വാരഫലം, അശ്വതി മുതൽ രേവതി വരെ; May 26-June 01, 2024, Weekly Horoscope

ആദിത്യൻ ഇടവം രാശിയിൽ രോഹിണി ഞാറ്റുവേലയിലാണ്. ചന്ദ്രൻ കൃഷ്ണപക്ഷത്തിൽ, മൂലം മുതൽ ഉത്രട്ടാതി വരെയുള്ള നക്ഷത്രങ്ങളിലായി സഞ്ചരിക്കുന്നു. ചൊവ്വ മേയ് 31 വരെ മീനം രാശിയിലും ജൂൺ 1 മുതൽ മേടം രാശിയിലും ആണ്. ബുധൻ മേയ് 30 വരെ മേടത്തിലും മേയ് 31 മുതൽ ഇടവത്തിലും സഞ്ചരിക്കുന്നു. വ്യാഴം ഇടവം രാശിയിലാണ്. വ്യാഴ മൗഢ്യം തുടരുന്നു. 

ശുക്രനും മൗഢ്യത്തിലാണ്. ഇടവം രാശിയിലാണ് ശുക്രൻ. ശനി കുംഭം രാശിയിൽ തന്നെയാണ്. രാഹു മീനം രാശിയിലും കേതു കന്നി രാശിയിലും അപ്രദക്ഷിണ ഗതി തുടരുന്നു. ഈയാഴ്ചയിലെ അഷ്ടമരാശിക്കൂറ് നോക്കാം. ഞായർ മുഴുവനും തിങ്കൾ വൈകിട്ടുവരെയും ഇടവക്കൂറുകാർക്കാണ് അഷ്ടമരാശി വരുന്നത്. തുടർന്ന് ബുധനാഴ്ച സന്ധ്യവരെ മിഥുനക്കൂറുകാർക്കാണ്. അതുമുതൽ തുടങ്ങി വെള്ളിയാഴ്ച അർദ്ധരാത്രി വരെ കർക്കടകക്കൂറുകാർക്കാണ് അഷ്ടമരാശി. തുടർന്ന് ശനിയാഴ്ച മുഴുവനും ചിങ്ങക്കൂറുകാർക്കും. 

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടെ സമ്പൂർണ വാരഫലം ഇവിടെ പരിശോധിക്കുന്നു.

അശ്വതി

ജോലി സംബന്ധിച്ച പ്രധാന തീരുമാനങ്ങൾ കൈക്കൊള്ളും. സഹപ്രവർത്തകരുടെ കാര്യാലോചനയിൽ പുതിയ തൊഴിൽ സാഹചര്യങ്ങൾ വിലയിരുത്തുന്നതാണ്. ഊർജ്ജസ്വലതയും ദീർഘവീക്ഷണവും അഭിനന്ദിക്കപ്പെടും. സംരംഭകർക്ക് മുന്നോട്ടു നീങ്ങാൻ ഇണങ്ങിയ സാഹചര്യമാണ്. ആത്മസംതൃപ്തി അനുഭവപ്പെടും.  സാമൂഹിക ജീവിതത്തിൻ്റെ ഭാഗമായിട്ടുള്ള തിരക്കുകളും വർദ്ധിക്കുന്നതാണ്. സുഹൃൽബന്ധങ്ങൾ ദൃഢമാകും. ഉല്ലാസത്തിന് നേരം കണ്ടെത്താൻ കഴിയും. ഊഹക്കച്ചവടത്തിൽ നിന്നും ആദായം ഉയർന്നേക്കും.

ഭരണി

നക്ഷത്രാധിപനായ ശുക്രന് മൗഢ്യം തുടരുകയാൽ അനുകൂല കാലത്തിലും വിപരീതാനുഭവങ്ങൾ വരാം. തൊഴിലിൽ ശ്രദ്ധ കേന്ദ്രീകരിക്കാനാവും. ബിസിനസ്സിൽ ഉണർവ്വുണ്ടാകും. സാമ്പത്തികമായ ആവശ്യങ്ങൾ ഭംഗിയായി നടന്നുകിട്ടും. ഉന്നത വ്യക്തികളുടെ പിന്തുണ ലഭിക്കുന്നതാണ്. വിദ്യാർത്ഥികൾക്ക് നവീനമായിട്ടുള്ള കോഴ്സുകൾക്ക് അഡ്മിഷൻ ലഭിച്ചേക്കാം. കിടപ്പുരോഗികൾക്ക് പുതുചികിൽസ കൊണ്ട് പ്രതീക്ഷിച്ച മാറ്റം ഉണ്ടാവണമെന്നില്ല.  വാരാന്ത്യത്തിൽ അഹിതകരമായ യാത്രകൾക്ക് സാധ്യത. അധികച്ചെലവുണ്ടാകുന്നതാണ്.

