ശനിദശ ഓരോ നക്ഷത്രക്കാർക്കും എപ്പോൾ വരും?

Astrology, Horoscope: നവഗ്രഹങ്ങളുടെ ഭരണകാലമാണ് മനുഷ്യ ജീവിതം.അതിൽ ശനിയുടെ ദശാകാലം 19 വർഷമാണ്. ഏറ്റവും വലിയ ദശ ശുക്രദശയാണ്. 20 വർഷം. രണ്ടാമത്തെ വലിയ ദശ ശനിദശയും (Shani dasha). ദശകളുടെ ക്രമം തീരുമാനിച്ചിരിക്കുന്നത് നക്ഷത്രങ്ങളെ കേന്ദ്രീകരിച്ചാണ്. മൂന്നു നക്ഷത്രങ്ങൾക്കു വീതം ഒരേ വിധത്തിലാവും ദശകളുടെ ക്രമം വരുന്നത്. അതായത് അശ്വതി മുതൽ രേവതി വരെയുള്ള 27 നക്ഷത്രങ്ങളെ 3 വീതം  9 ഗ്രൂപ്പുകളാക്കി തിരിച്ചിട്ടാണ് ദശകളുടെ ക്രമം നിർണയിച്ചിരിക്കുന്നത്. ഏതു ഗ്രഹത്തിൻ്റെ ദശയാണ് ആദ്യം എന്നു തീരുമാനിക്കുന്നത് ആ രീതി അവലംബിച്ചിട്ടാണ്.

ശനിദശ (Saturn Mahadasha) ഓരോ നക്ഷത്രക്കാർക്കും എപ്പോൾ വരുന്നുവെന്നും സാമാന്യഫലങ്ങൾ എന്താവുമെന്നും ഇവിടെ അന്വേഷിക്കുന്നു. സൂര്യൻ (സൂര്യദശ -6 വർഷം), ചന്ദ്രൻ (ചന്ദ്രദശ -10 വർഷം), ചൊവ്വ (ചൊവ്വാദശ -7 വർഷം) രാഹു (രാഹുദശ -18 വർഷം), വ്യാഴം (വ്യാഴദശ - 16 വർഷം) ശനി (ശനിദശ -19 വർഷം) ബുധൻ (ബുധദശ -17 വർഷം), കേതു (കേതുദശ - 7 വർഷം), ശുക്രൻ (ശുക്രദശ - 20 വർഷം) എന്നിങ്ങനെയാണ് ക്രമം.

ഉദാഹരണത്തിന് ഒരാൾ സൂര്യദശയിൽ ജനിച്ചാൽ ചന്ദ്രദശ രണ്ടാം ദശയും ചൊവ്വാ ദശ മൂന്നാം ദശയുമാവും. ഒമ്പതാം ദശ ശുക്രദശയായിരിക്കും. ഇനി ചന്ദ്രദശയിലാണ് ജനനമെങ്കിൽ രണ്ടാം ദശ ചൊവ്വാദശയും മൂന്നാം ദശ രാഹുദശയുമാവും. ഒമ്പതാം ദശയാവുന്നത് സൂര്യദശയാവും. മുകളിലത്തെ പട്ടികയിൽ ഒമ്പതാമതായി വരുന്ന ഗ്രഹം ആയ ശുക്രൻ്റെ ദശയിൽ ജനിച്ചാൽ രണ്ടാം ദശ സൂര്യദശ, മൂന്നാം ദശ ചന്ദ്രദശ എന്നിങ്ങനെ തുടർന്ന് ഒമ്പതാം ദശ കേതുവിൽ അവസാനിക്കും. 

ശനിദശ ആദ്യം ആർക്കൊക്കെ? 

