.  ധനവരവ് അധികരിച്ചേക്കും. ഊഹക്കച്ചവടത്തിൽ നിന്നും ആദായമുയരും. കിട്ടാക്കടങ്ങൾ ഭാഗികമായെങ്കിലും കിട്ടാനിടയുണ്ട്. ചെറുപ്പക്കാർക്ക് ദിശാബോധത്തോടെ പ്രവർത്തിക്കാനാവും. കച്ചവടം നടത്തുന്നവർക്ക് അതിൽ സ്ഥായിയായ താത്പര്യമേറും. ലാഭം വർദ്ധിക്കുന്നതാണ്. ഉദ്യോഗസ്ഥർക്കും ഗുണമുണ്ടാകുന്ന സാഹചര്യം സംജാതമാകും. ശത്രുപക്ഷത്തെ നിശബ്ദമാക്കാനാവും. പ്രവർത്തന മികവിന് അംഗീകാരം കൈവരാം. കുടുംബാംഗങ്ങൾക്കിടയിൽ ഐക്യം പുലരുന്നതായിരിക്കും. രാഷ്ട്രീയ പ്രവർത്തകർക്ക് തെരഞ്ഞെടുപ്പുകളിൽ വിജയം ഉറപ്പിക്കാൻ കഴിയുന്നതാണ്.

മീനക്കൂറിന് (പൂരുരുട്ടാതി നാലാം പാദം, ഉത്രട്ടാതി, രേവതി)

മീനക്കൂറിൽ ജനിച്ചവർക്ക് ചൊവ്വ രണ്ടാം ഭാവത്തിൽ സഞ്ചരിക്കുന്നു. വാക്സ്ഥാനമാണ് രണ്ടാമെടം. അതിനാൽ പരുക്കൻ വാക്കുകൾ പറയാനും കലഹത്തിലേക്ക് നയിക്കപ്പെടാനും സാധ്യത കൂടുതലാണ്.  കുടുംബ ബന്ധങ്ങളുടെ ദൃഢത നിലനിർത്താൻ ക്ലേശിക്കുന്നതാണ്. മനോവ്യസനങ്ങൾക്ക് ഓരോ കാരണങ്ങൾ വന്നുചേർന്നേക്കും. വിദ്യാർത്ഥികൾക്ക് ഉപരിപഠനാവസരം ലബ്ധമാകുന്നതാണ്.  എന്നാൽ ആയത് ദൂരദിക്കുകളിലാവുക, ഇഷ്ടവിഷയമാവാതെ വരിക തുടങ്ങിയ സാധ്യതകളുണ്ട്. ന്യായമായി ലഭിക്കേണ്ട വരുമാനത്തിൽ അല്പം കുറവ് വന്നേക്കാം. ഇഷ്ടവസ്തുക്കൾ ദുർലഭമാകാനിടയുണ്ട്. നവസംരംഭങ്ങൾ സമാരംഭിക്കാൻ  ഉചിതമായ കാലമല്ല. ചൊവ്വ ബലമുള്ള രാശിയിൽ സഞ്ചരിക്കുകയാൽ സാഹചര്യം പൂർണമായും വരുതിയിലല്ല എന്ന സ്ഥിതി വന്നേക്കില്ല. ആരോഗ്യപരമായി ജാഗ്രത വേണ്ടതുണ്ട്. സാമ്പത്തികമായ ക്രയവിക്രയങ്ങളിൽ കൃത്യത പുലർത്തണം.

Read More

• വാരഫലം, അശ്വതി മുതൽ ആയില്യം വരെ; June 02-June 08, 2024, WeeklyHoroscope

• WeeklyHoroscope(June 2– June 8, 2024): ഈ ആഴ്‌ച നിങ്ങൾക്കെങ്ങനെ?
• വാരഫലം, അശ്വതി മുതൽ ആയില്യം വരെ; June 02-June 08, 2024, Weekly Horoscope
• Daily Horoscope May 30, 2024: നിങ്ങളുടെ ഇന്നത്തെ ദിവസം, രാശി ഫലം
• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 May 27 to June 02
• വാരഫലം, അശ്വതി മുതൽ രേവതി വരെ; May 26-June 01, 2024, Weekly Horoscope
• ദേവഗണത്തിലെ നക്ഷത്രങ്ങൾ
• അക്കങ്ങളിൽ തെളിയും ഭാവികാലം
• മകയിരം നക്ഷത്രക്കാർ പ്രണയലോലരാണ്
• Bharani Star: ഭരണി നാളുകാർ ജീവിത ശൈലീ രോഗങ്ങളെ ശ്രദ്ധിക്കണം