ശുക്രൻ കർക്കടകം രാശിയിലേക്ക്; അശ്വതി മുതൽ രേവതി വരെ: Venus Transit

Venus Transit: 2024 ജൂലൈ 6 ന് (1199 മിഥുനം 22 ന്) ശുക്രൻ മിഥുനം രാശിയിൽ നിന്നും കർക്കടകം രാശിയിലേക്ക് സംക്രമിക്കുന്നു. ജൂലൈ 31 (1199 കർക്കടകം 16) വരെ കർക്കടകത്തിൽ തുടരും. കർക്കടകം രാശിയിൽ സഞ്ചരിക്കുന്ന ശുക്രൻ ജൂലൈ 9 വരെ പുണർതം നാലാംപാദത്തിലും, തുടർന്ന് ജൂലൈ 20 വരെ പൂയം നക്ഷത്രത്തിലും ജൂലൈ 31 വരെ ആയില്യം നക്ഷത്രത്തിലും സഞ്ചരിക്കുന്നു. 

ജൂലൈ 8 ന്, കഴിഞ്ഞ രണ്ടുമാസത്തിലധികമായി തുടരുന്ന ശുക്രമൗഢ്യം അവസാനിക്കുന്നുവെന്ന സവിശേഷതയും പ്രത്യേകം ഓർമ്മിക്കേണ്ടതുണ്ട്.  ശുക്രൻ പ്രവേശിക്കുന്ന കർക്കടകം രാശി ചന്ദ്രൻ്റെ സ്വക്ഷേത്രമാണ്. ശുക്രൻ്റെ ശത്രുഗ്രഹമാണ് ചന്ദ്രൻ എന്ന കാര്യം ഓർക്കാം. ശുക്രൻ്റെ ബന്ധുഗ്രഹമായ ബുധൻ കർക്കടകം രാശിയിൽ ഇപ്പോൾ സഞ്ചരിക്കുന്നുണ്ട്.

ജൂലൈ 16 ന് ശുക്രൻ്റെ മറ്റൊരു ശത്രു ഗ്രഹമായ ആദിത്യനും കർക്കടകത്തിൽ പ്രവേശിക്കുന്നുണ്ട്. ഇവയെല്ലാം ശുക്രൻ്റെ ഗോചരഫലക്കെ നിർണായകമായി  സ്വാധീനിച്ചേക്കാം. ഗ്രഹങ്ങളിൽ ഗോചരത്തിൽ ഏറ്റവും കൂടുതൽ രാശികളിൽ ഗുണം തരുന്ന ഗ്രഹം ശുക്രനാണ്. അവരവരുടെ ജന്മരാശിയുടെ  6, 7, 10 എന്നീ മൂന്നുരാശികളൊഴികെ ഒമ്പതു രാശികളിലും ഗുണദാതാവായ ഗ്രഹമാണ് ശുക്രൻ. അങ്ങനെ നോക്കുമ്പോൾ കുംഭം, മകരം, തുലാം എന്നീ മൂന്നുകുറുകളിൽ ജനിച്ചവർക്കൊഴികെ മറ്റുകൂറുകാർക്കെല്ലാം ശുക്രൻ്റെ കർക്കടകം രാശിയിലെ സഞ്ചാരം ഗുണഫലങ്ങൾ നൽകും. 

സൗമ്യഭാവങ്ങൾ, വാത്സല്യം,  പ്രണയം, രതി, ഭോഗം, സുഖഭക്ഷണയോഗം, ദേഹസുഖം, ഉറക്കം, വിവാഹം, ദാമ്പത്യാനുഭവങ്ങൾ, ദേവീ ഭക്തി, സിനിമ, സംഗീതം,  പൊതുവേ കലാവാസന, ലോട്ടറി ഭാഗ്യം എന്നിവ ശുക്രൻ്റെ കാരകത്വത്തിൽ വരുന്ന വിഷയങ്ങളാണ്. ഓരോ രാശിക്കാർക്കും,  ശുക്രൻ്റെ ഇപ്പോഴത്തെ സഞ്ചാരരാശിയായ കർക്കടകം എത്രാമത്തെ രാശി / ഭാവം എന്നതനുസരിച്ചാവും ഗുണദോഷഫലങ്ങൾ വരിക. പ്രായേണ കുംഭക്കൂറുകാർക്കും മകരക്കൂറുകാർക്കും തുലാക്കൂറുകാർക്കും ശുക്രന്റെ കർക്കടക സഞ്ചാരം ഗുണകരമായേക്കില്ല. മറ്റുള്ള കൂറുകാർക്ക്, സാമാന്യമായിട്ടുള്ള ശുഭാനുഭവങ്ങൾ പ്രതീക്ഷിക്കാം.

ശുക്രന്റെ കർക്കടക സഞ്ചാരത്തെ മുൻനിർത്തി മേടം മുതൽ മീനം വരെയുള്ള പന്ത്രണ്ട് കൂറുകളിൽ ജനിച്ച അശ്വതി മുതൽ ആയില്യം വരെയുള്ള 27 നക്ഷത്രക്കാരുടെ അനുഭവങ്ങൾ എപ്രകാരമാവുമെന്ന് ഇവിടെ വിശകലനം ചെയ്യുന്നു. 

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

ഗുണാനുഭവങ്ങൾക്കാവും മുൻതൂക്കം. പുതിയ വാഹനം വാങ്ങാൻ ആഗ്രഹിക്കുന്നവർക്ക് അതിന് അവസരമുണ്ടാവും. ഗൃഹനിർമ്മാണം പൂർത്തിയാകൽ അല്ലെങ്കിൽ ഗൃഹം മോടിപിടിപ്പിക്കൽ ഇവ സാധ്യതകളാണ്. സൗഹൃദം പുഷ്ടിപ്പെടും. വിശേഷിച്ചും സ്ത്രീ സൗഹൃദം. ഇരിക്കുന്ന മുറി കൂടുതൽ മനോഹരമാക്കും. പുതിയ കസേര, തീൻമേശ ഇവ വാങ്ങാനും സാഹചര്യമൊത്തു വരുന്നതാണ്. അമ്മ വഴി ബന്ധുക്കൾ അനുകൂലരാവും. വിനോദയാത്രകൾ പ്രത്യേകിച്ചും ജലയാത്രകൾ ഉണ്ടാവാം. സുഖഭക്ഷണ യോഗം, സുഖചികിൽസ, വിനോദങ്ങളിൽ പങ്കെടുക്കൽ, തൊഴിലിൽ അഭ്യുദയം, മാതാവിന് ആരോഗ്യസൗഖ്യം എന്നിവയും അനുഭവങ്ങളാവും.

ഇടവക്കൂറിന് (കാർത്തിക 2, 3, 4 പാദങ്ങൾ, രോഹിണി, മകയിരം 1,2 പാദങ്ങൾ)

മൂന്നാം ഭാവത്തിലായി ശുക്രൻ സഞ്ചരിക്കുന്നതിനാൽ സഹോദരിമാരുടെ ഇഷ്ടം, അവരിൽ നിന്നും സാമ്പത്തിക പ്രയോജനങ്ങൾ എന്നിവ ലഭിക്കാം. കുടുംബാംഗങ്ങളോടൊപ്പം വിനോദയാത്രകൾ, മംഗളകർമ്മങ്ങളിൽ പങ്കെടുക്കൽ എന്നിവ ഉണ്ടാവും. ഭാഗ്യാനുഭവങ്ങൾ പ്രതീക്ഷിക്കാം. ചിട്ടി, ലോൺ ഇവയിലൂടെ ധനം വന്നെത്താം. കച്ചവടം നവീകരിക്കാൻ സാധിക്കുന്നതാണ്. ദൂരെദിക്കിലുള്ള മാതാപിതാക്കളെ സന്ദർശിക്കാനാവും. കുടുംബ ക്ഷേത്ര ദർശനം സാധ്യമാകും. സാഹിത്യകാരന്മാർക്ക് എഴുതിയ കൃതികൾ പ്രകാശിപ്പിക്കാൻ അവസരം വരും. ആടയാഭരണങ്ങൾ പാരിതോഷികമായി ലഭിക്കാവുന്നതാണ്. അതിഥികൾ പാചകനൈപുണിയെ പ്രശംസിക്കും. പ്രണയികൾക്ക് ഉചിത തീരുമാനങ്ങൾ കൈക്കൊള്ളാൻ ധൈര്യമുണ്ടാകും. . 

മിഥുനക്കൂറിന് (മകയിരം 3, 4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

രണ്ടാം ഭാവത്തിലാണ് ശുക്രൻ സഞ്ചരിക്കുന്നത്. വാക്സ്ഥാനം, കുടുംബ സ്ഥാനം എന്നെല്ലാം രണ്ടാം ഭാവം അറിയപ്പെടുന്നു. പരുക്കൻ വാക്കുകൾ ഉപേക്ഷിക്കപ്പെടും. മധുരമായ വാക്കുകൾ കൂടുതലായി ഉച്ചരിക്കപ്പെട്ടേക്കാം. കവികൾ, പ്രസംഗകർ, അദ്ധ്യാപകർ തുടങ്ങി വിവിധ തൊഴിൽ വിഭാഗത്തിലുള്ളവരുടെ വാക്പാടവം ശ്രദ്ധിക്കപ്പെടുന്നതാണ്. ധനപരമായി മെച്ചമുണ്ടാകുന്നതിന് സാഹചര്യങ്ങൾ അനുകൂലമാവും. ഊഹക്കച്ചവടം, ഇൻഷ്വറൻസ് തുടങ്ങിയവയിലൂടെ ധനാർജ്ജനുണ്ടാവും. കിട്ടാക്കടം ഭാഗികമായെങ്കിലും ലഭിച്ചേക്കാം. കുടുംബ ജീവിതം കൂടുതൽ സ്വച്ഛന്ദമാകും. പ്രണയികൾക്ക് ഹൃദയൈക്യം ദൃഢമാകുന്നതാണ്. വിദ്യാർത്ഥികൾക്ക് ഉപരിപഠനം ആശിച്ച  വിഷയത്തിൽ തന്നെ തുടരാനാവും. കലാവാസനകൾ പരിപോഷിപ്പിക്കപ്പെടാം.

കർക്കടകക്കൂറിന് (പുണർതം നാലാം പാദം, പൂയം, ആയില്യം)

ശുക്രൻ ജന്മരാശിയിലാണ്. പൊതുവേ ദേഹസുഖവും, മനസ്സുഖവും അനുഭവപ്പെടുന്ന കാലമായിരിക്കും. വിഷമിപ്പിച്ചു കൊണ്ടിരുന്ന പിണക്കങ്ങൾ ഇണക്കങ്ങളായി മാറും. അവിവാഹിതരുടെ വിവാഹാലോചന സഫലമാകുന്നതാണ്. സ്ത്രീകളുടെ പിന്തുണ ലഭിക്കും. അന്യനാട്ടിൽ കഴിയുന്നവർക്ക് ഗൃഹത്തിലേക്ക് മടങ്ങാൻ അവസരം വന്നെത്തുന്നതാണ്.. കലാപഠനത്തിൽ പുരോഗതി ഉണ്ടാവും. സുഹൃത്തുക്കളുമൊത്ത് വിനോദയാത്രകൾക്ക് അവസരമുണ്ടായേക്കാം. വസ്ത്രാഭരണാദികളോ ഇലക്ട്രോണിക് ഉല്പന്നങ്ങളോ പാരിതോഷികമായി കിട്ടാനിടയുണ്ട്. മംഗളകർമ്മങ്ങളിൽ പങ്കെടുക്കും. ഇഷ്ടജനങ്ങളുമായി ഉല്ലാസം, സുഖഭക്ഷണം ഇവയെല്ലാം സാധ്യതകൾ. കിടപ്പു രോഗികൾക്ക് ആശ്വസിക്കാനാവും.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

പന്ത്രണ്ടാം ഭാവത്തിലാണ് ശുക്രൻ. മിക്ക ഗ്രഹങ്ങൾക്കും പന്ത്രണ്ടിലെ സഞ്ചാരം അനുകൂലമല്ല. പ്രതിലോമ ഫലങ്ങളാവും ജാതകന് സമ്മാനിക്കുക. എന്നാൽ ശുക്രൻ പന്ത്രണ്ടാം ഭാവത്തിൽ സഞ്ചരിക്കുമ്പോഴും ഗുണദാതാവാണ്. പഠനം, തൊഴിൽ ഇവയുമായി ബന്ധപ്പെട്ട് വിദേശ യാത്രകൾക്ക് ഒരുങ്ങുന്നവർക്ക് അനുകൂല ഫലങ്ങൾ പ്രതീക്ഷിക്കാം. കുടുംബാംഗങ്ങളുമൊത്ത് ഇഷ്ടയാത്രകൾക്ക് അവസരം ലഭിക്കും. സ്വർണാഭരണങ്ങൾ, ഇഷ്ടപ്പെട്ട ഇലക്ട്രോണിക് ഉപകരണങ്ങൾ ഇവ വാങ്ങിയേക്കും. ശുഭകാര്യങ്ങൾക്കായി ചെലവുണ്ടാവും. കടബാധ്യത കുറച്ചെങ്കിലും പരിഹരിക്കാൻ സാധിച്ചേക്കും. പണയ വസ്തുക്കൾ തിരിച്ചെടുക്കാനാവും. പാരമ്പര്യ വസ്തുക്കൾ വിൽക്കുവാനുള്ള ശ്രമം വിജയകരമാവും. മത്സരങ്ങളിൽ നല്ല പ്രകടനം നടത്തും. . 

കന്നിക്കൂറിന് (ഉത്രം 2,3,4 പാദങ്ങൾ, അത്തം, ചിത്തിര ആദ്യ പകുതി)

പതിനൊന്നാം ഭാവത്തിലാണ് ഏതു ഗ്രഹവും പരമാവധി ഗുണദാതാവായി മാറുന്നത്. കർക്കടകത്തിലെ ശുക്ര സഞ്ചാരം കന്നിക്കൂറുകാർക്ക് പല നിലയ്ക്കും ഗുണകരമാവും. ഭാഗ്യപുഷ്ടി പ്രതീക്ഷിക്കാം. സാമ്പത്തികമായിട്ടാവും കൂടുതൽ പ്രയോജനമുണ്ടാവുക. ബിസിനസ്സിൽ ധനവരവും ലാഭവും അധികരിക്കുന്നതാണ്. ചെലവ് നിയന്ത്രിക്കാൻ കഴിയും. തൊഴിൽ തേടുന്നവർക്ക് അർഹതയുള്ള അവസരം ലബ്ധമാകും. പ്രണയബന്ധം വിവാഹ തീരുമാനത്തിലെത്താം. കഴിവുകൾക്ക് അംഗീകാരം വന്നെത്തും. സ്ത്രീകളുടെ നിർലോഭമായ പിന്തുണ പ്രതീക്ഷിക്കാം. കുടുംബത്തിൽ സമാധാനമുണ്ടാവും. ഭോഗസുഖം, മതിയായ വിശ്രമം, മാനസികമായ പിരിമുറുക്കം ഇല്ലാതിരിക്കുക തുടങ്ങിയവയും ഫലങ്ങളിലുൾപ്പെടും.

തുലാക്കൂറിന് ( ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)

ശുക്രൻ പത്താം ഭാവത്തിൽ സഞ്ചരിക്കുകയാൽ പ്രതികൂലഫലങ്ങളാവും അധികവും. 6, 7, 10 എന്നീ ഭാവങ്ങളിൽ സഞ്ചരിക്കുമ്പോഴാണ് ശുക്രൻ വിപരീത ഫലങ്ങൾ നൽകുക. തൊഴിൽ രംഗം നിരുന്മേഷകരമാവും. പുതിയ സംരംഭങ്ങൾ തുടങ്ങുന്നത് നീട്ടിവെക്കുന്നതാവും നല്ലത്. ഉദ്യോഗസ്ഥർക്ക് ജോലിഭാരം കൂടുന്നതാണ്. സമയബന്ധിതമായി പൂർത്തിയാക്കേണ്ട ദൗത്യങ്ങളിൽ വിജയിച്ചേക്കില്ല. വായ്പകൾക്കുള്ള ശ്രമം ഫലം കാണാൻ സാധ്യത കുറവാണ്. രാഷ്ട്രീയ പ്രവർത്തകർക്ക് ആരോപണങ്ങളെ നേരിടേണ്ടവരാം. സ്വതന്ത്ര ചുമതലകൾ മറ്റുള്ളവർക്ക് കൂടി വിഭജിതമാക്കപ്പെടും. പ്രണയികൾക്കിടയിൽ പാരസ്പര്യം കുറയാം. ദാമ്പത്യത്തിൽ സ്വൈരക്കേട്, സ്ത്രീകളുടെ വിരോധം എന്നിവയ്ക്കും സാധ്യതയുണ്ട്.

