Mars Transit 2024: ചൊവ്വ ഇടവം രാശിയിൽ, അശ്വതി മുതൽ രേവതി വരെ

2024 ജൂലൈ 12 ന് (1199 മിഥുനം 28 ന്)  ചൊവ്വ (Mars) മേടം രാശിയിൽ നിന്നും ഇടവം രാശിയിലേക്ക് സംക്രമിക്കുന്നു. ഓഗസ്റ്റ് 26 (1200 ചിങ്ങം  10) വരെ, ഏതാണ്ട് 45 ദിവസങ്ങൾ,  ചൊവ്വ ഇടവം രാശിയിൽ തുടരും. ഇടവം രാശിയിൽ കാർത്തിക, രോഹിണി, മകയിരം എന്നീ മൂന്നു നക്ഷത്ര മണ്ഡലങ്ങളുണ്ട്. അവയിലൂടെയാവും കുജൻ്റെ യാത്ര. ജൂലൈ 27 വരെ കാർത്തികയിലും ആഗസ്റ്റ് 17 വരെ രോഹിണിയിലും അതിനുശേഷം മകയിരം നക്ഷത്രത്തിലുമായി ചൊവ്വ സഞ്ചരിക്കുന്നു. 

ഇടവം രാശി ചൊവ്വയുടെ 'സമൻ' ആയി കരുതപ്പെടുന്ന ശുക്രൻ്റെ സ്വക്ഷേത്രമാണ്. അവിടെ ചൊവ്വയുടെ ബന്ധുവായ വ്യാഴം സഞ്ചരിക്കുന്നു. ജ്യോതിഷ ഭാഷയിൽ ഇതിനെ 'ഗുരുമംഗല യോഗം'  എന്നാണ് വിശേഷിപ്പിക്കുക. (ഗുരു = വ്യാഴം, മംഗലൻ = ചൊവ്വ). ചൊവ്വയുടെ കാഠിന്യത്തെ ഒരു പരിധി വരെ കുറയ്ക്കാൻ ഗുരുവിന് കഴിയുന്നതാണ്. അതിനാൽ ഇടവം രാശിയിൽ ചൊവ്വ സഞ്ചരിക്കുമ്പോൾ ഏതൊക്കെ കൂറുകളിൽ ജനിച്ചവർക്കാണോ, പ്രതികൂലത വരിക, ആ ദോഷം അത്ര കഠിനമാവില്ലെന്ന് ചുരുക്കം. ഇക്കാര്യം പ്രത്യേകം ഓർമ്മിക്കേണ്ടതുണ്ട്. 

ചൊവ്വ അഥവാ കുജൻ ഗോചരസഞ്ചാരത്തിൽ അനുകൂലമാവുന്നത് 3, 6, 11 എന്നീ കൂറുകളിൽ ജനിച്ചവർക്ക് മാത്രമാണ്. അതായത് ചൊവ്വ ഇടവം രാശിയിൽ സഞ്ചരിക്കുമ്പോൾ ഇടവം 3,6,11 രാശികളായി വരുന്ന മീനം, ധനു, കർക്കിടകം എന്നീ കൂറുകളിൽ ജനിച്ചവർക്കാണ്. അവർക്കാണ് ഇടവച്ചൊവ്വ ഉന്നതമായ ഗുണാനുഭവങ്ങൾ സമ്മാനിക്കുന്നത്.

