/indian-express-malayalam/media/agency_attachments/RBr0iT1BHBDCMIEHAeA5.png)
Follow Us/indian-express-malayalam/media/media_files/2025/04/25/june-horoscope-2025-astrological-predictions-672675.jpg)
June Horoscope 2025: ജൂൺ മാസത്തെ നക്ഷത്രഫലം
ജൂൺ 14 വരെ മലയാളമാസമായ ഇടവവും 15 മുതൽ മലയാള മാസമായ മിഥുനവുമാണ്. ആദിത്യൻ ഇടവം, മിഥുനം രാശികളിലൂടെ സഞ്ചരിക്കുന്നു. രോഹിണി, മകയിരം, തിരുവാതിര എന്നീ മഴക്കാലത്തിൻ്റെ മാദകഭംഗികൾ നിറഞ്ഞതും, കർഷകകേരളത്തിന് അവിഭാജ്യവുമായ മൂന്നു ഞാറ്റുവേലകൾ ജൂൺമാസത്തിലുണ്ട്. ജൂൺ10-11 തീയതികളിലായി വെളുത്തവാവും ജൂൺ 25 ന് കറുത്തവാവും ഭവിക്കുന്നു. ഗ്രീഷ്മ ഋതുവിൻ്റെ കാലമാണിത്. ചാന്ദ്രമാസങ്ങളിൽ ജ്യേഷ്ഠവും ആഷാഢവും ഭാഗികമായി ജൂണിൽ വരുന്നുണ്ട്.
വ്യാഴം ഇപ്പോൾ മിഥുനരാശിയിൽ മകയിരം നക്ഷത്രത്തിലാണ്. ജൂൺ 14 മുതൽ തിരുവാതിരയിൽ സഞ്ചരിക്കും. പതിവിലും വേഗസഞ്ചാരത്തിലാണ്, വ്യാഴം. ശനി മീനം രാശിയിൽ ഉത്രട്ടാതി നക്ഷത്രത്തിലാണ്. രാഹു കുംഭം രാശിയിൽ പൂരൂരുട്ടാതി നക്ഷത്രത്തിലും കേതു ചിങ്ങം രാശിയിൽ ഉത്രം നക്ഷത്രത്തിലുമാണ്. രാഹുകേതുക്കൾ അപസവ്യഗതിയിൽ anti clock wise motion ൽ ആണെന്ന് ഓർമ്മിക്കാം.
ചൊവ്വ ജൂൺമാസം 7 ന് കർക്കടകം രാശിയിൽ നിന്നും ചിങ്ങം രാശിയിലേക്കാവും. ആയില്യത്തിൽ നിന്നും മകത്തിലേക്കും പകരുന്നതാണ്. ജൂൺ 6 ന് ബുധൻ സ്വക്ഷേത്രമായ മിഥുനം രാശിയിലേക്ക് പ്രവേശിക്കും. ജൂൺ 22 ന് കർക്കടകത്തിലേക്കും സംക്രമിക്കുന്നതാണ്. മകയിരം മുതൽ പൂയം വരെ നക്ഷത്രങ്ങളിൽ ഇക്കാലയളവിൽ ബുധൻ നീങ്ങും.
ജൂൺ 8 വരെ ബുധന് മൗഢ്യവുമുണ്ട്. മേയ് 31 മുതൽ ജൂൺ 29 വരെ ശുക്രൻ മേടം രാശിയിൽ, അശ്വതി, ഭരണി, കാർത്തിക എന്നീ നക്ഷത്രമണ്ഡലങ്ങളിലൂടെ സഞ്ചരിക്കുന്നതാണ്. ഈ ഗ്രഹനിലയെ അവലംബിച്ച് 2025 ജൂൺ മാസത്തിലെ അശ്വതി മുതൽ രേവതി വരെയുള്ള നാളുകാരുടെ നക്ഷത്രഫലം ഇവിടെ വിശദീകരിക്കുന്നു.
അശ്വതി
ശുക്രൻ ഏറെക്കുറെ മാസം മുഴുവൻ ജന്മരാശിയിൽ സഞ്ചരിക്കുന്നത് ജീവിതാസക്തിക്കും ഭൗതികമായ നേട്ടങ്ങൾക്കും കാരണമാകുന്നതാണ്. ശനിയും വ്യാഴവും അനിഷ്ടത്തിൽ തുടരുകയാൽ സാമ്പത്തിക കാര്യങ്ങളിൽ, പ്രത്യേകിച്ചും ചെലവിനങ്ങളിൽ ശ്രദ്ധയുണ്ടാവണം. കടബാധ്യത വരാം. അക്കാര്യത്തിലും കരുതൽ ആവശ്യം. കുടുംബത്തിലെ വൃദ്ധജനങ്ങളുടെ ആരോഗ്യ പരിരക്ഷ നിസ്സാരമാക്കരുത്. ശനി സൃഷ്ടിക്കുന്ന പ്രശ്നങ്ങളെ രാഹുവിൻ്റെ അനുകൂലതയാൽ ഒട്ടൊക്കെ പ്രതിരോധിക്കാൻ സാധിക്കുന്നതാണ്. യാത്രകൾ കുറയ്ക്കുക ഉത്തമം. ജൂൺ 14 ന് ശേഷം ജോലിയിൽ മെച്ചവും സ്വാസ്ഥ്യവും പ്രതീക്ഷിക്കാം. പഠനത്തിലും മുന്നേറാനാവും. ജൂൺ 7 ന് ശേഷം പഞ്ചമഭാവത്തിൽ കുജ - കേതു യോഗം വരുന്നതിനാൽ അനാവശ്യമായ ആലോചനകൾക്കും മക്കളുടെ കാര്യത്തിൽ മനക്ലേശത്തിനും ഇടയുണ്ട്.