ആദ്യം ശനിദശ വരുന്നത് പൂയം, അനിഴം, ഉത്രട്ടാതി എന്നീ മൂന്നു നാളുകാർക്കാണ്. ഒമ്പതു ദശകളിൽ ഇവരുടെ ഒന്നാം ദശ ശനിദശ എന്നർത്ഥം. ജനനം ശനിദശയിൽ എന്നും ഇതിനെ പറയാം. ശനിദശ ആകെ 19 വർഷമാണ്. ഒരു നക്ഷത്രം കണക്കാക്കുന്നത് ശരാശരി 24 മണിക്കൂർ എന്ന തോതിലാണ്. പൂയം, അനിഴം, ഉത്രട്ടാതി എന്നീ മൂന്നു നാളുകാർ നക്ഷത്രത്തിൻ്റെ തുടക്കത്തിൽ ജനിച്ചാൽ ആദ്യദശയായ ശനിദശയും 19 വർഷം കിട്ടും. നക്ഷത്രം തുടങ്ങി പകുതി ചെന്നപ്പോൾ അതായത് 12 മണിക്കൂർ പിന്നിട്ടപ്പോഴാണ് ജനിച്ചതെങ്കിൽ ശനിദശയും പകുതി പിന്നിട്ട് ശേഷിക്കുന്ന ഒമ്പതര വർഷം അഥവാ ഒമ്പതര വയസ്സുവരെ മാത്രമേ അനുഭവത്തിൽ വരൂ. ഇത് എല്ലാ ആദ്യ ദശകൾക്കും സ്വീകാര്യമായ തത്ത്വമാണ്. 

ശനിദശയിൽ ജനനവും ബാല്യകൗമാരങ്ങളും വരുമ്പോൾ ജീവിതത്തിൻ്റെ ക്ലേശങ്ങൾ നേരത്തെ തന്നെ അറിയുന്നു എന്ന സ്ഥിതി വരാം. "തീയിൽക്കുരുത്തത് വെയിലത്ത് വാടില്ല" എന്ന പഴമൊഴിയിൽ വ്യക്തമാക്കുന്നതുപോലെ പിന്നീട് ജീവിതത്തിൽ ഉണ്ടാവുന്ന ക്ലേശങ്ങളെ അതിജീവിക്കാനുള്ള ശക്തി വരുന്നു. ക്ഷമയും സഹനവും പരിശീലിക്കുന്നു. സഹിഷ്ണുതയുടെ പാഠങ്ങൾ പഠിപ്പിക്കുന്ന ഒരു ഗുരുനാഥനായി ശനി മാറുകയാണ് എന്നതാണ് ഉൺമ.

രണ്ടാം ദശയായി വരുന്നതാർക്കൊക്കെ? 

പുണർതം, വിശാഖം, പൂരൂരുട്ടാതി എന്നീ മൂന്നു നാളുകാർക്കാണ് രണ്ടാം ദശയായി ശനിദശ വരുന്നത്. ഈ മൂന്നു നാളുകാരുടേയും ജനനം വ്യാഴദശയിലാണ്. വ്യാഴം 16 വർഷമാണ്. ജനന സമയത്ത് ജന്മനക്ഷത്രം എത്ര കഴിഞ്ഞു എന്ന് കൃത്യം അറിയാത്തതിനാൽ ആദ്യദശ പകുതി കണക്കുകൂട്ടുകയാണ് രീതി (അർദ്ധദശ). അപ്പോൾ ശരാശരി 8 വയസ്സുവരെ വ്യാഴദശയും അതുമുതൽ 19 വർഷം ശനിദശയും എന്ന് കണക്കാക്കാം. 