ജന്മം, എട്ട്, പന്ത്രണ്ട് എന്നിങ്ങനെ മൂന്ന് രാശികളിൽ ചൊവ്വ സഞ്ചരിക്കുമ്പോഴാവും ദോഷഫലങ്ങൾ കൂടുതലായി വരിക. അതായത് ചൊവ്വ സഞ്ചരിക്കുന്ന ഇടവം രാശി കൂറായി വരുന്ന ഇടവക്കൂറുകാർക്കും, ഇടവം രാശി എട്ടാമെടമായി വരുന്ന  തുലാക്കൂറുകാർക്കും, ഇടവം രാശി പന്ത്രണ്ടാമെടമായി വരുന്ന മിഥുനക്കൂറുകാർക്കും ദോഷാനുഭവങ്ങൾ അധികമായിരിക്കും എന്ന് സാരം. മറ്റുള്ള ആറ് കൂറുകാർക്ക് ഗുണവും ദോഷവും ഏറിയും കുറഞ്ഞും അനുഭവപ്പെടുന്നതാണ്. 

മേടക്കൂറ് മുതൽ മീനക്കൂറ് വരെയുള്ള പന്ത്രണ്ട് കൂറുകളിൽ വരുന്ന അശ്വതി മുതൽ രേവതി വരെയുള്ള 27 നക്ഷത്രങ്ങളിൽ ജനിച്ചവർക്ക് ചൊവ്വയുടെ ഇടവം രാശിയിലെ സഞ്ചാരം സൃഷ്ടിക്കുന്ന അനുഭവങ്ങൾ ചുവടെ വിശദമായി വിശകലനം ചെയ്യുന്നു.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

ചൊവ്വ രണ്ടാം ഭാവത്തിലാണ് മേടക്കൂറുകാർക്ക് സഞ്ചരിക്കുന്നത്. ജന്മരാശിയിൽ നിന്നും മാറുന്നതിനാൽ അനാവശ്യ സമ്മർദ്ദങ്ങൾ ഒഴിവാകും എന്ന ഗുണമുണ്ട്. രണ്ടാമെടം ധനം, കുടുംബം, വാക്ക്, വിദ്യാഭ്യാസം ഇവയെ കുറിക്കുന്നു. ചൊവ്വ രണ്ടാംഭാവത്തിൽ സഞ്ചരിക്കുമ്പോൾ ഇവക്കെല്ലാം സമ്മിശ്രമായ ഫലമാവും വരിക. തൊഴിലിൽ നിന്നുള്ള ധനവരവ് അല്പം മന്ദീഭവിക്കാം. ഭൂമിയിൽ നിന്നുള്ള ആദായം പ്രതീക്ഷിച്ചവിധം ഉയരണമെന്നില്ല. കുടുംബസുഖം കുറയുന്നതാണ്. തർക്കിക്കുന്ന ശീലമേറും. കുറ്റം കണ്ടെത്തുവാൻ ഔൽസുക്യം കാട്ടും. വിദ്യാർത്ഥികളുടെ പഠന പുരോഗതി മെല്ലെയാവുന്നതാണ്. വാക്കുകൾ ആവശ്യത്തിലധികം മൂർച്ചയുള്ളതായി അനുഭവപ്പെടും. രക്തസമ്മർദ്ദം തുടങ്ങിയ ആരോഗ്യപ്രശ്നങ്ങൾ വിഷമിപ്പിച്ചേക്കാം.

ഇടവക്കൂറിന് (കാർത്തിക 2, 3, 4 പാദങ്ങൾ, രോഹിണി, മകയിരം 3,4 പാദങ്ങൾ) 

