പിതാവ് മരിച്ചത് അറിയാതെ പന്തെറിഞ്ഞ് ലങ്കൻ താരം; തുടരെ 5 സിക്സ് വഴങ്ങിയതിന് പിന്നാലെ ദുഃഖ വാർത്ത

ശ്രീലങ്കക്കെതിരെ മുഹമ്മദ് നബി അവസാന ഓവറിൽ അഞ്ച് സിക്സ് പറത്തി സ്കോർ ഉയർത്തിയെങ്കിലും അഫ്ഗാനിസ്ഥാന് ജയം തൊടാനായില്ല. എന്നാൽ അഫ്ഗാന്റെ അവസാന ഓവറിൽ മുഹമ്മദ് നബിയുടെ ബാറ്റിങ് പ്രഹരമേറ്റത് ശ്രീലങ്കൻ ബോളർ ദുനിത് വെല്ലാലെഗെയ്ക്കായിരുന്നു. പക്ഷേ അതിലും വലിയ നെഞ്ചുലയ്ക്കുന്ന വാർത്തയാണ് ദുലിത് വെല്ലാലെഗെയെ കാത്ത് മത്സരത്തിന്റെ അവസാനമിരുന്നത്. പിതാവ് മരിച്ചത് അറിയാതെയാണ് അഫ്ഗാനിസ്ഥാനെതിരെ ദുലിത് കളിച്ചത്. 

അഫ്ഗാനിസ്ഥാനെതിരെ തന്‍റെ ആദ്യ മൂന്ന് ഓവറിൽ 17 റണ്‍സ് മാത്രമാണ് ദുലിത് വഴങ്ങിയത്. എന്നാൽ അഫ്ഗാനിസ്ഥാൻ ഇന്നിങ്സിന്റെ അവസാന ഓവറിൽ ദുലിതിനെതിരെ നബി തുടരെ അഞ്ച് വട്ടം സിക്സ് പറത്തി. 32 റൺസ് ആണ് ഈ അവസാന ഓവറിൽ ദുലിതിന് എതിരെ അഫ്ഗാനിസ്ഥാൻ നേടിയത്. 

Also Read: ഡഗൗട്ടിൽ നോക്കുകുത്തിയായി ഇരുത്താനാണോ പ്ലേയിങ് 11ൽ ഇടം? സഞ്ജുവിനായി മുറവിളി

മത്സരം അവസാനിച്ചതിന് ശേഷം ശ്രീലങ്കന്‍ ടീം പരിശീലകനായ സനത് ജയസൂര്യയും ടീം മാനേജരും ചേർന്നാണ് വെല്ലാലെഗയോട് പിതാവ് മരിച്ച വിവരം അറിയിച്ചത്. ഹൃദയാഘാതം മൂലമാണ് ദുലിതിന്റെ പിതാവ് സുരംഗ വെല്ലാലെഗെ മരിച്ചതെന്നാണ് റിപ്പോർട്ട്. 

Also Read: ബുമ്രക്കെതിരെ ഒരു സിക്സ്; പാക്കിസ്ഥാന് വേണ്ടിവന്നത് 400 ബോളുകൾ

പിതാവിന്റെ വിയോഗ വാർത്ത അറിഞ്ഞതിന് പിന്നാലെ ദുലിത് കുടുംബത്തോടൊപ്പം ചേരാനായി കൊളംബോയിലേക്ക് തിരിച്ചു. ദുലിത് ശ്രീലങ്കയ്ക്കായി സൂപ്പർ ഫോർ മത്സരങ്ങൾ കളിക്കാൻ എത്തുമോ എന്നത് വ്യക്തമായിട്ടില്ല. ഏഷ്യാ കപ്പിൽ ശനിയാഴ്ച ബംