മോഹൻലാൽ ചിത്രത്തിന്റെ നിർണായക രംഗങ്ങളടങ്ങിയ ഹാർഡ് ഡിസ്ക് മോഷ്ടിക്കപ്പെട്ടതായി പരാതി

വിഷ്ണു മഞ്ചു, മോഹൻലാൽ, പ്രഭാസ്, അക്ഷയ് കുമാർ, ശരത് കുമാർ തുടങ്ങിയ വമ്പൻ താരനിര ഒന്നിക്കുന്ന ബ്രഹ്മാണ്ഡ ചിത്രമായ 'കണ്ണപ്പ'യുടെ നിർണായക രംഗങ്ങൾ അടങ്ങിയ ഹാർഡ് ഡിസ്ക് മോഷ്ടിക്കപ്പെട്ടതായി പരാതി. ചിത്രത്തിന്റെ റിലീസിന് ഒരു മാസം മുൻപാണ് ഹാർഡ് ഡിസ്ക് നഷ്ടപ്പെട്ടിരിക്കുന്നത്.

ഹൈദരാബാദ് ഫിലിം നഗറിലെ നിർമ്മാണ കമ്പനിയായ ട്വന്റി ഫോർ ഫ്രെയിംസ് ഫാക്ടറി പ്രൈവറ്റ് ലിമിറ്റഡിന്റെ ഓഫീസിൽ നിന്ന് ഹാർഡ് ഡിസ്ക് മോഷ്ടിക്കപ്പെട്ടതായാണ് ആരോപണം. ട്വന്റി-ഫോർ ഫ്രെയിംസ് ഫാക്ടറി പ്രൈവറ്റ് ലിമിറ്റഡിന്റെ എക്സിക്യൂട്ടീവ് പ്രൊഡ്യൂസർ റെഡ്ഡി വിജയ് കുമാർ ആണ് ഫിലിം നഗർ പൊലീസ് സ്റ്റേഷനിൽ പരാതി നൽകിയത്.

സിനിമയുടെ നിർണായക രംഗങ്ങളാണ് ഹാർഡ് ഡിസ്കിലുള്ളതെന്നും ഉള്ളടക്കം ചോർത്തുകയോ നശിപ്പിക്കുകയോ ചെയ്താൽ വലിയ സാമ്പത്തിക നഷ്ടമായിരിക്കും കമ്പനിക്ക് സംഭവിക്കുകയെന്നും പരാതിയിൽ പറയുന്നു. മാർച്ച് 23 ന് മുംബൈയിൽ നിന്നുള്ള വിഎഫ്എക്സ് വെണ്ടറായ ഹൈവ് സ്റ്റുഡിയോസ്, ഹാർഡ് ഡിസ്ക് പ്രൊഡക്ഷൻ ഹൗസിന്റെ ഓഫീസിലേക്ക് കൊറിയറിലൂടെ അയച്ചവെന്നും, പ്രൊഡക്ഷൻ ഹൗസിലെ ഒരു ജീവനക്കാരൻ കൊറിയർ സ്വീകരിച്ച് മറ്റൊരു ജീവനക്കാരന് കൈമാറിയെന്നും പരാതിയിൽ വിജയ് കുമാർ ആരോപിച്ചു.

Also Read:'ഫഹദ് മികച്ച നടൻ, ഒരുമിച്ച് അഭിനയിക്കാൻ ആഗ്രഹം, ആവേശം പ്രിയപ്പെട്ട സിനിമകളിലൊന്ന്': ആലിയ ഭട്ട്

ഹാർഡ് ഡിസ്ക് എത്രയും വേഗം കണ്ടെത്തി തിരികെ കൈമാറണമെന്നും അദ്ദേഹം പരാതിയിൽ ആവശ്യപ്പെട്ടു. മുകേഷ് കുമാർ സിംഗ് സംവിധാനം ചെയ്യുന്ന ചിത്രം, 24 ഫ്രെയിംസ് ഫാക്ടറി ബാനറിൽ വിഷ്ണു മഞ്ചുവിന്റെ പിതാവും നടനുമായ മോഹൻ ബാബുവാണ് നിർമ്മിക്കുന്നത്.

വിഷ്ണു മഞ്ചു പ്രധാന കഥാപാത്രമാകുന്ന ചിത്രത്തിൽ അതിഥി വേഷത്തിലാണ് മോഹൻലാലും പ്രഭാസും അക്ഷയ് കുമാറും എത്തുന്നത്. യഥാർത്ഥ സംഭവത്തെ ആസ്പദമാക്കി നിർമ്മിക്കുന്ന ചിത്രം, കണ്ണപ്പ എന്ന ശിവ ഭക്തൻറെ കഥയാണ് പറയുന്നത്.

Read More

• രജനീകാന്തിന് 150 കോടി, 'കൂലി'യിൽ ലോകേഷിന് റെക്കോർഡ് പ്രതിഫലം; ബജറ്റ് പുറത്ത്
• ഇവിടെ നരിവേട്ട നടക്കുമ്പോൾ അവിടെ തത്തയുമായി കളിച്ചിരിക്കുന്നോ?; ശ്രദ്ധേയമായി ടൊവിനോയുടെ വീഡിയോ
• "നമ്മളില്ലേ..." എന്ന് മനോജ് കെ. ജയൻ; ചത്തൊടുങ്ങേണ്ടി വന്നാലും തിരിഞ്ഞുനോക്കില്ലെന്ന് ആരാധകർ
• ആനയെക്കാൾ വലിയ ഉറുമ്പ്, ഭീമൻ ഒച്ച്; ഭീതിനിറച്ച് അത്ഭുതദ്വീപ് രണ്ടാം ഭാഗം; വീഡിയോ