ജന്മരാശിയിലാണ് ചൊവ്വ സഞ്ചരിക്കുന്നത്. പ്രായേണ ദോഷാനുഭവങ്ങൾക്ക് മുൻതൂക്കമുണ്ടാവാം. വ്യക്തിത്വം, കീർത്തി, ദേഹസൗഖ്യം ഇവയെല്ലാം  ബാധിക്കപ്പെടാം. സന്തുലിത വ്യക്തിത്വത്തിൻ്റെ ഉടമകളാണ്, സ്വതേ ഇടവക്കൂറുകാർ. എന്നാൽ ചൊവ്വ ജന്മരാശിയിൽ സഞ്ചരിക്കുമ്പോൾ അതിവൈകാരികത ഉണ്ടാവുന്നു. ക്ഷോഭമേറാം.  പരീക്ഷകൾ, അഭിമുഖം മുതലായവയിൽ തടസ്സമുണ്ടാവാനിടയുണ്ട്. അഥവാ  അവയിൽ പ്രതീക്ഷിച്ച വിധമുള്ള നേട്ടം കൈവരിക്കാൻ കഴിഞ്ഞേക്കില്ല. അപവാദങ്ങളെ പ്രതിരോധിക്കേണ്ടതായുണ്ട്. ഏഴാമെടത്തേക്ക് ചൊവ്വ നോക്കുകയാൽ പ്രണയ തടസ്സം, ദാമ്പത്യ പ്രശ്നങ്ങൾ എന്നിവയും സാധ്യതകളാണ്. പതിവ് ആരോഗ്യ പരിശോധനകൾ മുടങ്ങാനിടയുണ്ട്. അക്കാര്യത്തിൽ അലംഭാവമരുത്.

മിഥുനക്കൂറിന് (മകയിരം 3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

പതിനൊന്നാമെടത്തു നിന്നും പന്ത്രണ്ടാം ഭാവത്തിലേക്കാണ് കുജൻ സഞ്ചരിക്കുന്നത്. യാത്ര, ചെലവ്,  പാപകർമ്മാസക്തി എന്നിങ്ങനെ പ്രതികൂല വിഷയങ്ങളാണ് പൊതുവേ പന്ത്രണ്ടാമെടം കൊണ്ട് ചിന്തിക്കുക. ചെലവ് അധികരിക്കുന്നതാണ്. കുറച്ചൊക്കെ അതിൽ പാഴ്ച്ചെലവുകളും ഉണ്ടാവും. നിഷ്പ്രയോജന യാത്രകളും തന്മൂലം ദേഹക്ലേശവും അനുഭവപ്പെടും. ചിലർക്ക് വീടുവിട്ടു നിൽക്കേണ്ട സാഹചര്യം ഉണ്ടായേക്കും. പിന്നീട് പശ്ചാത്തപിക്കാൻ ഇടവരുന്ന വാക്കോ കർമ്മമോ ഭവിക്കാം. അമിതമായ ആത്മവിശ്വാസത്തിന് സാധ്യതയുണ്ട്. അത് ദോഷകരമാവാം. ഭൂമിയുടെ ക്രയവിക്രയം തടസ്സപ്പെടും.  സഹോദരരുമായി രമ്യബന്ധം പുലർത്താൻ കഴിഞ്ഞേക്കില്ല. വീഴ്ച, മുറിവ്, അപകടങ്ങൾ ഇവ വരാതിരിക്കാൻ ജാഗ്രത പുലർത്തണം.

കർക്കടകക്കൂറിന് (പുണർതം 4-ാം പാദം, പൂയം, ആയില്യം)

ചൊവ്വ അനുകൂല ഭാവമായ പതിനൊന്നാം ഭാവത്തിൽ സഞ്ചരിക്കുകയാണ്. വളരെ നേട്ടങ്ങൾ പ്രതീക്ഷിക്കാം. തടസ്സങ്ങൾ അകലുന്നതാണ്. പരീക്ഷാ വിജയം, നേതൃസിദ്ധി, സമൂഹത്തിൻ്റെ അംഗീകാരം ഇവയുണ്ടാവും.  ഉദ്യോഗാർത്ഥികൾക്ക് നിരാശപ്പെടേണ്ടി വരില്ല. ബിസിനസ്സിലെ നിരുന്മേഷത അകന്ന് ഉണർവനുഭവപ്പെടും. സാമ്പത്തികമായി മെച്ചമുണ്ടാകുന്ന കാലമാണ്. വസ്തുവ്യാപാരം ലാഭകരമാവും. എതിർപ്പുകളെ സമർത്ഥമായി പ്രതിരോധിക്കും. പിണങ്ങി നിന്നവർ ഇണങ്ങുന്നതാണ്. അവിവാഹിതരുടെ വിവാഹ വിഷയത്തിൽ അനുകൂലത സംജാതമാകും. സഹജമായ കഴിവുകൾ പുറത്തെടുക്കാനാവും. രാഷ്ട്രീയ പ്രവർത്തനത്തിൽ വിജയം ഭവിക്കുന്നതാണ്.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