രണ്ടാംദശയെ 'ധനനക്ഷത്രദശ' എന്നു പറയും. തന്മൂലം ശനിദശയിൽ, പുണർതം, വിശാഖം, പൂരൂരുട്ടാതി എന്നീ നാളുകാർക്ക് സാമ്പത്തികമായ പുരോഗതി വരാം. തനിക്ക് അപ്രകാരം വന്നില്ലെങ്കിൽ മാതാപിതാക്കൾക്ക് ജോലിയിൽ ഉയർച്ച, വരുമാന വർദ്ധനവ് എന്നിവ ഉണ്ടാവും. ക്ലേശങ്ങൾ കുറയാം. വിദ്യാ പുരോഗതി, ന്യായമായ തൊഴിൽ, ചിലർക്ക് വിവാഹാം എന്നിവയും സിദ്ധിച്ചേക്കാം. ശനിയുടെ സൗമ്യവും ഗുണം തരുന്നതുമായ വശമാണ് രണ്ടാം ദശയായി വരുമ്പോൾ അനുഭവത്തിൽ വരിക.

മൂന്നാം ദശയായി വരുന്നത് ആർക്കൊക്കെ? 

തിരുവാതിര, ചോതി, ചതയം എന്നീ മൂന്നു നക്ഷത്രങ്ങളിൽ ജനിക്കുന്നവർക്കാണ് ശനിദശ മൂന്നാം ദശയായി വരുന്നത്. ഈ നാളുകാരുടെ ജനനം രാഹുദശയിലാകുന്നു. ദശകളിൽ വെച്ച് ശുക്രദശ, ശനിദശ എന്നിവ കഴിഞ്ഞാൽ വലിയ ദശയാകുന്നു രാഹുദശ. സർപ്പദശ എന്നും രാഹുദശയ്ക്ക് പേരുണ്ട്. 18 വർഷമാണ് രാഹുദശയുടെ ദൈർഘ്യം.  

ആദ്യദശ പകുതി കണക്കാക്കും (അർദ്ധ ദശയായി) എന്ന നിയമമനുസരിച്ച് 18 വർഷത്തിൻ്റെ പകുതിയായ 9 വർഷമായിട്ടാണ് രാഹുദശയെ ആദ്യദശയായി വരുമ്പോൾ കണക്കാക്കുന്നത്. തുടർന്ന് 16 വർഷം നീളുന്ന രണ്ടാം ദശയായ വ്യാഴ ദശ. അതും കഴിയുമ്പോൾ ശരാശരി 25 വയസ്സായിട്ടുണ്ടാവും. പൊതുനിയമപ്രകാരം അതുമുതൽ ഈ മൂന്നു നാളുകാർക്കും ശനിദശ തുടങ്ങുന്നു. 

25 മുതൽ 44 വരെ, ഏതാണ്ട് നിറയൗവ്വനം കാലം മുഴുവൻ തിരുവാതിര, ചോതി, ചതയം നാളുകാർക്ക് ശനിദശയാവാം. മൂന്നാം ദശയ്ക്ക് 'ആപന്ന ദശ' അഥവാ ആപത്തുണ്ടാക്കുന്ന ദശ എന്നു പേരുണ്ട്. അതിനാൽ ഇവരുടെ ശനിദശ കഠിനമായിരിക്കും.

നേട്ടങ്ങൾ തടസ്സപ്പെടാം. പരാശ്രയത്വം ഭവിച്ചേക്കാം. സമസ്തവും വൈകിച്ചെയ്യുന്ന ശീലം സ്വഭാവമായി പരിണമിക്കാം. വിശ്വാസവഞ്ചനയ്ക്ക് പാത്രീഭവിക്കാനും ഇടവരാം. ചുരുക്കത്തിൽ ജീവിതത്തിലെ പരീക്ഷണ കാലമാവും, മൂന്നാം ദശയായി വരുന്ന ശനി ദശ. ക്ഷമയും കഠിനാധ്വാനവും സ്ഥിരോത്സാഹവും ഉചിത പ്രാർത്ഥനകളും കൊണ്ടേ വിജയിക്കാനാവൂ!

നാലാം ദശയായി വരുന്നത് ആർക്കൊക്കെ?

