രാഹു കേതു രാശി മാറുന്നു, അശ്വതി മുതൽ രേവതിവരെ

2025 മേയ് മാസം 18 ന്, 1200 ഇടവം 4 ന് ഞായറാഴ്ച രാത്രി 9:30 ന്  രാഹുവും കേതുവും രാശിമാറുന്നു. രാഹു മീനത്തിൽ നിന്നും കുംഭം രാശിയിലേക്കും കേതു കന്നിയിൽ നിന്നും ചിങ്ങത്തിലേക്കുമാണ് മാറുന്നത്. രാഹു പൂരൂരുട്ടാതി നക്ഷത്രത്തിലും കേതു ഉത്രം നക്ഷത്രത്തിലുമാണ് തുടരുന്നത്. രാഹുകേതുക്കൾ എപ്പോഴും പിൻഗതിയായാണ് (Anti Clock wise) സഞ്ചരിക്കുക എന്നതും ഓർക്കേണ്ട വസ്തുതയാണ്.

രാഹുവും കേതുവും തമ്മിൽ 180 ഡിഗ്രി അകലത്തിലാവും രാശിചക്രത്തിൽ  നിലയുറപ്പിക്കുന്നത്. ഇരുവരും പരസ്പരം ഏഴാം രാശികളിലാവും. സൈഹിംകേയൻ എന്ന അസുരൻ്റെ ശിരസ്സാണ് രാഹുവെന്നും ഉടലാണ് കേതുവെന്നും പുരാണകഥകളിൽ നിന്നറിയാം. 'ശനിയെപ്പോലെ രാഹു' എന്നും 'ചൊവ്വയെപ്പോലെ കേതു' എന്നും പറയാറുണ്ട്. രാഹുകേതുക്കളെ യഥാക്രമം Dragon's Head എന്നും Dragon's Tail എന്നും വിശേഷിപ്പിക്കുന്നു. Northern Node, Southern Node എന്നിങ്ങനെയും വിളിക്കപ്പെടുന്നുണ്ട്.

ഒരുരാശിയിൽ ശരാശരി 18 മാസം അഥവാ ഒന്നരവർഷം വീതമാണ് രാഹുവും കേതുവും സഞ്ചരിക്കുന്നത്. ഗോചരാൽ അവരവരുടെ ജനിച്ച കൂറിൻ്റെ 3,6,11 എന്നീ രാശികളിൽ സഞ്ചരിക്കുമ്പോൾ മാത്രമാണ് രാഹുവും കേതുവും ഗുണം നൽകുക. മറ്റുഭാവങ്ങളിൽ പ്രായേണ ദുഃഖപ്രദന്മാരായിരിക്കും. രാഹു-കേതു എന്നിവയെ സംബന്ധിച്ച ഈ അടിസ്ഥാന വസ്തുതകളെ അവലംബിച്ചുകൊണ്ട് രാഹുകേതുമാറ്റം ഓരോ കൂറിലും ജനിച്ചവർക്ക് എന്തെന്ത് ഫലങ്ങൾ നൽകുന്നുവെന്ന്  ഇവിടെ വിശദമാക്കുന്നു.

മേടക്കൂറിന് (അശ്വതി, ഭരണി, കാർത്തിക ഒന്നാം പാദം)