കാർത്തിക

അറിവും ആഗ്രഹവും സമാന്തരമായി നീങ്ങിയേക്കും. ഉദ്യമങ്ങൾ പകുതി വഴിയിൽ ഉപേക്ഷിക്കാൻ ആലോചിക്കും. മറ്റുള്ളവരുടെ വാക്കുകൾക്ക് അമിതപ്രാധാന്യം നൽകുന്ന രീതി ഗുണകരമാവില്ല. ആത്മവിശ്വാസത്തിന് ഉലച്ചിൽ സംഭവിച്ചേക്കാം. മുഖ്യതൊഴിലിനേക്കാൾ ഉപ തൊഴിലുകളിൽ നിന്നും വരുമാനം വർദ്ധിക്കുന്നതാണ്. സഹായ വാഗ്ദാനങ്ങൾ പാലിക്കപ്പെട്ടേക്കില്ല. ഭൂമിയിൽ നിന്നുള്ള ആദായം കുറയുന്നതാണ്. കലാപ്രവർത്തനം ഉന്മേഷഭരിതമാവും.  പൊതുപ്രവർത്തനത്തിൽ നിന്നും അല്പമാത്രമായ സന്തോഷം വന്നെത്തുന്നതാണ്.

രോഹിണി

ആദിത്യൻ രോഹിണിയിൽ സഞ്ചരിക്കുന്ന കാലമാകയാൽ മനസ്സ്വസ്ഥതയും ദേഹസൗഖ്യവും കുറയാം. തീരുമാനങ്ങൾ എടുക്കുമ്പോൾ സന്ദേഹികളാവും. അലച്ചിലിനിടയുണ്ട്. പഴയ കടബാധ്യതകൾ വീട്ടുന്നതിന് സമ്മർദ്ദം ഉണ്ടായേക്കും. അധികാരസ്ഥാനങ്ങളിൽ നിന്ന് ചലനം സംഭവിക്കുമോ എന്ന ആശങ്കയും ബാധിക്കാം. സാമ്പത്തികമായി തെല്ല് മെച്ചപ്പെട്ട കാലമാണ്. ഓൺലൈൻ വ്യാപാരം, ഏജൻസി പ്രവർത്തനം എന്നിവയിൽ വളർച്ചയുണ്ടാവും. തറവാട് / ജന്മനാട് സന്ദർശിക്കുന്നതിന് അവസരം വന്നെത്തും. കുടുംബ ബന്ധങ്ങൾ ഒട്ടൊക്കെ തൃപ്തികരമായിരിക്കും.

മകയിരം

പല ചോദ്യങ്ങൾക്കും വ്യക്തമായ ഉത്തരം ലഭിച്ചെന്നു വരില്ല. ബിസിനസ്സ് രംഗം അല്പം നിരാശപ്പെടുത്താം. അല്പലാഭം കൊണ്ട് തൃപ്തിപ്പെടേണ്ടി വരുന്നതാണ്. പുതിയ സംരംഭങ്ങൾ സമാരംഭിക്കുവാൻ ഉചിതമായ കാലമല്ല. ഔദ്യോഗിക യാത്രകൾ ഗുണകരമായേക്കും. വീടുവിട്ടുനിൽക്കുന്നവർ തൽസ്ഥിതിയിൽ തുടരപ്പെടുന്നതാണ്. സാങ്കേതിക വിഷയങ്ങളിൽ കൂടുതൽ അറിവ് സമ്പാദിക്കാൻ ശ്രമം തുടരുന്നതായിരിക്കും. അപരിചിതരുമായുള്ള ആശയവിനിമയത്തിൽ ജാഗ്രത വേണ്ടതുണ്ട്. ആഢംബര വസ്തുക്കൾക്ക് ചെലവുണ്ടാകും. കുട്ടികളുടെ ആരോഗ്യ പാലനത്തിൽ പ്രത്യേക ശ്രദ്ധയുണ്ടാവണം.

തിരുവാതിര

ഞായർ, തിങ്കൾ ദിവസങ്ങളിൽ മനസ്സന്തോഷമേറും. വിരുന്നുകളിൽ പങ്കെടുക്കും. പുതിയ സുഹൃത്തുക്കളെ ലഭിക്കുന്നതാണ്. പങ്കുകച്ചവടത്തിൽ നേട്ടങ്ങളുണ്ടാവും. ദാമ്പത്യസൗഖ്യം ഭവിക്കും. ചൊവ്വ, ബുധൻ ദിവസങ്ങളിൽ ശുഭാരംഭം നന്നല്ല. വാഹനം ഉപയോഗിക്കുന്നതിൽ ജാഗ്രത വേണം. തർക്കങ്ങൾക്ക് മുതിരാതിരിക്കുന്നത് നന്ന്. മറ്റു ദിവസങ്ങളിൽ ധനപരമായ മെച്ചം വന്നുചേരും. തൊഴിലിൽ പുരോഗതി അനുഭവപ്പെടും. സാമൂഹികമായ അംഗീകാരം സിദ്ധിക്കുന്നതാണ്. സർക്കാരിൽ നിന്നും കിട്ടേണ്ട രേഖകൾ ലഭിക്കും. കാര്യനിർവഹണം സുഗമമാവും.

പുണർതം

അത്യദ്ധ്വാനം കൂടാതെ തന്നെ പ്രതീക്ഷിച്ച നേട്ടങ്ങൾ ഉണ്ടാവും. നവസംരംഭത്തിന് വേണ്ടതായ വിദഗ്ദ്ധോപദേശം നേടും. കർമ്മരംഗത്ത് ഉണർവ്വുണ്ടാവും.  പ്രണയികൾക്ക് സന്തോഷിക്കാൻ സന്ദർഭം വന്നെത്തും. കുടുംബത്തോടൊപ്പം ലഘുയാത്രകൾ, വിനോദം, വിരുന്നുകൾ എന്നിവ ഭവിക്കുന്നതാണ്. മക്കളുടെ വിദ്യാഭ്യാസച്ചെലവുകൾക്ക് കരുതി വെച്ചിരുന്ന ധനം പ്രയോജനപ്പെടും. അന്യനാട്ടിൽ കഴിയുന്നവർക്ക് നാട്ടിലേക്ക് മടങ്ങാൻ അല്പം കൂടി കാത്തിരിക്കേണ്ടി വരും. ചൊവ്വ, ബുധൻ ദിവസങ്ങൾ അഷ്ടമരാശിക്കൂറ് ആകയാൽ മനോവാക്കർമ്മങ്ങളിൽ ജാഗ്രത വേണം.

പൂയം

ഞായർ മുതൽ ബുധൻ വരെയുള്ള ദിവസങ്ങളിൽ കർമ്മഗുണം പ്രതീക്ഷിക്കാം. ഉദ്യോഗസ്ഥർക്ക് ചുമതലകൾ സമയബന്ധിതമായി പൂർത്തിയാക്കാനാവും. സഹപ്രവർത്തകരുടെ സഹകരണം ശക്തി പകരുന്നതാണ്. കുടുംബ ജീവിതത്തിൽ സ്വസ്ഥതയും സുഖഭോഗവും ഉണ്ടാവും. പ്രിയബന്ധുക്കളുടെ സന്ദർശനം സന്തോഷമേകും. പാചക കുശലത അഭിനന്ദിക്കപ്പെടും. വ്യാഴം മുതൽ മനക്ലേശത്തിന് കാരണങ്ങൾ ഉണ്ടാവും. ചെലവ് കൂടുന്നതായി തോന്നും. കാര്യനിർവഹണത്തിന് അനിഷ്ടന്മാരെ ആശ്രയിക്കേണ്ടി വരുന്നതാണ്. അലച്ചിലിന് ഇടയുണ്ട്.

ആയില്യം

പ്രവൃത്തിയിൽ അനുസ്യൂതത്വം ഉണ്ടാവും. മുൻപ് പൂർത്തിയാക്കാതെ വിട്ട കാര്യങ്ങൾ മുഴുമിപ്പിക്കാൻ അവസരം കിട്ടുന്നതാണ്. പഠിതാക്കൾക്ക് ഉപരിപഠനാവസരം സംജാതമാകും. വിവാഹാദി മംഗളകർമ്മങ്ങളിൽ പങ്കെടുക്കുവാൻ സാധിച്ചേക്കും. നവസംരംഭങ്ങൾ ബാലാരിഷ്ടയിൽ തുടർന്നേക്കും. സ്ത്രീ സൗഹൃദങ്ങൾ പിന്തുണയേകും. ഊഹക്കച്ചവടത്തിൽ നഷ്ടം വരാൻ സാധ്യത കാണുന്നു. ബുധൻ, വ്യാഴം ദിവസങ്ങളിൽ അലച്ചിലുണ്ടാവും. ഉറ്റവരുമായി അകാരണമായി തർക്കത്തിൽ ഏർപ്പെട്ടേക്കും. 

മകം

കഴിവ് തെളിയിക്കാനുള്ള ധാരാളം അവസരങ്ങൾ മുന്നിലുണ്ടാവും. സാഹചര്യത്തിനൊപ്പം ഇണങ്ങാൻ സാധിക്കും. മറ്റുള്ളവരുടെ കാര്യത്തിൽ തലയിടുന്നത് വിഷമം വരുത്തുന്നതാണ്. ദേഹസൗഖ്യം അനുഭവപ്പെടും. സുഖഭക്ഷണ യോഗം ഭവിച്ചേക്കും. പ്രണയികൾക്ക് ആഹ്ളാദിക്കാനാവും. ദാമ്പത്യത്തിൽ ഹൃദയൈക്യം ദൃഢമാകുന്നതാണ്. എതിർപ്പുകളെ മറികടന്ന് തൊഴിലിൽ മുന്നേറാനാവും. പുതിയ വാഹനം വാങ്ങുന്നതിന് ശ്രമം തുടരുന്നതാണ്. വാരാന്ത്യത്തിൽ മനക്ലേശത്തിന് സാധ്യത കാണുന്നു.

പൂരം

നക്ഷത്രനാഥനായ ശുക്രൻ മൗഢ്യത്തിൽ തുടരുകയാൽ കഴിവുകൾ അംഗീകരിക്കപ്പെടണം എന്നില്ല. പല കോണുകളിൽ നിന്നും എതിർപ്പുകൾ ഉയരാം. തീരുമാനങ്ങൾ ശ്രദ്ധയോടെയാവണം. വലിയ മുതൽമുടക്കിന് ഗ്രഹാനുകൂല്യമില്ല. സാധാരണ കാര്യങ്ങൾ ഭംഗിയായി തന്നെ നടന്നു കിട്ടും. സുഹൃത്തുക്കൾക്കായി വാദിക്കുകയും കൂടുതൽ നേരം സുഹൃത്തുക്കൾക്കൊപ്പം ചെലവഴിക്കുകയും ചെയ്യും. ആഢംബര വസ്തുക്കൾ വാങ്ങുന്നതിൽ അമളി പറ്റാനിടയുണ്ട്. കുടുംബത്തിൻ്റെ പിന്തുണ ലഭിക്കും. മകളുടെ പഠനാവശ്യത്തിന് ലോൺ സൗകര്യം പ്രയോജനപ്പെടുത്തും.

ഉത്രം

ഉദ്യോഗത്തിൽ സാമാന്യം സംതൃപ്തിയുണ്ടാവും. പ്രൊഫഷണലുകൾക്ക് വെല്ലുവിളികൾ ഉയരാം. തൊഴിൽ രംഗം കൂടുതൽ മത്സരോന്മുഖമാവും. സാങ്കേതിക ജ്ഞാനം മെച്ചപ്പെടുത്തുവാൻ പരിശ്രമിക്കുന്നതാണ്. സാമ്പത്തികമായ ഞെരുക്കം നേരിട്ടേക്കും. ആശുപത്രിച്ചെലവുകൾ സാധ്യതയാണ്. സുഹൃത്തുക്കളുടെ സഹകരണം താങ്ങും തണലുമാകും. അഭിമുഖങ്ങളിൽ ശോഭിക്കുവാൻ കഴിഞ്ഞേക്കും. കലാകാരന്മാരെ നല്ല അവസരങ്ങൾ തേടി വരുന്നതാണ്.  സാമൂഹ്യ മാധ്യമങ്ങളിൽ നിന്നും വിമർശനം ഏൽക്കേണ്ടി വരും.

അത്തം

ഗൃഹത്തിൽ മംഗളകർമ്മങ്ങൾ നടക്കും. ബന്ധുസമാഗമം സന്തോഷമേകും. വാഹനത്തിൻ്റെ അറ്റകുറ്റപ്പണി തീർന്ന് ഉപയോഗത്തിലെത്തും. മക്കളുടെ പഠനാവശ്യത്തിനായുള്ളവായ്പയുടെ അപേക്ഷയിൽ അനുമതി ലഭിച്ചേക്കും. ജീവിതപങ്കാളിയുടെ ഹൃദയാഭിലാഷങ്ങൾ മനസ്സിലാക്കി പെരുമാറുന്നതാണ്. കുടുംബ ബിസിനസ് വിപുലീകരിക്കുവാൻ തീരുമാനിക്കും. വസ്തുവില്പന നീളുന്നതാണ്. കുടംബ ക്ഷേത്രത്തിൽ ദൈവിക സമർപ്പണത്തിന് അവസരമുണ്ടാകും. ബുധൻ മുതൽ ശനി വരെയുള്ള ദിവസങ്ങൾ കൂടുതൽ ഹൃദ്യമായി അനുഭവപ്പെടും.

ചിത്തിര

മാറ്റങ്ങൾ വന്നുചേരുന്ന കാലമാണ്. ഗുണദോഷ വിവേചനത്തോടെ അവയെ ഉൾക്കൊള്ളേണ്ടതുണ്ട്. ആത്മവിശ്വാസം കർമ്മരംഗത്ത് നിഴലിക്കാതിരിക്കില്ല. വിദ്യാഭ്യാസ കാര്യത്തിൽ തടസ്സങ്ങൾ അകലും. അന്യദേശത്ത് പഠിപ്പിന് അവസരമുണ്ടാവും. സ്വാശ്രയ ജോലികളിൽ ലാഭമുണ്ടായിത്തുടങ്ങുന്നതാണ്.  സാമ്പത്തിക കാര്യങ്ങളിൽ ഉപദേശം ആവശ്യമായി വരും. ഭാഗ്യക്കേടുകൾ മാറുന്നതായി തോന്നും. പൊതുപ്രവർത്തനം വിമർശിക്കപ്പെടാം. കഴമ്പില്ലാത്ത ആരോപണങ്ങളെ അവഗണിച്ചേക്കും. സുഹൃൽ സംഗമം മാനസികോല്ലാസത്തിന് വഴിതുറക്കുന്നതാണ്.

ചോതി

തീർത്ഥാടനവും ആത്മീയാന്വേഷണങ്ങളും തുടരപ്പെടും. പുതിയ കാഴ്ചകളും അനുഭവങ്ങളും മനസ്സന്തോഷത്തിന് കാരണമാകുന്നതാണ്. ഭൗതിക സാഹചര്യങ്ങൾ മോശമാവില്ല. ന്യായമായ ആവശ്യങ്ങൾ നന്നായി നിർവഹിക്കപ്പെടും. സ്വകാര്യ സ്ഥാപനത്തിൽ ജോലിക്കുള്ള ശ്രമം ഫലം കണ്ടേക്കാം. കൂട്ടുകച്ചവടത്തിൽ പുതിയ പങ്കാളികളെ ചേർക്കാൻ ശ്രമിക്കും. എതിർക്കുന്നവരുടെ ജല്പനങ്ങളെ അവഗണിക്കും. നിക്ഷേപം, ഇൻഷ്വറൻസ്, ചിട്ടി ആദിയായവയിൽ നിന്നും ധനാഗമം ഉണ്ടാവുന്നതാണ്.  പാരമ്പര്യ കലാരൂപങ്ങളിൽ പഠന താല്പര്യം ഭവിക്കും.

വിശാഖം

ഞായർ, തിങ്കൾ ദിവസങ്ങളിൽ കാര്യസാധ്യം എളുപ്പമാവും. പലരുടേയും സഹകരണം അനപേക്ഷിതമായി ലഭിക്കുന്നതായിരിക്കും. ശുഭവാർത്തകൾ സന്തോഷത്തിന് കാരണമാകുന്നതാണ്. ഉല്ലാസങ്ങൾക്ക് സാഹചര്യം ഒത്തിണങ്ങും. ചൊവ്വ മുതൽ വെള്ളി വരെ വിശ്രമം കുറയുന്നതായിരിക്കും. സമയബന്ധിതമായി ജോലി ചെയ്യേണ്ടി വരുന്നതാണ്. സാമ്പത്തികമായി അല്പം ഞെരുക്കത്തിന് ഇടയുണ്ട്. ചെറുയാത്രകൾ ജോലിയുടെ ഭാഗമായേക്കും. വാരാന്ത്യത്തിൽ സ്വസ്ഥത വന്നെത്തും. ഇഷ്ടജനങ്ങളെ കാണുവാൻ സാധിക്കും.