മകയിരം, ചിത്തിര, അവിട്ടം എന്നീ മൂന്നു നാളുകളിൽ ജനിച്ചവർക്ക് ശനിദശ നാലാം ദശയായി വരുന്നു. ഈ നാളുകാരുടെ ജനനം ചൊവ്വാദശയിലാകുന്നു. ചെറിയ ദശയാണ് ചൊവ്വാദശ. ആകെ 7 വർഷമാണ് ദശാകാലം. ആദ്യദശയെ അർദ്ധദശയായി സ്വീകരിച്ചാൽ മൂന്നര വയസ്സുവരെ ചൊവ്വദശ എന്നൂഹിക്കാം.

രണ്ടും മൂന്നും ദശകൾ യഥാക്രമം 18 വർഷമുള്ള രാഹുദശയും 16 വർഷമുള്ള വ്യാഴദശയുമാണ്. അപ്പോൾ ശരാശരി മുപ്പത്തിയേഴര വയസ്സാവും. അതു മുതൽ 19 വർഷം ശനിദശ. 37 1/2 വയസ്സു മുതൽ 56 1/2 വയസ്സുവരെ. യൗവ്വനത്തിൽ തുടങ്ങി വാർദ്ധക്യത്തിൻ്റെ പടിവാതിലോളം ശനിദശ നീളുന്നു.

നാലാം ദശയ്ക്ക് 'ക്ഷേമനക്ഷത്രദശ' എന്ന് പേരുണ്ട്. അതിനാൽ മകയിരം, ചിത്തിര, അവിട്ടം എന്നീ നാളുകാരുടെ നാലാം ദശയായ ശനി ദശ  കഠിനമാവാനിടയില്ല.   അദ്ധ്വാനത്തിന് അർഹമായ പ്രതിഫലം, ഗൃഹനിർമ്മാണം, ജോലിയിൽ ഉയർച്ച, മക്കളുടെ വിവാഹം തുടങ്ങിയവ സാക്ഷാൽകരിക്കാൻ കഴിഞ്ഞേക്കും. ചിലർക്ക് പ്രവാസം, ജീവിതശൈലീ രോഗങ്ങൾ, സാമ്പത്തിക ബാധ്യത, വേണ്ടപ്പെട്ടവരുടെ വിയോഗം തുടങ്ങിയ ചില ദുരിതങ്ങളും കൂടി ശനിദശയിൽ അനുഭവിക്കേണ്ടതായി വന്നേക്കാം.

അഞ്ചാം ദശയായി വരുന്നത് ആർക്കൊക്കെ?

രോഹിണി, അത്തം, തിരുവോണം എന്നീ മൂന്നു നക്ഷത്രങ്ങളിൽ ജനിച്ചവരുടെ അഞ്ചാം ദശയായി വരുന്നത് ശനി ദശയാണ്. ഈ മൂന്നുനാളുകാരുടെ ആദ്യദശ ചന്ദ്രദശയാണ്. 10 വർഷക്കാലമാണ് ചന്ദ്രദശയുടേത്. ആദ്യ ദശയായ ചന്ദ്രദശയെ പകുതി അഥവാ അർദ്ധദശയായി കണക്കാക്കിയാൽ 

5 വർഷം അഥവാ  5 വയസ്സുവരെ ഉണ്ടാവും. തുടർന്ന് ക്രമത്തിൽ ചൊവ്വ, രാഹു, വ്യാഴം എന്നീ ദശകൾ. ഇത്രയും ദശകൾ കഴിയുമ്പോൾ 46 വയസ്സാകും. അതുമുതൽ 19 വർഷം, അതായത് 65 വയസ്സുവരെ ശനിദശയാവും. 