രാഹുവിൻ്റെ രാശിമാറ്റം കൊണ്ട് ഏറ്റവും ഗുണഫലം അനുഭവിക്കുന്നവർ മേടക്കൂറിലെ നക്ഷത്രക്കാരാണ്. വ്യയവും വേദനയും ച്യുതിയും നിറഞ്ഞ പന്ത്രണ്ടിൽ നിന്നും സൗഭാഗ്യങ്ങളെ സമ്മാനിക്കുന്ന പതിനൊന്നാമെട ത്തിലേക്ക് രാഹു സഞ്ചരിക്കുന്നു. മുഖ്യമായും അനാവശ്യമായിട്ടുള്ള ചെലവുകൾ നിയന്ത്രിക്കാനാവും. വ്യാഴം, ശനി എന്നീ ഗ്രഹങ്ങളുടെ പ്രതികൂലസ്ഥാനങ്ങളിലെ സഞ്ചാരത്തെ രാഹുവിൻ്റെ അനുകൂല ഭാവ സഞ്ചാരം ഒരുപരിധിവരെ സന്തുലിതമാക്കും. വിദേശത്ത് പഠിപ്പിന് / തൊഴിലിന് ആയി പോകാൻ കഴിയും. മുഖ്യതൊഴിലിനൊപ്പം ഉപതൊഴിലും തുടങ്ങാനായേക്കും. ധനാഗമത്തിലെ തടസ്സങ്ങൾ നീങ്ങുന്നതാണ്. പ്രണയ സാഫല്യം, വിവാഹസിദ്ധി, തൊഴിൽ മുന്നേറ്റം ഇവ ഫലവത്താകും. കേതു ആറിൽ നിന്നും അഞ്ചാമെടത്തിലേക്ക് മാറുന്നതിനാൽ ഉപാസനാദികൾക്ക് തടസ്സം വരാം. മക്കളുടെ കാര്യത്തിൽ ചില ഉൽക്കണ്ഠകൾ ഉണ്ടാവുന്നതാണ്. ഉദരരോഗത്തിന് ചികിൽസ വേണ്ടിവന്നേക്കും. കാര്യാലോചനകളിൽ വിമർശനം ഉയരുന്നതാണ്.

ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ)

രാഹു-കേതു മാറ്റം ഇടവക്കൂറുകാർക്ക് അത്ര അനുകൂലമല്ല. ശനി, വ്യാഴം എന്നീ ഗ്രഹങ്ങൾ നൽകുന്ന നേട്ടങ്ങളുടെയും പുരോഗതിയുടെയും മേൽ രാഹുവും കേതുവും നിഴൽവീഴ്ത്തും. രാഹു കർമ്മഭാവത്തിൽ മാറിയതിനാൽ തൊഴിലിൽ എന്നും ഓരോ തലവേദനകൾ വന്നെത്താം. പ്രശ്നങ്ങൾ പരിഹരിക്കാൻ സമയവും ഊർജ്ജവും കൂടുതലായി ചെലവാകുന്നതാണ്. നവസംരംഭങ്ങൾ വിജയിക്കാൻ ഇരട്ടി അധ്വാനം വേണ്ടിവന്നേക്കും.  പ്രതീക്ഷിച്ച നിയമനം വൈകുന്നതാണ്. കേതു സുഖസ്ഥാനത്തിൽ വരികയാൽ ദേഹാരോഗ്യം ബാധിക്കപ്പെടാം. മാനസിക നിലയും പരീക്ഷിതമാവും. വീട്ടിൽ സ്വൈരം കുറയുന്നതാണ്. സുഹൃത്തുക്കളും ബന്ധുക്കളും മറുചേരിയിലായാൽ അത്ഭുതപ്പെടാനില്ല. വാഹനം കൈകാര്യം ചെയ്യുന്നതിൽ ജാഗ്രത കുറയരുത്.

മിഥുനക്കൂറിന് (മകയിരം 3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ)