ഭരണി
കുറച്ചധികം സമാശ്വാസങ്ങളും കുറച്ചു സമ്മർദ്ദങ്ങളും ഉണ്ടാവും. വ്യാഴം മൂന്നിലാകയാൽ തീരുമാനിച്ച കാര്യങ്ങൾ നന്നായി നിർവഹിക്കാൻ കഴിഞ്ഞേക്കില്ല. പന്ത്രണ്ടിലെ ശനി പലപ്പോഴും ആലസ്യത്തിനും കർമ്മഭംഗത്തിനും കാരണമാകുന്നതാണ്. ചെലവ് കൂടാനിടയുണ്ട്. അഞ്ചാം ഭാവത്തിലെ കുജ - കേതു യോഗം വേണ്ടാത്ത കാര്യങ്ങൾക്ക് പിടിവാശി കൂട്ടും. ഭാവന കാടുകയറാം. ദൈവികകാര്യങ്ങൾക്ക് തടസ്സം വരാനും സാധ്യതയുണ്ട്. മാസപ്പകുതിക്കുശേഷം ചെയ്യുന്ന തൊഴിലിൽ അഭിവ്യദ്ധി വരാം. തൊഴിലില്ലാത്തവർക്ക് പുതിയ അവസരങ്ങൾ ലഭിക്കാനുമിടയുണ്ട്. രാഹുവിൻ്റെ സ്ഥിതിയാൽ രഹസ്യ വരുമാനം വന്നെത്തും. ശുക്രൻ ജന്മരാശിയിൽ സഞ്ചരിക്കുന്നത് പ്രണയപുഷ്ടി, ദാമ്പത്യസൗഖ്യം, ഭോഗസിദ്ധി ഇവയ്ക്ക് കാരണമാകുന്നതാണ്. ജീവിതത്തോടു തോന്നിയ അനിഷ്ടം, ഇഷ്ടമായി മാറാം.
കാർത്തിക
പരിഭവങ്ങളും പരാതികളും ഉണ്ടാവും. വേണ്ടപ്പെട്ട ചിലരുടെ അവഗണന മനസ്സിനെ നീറ്റിക്കൊണ്ടിരിക്കും. എങ്കിലും ജീവിതത്തിൻ്റെ താളവും ഒഴുക്കും അഭംഗുരമായി തുടരുകതന്നെ ചെയ്യും. കൂടിയാലോചനകളിൽ വ്യത്യസ്തമായ നിലപാടുകൾ സ്വീകരിക്കേണ്ടി വരാം. വാക്കുകൾ പരുക്കനാവാതിരിക്കാൻ പരമാവധി ശ്രമിക്കുന്നതാണ്. മേടക്കൂറുകാർക്ക് രാഹുവും, ഇടവക്കൂറുകാർക്ക് ശനിയും ഹിതകാരികളാണ്. കീറാമുട്ടിയായിട്ടുള്ള പ്രശ്നങ്ങൾക്ക് സ്വയം പരിഹാരം തെളിഞ്ഞേക്കും. സ്വാശ്രയ വ്യാപാരത്തിൽ നിന്നും മോശമല്ലാത്ത വരുമാനം ഉണ്ടാവുന്നതാണ്. മേലധികാരികളുടെ അപ്രീതി ഉദ്യോഗസ്ഥരെ വിഷമിപ്പിക്കാം. വീട്ടമ്മമാർക്ക് നവീന ഗൃഹോപകരണങ്ങൾ ലഭിക്കാം. അതിഥികളുടെ പ്രശംസാവചനങ്ങൾ കേൾക്കുന്നതാണ്.
രോഹിണി
ജന്മത്തിലും രണ്ടാം ഭാവത്തിലുമായി ആദിത്യൻ സഞ്ചരിക്കുകയാൽ ദേഹക്ലേശവും അലച്ചിലുമുണ്ടാവും. ശുക്രൻ പന്ത്രണ്ടിലും വ്യാഴം രണ്ടിലും ബുധൻ രാശിയിലും സഞ്ചരിക്കുകയാൽ സാമ്പത്തികോന്നതി, സാമൂഹികാംഗീകാരം, തൊഴിൽ വളർച്ച എന്നിവ പ്രതീക്ഷിക്കാം. ഉള്ളിലെ വികാരവിചാരങ്ങൾ എന്തായാലും അവയെ തേച്ചുമിനുക്കി അവതരിപ്പിക്കുന്നതാണ്. സദസ്സുകളിൽ ബഹുമാനിക്കപ്പെടും. പതിനൊന്നിലെ ശനി പാരമ്പര്യമഹിമകളാൽ അംഗീകാരത്തിനും ധനോന്നതിക്കും കാരണമാകുന്നതാണ്. സ്വതസിദ്ധമായ കഴിവുകൾ പ്രകടിപ്പിക്കാൻ സാധിക്കും. തുടർ വിദ്യാഭ്യാസത്തിന് അവസരം ലഭിക്കുന്നതാണ്. ചൊവ്വയും കേതുവും രണ്ടാം ആഴ്ച മുതൽ നാലാമെടത്തിൽ ഒത്തുചേരുകയാൽ വാഹനം വാങ്ങുന്നതിലും ഉപയോഗിക്കുന്നതിലും ശ്രദ്ധിക്കണം. ഗൃഹസൗഖ്യം കുറയാം.
മകയിരം
മാസത്തിൻ്റെ പകുതി വരെ വ്യാഴം ജന്മനക്ഷത്രത്തിൽ സ്ഥിതി ചെയ്യുന്നു. ആകയാൽ പലതരം സമ്മർദ്ദങ്ങൾ വരാം. ജൂൺ എട്ടുമുതൽ മകയിരം ഞാറ്റുവേല തുടങ്ങുന്നതാണ്. ദേഹസ്വാസ്ഥ്യം കുറയുന്ന കാലമാവും. ജൂൺ 7നു ശേഷം ജന്മനക്ഷത്രാധിപനായ ചൊവ്വയുടെ നീചം തീരുന്നതിനാൽ ആത്മവിശ്വാസം ഉയരുന്നതാണ്. ന്യായമായ ആവശ്യങ്ങൾ ചോദിച്ചുവാങ്ങാൻ മടിയുണ്ടാവില്ല. മിഥുനക്കൂറുകാർക്ക് പ്രബലന്മാരുടെ പിന്തുണ കിട്ടുന്നതാണ്. ഭൂമിയിൽ നിന്നും ധനവരവ് പ്രതീക്ഷിക്കാം. പ്രവാസ ജീവിതം നയിക്കുന്നവർക്ക് മെച്ചപ്പെട്ട തൊഴിൽ ലഭിക്കുന്നതാണ്. ഇടവക്കൂറുകാർക്ക് ശനി കാര്യതടസ്സം ഒഴിവാക്കി ലക്ഷ്യം നേടിക്കൊടുക്കും.മിഥുനക്കൂറുകാർക്ക് ശനി-രാഹു യോഗം തൊഴിലിൽ ആലസ്യം സൃഷ്ടിച്ചേക്കും.