അഞ്ചാം ദശയ്ക്ക് 'പ്രത്യരി നക്ഷത്രദശ' എന്നാണ് പേര്. ശത്രുതകളും അസന്തുഷ്ടികളും ഉണ്ടാക്കുന്ന ദശയാവും. ആ വാക്കിൻ്റെ ആശയം ഏതാണ്ട് അപ്രകാരമാണ്. യൗവ്വനാന്ത്യത്തിൽ തുടങ്ങി വാർധക്യത്തോളം നീളുന്നതിനാൽ ആരോഗ്യപ്രശ്നങ്ങൾ സ്വാഭാവികമാവും. വാതരോഗം, മാനസിക വിഷാദം തുടങ്ങിയവയും വേഗം ബാധിക്കാം. ജോലിയിൽ നിന്നും പിരിയുന്ന കാലമാകയാൽ സാമ്പത്തിക ക്ലേശങ്ങളും വരാം. ഗൃഹനിർമ്മാണം, മക്കളുടെ കല്യാണം തുടങ്ങിയവ കടബാധ്യതയ്ക്ക് വഴിവെക്കാം. 

ചിലർക്ക് പ്രവാസം അവസാനിപ്പിച്ച് നാട്ടിലേക്ക് മടങ്ങാൻ സാധിച്ചേക്കില്ല. ഏകാന്തതയുടെ തുരുത്തിൽ പെട്ട് പോകുന്നവരും ശനിദശയിൽ അപൂർവ്വമല്ല. ഉറ്റവരുടെ വിരഹവിയോഗാദികളും വിഷമിപ്പിക്കാം. ഗ്രഹനിലയിൽ ശനി ഇഷ്ടഭാവത്തിൽ ബലമുള്ള രാശികളിലായി സ്ഥിതി ചെയ്യുന്നവർക്ക് ഗുണാനുഭവങ്ങൾ ശനിദശയിൽ വർദ്ധിക്കുന്നതാണ്.

ആറാം ദശയായി വരുന്നത് ആർക്കൊക്കെ?

കാർത്തിക, ഉത്രം, ഉത്രാടം എന്നീ മൂന്നു നക്ഷത്രങ്ങളിൽ ജനിച്ചവർക്ക് ആറാം ദശയാണ് ശനി ദശ. ഈ നാളുകാർ സൂര്യദശയിൽ ജനിക്കുന്നു. ആറുവർഷമാണ് സൂര്യദശ. അതിൻ്റെ പകുതി സ്വീകരിച്ചാൽ (അർദ്ധദശ) മൂന്നു വർഷം അഥവാ മൂന്നു വയസ്സുവരെ സൂര്യദശയും തുടർന്ന് ക്രമത്തിൽ ചന്ദ്രദശ, ചൊവ്വാദശ, രാഹുദശ, വ്യാഴദശ എന്നീ ദശകളുമാണ്. ഇത്രയും ദശകൾ പിന്നിടുമ്പോൾ 54 വയസ്സാവും. ആറാം ദശയായ ശനിദശ അതുമുതൽക്കാണ്. 

19 വർഷമാണ് ശനി ദശാകാലം എന്നത് ഓർമ്മിക്കുക. 54 വയസ്സ് മുതൽ 73 വയസ്സുവരെ എന്നു ചുരുക്കം. ആറാം ദശയ്ക്ക് 'സാധകനക്ഷത്രദശ' എന്ന് പേരുണ്ട്. പ്രായേണ നേട്ടങ്ങൾക്കാവും മുൻതൂക്കം എന്നാണ് സൂചന. അതുവരെ വിശ്രമം അറിയാതെ അദ്ധ്വാനിച്ചതിൻ്റെ ഫലം അനുഭവിക്കാനാകുന്നത് ശനിദശയിൽ ആണെന്നുവരാം. ഉത്തരവാദിത്വങ്ങൾ പൂർത്തീകരിച്ചതിൻ്റെ സംതൃപ്തിയും അനുഭവിക്കാനായേക്കും. ആദ്ധ്യാത്മികമായ താത്പര്യങ്ങൾക്കും ശനി വഴിയൊരുക്കാം. 