രാഹു പത്തിൽ നിന്നും ഒമ്പതിലേക്കും കേതു നാലിൽ നിന്നും മൂന്നിലേക്കും സഞ്ചരിക്കുന്നു. തൊഴിലിനെ സൂചിപ്പിക്കുന്ന പത്താം ഭാവത്തിൽ നിന്നും രാഹു മാറിയത് കർമ്മരംഗത്ത് തെല്ല് ആശ്വാസമുണ്ടാക്കും. എന്നാൽ ഭാഗ്യസ്ഥാനത്തേക്ക് ആണ് മാറ്റം എന്നതിനാൽ  ഭാഗ്യഭ്രംശത്തിന് രാഹുമാറ്റം കാരണമായേക്കാം. പിതാവിൻ്റെയും ഗുരുജനങ്ങളുടെയും വിരോധം നേടാൻ ഇടയുള്ളതിനാൽ കരുതൽ വേണം. ചിലപ്പോൾ 'മനസ്സാക്ഷിയില്ലാതെ പെരുമാറി' എന്ന ദുഷ്പ്പേരുണ്ടാവും.കേതുവിൻ്റെ മാറ്റം വളരെ അനുകൂലമാണ്. ഗാർഹികമായ അലട്ടലുകൾ ഇല്ലാതാവും. മനസ്സുഖം പ്രതീക്ഷിക്കാം.രോഗഗ്രസ്തർക്ക് ആശ്വാസം വരുന്നതാണ്. കരാറുകൾ, ഏജൻസി പ്രവർത്തനങ്ങൾ എന്നിവയിൽ വിജയിക്കും. പരാശ്രയം അവസാനിക്കുന്നതാണ്.

കർക്കടകക്കൂറിന് (പുണർതം 4, പൂയം, ആയില്യം)

രാഹു ഒമ്പതിൽ നിന്നും എട്ടിലേക്കും, കേതു മൂന്നിൽ നിന്നും രണ്ടിലേക്കും മാറുകയാണ്. ഒട്ടും സുഖകരമായ ഗ്രഹാവസ്ഥയല്ലിത്. പാപഗ്രഹം അഷ്ടമത്തിൽ ഉണ്ടാവുന്നത് കാര്യതടസ്സം, രോഗാദികൾ, ധനക്ളേശം, ഭാഗ്യഭ്രംശം എന്നിവയ്ക്ക് കാരണമാകും. മൃത്യുഭയം, വിഷാദചിന്ത, ഉറ്റവരുടേയും ഉടയവരുടേയും വേർപാടുകൾ മുതലായവയ്ക്കും രാഹുവിൻ്റെ അഷ്ടമസ്ഥിതി വഴിയൊരുക്കാനിടയുണ്ട്. എന്നാൽ മിഥുനവ്യാഴം രാഹുവിനെ നോക്കുന്നത് ദോഷശക്തിയെ കുറയ്ക്കുന്നതാണ്. രണ്ടാമെടമെന്നത് മുഖ്യമായും വാക്സ്ഥാനമാണ്. കൂടാതെ കുടുംബം, ധനം, വിദ്യാഭ്യാസം ഇവയും രണ്ടാമെടം കൊണ്ട് ചിന്തിക്കും. ഇപ്പറഞ്ഞവക്കെല്ലാം ഏതെങ്കിലും തരത്തിൽ ദോഷമോ, അപചയമോ കേതുസ്ഥിതിയാൽ സംഭവിക്കാം. അതിനാൽ കരുതൽ പുലർത്തണം.

ചിങ്ങക്കൂറിന് (മകം, പൂരം, ഉത്രം ഒന്നാം പാദം)

രാഹു എട്ടിൽ നിന്നും മാറി ഏഴിലാവുന്നു. അതു കുറച്ചൊക്കെ ആശ്വാസമാണ്. നിർഭാഗ്യങ്ങൾ കുറയും. പ്രയത്നത്തിന് പ്രതിഫലവും അംഗീകാരവും ഭവിക്കും. 
ഏഴാമെടം പ്രണയം, വിവാഹം, ദാമ്പത്യം മുതലായ കാര്യങ്ങളെ സംബന്ധിക്കുന്ന  ഭാവമാണ്. ആകയാൽ അത്തരം കാര്യങ്ങളിൽ കരുതൽ വേണം. അനുരഞ്ജനം ഗൃഹൈക്യത്തിന് അനിവാര്യമാണ്. പ്രണയത്തിൽ വിശ്വാസവഞ്ചന സാധ്യതയായതിനാൽ കരുതൽ വേണം. കൂട്ടുകച്ചവടം, കൊടുക്കൽ വാങ്ങൽ ഇവയും ബാധിക്കപ്പെടാം. ജന്മരാശിയിൽ കേതു സഞ്ചരിക്കുന്നതിനാൽ ആരോഗ്യപ്രശ്നങ്ങൾ ഉണ്ടാവുന്നതാണ്. വ്രണമോ ചൊറിചിരങ്ങുകൾ ഇവയുണ്ടാവാം. ആരോഗ്യ പരിശോധനയിൽ അനാസ്ഥയരുത്. കീർത്തിക്ക് ഏതെങ്കിലും തരത്തിൽ മങ്ങലേൽക്കാം. അമിതമായ ആത്മവിശ്വാസം ഗുണം ചെയ്യില്ല.

