Amaran OTT: വിജയകുതിപ്പ് തുടർന്ന് അമരൻ, ഒടിടി റിലീസ് തീയതി നീട്ടി

Amaran OTT: ശിവകാർത്തികേയനും സായ് പല്ലവിയും അഭിനയിച്ച അമരൻ ബോക്‌സ് ഓഫീസിൽ മികച്ച പ്രകടനം തുടരുകയാണ്. തീയേറ്ററിൽ അരങ്ങേറ്റം കുറിച്ചതിന് പിന്നാലെ, 28 ദിവസങ്ങൾക്ക് ശേഷം ചിത്രം ഒടിടിയിൽ എത്തുമെന്ന രീതിയിലായിരുന്നു ആദ്യം ഒടിടി റിലീസ്  ഷെഡ്യൂൾ ചെയ്തത്. എന്നാൽ, തിയേറ്ററുകളിൽ ചിത്രത്തിനു ലഭിക്കുന്ന വമ്പൻ വരവേൽപ്പ് കാരണം ഒടിടി സ്ട്രീമിംഗ് ഒരാഴ്ച കൂടി വൈകിപ്പിച്ചിരിക്കുകയാണ് നെറ്റ്ഫ്ളിക്സ്. 

ഇതിനകം, ആഗോളതലത്തിൽ ചിത്രം 203.57 കോടിയോളം കളക്ഷൻ നേടി കഴിഞ്ഞു. 
നിലവിലെ ട്രെൻഡ് തുടരുകയാണെങ്കിൽ ചിത്രം മിനിമം 275 കോടിയെങ്കിലും ബോക്സ് ഓഫീസിൽ നിന്നും കളക്റ്റ് ചെയ്യുമെന്നാണ് ട്രേഡ് അനലിസ്റ്റുകൾ പറയുന്നത്. 

ചിത്രത്തിന്റെ തിയേറ്റർ കുതിപ്പിനു മുന്നിലെ ഏക ആശങ്ക, നവംബർ 14ന് കങ്കുവ തിയേറ്ററിൽ എത്തുന്നതോടെ അമരൻ കാണാൻ എത്തുന്ന പ്രേക്ഷകരുടെ എണ്ണത്തിൽ കുറവു വരുമോ എന്നതാണ്. പ്രേക്ഷകർ ഏറെ നാളായി ആകാംക്ഷയോടെ കാത്തിരിക്കുന്ന ചിത്രമാണ് സൂര്യയുടെ കങ്കുവ.  കങ്കുവയെ പ്രേക്ഷകർ എങ്ങനെ സ്വീകരിക്കുന്നു എന്നതിനെ ആശ്രയിച്ചിരിക്കും അമരന്റെ മുന്നോട്ടുള്ള ബോക്സ് ഓഫീസ് റൺ.

യഥാർത്ഥ സംഭവകഥയെ ആസ്പദമാക്കി ഒരുക്കിയ അമരൻ ദീപാവലി റിലീസായാണ് തിയേറ്ററുകളിൽ എത്തിയത്. കമൽഹാസൻ്റെ രാജ് കമൽ ഫിലിംസ് ഇൻ്റർനാഷണലിൻ്റെ പിന്തുണയോടെ എത്തിയ  ചിത്രം പറയുന്നത്, അന്തരിച്ച മേജർ മുകുന്ദ് വരദരാജൻ്റെ ജീവചരിത്രമാണ്. ശിവകാർത്തികേയനും സായ് പല്ലവിയുമാണ് ചിത്രത്തിൽ കേന്ദ്രകഥാപാത്രങ്ങളായി എത്തുന്നത്. 

മേജർ മുകുന്ദ് വരദരാജന്റെ ജീവിതകഥ പറയുന്ന ചിത്രത്തിൽ മുകുന്ദായി ശിവകാർത്തികേയൻ എത്തുമ്പോൾ മുകുന്ദിന്റെ ഭാര്യ ഇന്ദു റെബേക്ക വർഗീസിന്റെ വേഷമാണ് സായ് പല്ലവിയ്ക്ക്. ജി.വി. പ്രകാശ് കുമാർ ആണ് ചിത്രത്തിന്റെ സംഗീത സംവിധാനം.

നവംബർ 28ന് ചിത്രം നെറ്റ്ഫ്ളിക്സിൽ എത്തുമെന്നായിരുന്നു ആദ്യം പ്ലാൻ ചെയ്തത്. എന്നാൽ, ഏറ്റവും പുതിയ റിപ്പോർട്ടുകൾ പ്രകാരം  ഡിസംബർ 11നാവും ചിത്രം റിലീസിനെത്തുക.

Read More

• ബജറ്റ് 35 കോടി, ആകെ നേടിയത് 2 കോടി മാത്രം; ഒരു വർഷത്തിനിപ്പുറം ആ ദിലീപ് ചിത്രം ഒടിടിയിലേക്ക്
• നയൻതാര വിഘ്നേശ് വിവാഹം; ശ്രദ്ധേയമായി ഡോക്യുമെൻ്ററിയുടെ ട്രെയിലർ പോസ്റ്റർ
• ഫ്രഷ് കഥയുണ്ടോ, ഞാൻ കഥ കേൾക്കാം; എഴുത്തുകാരെ ക്ഷണിച്ച് പ്രഭാസ്
• I Am Kathalan Movie Review: പ്രണയമല്ല, ഈ കാതലൻ 'വിഷയമാണ്'; റിവ്യൂ
• അമ്മയുടെ കാർബൺ കോപ്പി തന്നെ; വൈറലായി റാഹയുടെ ചിത്രങ്ങൾ