അവരവരുടെ ഗ്രഹനിലയിൽ, ജാതകത്തിൽ ശനി ബലവാനാണെങ്കിൽ ശനിദശയുടെ സ്വതസ്സിദ്ധമായ ക്ലേശങ്ങൾ നാമമാത്രമാവും. ശനി ദുർബലനാണെന്ന് വന്നാൽ അനിഷ്ടഫലങ്ങൾ ഉണ്ടാവുകയും ചെയ്യുന്നതാണ്.

ശനിദശ: ഏഴാം ദശയായി വരുന്നത് ആർക്കൊക്കെ?

ഭരണി, പൂരം, പൂരാടം എന്നീ മൂന്നു നക്ഷത്രങ്ങളിൽ ജനിച്ചവർക്ക് ഏഴാം ദശയാണ് ശനി ദശ.  ഈ മൂന്ന് നാളുകാരുടെ ജനനം ഏറ്റവും വലിയ ദശയായ ശുക്രദശയിലാവുന്നു.  20 വർഷമാണ് ശുക്രദശാകാലം. അതിൻ്റെ പകുതി - അർദ്ധദശ - സ്വീകരിച്ചാൽ പത്തു വർഷം അഥവാ പത്തു വയസ്സുവരെ ശുക്രദശയാവും. തുടർന്ന് ക്രമത്തിൽ സൂര്യദശ, ചന്ദ്രദശ, ചൊവ്വാദശ, രാഹുദശ, വ്യാഴദശ എന്നീ ദശകളാണ്. 

ഇത്രയും ദശകൾ/ ഈ ആറ് ദശകൾ പിന്നിടുമ്പോൾ ശരാശരി 67 വയസ്സാകും. ശനിദശ അവിടെ തുടങ്ങുന്നു. ശുക്രദശ കഴിഞ്ഞാൽ ഏറ്റവും വലിയ ദശ ശനി ദശയാണ്! 

19 വർഷമാണ് ശനിദശാകാലം എന്നത് ഓർമ്മിക്കുമല്ലോ. ദശ തീരുമ്പോൾ  വയസ്സ് 86 ആകും. അങ്ങനെ വാർദ്ധകൃത്തിൽ തുടങ്ങി അതിവാർദ്ധക്യത്തിൽ അവസാനിക്കുന്ന ദശകളാണ് 7,8,9 ആയി വരുന്ന ദശകളെല്ലാം തന്നെ. ഏതു നക്ഷത്രക്കാർക്കും ഇതുതന്നെയാവും അനുഭവം.  

ഏഴാം ദശയെ 'വധ നക്ഷത്രദശ' എന്ന് പണ്ഡിതന്മാർ സംബോധന ചെയ്യുന്നു. അപകടകാരിയും മരണമുണ്ടാക്കാൻ  കെല്പുമുള്ളതുമായ ദശ എന്നാണ് അതിൻ്റെ അർത്ഥം. ഏഴാം ദശയിൽ മനസ്സിനെയും ശരീരത്തെയുമെല്ലാം തളർത്തുന്ന അതിവാർദ്ധക്യം അനുഭവിക്കേണ്ടി വരുകയും ചെയ്യുമല്ലോ! രോഗക്ലേശങ്ങൾ നിരന്തരമാവും. പരാശ്രയത്വം ഉണ്ടാവും. ഏകാന്തത, ദാരിദ്ര്യം, വിരഹവിയോഗാദികൾ മൂലം വിഷാദം, ബാധ്യതകൾ എന്നിങ്ങനെ പലതരത്തിൽ ക്ലേശാനുഭവങ്ങൾ ഭവിക്കാം. 

സ്വന്തം ഗ്രഹനിലയിൽ അഥവാ അവരവരുടെ ജാതകത്തിൽ ശനി അനുകൂല ഭാവത്തിൽ സ്ഥിതി ചെയ്യുകയാണെങ്കിൽ ശനിദശ അത്ര ക്ലേശഭൂയിഷ്ഠം ആവണമെന്നില്ല. ഉചിതമായ വഴിപാടുകളും പ്രാർത്ഥനകളും ശനിദശാ ദോഷനിവൃത്തിക്കായി അനുഷ്ഠിക്കുന്ന രീതി വിശ്വാസികളുടെ ഇടയിൽ പതിവുള്ളതാണ്. . 