കന്നിക്കൂറിന് (ഉത്രം 2, 3, 4 പാദങ്ങൾ, അത്തം, ചിത്തിര 1, 2 പാദങ്ങൾ)

ഏഴാം ഭാവത്തിൽ നിന്നും രാഹു ആറാം ഭാവത്തിലേക്ക് മാറുന്നത് വളരെ അനുകൂലമാണ്. 3, 6, 11 തുടങ്ങിയ ഭാവങ്ങളിൽ സഞ്ചരിക്കുമ്പോഴാണ് പാപഗ്രഹങ്ങൾ ഗുണഫലദാതാക്കൾ ആവുക. പല നേട്ടങ്ങൾ കരഗതമാവും. ഉദ്യോഗത്തിൽ ഉയർച്ച വരുന്നതാണ്. തൊഴിലില്ലാത്തവർക്ക് തൊഴിൽ ലഭിക്കാം. ബിസിനസ്സിൽ വളർച്ച വന്നെത്തും. കടക്കെണിയിൽ നിന്നും രക്ഷകിട്ടുന്നതാണ്. എതിർപ്പുകളെ മറികടക്കുകയാൽ ആത്മവിശ്വാസം പ്രകടമാവും. നവസംരംഭങ്ങളിൽ നിന്നും ആദായം കിട്ടിത്തുടങ്ങും. കേതു കന്നിരാശിയിൽ നിന്നും മാറുന്നത് ജീവിതപുരോഗതിക്ക് കാരണമാവും. തടസ്സങ്ങളെ മറികടക്കും. പുതുവിഷയങ്ങൾ പഠിച്ചറിയാനവസരം സംജാതമാവുന്നതാണ്. പന്ത്രണ്ടിലേക്ക്  കേതു മാറിയതിനാൽ ചെലവിൽ ശ്രദ്ധയുണ്ടാവണം. അനാവശ്യ യാത്രകൾ ഒഴിവാക്കപ്പെടണം.

തുലാക്കൂറിന് (ചിത്തിര 3, 4 പാദങ്ങൾ, ചോതി, വിശാഖം 1,2,3)

രാഹു ആറിൽ നിന്നും അഞ്ചിലേക്കും കേതു പന്ത്രണ്ടിൽ നിന്നും പതിനൊന്നിലേക്കും മാറുകയാണ്. രാഹുമാറ്റത്താൽ വലിയ ഗുണം പ്രതീക്ഷിക്കേണ്ടതില്ല. ആശയക്കുഴപ്പങ്ങൾ ഉണ്ടാവും. ചിന്താപരത കൂടുന്നതാണ്. ക്രിയാപരത കുറയുകയും ചെയ്യും. മക്കളെ സംബന്ധിക്കുന്ന ഭാവമാകയാൽ കുട്ടികളോടുള്ള പെരുമാറ്റത്തിൽ സ്നേഹം കുറയും. ചിലപ്പോൾ നിർബന്ധ ബുദ്ധി വർദ്ധിക്കുന്നതാണ്. കാര്യാലോചനകളിൽ തെറ്റായ നിലപാടുകൾ കൈക്കൊള്ളും. സമയനിഷ്ഠ പാലിക്കാൻ കഴിയാതെ വരുന്നതാണ്. കേതുവിൻ്റെ മാറ്റം ഏറ്റവും ഗുണപ്രദമായിരിക്കും. രഹസ്യമായ വരുമാനം ഉയരും. ഭൗതികസുഖങ്ങൾ അനുഭവിക്കുമാറാകും. ശത്രുക്കളുടെ പ്രവർത്തനങ്ങളെ പ്രതിരോധിക്കാനാവും. കഠിന മത്സരങ്ങളിൽ നേട്ടമുണ്ടാക്കുന്നതാണ്.