തിരുവാതിര
വ്യാഴം, ശനി, ആദിത്യൻ എന്നിവ അനുകൂലത്തിൽ അല്ലാത്തതിനാൽ വ്യക്തിപരമായും തൊഴിൽപരമായും പിരിമുറുക്കം ഉണ്ടാവും. ലഘു നേട്ടങ്ങൾക്ക് കൂടുതൽ പ്രയത്നം ആവശ്യമാവുന്നതാണ്. സംഘടനകളിൽ മുന്നേറ്റം ഉണ്ടാക്കാനാവില്ല. ഉദ്യോഗസ്ഥർക്ക് മേലധികാരികളുടെ വിരോധമുണ്ടാവും. ബിസിനസ്സിൽ നിലവിലെ സ്റ്റോക്കുകൾ വിറ്റഴിക്കാനാണ് ശ്രമിക്കേണ്ടത്. തത്കാലം കൂടുതൽ പണം മുടക്കരുത്. ശുക്രൻ, ബുധൻ, ചൊവ്വ, കേതു തുടങ്ങിയ ഗ്രഹങ്ങൾ ഇഷ്ടഭാവങ്ങളിൽ സഞ്ചരിക്കുന്നത് പിടിച്ചുനിൽക്കാൻ കരുത്തുപകരും. തുടർ വിദ്യാഭ്യാസത്തിൽ ആഗ്രഹം നേടാനാവും. ശത്രുക്കളുടെ പ്രവർത്തനത്തെ അതിജീവിക്കും.വ്യവഹാരത്തിൽ വിജയിക്കുവാനാവും. പ്രണയ ജീവിതത്തിൽ സ്വച്ഛന്ദത വരും. കുടുംബ സമാധാനം സാമാന്യമായിരിക്കും.
പുണർതം
തൊഴിൽ രംഗത്ത് പലതരം ആശങ്കകളുണ്ടാവും. പ്രായോഗികമായി ചില തടസ്സങ്ങൾ വരുന്നതാണ്. ലക്ഷ്യം നേടാനായി കൂടുതൽ അധ്വാനം ആവശ്യമായേക്കും. സഹപ്രവർത്തകരുടെ ഉപദേശം ഗുണം ചെയ്യാം. ഭൂമിയോ വീടോ വാങ്ങുക / വിൽക്കുക തുടങ്ങിയവയിൽ പുരോഗതി ദൃശ്യമാകും. കടം വാങ്ങി കച്ചവടത്തിൽ നിക്ഷേപിക്കുന്നത് വിപരീതഫലം സൃഷ്ടിക്കുന്നതാണ്. ചടുലമായ നീക്കങ്ങളെക്കാൾ ക്ഷമാപൂർവ്വമായ കാത്തിരിപ്പാവും ഗുണം ചെയ്യുന്നത്. രോഗങ്ങളാൽ വലയുന്നവർക്ക് തെല്ല് ആശ്വാസം ഉണ്ടാവും. സർക്കാരിൽ നിന്നുമുള്ള അനുമതി വൈകിയേക്കും. സഹോദരരെക്കൊണ്ട് ഗുണമുണ്ടാവും. വില കൂടിയ ആടയാഭരണങ്ങൾ, സുഗന്ധലേപനങ്ങൾ തുടങ്ങിയവ വാങ്ങാനിടയുണ്ട്.
പൂയം
പുതിയ കാര്യങ്ങൾ തുടങ്ങാൻ ഗ്രഹാനുകൂല്യം ഇല്ലാത്ത കാലമാണ്. മാസത്തിൻ്റെ ആദ്യപകുതിയിൽ തൊഴിൽ രംഗത്ത് വളർച്ച പ്രതീക്ഷിക്കാം.വിപുലീകരണത്തിന് മുതിരരുത്. നിലവിലെ സ്ഥിതി മുടക്കാതെ കൊണ്ടുപോയാൽ മതി. വാക്സ്ഥാനത്ത് ചൊവ്വ - ശിഖി യോഗം വരികയാൽ സംഭാഷണം ശത്രുക്കളെ സൃഷ്ടിക്കുന്നതാണ്. കുടുംബത്തിൽ സ്വൈരം കുറയും. ജീവിത പങ്കാളിക്ക് ആരോഗ്യപ്രശ്നങ്ങൾ വരാനിടയുണ്ട്. ജോലി ഉപേക്ഷിച്ചാൽ പുതിയ ജോലികിട്ടാൻ വിഷമിച്ചേക്കും. ചെലവ് ചെയ്യുന്നതിൽ മിതത്വം വേണ്ട സന്ദർഭമാണ്. വിദേശ യാത്രകൾക്ക് അവസരം ഉണ്ടാവും. പഠന താല്പര്യങ്ങൾ തടസ്സപ്പെടുകയില്ല. രാഹുവിൻ്റെ അഷ്ടമസ്ഥിതി വിഷാദചിന്തകൾ സൃഷ്ടിക്കുന്നതാണ്. സ്വന്തം കഴിവുകളിൽ വിശ്വാസം കുറയുകയും പരാജയഭീതി കൂടുകയും ചെയ്യും.
ആയില്യം
നക്ഷത്രനാഥനായ ബുധൻ്റെ അനുകൂല സഞ്ചാരം ഗുണഫലങ്ങൾ സൃഷ്ടിക്കാം. ജൂൺ പകുതിവരെ ആദിത്യൻ ലാഭഭാവത്തിൽ സഞ്ചരിക്കുന്നതു മൂലം വ്യാപാരത്തിൽ കരുനീക്കങ്ങൾ ഫലവത്താകും. ഔദ്യോഗികമായ ഗുണമുണ്ടാവുന്ന കാലവുമായിരിക്കും. എന്നാൽ രാഹുകേതുക്കളും ചൊവ്വയും പ്രതികൂലത്തിലാവുക കാരണം ആരോഗ്യത്തിൽ ശ്രദ്ധയുണ്ടാവണം. വാക്കും കർമ്മവും പൊരുത്തപ്പെടുത്താൻ വിഷമിക്കുന്നതാണ്. കുടുംബാംഗങ്ങളോടും സഹപ്രവർത്തകരോടും കയർക്കേണ്ട സന്ദർഭങ്ങൾ സംജാതമാകും. സിവിൽ വ്യവഹാരങ്ങൾ പിന്നെയും നീളുന്നതാണ്. പുതിയ ജോലിക്കായി കാത്തിരിപ്പ് അനിവാര്യമാകും. തീർത്ഥാടന യോഗമുണ്ട്. വയോജനങ്ങളുടെ കാര്യങ്ങളിൽ ശ്രദ്ധ പുലർത്തും.