ശനിദശ: എട്ടാം ദശയായി വരുന്നത് ആർക്കൊക്കെ? 

അശ്വതി, മകം, മൂലം എന്നീ മൂന്നു നക്ഷത്രങ്ങളിൽ ജനിച്ചവരുടെ എട്ടാം ദശ ശനിദശയാണ്. ഈ മൂന്നുനാളുകാരുടെ ജനനം ചെറിയ ദശകളിലൊന്നായ കേതു ദശയിൽ ആകുന്നു. 7 വർഷമാണ് കേതുദശാകാലം. അതിൻ്റെ പകുതി, അർദ്ധദശ, സ്വീകരിക്കുകയാണ് എങ്കിൽ മൂന്നര വയസ്സുവരെ അഥവാ മൂന്നര വർഷം വരെ കേതുദശയുണ്ടാവും. 

തുടർന്നുള്ള ദശകളുടെ ക്രമം ഇവ്വിധമാണ്: ശുക്രദശ, സൂര്യദശ, ചന്ദ്രദശ, ചൊവ്വാദശ, രാഹുദശ, വ്യാഴദശ. ഈ ഏഴു ദശകൾ പിന്നിടുമ്പോൾ 80 / 81 വയസ്സു പിന്നിടും. അതു മുതൽ  19 വർഷം, അതായത് 99 /100 വയസ്സുവരെയാണ് എട്ടാം ദശയായ ശനി ദശ. ആയുസ്സിൻ്റെ കാര്യത്തിൽ ഭാഗ്യവാന്മാർക്കും ഭാഗ്യവതികൾക്കും ഒക്കെയാവും വാർദ്ധക്യത്തിൻ്റെ ്് പരമകാഷ്ഠയിലെത്തുന്ന ശനിദശയിൽ പ്രവേശിക്കാൻ തന്നെ കഴിയുക. അതുപൂർത്തീകരിക്കാൻ കഴിയുക എന്നതാവട്ടെ അപൂർവ്വം വ്യക്തികൾക്ക് കൈവരുന്ന ഭാഗ്യവുമാണ്. 

എട്ടാം ദശയെ 'മൈത്രീ ദശ' എന്ന് പറയാറുണ്ട്. സുഹൃത്തിനെപ്പോലെ ഗുണകരവും ഹിതകരവും എന്ന് മൈത്രിയെ വ്യാഖ്യാനിക്കാം. മൂന്ന്, അഞ്ച്, ഏഴ് ആയി വരുന്ന ദശകൾ ഉണ്ടാക്കുന്ന അത്രയും ക്ലേശങ്ങൾ വാർദ്ധക്യകാലത്തെ ദശകളായ എട്ടാം ദശയും  ഒമ്പതാം ദശയും സൃഷ്ടിക്കില്ലെന്ന് പറയാറുണ്ട്. ഇങ്ങനെയൊക്കെ ആണെന്നുവന്നാലും പ്രായം ഒരു ഘടകം തന്നെയാണല്ലോ. അതിനാൽ

'മൈത്രീദശ' ആയാലും ദുഃഖദുരിതാദികളുടെ കഷായം കുറശ്ശേ എങ്കിലും കുടിക്കേണ്ടി വരാതിരിക്കില്ല. ബാധ്യതകളൊഴിഞ്ഞ സ്വസ്ഥമായ ജീവിതം, കുടുംബസൗഖ്യം, രോഗാദികളുടെ കഠിനവും നിരന്തരവുമായ ഉപദ്രവം ഇല്ലാതിരിക്കൽ തുടങ്ങിയവ എട്ടാം ദശയിൽ സാമാന്യേന പ്രതീക്ഷിക്കാം.