വൃശ്ചികക്കൂറിന് (വിശാഖം നാലാം പാദം, അനിഴം, തൃക്കേട്ട)

രാഹു അഞ്ചാം ഭാവത്തിൽ നിന്നും നാലിലേക്കും കേതു പതിനൊന്നിൽ നിന്നും പത്തിലേക്കും സംക്രമിക്കുകയാണ്. ഗൃഹത്തിൽ നിന്നും വിട്ടുനിൽക്കാനിടയുണ്ട്. പഠിക്കാനായോ ജോലിമൂലമോ അന്യയിടത്തേക്ക് പോകുന്നതുകൊണ്ടാണെന്നും വരാം. മനസ്സിന് ഇടക്കിടെ ചാഞ്ചല്യം ഉണ്ടാവും. തീരുമാനങ്ങളിൽ ഉറച്ചുനിൽക്കാൻ ക്ലേശിക്കുന്നതാണ്. ബന്ധുക്കളുമായി രമ്യബന്ധം പുലർത്താൻ കഴിഞ്ഞേക്കില്ല. സുഹൃത്തുക്കളുടെ എല്ലാ വാക്കുകളും മുഖവിലക്കെടുക്കരുത്. ഗൃഹനിർമ്മാണം അല്പം പതുക്കെയാവും. മാതാവിൻ്റെ ആരോഗ്യത്തിൽ ശ്രദ്ധയുണ്ടാവണം. കേതു പത്താമെടത്തിൽ വരുകയാൽ ജോലിമാറ്റത്തിന് ഉചിതസമയമല്ല. ജോലിയുടെ സമയം അസൗകര്യപ്രദമായ ഷിഫ്റ്റുകളിലേക്ക് മാറാനിടയുണ്ട്. സ്വാശ്രയ സംരംഭങ്ങളിൽ നല്ല കരുതൽ വേണം. തീർത്ഥാടനം സാധ്യമായേക്കും.

ധനുക്കൂറിന് (മൂലം, പൂരാടം ഉത്രാടം, ഒന്നാം പാദം)

രാഹു നാലിൽ നിന്നും മൂന്നിലേക്കും കേതു പത്തിൽ നിന്നും ഒമ്പതിലേക്കും മാറുന്നു.  രാഹുവിൻ്റെ മാറ്റം ധനുക്കൂറുകാർക്ക് ഏറ്റവും ഗുണദായകമാണ്. 
 ഗൃഹത്തിൽ അനുഭവപ്പെട്ടിരുന്ന ക്ലേശങ്ങൾക്ക് അവസാനമാകും. മനസ്സിൻ്റെ ഗ്ളാനിയും വിഷാദവും നീങ്ങുന്നതാണ്. ഉന്നമനേച്ഛ വന്നുചേരും. തൊഴിലിൽ ശ്രദ്ധ ചെലുത്താൻ കഴിയുന്നതാണ്. സംഘടനകളുടെ നേതൃത്വത്തിലേക്ക് ഉയർത്തപ്പെടാം. രോഗഗ്രസ്തർക്ക് ആശ്വാസമുണ്ടാവുന്ന കാലമായിരിക്കും. വിൽക്കാത്ത ഭൂമി വിൽക്കാനാവും. വിദ്യാഭ്യാസത്തിൽ പുരോഗതി പ്രതീക്ഷിക്കാം. കേതു പത്തിൽ നിന്നും മാറുകയാൽ തൊഴിലിടത്തിലെ പ്രശ്നങ്ങൾക്ക് പരിഹാരം സിദ്ധിക്കുന്നതാണ്. നവസംരംഭങ്ങളുമായി മുന്നോട്ടു പോകാനാവും. എന്നാൽ ഒമ്പതിലെ കേതു ഉപാസനകൾക്ക് ഭംഗം വരുത്താം. പിതാവിൻ്റെ / ഗുരുജനങ്ങളുടെ ആരോഗ്യത്തിൽ ശ്രദ്ധയുണ്ടാവണം. ചില ഭാഗ്യഭ്രംശങ്ങൾക്കും സാധ്യതയുണ്ട്.