മകം
ആദിത്യൻ 10, 11 ഭാവങ്ങളിലും വ്യാഴം 11 ലും സഞ്ചരിക്കുന്നത് തൊഴിൽപരമായി വളർച്ചയും നേട്ടങ്ങളും ഉണ്ടാവും എന്നതിൻ്റെ സൂചനയാണ്. ശുക്രനും ബുധനും കൂടി അനുകൂലത്തിലാണ്. അതിനാൽ സാമ്പത്തിക സ്ഥിതി മെച്ചപ്പെടും. ഭാവിയിൽ പ്രയോജനം ചെയ്യുന്ന നിക്ഷേപങ്ങൾ നടത്താനാവും. ബിസിനസ്സ് വിപുലീകരിക്കാൻ സാധിച്ചേക്കും. ഉദ്യോഗസ്ഥർക്ക് രമ്യമായ അന്തരീക്ഷത്തിൽ ജോലി ചെയ്യാനാവും. കരാർപണികൾ നീട്ടിക്കിട്ടുന്നതാണ്. പഠനകാര്യങ്ങളിൽ തുടർച്ച വന്നെത്തും. രാഹു, ശനി, എന്നീ ഗ്രഹങ്ങൾ ഏഴിൽ സഞ്ചരിക്കുന്നത് പ്രണയം, ദാമ്പത്യം എന്നിവയെ സാരമായി ബാധിക്കാം. നവദമ്പതികൾക്കിടയിൽ കലഹമുണ്ടാവാം. ചൊവ്വയും കേതുവും ജന്മരാശിയിൽ സഞ്ചരിക്കുന്നതിനാൽ ആരോഗ്യപ്രശ്നങ്ങൾ, വൈകാരിക പിരിമുറുക്കങ്ങൾ എന്നിവയും സാധ്യതകൾ.
പൂരം
ഗ്രഹങ്ങൾ രണ്ടുചേരികളായി തിരിഞ്ഞതുപോലെ തോന്നും. ആദിത്യൻ, ബുധൻ, ശുക്രൻ, വ്യാഴം എന്നിവ ഗുണഫലങ്ങൾ നൽകും. തൊഴിൽ, വരുമാനം മുതലായവ മെച്ചപ്പെടുന്നതാണ്. ജോലി തേടുന്നവർക്ക് വരുമാന മാർഗ്ഗം തരപ്പെടുന്നതാണ്. ഔദ്യോഗികമായി സ്വതന്ത്ര ചുമതല ലഭിച്ചേക്കും. സ്വകാര്യ സ്ഥാപനത്തിലെ ജീവനക്കാർക്ക് വേതനം ഉയരുന്നതാണ്. വിപണന തന്ത്രങ്ങൾ ആവിഷ്കരിച്ച് ഉപഭോക്താക്കളെ സ്വാധീനക്കാൻ വ്യാപാരികൾക്കാവും. വിദ്യാർത്ഥികളുടെ ഉപരിപഠന കാര്യങ്ങൾക്ക് മുടക്കം വരില്ല. വിദേശസ്വപ്നം സാക്ഷാൽക്കരിക്കാൻ കഴിഞ്ഞേക്കും. ചൊവ്വയും കേതുവും ജന്മരാശിയിൽ സഞ്ചരിക്കുന്നത് ആരോഗ്യപ്രശ്നങ്ങൾ ഉണ്ടാക്കുന്നതാണ്. വൈദ്യസഹായം വേണ്ടിവന്നേക്കും. എട്ടിലും ഏഴിലും സഞ്ചരിക്കുന്ന ശനിയും രാഹുവും പലതരം തടസ്സങ്ങൾ സൃഷ്ടിക്കുന്നതാണ്. പ്രണയഭംഗം, ദാമ്പത്യത്തിൽ സ്വൈരക്കേടുകൾ ഇവ സംഭവിക്കാം.
ഉത്രം
നക്ഷത്രനാഥനായ ആദിത്യന് ശുഭഗ്രഹങ്ങളായ ബുധൻ, വ്യാഴം എന്നിവയുടെ യോഗം വരുന്നത് ഗുണകരമാണ്. മനസ്സാക്ഷിയുള്ളവരുടെ സഹകരണം കൈവരുന്നതായിരിക്കും. തൊഴിലിടത്തിൽ ആശ്വാസം ഭവിക്കും. സഹപ്രവർത്തകരുടെ സഹകരണം പ്രതീക്ഷിക്കാം. ചെയ്യുന്ന തൊഴിലിൽ ചിങ്ങക്കൂറുകാർ നേട്ടങ്ങളുണ്ടാക്കും. പദവിയുയരാം. വ്യാപാരം പുഷ്ടിപ്പെടുന്നതാണ്. കന്നിക്കൂറുകാർ അക്കാര്യത്തിൽ പൂർണവിജയം നേടിയേക്കില്ല. ജന്മരാശിയിലെ കേതുവും ചൊവ്വയും ചിങ്ങക്കൂറുകാരെ അസ്വസ്ഥരാക്കും. രോഗങ്ങൾ വരാൻ / മൂർച്ഛിക്കാൻ ഇടയുണ്ട്. അക്കാര്യത്തിൽ നല്ല കരുതൽ വേണം. പ്രണയികൾ കലഹിക്കാനിടയുണ്ട്. കന്നിക്കൂറുകാരുടെ ദാമ്പത്യത്തിലും സ്വൈരമുണ്ടാവില്ല. രാഹു അനുകൂല ഭാവത്തിൽ സഞ്ചരിക്കുന്നതിനാൽ കന്നിക്കൂറുകാർക്ക് ശത്രുബാധ, കടക്കെണി എന്നിവയിൽ ആശ്വസിക്കാനാവും.
അത്തം
തൊഴിൽപരമായി മാസത്തിൻ്റെ ആദ്യപകുതിയിൽ സാധാരണ പോലെയാവും കാര്യങ്ങൾ. വ്യാപാരരംഗത്ത് വലിയ ഉന്മേഷം പ്രതീക്ഷിക്കേണ്ടതില്ല. സീസൺ ബിസിനസ്സുകാർക്ക് നേട്ടമുണ്ടായേക്കും. ശുക്രൻെറ അഷ്ടമ ഭാവത്തിലെ സഞ്ചാരം ഭൗതിക സുഖങ്ങൾക്ക് കാരണമാകാം. സുഹൃൽബന്ധം ദൃഢമാകുന്നതാണ്. പരീക്ഷാഫലം ഒട്ടൊക്കെ പ്രതീക്ഷിച്ചതുമാതിരി തന്നെയാവും. ആറാം ഭാവത്തിലെ രാഹു രോഗചികിത്സ ഫലപ്രദമാക്കും. കടബാധ്യത കുറയും. കേതുവും ചൊവ്വയും പന്ത്രണ്ടിൽ ഒരുമിക്കുന്നത് ചെലവുകൾ വർദ്ധിപ്പിക്കുന്നതാണ്. ഇഷ്ടത്തോടുകൂടിയല്ലാത്ത സഞ്ചാരം വേണ്ടിവരാം. മാസത്തിൻ്റെ രണ്ടാം പകുതിയിൽ തൊഴിലിടത്തിൽ സമാധാനമുണ്ടാവും. സാമാന്യമായ പുരോഗതി ദൃശ്യമാകും.
ചിത്തിര
തുലാക്കൂറുകാർക്ക് വ്യാഴത്തിൻ്റെ ഭാഗ്യസ്ഥിതിയാൽ കാര്യനിർവഹണം സുഗമമാവുന്നതാണ്. ആദിത്യന് അനുകൂലമല്ലാത്ത സ്ഥിതി വരുകയാൽ സർക്കാരിൽ നിന്നും പ്രതീക്ഷിക്കുന്ന ലൈസൻസ്, അനുമതി രേഖകൾ എന്നിവ വൈകാനിടയുണ്ട്. മേലുദ്യോഗസ്ഥരുടെ അനിഷ്ടം വരാം. ചൊവ്വയും കേതുവും പതിനൊന്നിൽ വരുന്നത് നിഗൂഢമായ ധനപ്രാപ്തി, ഭൂമിയിൽ നിന്നും ആദായം എന്നിവയ്ക്ക് കാരണമാകും. മാതാപിതാക്കളുടെ ആരോഗ്യത്തിൽ ശ്രദ്ധയുണ്ടാവണം. സഹോദരാനുകൂല്യം ഭവിക്കുന്നതാണ്. കന്നിക്കൂറുകാർക്ക് മാസത്തിൻ്റെ രണ്ടാം പകുതി ഒട്ടൊക്കെ ഗുണകരമായേക്കും. സഹപ്രവർത്തകരുടെ സഹകരണം പ്രതീക്ഷിക്കാം. ഭോഗാനുഭവങ്ങൾ, പാരിതോഷിക ലബ്ധി, നവസംരംഭങ്ങളിൽ വിജയം എന്നിവ ഭവിക്കുന്നതാണ്.
ചോതി
ആദിത്യൻ അനിഷ്ടസ്ഥാനത്ത് സഞ്ചരിക്കുകയാൽ തൊഴിലിടത്തിൽ അലോസരവും ഈർഷ്യയും ഉണ്ടാവാം. ഉദ്യോഗസ്ഥർക്ക് ഓഫീസിൽ തന്നെ വിരോധികൾ വരാനിടയുണ്ട്. പല കാര്യങ്ങളും സ്വന്തം അറിവു കൂടാതെയാവും ഒപ്പമുള്ളവർ ചെയ്യുക. ജൂൺ 14 നു ശേഷം തൽസ്ഥിതിയിൽ മാറ്റം വന്നേക്കും. കുടുംബകാര്യങ്ങൾക്ക് നേരം കണ്ടെത്തും. മക്കളുടെ/പേരക്കുട്ടികളുടെ സ്നേഹവാത്സല്യങ്ങൾ അനുഭവിക്കാനാവും. അഞ്ചിലെ രാഹു ചില കാര്യങ്ങളിൽ അവ്യക്തത വരുത്താം. സന്ദിഗ്ദ്ധതയും ഉണ്ടാവുന്നതാണ്. ശനിയുടെ സുസ്ഥിതിയാൽ നേട്ടങ്ങൾ അനുഭവിക്കാനാവും. കടബാധ്യത കുറക്കാനാവുന്നതാണ്. പതിനൊന്നാമെടത്തിലെ കേതു- ചൊവ്വ സംഗമം വളരെയധികം ഗുണം ചെയ്യും. തീവ്രമായി ആഗ്രഹിക്കാത്തവ പോലും സഫലമാവാനിടയുണ്ട്.
വിശാഖം
തുലാക്കൂറുകാർക്ക് പറഞ്ഞുവെച്ചിരുന്ന അവസരങ്ങൾ ലഭിക്കാം. ഉപരി വിദ്യാഭ്യാസത്തിന് അവസരങ്ങളുണ്ടാവും. ഉദ്യോഗസ്ഥർക്ക് സമ്മിശ്രമായ അനുഭവങ്ങൾ ഭവിക്കുന്നതാണ്. അഞ്ചാം ഭാവത്തിലെ രാഹു ആശയക്കുഴപ്പങ്ങൾ സൃഷ്ടിക്കും. ഭൂമി വ്യാപാരം ലാഭകരമാവുന്നതാണ്. വൃശ്ചികക്കൂറുകാർ കബളിപ്പിക്കലിന് വിധേയരായേക്കാം. വാഗ്ദാനങ്ങൾ ജലരേഖകളാവും. സുഹൃൽബന്ധങ്ങളെ പൂർണമായി വിശ്വസിക്കരുത്. തൊഴിൽ മാറാൻ ഇപ്പോൾ ഗ്രഹാനുകൂല്യം ഇല്ലെന്നതോർക്കണം. വിശാഖം നാളുകാർ നിലവിലെ തൊഴിലിൽ കഴിയുന്നേടത്തോളം തുടരാൻ ശ്രമിക്കണം. കുടുംബ ജീവിതത്തിൽ സാമാന്യമായ സംതൃപ്തി പ്രതീക്ഷിച്ചാൽ മതിയാകും. രോഗീപരിചരണം, ജീവകാരുണ്യം തുടങ്ങിയവയ്ക്ക് സമയം കണ്ടെത്തും.
അനിഴം
പ്രത്യക്ഷത്തിൽ ഗ്രഹങ്ങളൊന്നും അനുകൂലമല്ലാത്ത നിലയിലാണ്. അതിനാൽ വലിയ നേട്ടങ്ങൾ പ്രതീക്ഷിക്കേണ്ടാത്ത സ്ഥിതിയാണുണ്ടാവുക. അവരവരുടെ ജാതകം അനുസരിച്ചും ദശാപഹാരാദികൾ അനുസരിച്ചും ഉള്ള ഫലമാവും ഇപ്പോൾ ലഭിക്കുന്നത് എന്നും പറയാം. ഓഫീസിൽ അധ്വാനം കൂടുന്നതാണ്. പുതിയ ദൗത്യങ്ങൾ നിറവേറ്റുക ശ്രമകരമായേക്കും. ബിസിനസ്സു യാത്രകളാൽ ചെറിയ നേട്ടങ്ങൾ ഉണ്ടാവുന്നതാണ്. കമ്മീഷൻ വ്യാപാരത്തിൽ ആദായമുണ്ടാവും. പണയ വസ്തുക്കൾ മേൽപ്പണയം വെച്ച് ചില അത്യാവശ്യങ്ങൾ നടത്തിയെടുക്കുന്നതാണ്. വിദേശത്ത് പോകാനവസരം ഭവിക്കും. മകൻ്റെ പഠനാവശ്യങ്ങൾക്കുള്ള അപേക്ഷ ബാങ്കിൽ പരിഗണിക്കപ്പെടാം. വാഹനം ഉപയോഗിക്കുന്നതിൽ ശ്രദ്ധ വേണം.
തൃക്കേട്ട
സർക്കാർ സ്ഥാപനങ്ങളിൽ നിന്നും ലഭിക്കേണ്ട രേഖകൾ എളുപ്പം കിട്ടിയേക്കില്ല. ഉദ്യോഗസ്ഥർക്ക് പ്രതീക്ഷിച്ച സ്ഥലംമാറ്റം വൈകുന്നതാണ്. തന്മൂലം ഭാര്യയും ഭർത്താവും രണ്ടുദിക്കിൽ ജോലി ചെയ്യുന്ന സ്ഥിതി തുടർന്നേക്കും. കൂട്ടുകച്ചവടത്തിൽ ഏർപ്പെട്ടവർക്കിടയിൽ തർക്കങ്ങൾ വരാം. നാലും അഞ്ചും ഭാവങ്ങളിൽ രാഹുവും ശനിയും സഞ്ചരിക്കുകയാൽ മനസ്സ് ചഞ്ചമാവും. ആലോചനകൾ തീരുമാനമായി രൂപപ്പെടുകയില്ല. അപക്വമായ തീർപ്പുകൾ കൈക്കൊള്ളാം. അതും സാധ്യതയാണ്. സാമ്പത്തിക ബാധ്യതകൾ വരുത്താതിരിക്കാൻ ശ്രദ്ധിക്കണം. പഴയ കടങ്ങൾ സ്വൈരക്കേടുണ്ടാക്കാം. രാഷ്ട്രീയ പ്രവർത്തകർക്ക് ജനപിന്തുണ കുറയാം. നവസംരങ്ങളുടെ കാര്യത്തിൽ ക്ഷമ ആവശ്യമാണ്.
മൂലം
ജീവിതം സ്വസ്ഥതയിലേക്ക് നീങ്ങുന്ന കാലമാണ്. സാഹചര്യങ്ങൾ സാമാന്യം അനുകൂലതയിലെത്തും. ചെയ്തുപോരുന്ന തൊഴിൽ തുടരാൻ തീരുമാനിക്കും. ജോലിയില്ലാതെ വിഷമിച്ചവർക്ക് അർഹതക്കനുസരിച്ച് നിയമനം കിട്ടും. ദൂരദിക്കിലായിരുന്ന ഭാര്യാഭർത്താക്കന്മാർക്ക് ഒരിടത്തേക്ക് മാറ്റം ഉണ്ടായേക്കാം. സംരംഭങ്ങൾക്ക് ലൈസൻസ് ലഭിക്കുന്നതാണ്. മക്കളുടെ ഭാവി കാര്യം സംബന്ധിച്ച ഉൽക്കണ്ഠകൾക്ക് പരിഹാരം പ്രതീക്ഷിക്കാം. രാഹുവിൻ്റെ മൂന്നാം ഭാവത്തിലെ ഇഷ്ടസ്ഥിതി നാലാം ഭാവത്തിലെ കണ്ടകശനിദോഷത്തെ തടയാൻ പര്യാപ്തമാണ്. ഗൃഹനിർമ്മാണത്തിനാവശ്യമായ ധനം സ്വരൂപിക്കാൻ കഴിഞ്ഞേക്കും. ഒമ്പതിലെ കുജകേതുസംഗമം പിതാവിന് ക്ലേശങ്ങൾ സൃഷ്ടിക്കുന്നതാണ്.
പൂരാടം
ന്യായമായ ആഗ്രഹങ്ങൾ നിറവേറപ്പെടുന്നതാണ്. കർമ്മരംഗത്തെ ബാധിച്ചിരുന്ന ഉദാസീനത നീങ്ങും. അടഞ്ഞ വരുമാന മാർഗം തുറന്നു കിട്ടുന്നതാണ്. നവസംരംഭങ്ങളുടെ ആസൂത്രണം പുരോഗമിക്കും. പുതിയ സാങ്കേതിക മേഖലയിൽ വിദ്യാർത്ഥികൾക്ക് ഉപരിപഠനം സാധ്യമാകുന്നതാണ്. കുടുംബ പ്രശ്നങ്ങൾ എല്ലാവരുമായി കൂടിയാലോചന നടത്തി പരിഹരിക്കാൻ ശ്രമിക്കും. സാമ്പത്തിക പരാശ്രയത്വത്തിൽ നിന്നും ഭാഗികമായി മോചനം കിട്ടുന്നതാണ്. എന്നാൽ അധിക സാമ്പത്തിക ബാധ്യത വരുത്തിവെക്കാതിരിക്കാൻ ശ്രദ്ധ വേണം. പഴയ വീട് പുതുക്കാനുള്ള ശ്രമം ഉപേക്ഷിക്കുന്നതാണ്. സഹോദരർ, മാതാവ് എന്നിവർക്ക് സുഖം കുറഞ്ഞ കാലമായിരിക്കും. മക്കളുടെ ഭാവി സംബന്ധിച്ച കാര്യങ്ങളിൽ ശുഭഫലങ്ങൾ ഉണ്ടാവുന്നതാണ്.
