Sanju Samson: സഞ്ജു സാംസൺ മധ്യനിരയിലേക്ക്? യുവ താരത്തെ ഓപ്പണറാക്കാൻ സാധ്യത

ഇംഗ്ലണ്ടിനെതിരായ പരമ്പരയിലെ ആദ്യ മൂന്ന് ട്വന്റി20യിലും സഞ്ജു സാംസൺ നിരാശപ്പെടുത്തിയതോടെ ഓപ്പണിങ് സഖ്യത്തെ ഇന്ത്യ മാറ്റി പരീക്ഷിക്കുമോ എന്ന ചോദ്യമാണ് ഉയരുന്നത്. അഭിഷേക് ശർമ പരമ്പരയിലെ ഒരു ട്വന്റി20യിൽ അർധ ശതകം കണ്ടെത്തിയതിനാൽ ഓപ്പണിങ്ങിലെ സ്ഥാനത്ത് തുടരും. എന്നാൽ ഫാസ്റ്റ് ബോളർമാരെ നേരിടുന്നതിൽ സഞ്ജുവിന് പിഴയ്ക്കുന്നതിനാൽ താരത്തെ ഇന്ത്യ മധ്യനിരയിലേക്ക് ഇറക്കി കളിപ്പിക്കുമോ എന്നാണ് ഇനി അറിയേണ്ടത്. 

കൊൽക്കത്തയിൽ 20 പന്തിൽ നിന്ന് 26 റൺസ്. ചെപ്പോക്കിലേക്ക് വന്നപ്പോൾ ഏഴ് പന്തിൽ നിന്ന് അഞ്ച് റൺസ്. രാജ്കോട്ടിൽ ആറ് പന്തിൽ നിന്ന് മൂന്ന് റൺസ്. മൂന്ന് ഇന്നിങ്സിലും സഞ്ജുവിനെ പുറത്താക്കിയത് ഇംഗ്ലീഷ് പേസർ ജോഫ്ര ആർച്ചറാണ്. അതും ഷോർട്ട് പിച്ച് പന്തുകളിലൂടെ. ഇംഗ്ലണ്ട് ബോളറുടെ ഷോർട്ട് പിച്ച് ബോൾ തന്ത്രം മറികടക്കാൻ പ്ലാസ്റ്റിക് ബോളിൽ ഉൾപ്പെടെ സഞ്ജു പ്രത്യേക പരിശീലനം നടത്തി. എന്നാൽ രാജ്കോട്ടിൽ അതും ഗുണം ചെയ്തില്ല. 

ഇതോടെ പുനെയിലെ നാലാം ട്വന്റി20യിലേക്ക് എത്തുമ്പോൾ സഞ്ജുവിനെ മധ്യനിരയിലേക്ക് ഇറക്കി പകരം ഓപ്പണിങ്ങിൽ അഭിഷേകിന് ടീം മാനേജ്മെന്റ് പുതിയ കൂട്ട് നൽകുമോ എന്നറിയണം. അതോ സഞ്ജുവിലുള്ള വിശ്വാസം കൈവിടാതെ താരത്തിന് വീണ്ടും അവസരം നൽകുമോ എന്നും ജനുവരി 31ന് അറിയാം. 

ജുറൽ ഓപ്പണർ

സഞ്ജുവിനെ മധ്യനിരയിലേക്ക് മാറ്റിയാൽ പകരം ആര് ഓപ്പണിങ്ങിലേക്ക് വരും എന്ന ചോദ്യമുണ്ട്. ധ്രുവ് ജുറെലിന്റെ പേരാണ് ഈ സ്ഥാനത്ത് ഉയർന്ന് കേൾക്കുന്നത്. രാജ്കോട്ടിൽ എട്ടാമതായാണ് ജുറെലിനെ ഇന്ത്യ ഇറക്കിയത്. ഇത് വലിയ വിമർശനത്തിനാണ് ഇടയാക്കിയത്. ജുറലിനെ ഗംഭീർ നശിപ്പിക്കുകയാണ് എന്നുൾപ്പെടെയുള്ള പ്രതികരണങ്ങൾ വന്ന് കഴിഞ്ഞു. 

ഇടംകൈ വലംകൈ കോംപിനേഷൻ കൊണ്ടുവരാനാണ് ജുറെലിനെ മൂന്നാം ട്വന്റി20യിൽ ഇന്ത്യ എട്ടാമതായി ഇറക്കിയത്. എന്നാൽ ഇത് ചെയ്സിങ്ങിൽ ഇന്ത്യക്ക് ഒട്ടും ഗുണം ചെയ്തില്ല. തിലക് വർമയെ ഓപ്പണിങ്ങിലേക്ക് കൊണ്ടുവരാൻ ടീം മാനേജ്മെന്റ് തയ്യാറാകുമോ എന്നും അറിയണം. സഞ്ജുവിനെ നാലാം ട്വന്റി20യിൽ പ്ലേയിങ് ഇലവനിൽ നിന്ന് തന്നെ ഒഴിവാക്കുന്ന കടുത്ത നടപടികളിലേക്ക് ടീം മാനേജ്മെന്റ് പോയേക്കില്ല എന്നാണ് വിലയിരുത്തപ്പെടുന്നത്. എന്നാൽ സഞ്ജു പേസ് ബോളിങ്ങിനെ നേരിടുന്നതിൽ പ്രയാസപ്പെടുന്നത് ടീം മാനേജ്മെന്റിന് മേലുള്ള സമ്മർദം കൂട്ടുന്നുണ്ട്. 

Read More

• ഏഴ് മത്സരം 800 കോടി രൂപ; ചെന്നൈയുടെ ബ്രാൻഡ് മൂല്യത്തേക്കാൾ വലുത്; ഒടുവിൽ സ്വന്തം മണ്ണിലേക്ക് മടക്കം
• Virat Kohli: ഇതിനൊരു അവസാനമില്ലേ? ഡൽഹി പേസർമാർക്ക് മുൻപിലും വിയർത്ത് കോഹ്ലി
• india Vs England Live Score: ജീവൻ നിലനിർത്തി ഇംഗ്ലണ്ട്; രാജ്കോട്ടിൽ 26 റൺസ് ജയം
• India vs England Live Score: വീണ്ടും വിക്കറ്റ് വലിച്ചെറിഞ്ഞ് സഞ്ജു; തുടരെ മൂന്നാം വട്ടവും ആർച്ചർ വീഴ്ത്തി