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

മൂന്നാം ഭാവത്തിൽ അനുകൂല ഭാവത്തിലായിരുന്നു, രാഹു. ഇപ്പോൾ പ്രതികൂലമായ രണ്ടാം ഭാവത്തിലേക്ക് മാറുകയാണ്. കേതു ഒമ്പതിലായിരുന്നു, ഇനി അനിഷ്ടസ്ഥാനമായ അഷ്ടമത്തിലും. രാഹു രണ്ടിലാവുക മൂലം വാക്കുകൾ പരുഷമാവും. മനപ്പൂർവ്വമല്ലാതെ തന്നെ നുണ പറയേണ്ടി വന്നേക്കും. സംഭാഷണം ശത്രുക്കളെ സൃഷ്ടിക്കാനിടയുണ്ട്. വിദ്യാഭ്യാസത്തിൽ തടസ്സങ്ങൾക്ക് സാധ്യത കാണുന്നു. കുടുംബ ജീവിതത്തിൽ ഇടയ്ക്കിടയ്ക്ക് അപശ്രുതികൾ ഉയരാം.  ധനപരമായി ഏറ്റവും ശ്രദ്ധയുണ്ടാവണം. മുഖരോഗങ്ങൾ - ഇ.എൻ.ടി - വിഭാഗത്തിലുള്ളവ ഉപദ്രവിക്കാം. കേതുവിൻ്റെ അഷ്ടമസ്ഥിതി ബിസിനസ്സുകാർക്ക് നഷ്ടങ്ങൾ വരുത്തുന്നതാണ്. മുൻകൂട്ടി നിശ്ചയിച്ച കാര്യങ്ങൾ മാറ്റിവെക്കേണ്ടി വരാം. ഗാർഹികോപകരണങ്ങൾ കേടാകാനിടയുണ്ട്. വാഹനം ഉപയോഗിക്കുന്നതിൽ ജാഗ്രത അനിവാര്യം. ചെറുരോഗങ്ങൾക്കും വൈദ്യസഹായം തേടാം.

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1, 2, 3 പാദങ്ങൾ) 