അനിഴം

സമ്മിശ്രമായ വാരമാണ്. പുതിയതായി ജോലിക്ക് ചേർന്നവർക്ക് പരിശീലനം കഠിനമാവും. ബിസിനസ്സ് യാത്രകൾ ചെറുനേട്ടങ്ങൾക്ക് വഴിതുറക്കാം. പണയത്തിലൂടെ സാമ്പത്തിക ആവശ്യങ്ങൾ നിറവേറ്റും. സുഹൃത്തുക്കൾ അവഗണിക്കുകയാണ് എന്ന തോന്നലുണ്ടാവും. അനുരാഗികൾക്ക് സന്തോഷം തോന്നും. സഹപ്രവർത്തകരോട്  ക്ഷോഭിച്ചേക്കാം. വ്യാപാരികൾക്ക് ഉപഭോക്താക്കളുടെ മോശം പ്രതികരണം നേരിടേണ്ടി വരുന്നതാണ്. ചൊവ്വ, ബുധൻ ദിവസങ്ങളിൽ ആത്മവിശ്വാസം ഉയർന്നേക്കും.

തൃക്കേട്ട

കർമ്മമേഖലയിൽ തടസ്സങ്ങൾ അനുഭവപ്പെടാം. പ്രവൃത്തി പുനരാരംഭിക്കുവാൻ കൂടുതൽ തയ്യാറെടുപ്പുകൾ നടത്തേണ്ടതായി വരുന്നതാണ്. ഊഹക്കച്ചവടത്തിൽ ആദായം പ്രതീക്ഷിക്കാം. വീടിൻ്റെ നവീകരണത്തിന് പ്രതീക്ഷിച്ചതിലും ചെലവ് ഉണ്ടാവുന്നതാണ്.  സർക്കാരിൽ നിന്നും ലഭിക്കേണ്ട ലൈസൻസിനായി കാത്തിരിപ്പ് തുടരും. കുടുംബാംഗങ്ങൾ ഒത്തുചേർന്ന് യാത്രകളുണ്ടാവും. ആരോഗ്യ പ്രശ്നങ്ങൾക്ക്  വൈദ്യസഹായം വേണ്ടി വരുന്നതാണ്. സുഹൃൽ സംഗമങ്ങളിൽ പങ്കെടുക്കും.

മൂലം

ജന്മരാശിയിലൂടെ ചന്ദ്രൻ സഞ്ചരിക്കുകയാൽ ഞായർ, തിങ്കൾ ദിവസങ്ങളിൽ ക്ഷേത്രാടനം, സുഖഭക്ഷണ യോഗം, പാരിതോഷിക ലബ്ധി, വിശിഷ്ട വ്യക്തികളെ പരിചയപ്പെടൽ എന്നിവ സാധ്യതകളാണ്. മറ്റു ദിവസങ്ങളിൽ ഗുണദോഷ സമ്മിശ്രമായ ഫലങ്ങൾ ഭവിക്കും. തൊഴിൽ സമ്മർദ്ദങ്ങൾ ഉണ്ടായേക്കാം. 

ഏല്പിച്ച ദൗത്യങ്ങളിൽ ഭാഗികമായ വിജയം സിദ്ധിക്കുന്നതാണ്. സാമ്പത്തികമായ ഞെരുക്കം കുറയാം. വായ്പകൾ തിരിച്ചടക്കുന്നതിൽ വീഴ്ച വരാനിടയുണ്ട്. പുതിയ കാര്യങ്ങൾ പഠിക്കാനും അവ പ്രായോഗികമാക്കാനും ഔത്സുക്യം ഭവിക്കുന്നതാണ്.

പൂരാടം

നക്ഷത്രനാഥന് സ്വക്ഷേത്രസ്ഥിതി ഉള്ളതിനാൽ വാക്കുകൾ വിലമതിക്കപ്പെടും. സമൂഹത്തിൽ സ്വാധീനശക്തി ഉയരും. സ്ത്രീ സുഹൃത്തുക്കളിൽ നിന്നും പിന്തുണയുണ്ടാകും. സ്വാശ്രയ വ്യാപാരത്തിൽ വളർച്ചയുണ്ടാവും. പുതിയ ഏജൻസികൾ / ഡീലർഷിപ്പുകൾ ലഭിക്കുന്നതാണ്. വസ്തുതർക്കങ്ങൾക്ക് സാധ്യതയുണ്ട്. ചൊവ്വ, ബുധൻ ദിവസങ്ങളിൽ നിരുന്മേഷത വരാം. ഗവേഷകർക്ക് പ്രബന്ധ രചനയിൽ താല്പര്യം കുറയുന്നതാണ്. മറ്റു ദിവസങ്ങളിൽ അധ്വാനം വിലമതിക്കപ്പെടും.