വൃശ്ചികക്കൂറിന് (വിശാഖം നാലാം പാദം , അനിഴം, തൃക്കേട്ട)

ശുക്രൻ ഒമ്പതാം ഭാവത്തിൽ സഞ്ചരിക്കുന്നു. ആകയാൽ തടസ്സങ്ങളെ മറികടന്ന് ലക്ഷ്യത്തിലെത്തും.  പരീക്ഷയിൽ ഉയർന്ന വിജയം കരസ്ഥമാക്കും.  ഭാഗ്യാനുഭവങ്ങൾ ആവർത്തിച്ചേക്കാം. ഉദ്യോഗസ്ഥർക്ക് ജോലിയിൽ ഉയർച്ചയുണ്ടാവും. വേതന വർദ്ധനയ്ക്കും സാധ്യതയുണ്ട്. ബിസിനസ്സിൽ ആദായം ഉയരുന്നതാണ്. പുതിയ ശാഖകൾ തുടങ്ങാനോ വിപുലീകരണത്തിനോ സാഹചര്യം അനുകൂലമായി വരും. കുടുംബബന്ധം കൂടുതൽ ദൃഢമാകും. അവിവാഹിതരുടെ വിവാഹകാര്യത്തിൽ ശുഭതീരുമാനം ഉണ്ടായേക്കും.  ഊഹക്കച്ചവടത്തിൽ നിന്നും ലാഭമുണ്ടാകും. പൊതുവേ മനസ്സന്തോഷം, ഭോഗസുഖം, രോഗികൾക്ക് സമാശ്വാസം, ലോട്ടറി ഭാഗ്യം, ജീവകാരുണ്യ പ്രവർത്തനം എന്നിവ ഭവിക്കും.  ഭാവിയിൽ പ്രയോജനപ്പെടുന്ന കാര്യങ്ങൾക്ക് തുടക്കമിടും.  

ധനുക്കൂറിന് (മൂലം, പൂരാടം , ഉത്രാടം ഒന്നാം പാദം)

ശുക്രൻ എട്ടാം ഭാവത്തിൽ സഞ്ചരിക്കുകയാൽ അനുകൂലഫലങ്ങൾക്ക് മുൻതൂക്കം പ്രതീക്ഷിക്കാം. കാര്യതടസ്സം നീങ്ങി കർമ്മഗുണം അനുഭവത്തിലെത്തും. അധികാരികളുടെ പ്രീതിയുണ്ടാവും.  സമൂഹത്തിൻ്റെ ആദരം നേടുന്നതാണ്. കച്ചവടത്തിൽ അഭ്യുദയമുണ്ടാവും. വിദ്യാർത്ഥികൾക്ക് ഇടക്കാല പരീക്ഷകളിൽ നല്ല പ്രകടനം നടത്താൻ കഴിയുന്നതാണ്. വിനോദയാത്രകൾക്ക് അവസരമുണ്ടാവും. ബന്ധുജനങ്ങളെ സന്ദർശിക്കുന്നതാണ്. ഏജൻസി, കരാർ പണികൾ, കമ്മീഷൻ ഏർപ്പാടുകൾ എന്നിവ ലാഭകരമാവും. രാഷ്ട്രീയ പ്രവർത്തനത്തിൽ കരുതൽ വേണ്ടതുണ്ട്. കടബാധ്യതകളെക്കുറിച്ച് ഓർമ്മപ്പെടുത്തൽ ഉണ്ടായിക്കൊണ്ടിരിക്കും. സ്വർണ്ണപ്പണയം തിരിച്ചെടുക്കാൻ ധനസമാഹരണം ആവശ്യമായി വരാം.

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

മകരക്കൂറുകാർക്ക് ഏഴാമെടത്തിലാണ് ശുക്രസഞ്ചാരം. 6, 7,10 എന്നീ ഭാവങ്ങളിൽ ശുക്രസഞ്ചാരം അനുകൂലമാവില്ലെന്നുണ്ട്. പ്രണയികൾക്ക് ഏഴാം ഭാവത്തിലെ ശുക്രൻ വിരോധം, പിണക്കം, പ്രണയവിഘ്നം ഇവ സൃഷ്ടിക്കാം. ദാമ്പത്യത്തെയും അല്പം പ്രതികൂലമായി ബാധിക്കാനിടയുണ്ട്. കൂട്ടുകച്ചവടത്തിൽ ചില പ്രശ്നങ്ങൾ ഉടലെടുക്കും. യാത്രകൾ കൊണ്ട് ഉദ്ദേശിച്ച ഗുണാനുഭവങ്ങൾ ഉണ്ടായിക്കൊളളണമെന്നില്ല. സാമ്പത്തിക കാര്യങ്ങളിൽ അമളി പറ്റാതെ നോക്കണം. സാമൂഹ്യമാധ്യമങ്ങളിലെ വിനോദങ്ങളിൽ ഏർപ്പെട്ട് പണം നഷ്ടമാകാം. പതിവായുള്ള  ആരോഗ്യ പരിശോധനകളിൽ വീഴ്ച വരുത്തരുത്. വാഗ്ദാനലംഘനം ശത്രുക്കളെ സൃഷ്ടിക്കാം. 