രാഹു രണ്ടാം ഭാവത്തിൽ നിന്നും ജന്മരാശിയിലേക്കും, കേതു അഷ്ടമത്തിൽ നിന്നും ഏഴാം ഭാവത്തിലേക്കും മാറുന്നു. ജന്മം, 8, 12 എന്നീ ഭാവങ്ങളിൽ സഞ്ചരിക്കുന്ന പാപഗ്രഹങ്ങൾ വളരെയധികം ദോഷപ്രദന്മാരാണ്. രാഹു ജന്മരാശിയിലൂടെ ഒന്നരവർഷക്കാലം പിൻഗതിയായി സഞ്ചരിക്കുകയാൽ കുംഭക്കൂറുകാർ വളരെയധികം കരുതൽ കൈക്കൊള്ളണം. ആത്മവിശ്വാസം കുറയുന്നതാണ്. ചിലപ്പോൾ നിസ്സാര ദൗത്യങ്ങളിൽ പരാജയപ്പെടാം. അപവാദങ്ങൾക്ക് എളുപ്പം ശരവ്യരാവും. ആരോഗ്യപ്രശ്നങ്ങൾ വേഗം ബാധിക്കും. തൊഴിലിടത്തിൽ സമാധാനമുണ്ടാവില്ല. മത്സരങ്ങളിൽ തോൽവി പിണയാം. ദുസ്സാഹസങ്ങൾക്ക് മുതിരും. ഏഴാം ഭാവത്തിൽ സഞ്ചരിക്കുന്ന കേതു പ്രണയശൈഥില്യം വരുത്താം. ദാമ്പത്യത്തിലും സ്വൈരം കുറയുന്നതാണ്. കൂട്ടുകച്ചവടത്തിൽ സുഗമതയുണ്ടാവില്ല. വിദേശപഠനം,തൊഴിൽഇവയ്ക്ക് തടസ്സം ഏർപ്പെടാം.

മീനക്കൂറിന് (പൂരുരുട്ടാതി 4-ാം പാദം, ഉത്രട്ടാതി, രേവതി)

ജന്മരാശിയിൽ നിന്നും മാറി രാഹു പന്ത്രണ്ടിൽ സഞ്ചരിക്കുന്നത് തെല്ല് ആശ്വാസമാണെന്ന് പറയാം. എന്നാലും ക്ലേശാനുഭവങ്ങൾ ഉണ്ടാവുന്നതാണ്. താമസിക്കുന്ന നാട്ടിൽ നിന്നും ദൂരദിക്കിലേക്ക് മാറാനിടയുണ്ട്. പഠനം, തൊഴിൽ എന്നിവ കാരണമാകാം. വരവും ചെലവും തമ്മിൽ പൊരുത്തപ്പെടുകയില്ല. ആഢംബരച്ചെലവുകളും ദുർവ്യയവും ഉണ്ടാവുന്നതാണ്. പദരോഗം, മുറിവ്, വ്രണം ഇവ വരാനിടയുണ്ട്. പദവികളിൽ നിന്നും മാറാനോ മാറ്റപ്പെടാനോ സാധ്യത കാണുന്നു. മനസ്സ് ചഞ്ചലമാവും. എന്നാൽ കേതു ഏഴിൽ നിന്നും ആറാംഭാവത്തിൽ മാറുന്നത് ആശ്വാസമേകും. പലതരം നേട്ടങ്ങൾ വരാനിടയുണ്ട്. ശത്രൂപദ്രവത്തെ ഫലപ്രദമായി നേരിടുന്നതാണ്. തൊഴിൽ രംഗത്ത് വിജയിക്കാൻ കഴിയും. ചുമതലകൾ സ്തുത്യർഹമാം വിധം നിർവഹിക്കുന്നതാണ്. പൊതുരംഗത്ത് വിജയിക്കാൻ പറ്റും. ദാമ്പത്യത്തിലെ അസ്വാരസ്യങ്ങൾ അവസാനിക്കുന്നതാണ്.

Read More

• Daily Horoscope May 08, 2025: നിങ്ങളുടെ ഇന്നത്തെ ദിവസം, രാശി ഫലം
• Jupiter Transit 2025: വ്യാഴം രാശിമാറുന്നു, ഗുണം ഏതൊക്കെ കൂറുകൾക്ക്? അശ്വതി മുതൽ രേവതിവരെ
• Medam Month Horoscope: മേട മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ
• Vishu Phalam 2025: സമ്പൂർണ വിഷു ഫലം; അശ്വതി മുതൽ രേവതി വരെ, എസ് ശ്രീനിവാസ അയ്യർ എഴുതുന്നുVishu Phalam 2025: വിഷു ഫലം; അശ്വതി മുതൽ രേവതി വരെ, സി വി ഗോവിന്ദൻ എടപ്പാൾ എഴുതുന്നു