ഉത്രാടം

ആത്മാർത്ഥത അഭിനന്ദിക്കപ്പെടും. പ്രവൃത്തികളെ സ്വയം വിശകലനം ചെയ്യുന്നതാണ്. ശരിതെറ്റുകൾ മനസ്സിലാക്കും. ഉദ്യോഗസ്ഥർക്ക് ഡെപ്യൂട്ടേഷൻ വ്യവസ്ഥ ബാധകമായി വന്നേക്കാം. സ്വാശ്രയ ബിസിനസ്സിൽ മാറ്റം കൊണ്ടുവരാൻ പരിശ്രമിച്ചേക്കും. ജീവിത പങ്കാളിയുടെ ഓൺലൈൻ വ്യാപാരത്തിന് സർവ്വാത്മനാ പിന്തുണയേകും. വാരാദ്യം അലച്ചിലിന് സാധ്യത കാണുന്നു. സാമ്പത്തികമായ ഭദ്രതയില്ലായ്മ വിഷമിപ്പിക്കുന്നതാണ്. മക്കളുടെ പഠനച്ചെലവുകൾക്ക് പോംവഴി കാര്യമായി അന്വേഷിക്കും. അശന ശയന സുഖം കുറയുന്നതാണ്.

തിരുവോണം

കൃത്യമായ ലക്ഷ്യത്തോടെ കർമ്മങ്ങളിൽ ഏർപ്പെടും. അവയ്ക്ക് വ്യക്തമായ വിശദീകരണം നൽകാൻ സാധിക്കുന്നതാണ്. വ്യക്തമായ പിന്തുണ സഹപ്രവർത്തകരിൽ നിന്നും നേടുവാനാവും. പഠനച്ചെലവുകളും ആശുപത്രിച്ചെലവും വർദ്ധിക്കുന്നതാണ്. കുടുംബ ബഡ്ജറ്റിൻ്റെ താളം തെറ്റുന്നതിൽ വിഷണ്ണത ഭവിക്കും. അനുബന്ധ തൊഴിലുകൾ പുഷ്ടിപ്പെടുത്താൻ താത്പര്യമേറും. സുഹൃൽവൃത്തങ്ങളിൽ നിന്നും സമയോചിതമായി ലഭിച്ച സഹായം ആശ്വാസമുണ്ടാക്കും. ചൊവ്വ, ബുധൻ, ശനി ദിവസങ്ങൾക്ക് മേന്മയേറുന്നതാണ്.

അവിട്ടം

തൊഴിലിൽ വിജയിക്കുന്നതിന് ആവശ്യമായ തന്ത്രങ്ങൾ മെനയും. സുഹൃത്തുക്കളുടെ  ശുപാർശയിൽ ചില അവസരങ്ങൾ കിട്ടിയേക്കും. രാഷ്ട്രീയ തർക്കങ്ങളിൽ ആശയ ഭിന്നതകൾ തുറന്നു പറയാൻ മടിക്കില്ല. നവീന സാങ്കേതിക വിദ്യകൾ പഠിക്കാൻ സമയം കണ്ടെത്തും. അത്യാവശ്യച്ചെലവുകൾക്ക് ധനം കൈവശമുണ്ടാവും. പഴയ വാഹനം വിൽക്കാനുള്ള ശ്രമം വിജയം കാണുന്നതാണ്. പ്രണയികൾക്ക് ശുഭവാർത്തകൾ വരും. കുടുംബ ജീവിതത്തിൽ പൊതുവേ സമാധാനം പുലരും.

ചതയം

നല്ല തുടക്കം കിട്ടുന്ന വാരമാണ്. ആത്മവിശ്വാസമുണ്ടാവും. പ്രതീക്ഷിച്ച കാര്യങ്ങൾ സാക്ഷാൽകരിക്കാൻ സാധിേച്ചക്കും. സ്വതന്ത്ര ചുമതലകളിൽ ശോഭിക്കുന്നതാണ്. സഹപ്രവർത്തകരുടെ വാക്കുകൾ മുഖദാവിലെടുക്കും. സാമ്പത്തികമായി തരക്കേടില്ലാത്ത സമയമാണ്. അയൽ പ്രശ്ങ്ങൾക്ക് രമ്യമായ പരിഹാരം വന്നു ചേരും. മാതൃജനങ്ങളുടെ ആരോഗ്യത്തിൽ ശ്രദ്ധയുണ്ടാവണം. സർക്കാരുമായി ബന്ധപ്പെട്ട കാര്യങ്ങൾ അല്പം മെല്ലെയാവും. ചൊവ്വ, ബുധൻ ദിവസങ്ങളിൽ അലച്ചിലിനിടയുണ്ട്. ചെലവധികരിക്കുന്നതാണ്.