പത്താം ഭാവത്തിലായാണ് ചൊവ്വ സഞ്ചരിക്കുന്നത്. മുഖ്യമായും കർമ്മരംഗം ബാധിക്കപ്പെടാം. പ്രതീക്ഷിച്ച ലോണോ മറ്റു ധനസഹായമോ വൈകാനിടയുണ്ട്. പുതുസംരംഭങ്ങൾ തുടങ്ങാൻ കാലാനുകൂലത ഇല്ല. നിലവിലെ തൊഴിൽ ഉപേക്ഷിച്ചിട്ട് പുതുതൊഴിൽ തേടുന്നതും ആശാസ്യമാവില്ല. സ്ഥാനക്കയറ്റം പ്രതീക്ഷിച്ചവർക്ക് അനർഹർക്ക് ആ പദവിയിലേക്ക് കയറ്റം കിട്ടുന്നതു കണ്ടു സങ്കടപ്പെടേണ്ട സ്ഥിതി വരാം. രാഷ്ട്രീയ പ്രവർത്തകരുടെ സ്വാധീനം താത്കാലികമായി കുറഞ്ഞെന്നുവരാം. മത്സരങ്ങളിൽ പരാജയത്തിൻ്റെ കയ്പുനീർ കുടിക്കപ്പെടാം. വീടുമാറ്റത്തിന് സാധ്യതയുണ്ട്. തീർത്ഥാടനങ്ങൾക്കുള്ള ശ്രമം നീട്ടിവെക്കേണ്ട സ്ഥിതിയുണ്ടാവാം. ആരോഗ്യപരമായി ജാഗ്രത വേണം.

കന്നിക്കൂറിന് (ഉത്രം 2,3,4 പാദങ്ങൾ, അത്തം, ചിത്തിര 1,2 പാദങ്ങൾ)

ചൊവ്വ എട്ടാമെടമായ മേടം രാശിയിൽ നിന്നും ഒമ്പതാം രാശിയിലേക്ക് വരുന്നു. കുറച്ചൊക്കെ അനുകൂലത പ്രതീക്ഷിക്കാം. ഒമ്പതിലെ വ്യാഴത്തിനൊപ്പം ചേരുകയാൽ വ്യാഴം നൽകുന്ന ഗുണഫലങ്ങൾ കുറെശ്ശൊന്ന് മന്ദീഭവിക്കാം.  പ്രതീക്ഷകൾ നിറവേറാൻ താമസമുണ്ടാവും. പിതാവിൻ്റെ ആരോഗ്യസ്ഥിതി ബാധിക്കപ്പെടാം. ദൈവീക കാര്യങ്ങളും ഉപാസനാദികളും തടസ്സപ്പെടാനിടയുണ്ട്. തീർത്ഥാടനാദികൾ മാറ്റിവെച്ചേക്കാം. പൈതൃക സ്വത്ത് സംബന്ധിച്ച തർക്കങ്ങൾക്കും സാധ്യതയുണ്ട്. സഹായ വാഗ്ദാനങ്ങൾ പിൻവലിക്കപ്പെടാം. തൊഴിൽ രംഗത്ത് പുരോഗതി പതുക്കെയാവും. വിയർപ്പൊഴുക്കി നേടിയ വിജയത്തിന് തിളക്കം കുറവായി തോന്നും. ഭാവി സംബന്ധിച്ച് തെറ്റായ തീരുമാനങ്ങൾ കൈക്കൊണ്ടെന്ന് വരാവുന്നതാണ്.

തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)

ചൊവ്വയുടെ കാഠിന്യം ഏറ്റവും കൂടുതൽ വരുന്ന ഭാവങ്ങളിലൊന്ന് എട്ടാമെടമാണ്. തുലാക്കൂറുകാരുടെ എട്ടാമെടമായ ഇടവം രാശിയിലാണ് ചൊവ്വയുടെ സഞ്ചാരം. അകാരണമായ ഭയപ്പാടുകൾ ഉണ്ടാവും. ദുസ്സ്വപ്നങ്ങൾ കാണും. ശത്രുക്കളുടെ ഉപദ്രവം വർദ്ധിക്കുന്നതായി അനുഭവപ്പെടാം. കർമ്മരംഗത്ത് ദുർഘടത്വമേറും.  വാക്കുറപ്പിച്ചിരുന്ന ഭൂമി വ്യാപാരം മുടങ്ങാനിടയുണ്ട്. ചെലവ് അധികരിക്കാം. സഹോദരരുടെ പിന്തുണ കുറയുന്നതായി തോന്നും. മുൻപ് സുലഭമായിരുന്നവ ഇപ്പോൾ ദുർലഭമായി അനുഭവപ്പെടും. വീഴ്ച, അപകടം ഇവ സാധ്യതകളാണ്. വാഹനം, അഗ്നി, വൈദ്യുതി, യന്ത്രം എന്നിവ കൈകാര്യം ചെയ്യുന്നതിൽ ഏറ്റവും ശ്രദ്ധയുണ്ടാവണം. കടബാധ്യതകൾ വലയ്ക്കുന്നതാണ്. ആരോഗ്യപരിപാലന ത്തിൽ ജാഗ്രത അനിവാര്യം.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

ഏഴാമെടത്തിലാണ് ചൊവ്വ സഞ്ചരിക്കുന്നത്. ഏഴാമെടം മുഖ്യമായും വിവാഹം, പ്രണയം, ദാമ്പത്യം തുടങ്ങിയ ഭാവങ്ങളെ സൂചിപ്പിക്കുന്നു. അവയെ വിപരീതമായി ബാധിക്കുന്നു, ചൊവ്വ. പ്രണയത്തിൽ തടസ്സമോ തകർച്ചയോ സംഭവിക്കാം. അവിവാഹിതരുടെ വിവാഹാലോചനകൾക്കും താൽകാലികമായ വിളംബം ഭവിക്കാനിടയുണ്ട്. ഭാര്യാഭർത്താക്കന്മാർ അനൈക്യത്തിലാവാനും കലഹിക്കാനും സാധ്യത കാണുന്നു. കൂട്ടുബിസിനസ്സുകളിൽ സമ്മർദ്ദം ഉണ്ടാകും. പങ്കാളികൾ തമ്മിൽ അഭിപ്രായ ഭിന്നതകൾ ഉടലെടുക്കാം. വ്യാപാരയാത്രകളാൽ പറയത്തക്ക പ്രയോജനം ഉണ്ടായില്ലെന്ന് വരാം. വിദേശത്ത് പോകാൻ ആഗ്രഹിക്കുന്നവർക്ക് യാത്രാനുമതി വൈകുന്നതാണ്. പണമെടപാടുകളിൽ അമളി വരാം.

ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)