ഉത്രാടം
നക്ഷത്രാധിപനായ ആദിത്യന് ബുധവ്യാഴയോഗം വരുന്നതിനാൽ മാനസിക നിലവാരം ഉയരാനും ജീവിതാവസ്ഥകൾ മെച്ചപ്പെടാനും സാധ്യതയുണ്ട്. തിബോധത്തോടെ കാര്യനിർവഹണത്തിൽ മുഴുകാനാവും. തൊഴിലിടത്തിൽ സമാധാനം പ്രതീക്ഷിക്കാം. ധനുക്കൂറുകാർക്ക് മാസാദ്യ പകുതിയും, മകരക്കൂറുകാർക്ക് രണ്ടാം പകുതിയും ഗുണകരമായിരിക്കും. ഊഹക്കച്ചവടത്തിൽ മെച്ചം ഭവിക്കുന്നതാണ്. വൃദ്ധജനങ്ങളുടെ പരിചരണത്തിന് സമയം കണ്ടെത്തും. ബന്ധുകലഹത്തിൽ ഇടപെടുന്നത് ചീത്തപ്പേരുണ്ടാക്കാം. പാപഗ്രഹങ്ങൾക്ക് സ്വാധീനം കൂടുന്ന കാലമാകയാൽ സർവ്വകാര്യങ്ങളിലും കരുതലുണ്ടാവണം. വിദേശത്തു കഴിയുന്നവർക്ക് നാട്ടിലെത്താൻ അല്പം കൂടി കാത്തിരിപ്പ് ആവശ്യമാണ്. കലാപ്രവർത്തനം അംഗീകരിക്കപ്പെടും.
തിരുവോണം
ഗ്രഹനിലയുടെ ദുർഘടത്വം സൂചിപ്പിക്കുന്നതിനെക്കാൾ നല്ലഫലം ജീവിതം കൊണ്ടുണ്ടായെന്നു വരാം. ശനിയുടെയും ശുക്രൻ്റെയും അനുകൂലത പല കാര്യങ്ങളും ഉള്ളംകൈയിലെത്തിക്കാൻ പര്യാപ്തമാണ്. തടസ്സങ്ങളകറ്റപ്പെടും. വാക്സ്ഥാനത്തെ രാഹു സ്ഥിതി മനപ്പൂർവ്വമല്ലെങ്കിൽ കൂടി കളവുപറയിപ്പിക്കും. മാസത്തിൻ്റെ രണ്ടാം പകുതിയിൽ ആദിത്യൻ കൂടുതൽ അനുകൂലനാണ്. വ്യാഴം ആറാം ഭാവത്തിലാവുകയാൽ സമൂഹം അംഗീകരിക്കുന്നവർ ശത്രുവാകാനിടയുണ്ട്. ബുധസഞ്ചാരം തെളിഞ്ഞും മറഞ്ഞുമാണ്. ഉപരിപഠനത്തിൽ വ്യക്തതയുണ്ടാവില്ല. മാസാദ്യം ഏഴിൽ സഞ്ചരിക്കുന്ന ചൊവ്വ എട്ടിലേക്ക് മാറി ശിഖിയുമായി ചേരുന്നത് ശുഭഫലങ്ങൾ സൃഷ്ടിക്കില്ല. ആരോഗ്യജാഗ്രത അനിവാര്യമാണ്.
അവിട്ടം
നക്ഷത്രാധിപൻ ചൊവ്വ ആദ്യ ആഴ്ച കഴിയുമ്പോൾ നീചക്ഷേത്രത്തിൽ നിന്നും മാറുന്നത് ആശ്വാസമാണ്. എന്നാൽ കേതുവുമായി യോഗം ചേരുകയാൽ ദുർജ്ജനങ്ങളുമായി കൂട്ടുണ്ടാവും. അക്കാര്യത്തിൽ ശ്രദ്ധയുണ്ടാവണം. വാഹനം കൈകാര്യം ചെയ്യുന്നതിലും ജാഗ്രത ആവശ്യമാണ്. വ്യാപരികൾ ഉപഭോക്താക്കളെ ആകർഷിക്കുന്ന തന്ത്രം ആവിഷ്കരിക്കും. അധികവായ്പ ബിസിനസ്സിൽ സ്വീകരിക്കുന്നത് ആസന്നഭാവിയിൽ ദോഷമുണ്ടാക്കാം. കുടുംബ ഭദ്രതക്കായി ചിലതൊക്കെ ചെയ്യുവാനാവും. മകന് പരീക്ഷാവിജയത്തിനായുള്ള ഉപഹാരം എന്ന നിലയിൽ വാഹനം വാങ്ങിനൽകും. കൂടുത്തരവാദിത്വത്തിൽ വീഴ്ച വരുത്തുന്ന സഹപ്രവർത്തകരോട് പിണങ്ങും. ആഢംബരച്ചെലവുകൾ നിയന്ത്രിക്കണം. പാരമ്പര്യ വസ്തുവിൽക്കാൻ ശ്രമം തുടരുന്നതാണ്.