പൂരൂരുട്ടാതി

ജന്മനക്ഷത്രത്തിൽ ശനി സഞ്ചരിക്കുകയാൽ ലക്ഷ്യത്തിലെത്താൻ കുറച്ചധികം ക്ലേശിക്കേണ്ടി വരാം. തടസ്സങ്ങളുള്ളതായി അനുഭവപ്പെടും. നിലവിലെ തൊഴിൽ ഉപേക്ഷിച്ച ശേഷം പുതിയത് തേടുന്നത് ആശാസ്യമാവില്ല. ഉപജാപങ്ങളെ ചെറുക്കാൻ ഏറെ ഊർജ്ജം ചെലവായേക്കും. സാധാരണ കാര്യങ്ങൾ തൃപ്തികരമായി നടക്കുന്നതാണ്. ഊഹക്കച്ചവടത്തിൽ അല്പ ലാഭം മാത്രം പ്രതീക്ഷിക്കാം. ഗൃഹത്തിൽ പൂജ, പുണ്യകർമ്മങ്ങൾ നടക്കുന്നതാണ്. തുണിത്തരങ്ങളോ ആഡംബര വസ്തുക്കളോ വാങ്ങിയേക്കും.

ഉത്രട്ടാതി

മുൻ പിൻ നക്ഷത്രങ്ങളിൽ ശനി, രാഹു, ചൊവ്വ എന്നീ     ഗ്രഹങ്ങൾ സഞ്ചരിക്കുകയാൽ പൊതുവേ മാനസികമായ സമ്മർദ്ദങ്ങൾ ഉള്ള കാലമാണ്. സുലഭം എന്ന് കരുതിയവ അല്പം ദുർലഭമാകുന്നതാണ്. കൃത്യനിഷ്ഠ പാലിക്കാൻ കഴിയാത്തത് ജോലിസ്ഥലത്ത് പ്രശ്നങ്ങൾ സൃഷ്ടിച്ചേക്കാം. സാമ്പത്തികമായി ആശ്വാസമുണ്ടാകും. കുടുംബകാര്യങ്ങൾ ഒരുവിധം ഭംഗിയായി നിർവഹിക്കപ്പെടും. സഹോദരരും ബന്ധുക്കളും പിന്തുണയ്ക്കും. പുതിയ സംരംഭങ്ങൾ തുടങ്ങാൻ അനുകൂലമായ കാലമല്ല. വൃദ്ധജനങ്ങളുടെ ആരോഗ്യകാര്യത്തിൽ ജാഗ്രത വേണ്ടതുണ്ട്.

രേവതി

ഞായർ മുതൽ ബുധൻ വരെയുള്ള ദിവസങ്ങളിൽ ഗുണാനുഭവങ്ങൾ വർദ്ധിക്കും. തൊഴിൽ മേഖലയിൽ സ്വാധീനം ഉണ്ടാകുന്നതാണ്. ഊഹക്കച്ചവടത്തിൽ നിന്നും നേട്ടങ്ങൾ കൈവരിക്കാനാവും. ഭാവിയിലെ ചില യാത്രകൾക്ക് തയ്യാറെടുക്കും. വീടുവിട്ടു നിൽക്കുന്നവർ നാട്ടിലേക്ക് മടങ്ങും. പാരമ്പര്യമായി ചെയ്തു വരുന്ന ബിസിനസ്സിൽ ഉപഭോക്താക്കളെ ആകർഷിക്കുവാനുള്ള പോംവഴികൾ ആലോചിക്കും. കാര്യാലോചനാ യോഗങ്ങളിൽ ശക്തമായ അഭിപ്രായം രേഖപ്പെടുത്തുന്നതാണ്. വ്യാഴം മുതൽ സമ്മിശ്ര ഫലങ്ങൾ ഭവിക്കാം.

Read More

• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 May 27 to June 02
• രഫലം, അശ്വതി മുതൽ ആയില്യം വരെ; May 26-June 01, 2024, WeeklyHoroscope
• വാരഫലം, മകം മുതൽ തൃക്കേട്ട വരെ; May 26-June 01, 2024, Weekly Horoscope
• വാരഫലം, മൂലം മുതൽ രേവതി വരെ; May 26-June 01, 2024, Weekly Horoscope
• 2024 ജൂൺ മാസത്തിലെ സമ്പൂർണ നക്ഷത്രഫലം, അശ്വതി മുതൽ രേവതി വരെ
• ഇടവമാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ: Monthly Horoscope for Edavam