ചൊവ്വ ആറാം ഭാവത്തിൽ സഞ്ചരിക്കുകയാൽ അനുകൂല ഫലം പ്രതീക്ഷിക്കാം. മുൻപ് വലുതായ ശ്രമം കൈക്കൊണ്ടിട്ടും നടക്കാതെ പോയ കാര്യങ്ങൾ ഇപ്പോൾ അല്പ യത്നം കൊണ്ട് സഫലമാവും. സ്വാഭാവികമായ നേട്ടങ്ങൾ, വിജയം എന്നിവയെ ചെറുക്കാൻ ശത്രുക്കൾക്ക് കഴിയില്ല. സാമ്പത്തികമായി അനുകൂലാന്തരീക്ഷമാണ്. കച്ചവട രംഗം പുഷ്ടിപ്പെടും. ഭൂമിയിൽ നിന്നും ആദായം പ്രതീക്ഷിക്കാം. പഴയ കടബാധ്യതകൾ ഭാഗികമായെങ്കിലും പരിഹരിക്കാനാവും. നീണ്ടുപോയ വ്യവഹാരങ്ങൾക്ക് നല്ല പരിസമാപ്തിയുണ്ടാവും. പുതിയ വാഹനം വാങ്ങാനുള്ള സാധ്യതയുണ്ട്. മത്സരങ്ങളിലും തെരഞ്ഞെടുപ്പുകളിലും വിജയിക്കുന്നതാണ്. നേതൃരംഗത്തേക്ക് ഉയർത്തപ്പെടും. ഉദ്യോഗസ്ഥർക്ക് പല നിലയ്ക്കും ആശ്വാസമനുഭവപ്പെടുന്ന കാലമാണ്. ദാമ്പത്യരംഗം സമാധാനപൂർണമാവും.

മകരക്കൂറിന് (ഉത്രാടം 2,3,4 , തിരുവോണം, അവിട്ടം 1,2 പാദങ്ങൾ)

ചൊവ്വ അഞ്ചാം ഭാവത്തിൽ സഞ്ചരിക്കുന്നു. പ്രായേണ പ്രതികൂല / സമ്മിശ്ര ഫലങ്ങളാവും അനുഭവത്തിൽ വരിക. പ്രധാനമായും മക്കളെ സംബന്ധിച്ച കാര്യങ്ങൾ, കാര്യാലോചന, ഭാവനാവിലാസം തുടങ്ങിയവ അഞ്ചാമെടം കൊണ്ട് മനസ്സിലാക്കപ്പെടുന്നു. ചെറുതോ വലുതോ ആകട്ടെ തീരുമാനങ്ങൾ, അവ കൈക്കൊള്ളും മുൻപ് വരുംവരായ്കകളെക്കുറിച്ച് ആലോചിക്കുന്നത് നന്നായിരിക്കും.  ജോലിസ്ഥലത്തെ ചർച്ചകളിലും ബിസിനസ്സ് മീറ്റിംഗുകളിലും പങ്കുവെക്കുന്ന ആശയങ്ങൾ വിമർശനം ഏറ്റുവാങ്ങുന്നതാണ്. സഹപ്രവർത്തകരുടെ ദുരാരോപണങ്ങൾക്ക് ശരവ്യമാക്കപ്പെടാം. മക്കളുടെ ഉപരിപഠനം, വിദേശ യാത്ര മുതലായവയും പുനരാലോചനകൾക്ക് വിധേയമാക്കണം. ധനവരവ് പതിവുപോലെ തന്നെയാവും. ആരോഗ്യപ്രശ്നങ്ങൾ ഉടലെടുക്കാം. 