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

ആറാം ഭാവത്തിലാണ് ശുക്രൻ സഞ്ചരിക്കുന്നത് എന്നതിനാൽ ശത്രുക്കളുടെ ഉപദ്രവമുണ്ടാവും. ദുരാരോപണങ്ങളെ നേരിടേണ്ടി വരാം. പ്രതീക്ഷിച്ചത്ര വരുമാനം ബിസിനസ്സിൽ നിന്നും ഉണ്ടാവണമെന്നില്ല. കൂട്ടുകെട്ട് ദോഷകരമായെന്ന് വരാം. പ്രണയത്തിൽ വിഘാതമോ പരാജയമോ സാധ്യതയാണ്. ഉദ്യോഗസ്ഥർക്ക് ദുർഘട ദൗത്യങ്ങൾ ഏറ്റെടുക്കേണ്ടി വന്നേക്കും. പൊതുപ്രവർത്തകർക്ക് ജനപിന്തുണ കുറയുന്നതായി ബോധ്യമാകും. അശുഭവാർത്തകൾ കേൾക്കപ്പെടാം. ചെറുകിട സംരംഭങ്ങളിൽ നിന്നും ഏജൻസി പ്രവർത്തനങ്ങളിൽ നിന്നും സാമാന്യം നേട്ടങ്ങളുണ്ടാവും. ഇടനില നിന്നുള്ള പ്രവർത്തനങ്ങളും വിജയം കാണുന്നതാണ്.

മീനക്കൂറിന് (പൂരൂരുട്ടാതി നാലാം പാദം, ഉത്രട്ടാതി, രേവതി)

 ശുക്രൻ അഞ്ചാം ഭാവത്തിൽ സഞ്ചരിക്കുകയും പതിനൊന്നാം ഭാവത്തിലേക്ക് നോക്കുകയും ചെയ്യുന്നതിനാൽ ധനപരമായി ഉയർച്ചയുണ്ടാവും. ന്യായമായ ആഗ്രഹങ്ങൾ നിറവേറപ്പെടാം. ലോട്ടറി, ചിട്ടി മുതലായവയിലൂടെ ധനസമാഹരണം ഉണ്ടാവും. വിലകൂടിയ വസ്തുക്കൾ പാരിതോഷികമായി ലഭിച്ചേക്കാം. വ്യാപാരത്തിൽ മെച്ചമുണ്ടാകും. ഉപഭോക്താക്കളുടെ വിശ്വാസമാർജ്ജിക്കാൻ സാധിക്കുന്നതാണ്. കലാകാരന്മാർക്ക് കലാപ്രകടനത്തിന് അവസരം സിദ്ധിക്കും. സാഹിത്യകാരന്മാർക്ക്ഭാവനാശക്തി അധികരിക്കുന്നതാണ്. മത്സരങ്ങളിലും അഭിമുഖങ്ങളിലും വിജയം നേടാനാവും. മകളുടെ വിവാഹകാര്യത്തിൽ ശുഭതീരുമാനം ഭവിക്കും. കിടപ്പ് രോഗികൾക്ക് ആശ്വാസം അനുഭവപ്പെടും.

Read More

• Daily Horoscope July 04, 2024: നിങ്ങളുടെ ഇന്നത്തെ ദിവസം, രാശി ഫലം
• Weekly Horoscope (June 30– July 06, 2024): ഈ ആഴ്‌ച നിങ്ങൾക്കെങ്ങനെ?
• വാരഫലം, അശ്വതി മുതൽ രേവതി വരെ; June 30-July 06 08, 2024, Weekly Horoscope
• 2024 ജൂലെ മാസത്തിലെ നക്ഷത്രഫലം, അശ്വതി മുതൽ രേവതി വരെ
• മിഥുനമാസത്തെ നക്ഷത്രഫലം, അശ്വതി മുതൽ രേവതി വരെ
• എന്താണ് വസുപഞ്ചകം അഥവാ പഞ്ചകദോഷം?
• ശനിദശ ഓരോ നക്ഷത്രക്കാർക്കും എപ്പോൾ വരും