ചതയം
ജന്മരാഹുവിൻ്റെ പ്രവർത്തനങ്ങൾ ചില പ്രശ്നങ്ങളെ സങ്കീർണ്ണമാക്കും. രണ്ടാമെടത്തിലെ ശനി മനപ്പൂർവ്വമായിട്ടോ അല്ലാതെയോ കള്ളം പറയിപ്പിക്കുന്നതാണ്. ധനപരമായി കൃത്യതയുണ്ടാവണം. ഏഴാം ഭാവത്തിലായി ജൂൺ രണ്ടാം ആഴ്ച മുതൽ ചൊവ്വയും കേതുവും ഇണങ്ങുന്നത് പ്രണയത്തിൽ ഭിന്നസ്വരങ്ങൾ ഉയർത്തും. ശാഠ്യവും പിടിവാശിയും കുടുംബ ജീവിതത്തിൽ സ്വൈരക്കേടുണ്ടാക്കും. പാർട്ണർഷിപ്പ് ബിസിനസ്സുകളിൽ നിന്നും പിൻവാങ്ങും. ശത്രുക്കളുടെ ഉപജാപങ്ങൾ ഫലിക്കുന്നതാണ്. അഞ്ചാം ഭാവത്തിലെ വ്യാഴ സഞ്ചാരം ദുരിതങ്ങളെ ഒരുപരിധിവരെ നിയന്ത്രിക്കുന്നതാണ്. ആഗ്രഹിച്ച വിഷയങ്ങൾ പഠിക്കാനവസരം കിട്ടാം. രോഗക്ലേശിതർ പാരമ്പര്യ ചികിൽസ പ്രയോജനപ്പെടുത്താൻ സന്നദ്ധരാവും. ധ്യാനം, യോഗ മുതലായവ ശീലിക്കണം.
പൂരൂരുട്ടാതി
രാഹു കുംഭരാശിയിൽ പൂരൂരുട്ടാതിയിൽ സഞ്ചരിക്കുന്നതിനാൽ ദേഹാലസ്യമുണ്ടാവും. സമയബന്ധിതമായി പ്രവൃത്തികൾ പൂർത്തിയാക്കില്ല. ഏകാഗ്രത ശിഥിലമാവാനിടയുണ്ട്. യാഥാർത്ഥ്യബോധം കുറയുന്നതാണ്. ചിലപ്പോൾ കഠിനമായ ചുമതലകൾ ഏറ്റെടുക്കും. പകുതിയിൽ ഉപേക്ഷിക്കാനും സാധ്യതയുണ്ട്. ജോലിയിൽ അസംതൃപ്തിയുണ്ടാവുന്ന കാലമാണ്. കഴിവതും ജോലി ഉപേക്ഷിക്കരുത്. വരുമാന മാർഗത്തിൽ കുറവ് വന്നേക്കും. ബന്ധങ്ങളുടെ ദാർഢ്യത്തിൽ അയവുണ്ടാകുന്നതാണ്. വ്യാഴൻ്റെ സൽഭാവസ്ഥിതി ജീവിതത്തെ സന്തുലിതമാക്കും. മക്കളുടെ ശ്രേയസ്സ് ആശ്വാസമേകുന്നതാണ്. ഉപാസനകൾ തടസ്സപ്പെട്ടേക്കില്ല. വിവാഹാലോചനകൾശുഭതീരുമാനത്തിലെത്താൻ അല്പം കൂടി കാത്തിരിപ്പ് ആവശ്യമാണ്.
ഉത്രട്ടാതി
ശനി ജന്മരാശിയിൽ, ജന്മനക്ഷത്രത്തിലാണ്. രാഹു പന്ത്രണ്ടിൽ സഞ്ചരിക്കുന്നു. ഈ ഗ്രഹസ്ഥിതി രണ്ടും അനുകൂലമല്ല. അനാവശ്യയാത്രകൾ, ദുർവ്യയം, പതനഭയം എന്നിവയ്ക്ക് രാഹു കാരണമാകും. ദേഹ- മനക്ലേശങ്ങൾ, ആലസ്യം, നേട്ടങ്ങൾ ഇല്ലാതാവുക തുടങ്ങിയവ ശനി മൂലം ഭവിക്കാം. മൂന്നിലെ ആദിത്യസഞ്ചാരം മാസാദ്യം ഉദ്യോഗസ്ഥർക്ക് ഗുണകരമാവും. മേലധികാരികൾ നിലപാടുകളെ അംഗീകരിക്കും. ആറാംഭാവത്തിലെ കേതുവും ചൊവ്വയും പല തടസ്സങ്ങളെ മറികടക്കുന്നതിന് കരുത്താകും. സംഘടനകളിൽ സ്വാധീനമുറപ്പിക്കാൻ കഴിയുന്നതാണ്.. നല്ലരീതിയിൽ നടക്കുന്ന സ്ഥാപനങ്ങൾ ഏറ്റെടുക്കുവാനാവും. വിൽക്കാതെ കിടക്കുന്ന ഭൂമിവിൽക്കാനാവും. വ്യവഹാരത്തിൽ വിജയം വരുന്നതാണ്.
രേവതി
കുടുംബ പ്രശ്നങ്ങൾ പരിഹരിക്കാനുള്ള ശ്രമങ്ങൾ ഭാഗികമായി വിജയിക്കും. കർമ്മരംഗത്ത് സമാധാനം പ്രതീക്ഷിക്കാം. പ്രോജക്ടുകളുടെ നടത്തിപ്പിൽ വിജയമുണ്ടാവുന്നതാണ്. പൊതുപ്രവർത്തകർ ആരോപണങ്ങൾക്ക് ശക്തമായ മറുപടി നൽകും. കൂടുതൽ ആദായം ലഭിക്കുന്ന നിക്ഷേപങ്ങൾക്ക് മുതിരുന്നതിന് മുന്നേ അവയുടെ വിശ്വാസ്യത ഉറപ്പുവരുത്തണം. ജന്മത്തിലെ ശനിയും പന്ത്രണ്ടിലെ രാഹുവും പ്രവർത്തനങ്ങളിൽ ഇടക്കിടെ തടസ്സങ്ങളുണ്ടാക്കാൻ പര്യാപ്തമാണ്. ആരോഗ്യപരമായി ശ്രദ്ധ പുലർത്തണം. ദുശ്ശീലങ്ങൾ ഉണ്ടെങ്കിൽ അധികരിക്കാൻ സാധ്യതയുള്ളതിനാൽ നിയന്ത്രണം വേണ്ടതുണ്ട്. ചെറുപ്പക്കാരുടെ വിവാഹ കാര്യത്തിൽ തടസ്സങ്ങൾ വരാം. ചൊവ്വയും കേതുവും ആറാമെടത്തിൽ യോഗം ചെയ്യുന്നത് പലനിലയ്ക്കും ഗുണകരമാണ്. വ്യവഹാര വിജയവും ഭൂമിലാഭവും ഫലങ്ങളിൽ ഉൾപ്പെടും.
Read More
Stay updated with the latest news headlines and all the latest Lifestyle news. Download Indian Express Malayalam App - Android or iOS.