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

ചൊവ്വ നാലാം ഭാവത്തിൽ  സഞ്ചരിക്കുന്നു. അമ്മ, അമ്മാവൻ, സുഹൃത്തുക്കൾ, വാഹനം, ഭൂമി, വീട്, മനസ്സന്തോഷം ഇവയെല്ലാം നാലാമെടം കൊണ്ട് മനസ്സിലാക്കാം. ചൊവ്വ നാലിൽ സഞ്ചരിക്കുമ്പോൾ വസ്തു സംബന്ധിച്ച വ്യവഹാരം, അയൽ തർക്കം, വീടിന് അറ്റകുറ്റപ്പണി എന്നിവ ഉണ്ടായേക്കാം. സുഹൃത്തുക്കളുമായി പിണങ്ങാനിടയുണ്ട്.  അമ്മ വഴി ബന്ധുക്കളുമായുള്ള സ്വൈരക്കേട് തുടരപ്പെടുന്നതാണ്. അമ്മയുടെ ആരോഗ്യകാര്യത്തിലും ശ്രദ്ധ വേണം. വാഹനം വാങ്ങാനുള്ള താത്പര്യം തടസ്സപ്പെടാനിടയുണ്ട്. വാഹനം ഉപയോഗിക്കുന്നതിലും ശ്രദ്ധ വേണം. മാനസിക ആരോഗ്യം മെച്ചപ്പെട്ടതാവില്ല. ഭയം, വിഷാദം, ദേഷ്യം ഇവ ചിലപ്പോൾ അകാരണമായിട്ടാവും, എന്നാലും മനസ്സിനെ ബാധിച്ചേക്കാം. സ്വന്തം ഇരിപ്പിടം അഥവാ പദവി സംബന്ധിച്ച് ഔദ്യോഗിക ജീവിതത്തിൽ തർക്കങ്ങൾ ഉണ്ടാവാനിടയുണ്ട്.

മീനക്കൂറിന് (പൂരൂരുട്ടാതി നാലാം പാദം, ഉത്രട്ടാതി, രേവതി)

ചൊവ്വ അനുകൂല ഭാവമായ മൂന്നാമെടത്തിൽ സഞ്ചരിക്കുന്നു. ആത്മവിശ്വാസം ഉയരും. തടസ്സപ്പെട്ടിരുന്ന കാര്യങ്ങൾ നിർവിഘ്നം നടന്നു കിട്ടും. ഉദ്യോഗസ്ഥർക്ക് അധികാരികളുടെ പ്രീതി ലഭിക്കാം. സ്ഥാനപ്രാപ്തി, ബഹുമതി ഇവ പ്രതീക്ഷിക്കാം.  സഹോദരാനുകൂല്യം / കുടുംബത്തിൻ്റെ പിന്തുണ ഇവയുണ്ടാവുന്നതാണ്. ബിസിനസുകാർക്ക് വളർച്ചയുടെ കാലഘട്ടമാണ്. മുടങ്ങിപ്പോയ വായ്പാ തിരിച്ചടവുകൾ  പൂർത്തീയാക്കാനാവും. വിപുലീകരണത്തിനും അവസരമുണ്ടാകും. ഭൂമി വിൽപ്പന, വസ്തു വാങ്ങൽ ഇവ രണ്ടും നടന്നുകിട്ടും. പൊതുപ്രവർത്തകർക്ക് നല്ല സമയമാണ്. സംഘടനാ തലത്തിൽ നേതൃപദവി ലഭിച്ചേക്കും. എതിർപ്പുകളെ നിരാകരിച്ച് മുന്നോട്ട് പോകാനാവും. ആഗ്രഹിച്ച ഇലക്ട്രോണിക് ഉപകരണങ്ങൾ വാങ്ങുവാനായേക്കും.

Read More

• Daily Horoscope July 11, 2024: നിങ്ങളുടെ ഇന്നത്തെ ദിവസം, രാശി ഫലം
• വാരഫലം, അശ്വതി മുതൽ ആയില്യം വരെ; Weekly Horoscope, 2024 July 14- 20
• ശുക്രൻ കർക്കടകം രാശിയിലേക്ക്; അശ്വതി മുതൽ രേവതി വരെ: Venus Transit
• 2024 ജൂലെ മാസത്തിലെ നക്ഷത്രഫലം, അശ്വതി മുതൽ രേവതി വരെ
• മിഥുനമാസത്തെ നക്ഷത്രഫലം, അശ്വതി മുതൽ രേവതി വരെ
• എന്താണ് വസുപഞ്ചകം അഥവാ പഞ്ചകദോഷം?
• ദേവഗണത്തിലെ നക്ഷത്രങ്ങൾ
• ശനിദശ ഓരോ നക്ഷത്രക്കാർക്കും എപ്പോൾ വരും