ശനിദശ: ഒമ്പതാം ദശയായി വരുന്നത് ആർക്കൊക്കെ? 

ആയില്യം, തൃക്കേട്ട, രേവതീ എന്നീ മൂന്നു നക്ഷത്രങ്ങളിൽ ജനിച്ചവർക്കാണ് ശനിദശ ഒമ്പതാം ദശയായി  വരുന്നത്. ഈ മൂന്നു നാളുകാരുടെ ജനനം ബുധദശയിലാകുന്നു.  17 വർഷമാണ് ബുധദശയുടെ കാലാവധി. 

ജനന സമയവും അതിനെ മുൻനിർത്തി ആദ്യദശയുടെ ശിഷ്ടവും കണ്ടെത്തും. അതറിയില്ലെങ്കിൽ ജന്മദശയുടെ പകുതി കണക്കാക്കുകയാണ് സാമാന്യരീതി. ഇതിനെ അർദ്ധദശ എന്ന്  വിളിക്കുന്നു. ബുധദശയുടെ പകുതി എട്ടരവർഷമാണ്. അഥവാ എട്ടര വയസ്സു വരെയാണ് ബുധദശ. തുടർന്ന് കേതുദശ, ശുക്രദശ, സൂര്യദശ, ചന്ദ്രദശ, ചൊവ്വാദശ, രാഹുദശ, വ്യാഴദശ എന്നിങ്ങനെ ശനിദശ ഒഴികെ എല്ലാ ദശകളും കടന്നു വരുന്നു. അത്രയും കഴിയുമ്പോൾ 92/93 വയസ്സിലെത്തും. ശനിദശയുടെ ഊഴം അവിടം മുതലാണ്.

19 വർഷം കണക്കാക്കുമ്പോൾ 111/112 വയസ്സുവരെ ശനിദശയാവും. ഇതിൻ്റെ പ്രായോഗികത ഏതാണ്ട് അസാധ്യമാണ്. അഥവാ ആയില്യം, തൃക്കേട്ട, രേവതി, എന്നീ നക്ഷത്രങ്ങളിൽ ജനിച്ചവർക്ക് ഒമ്പതാം ദശയായ ശനി ദശ അനുഭവത്തിൽ വരിക എന്നതും പൂർത്തിയാക്കുക എന്നത് 'അപൂർവ്വത്തിൽ അപൂർവ്വ'മാണ്. എന്നല്ല എല്ലാ നാളുകാർക്കും (ആയുഷ്മാന്മാരായ വ്യക്തികൾക്ക്) പ്രായേണ 7, 8 ദശകൾ വരെയൊക്കെയാവും എത്തിച്ചേരാനാവുക എന്നതും പ്രസ്താവ്യമാണ്. 

'പരമ മൈത്രി ദശ' എന്ന പേരുണ്ട്, ഒമ്പതാം ദശയ്ക്ക്. ഏവരുടേയും ബഹുമാനവും സ്നേഹവായ്പും ലഭിക്കാം. ശനി ഗ്രഹനിലയിൽ ദുർബലനെങ്കിൽ വർദ്ധിത ദുരിതങ്ങൾ ഉണ്ടാവുകയും ചെയ്യും. . 

Read More

• Weekly Horoscope (June 16– June 22, 2024): ഈ ആഴ്‌ച നിങ്ങൾക്കെങ്ങനെ?
• വാരഫലം, അശ്വതി മുതൽ രേവതി വരെ; June 16-June 22 08, 2024, Weekly Horoscope
• ദേവഗണത്തിലെ നക്ഷത്രങ്ങൾ
• അക്കങ്ങളിൽ തെളിയും ഭാവികാലം
• മകയിരം നക്ഷത്രക്കാർ പ്രണയലോലരാണ്
• Bharani Star: ഭരണി നാളുകാർ ജീവിത ശൈലീ രോഗങ്ങളെ ശ്രദ്ധിക്കണം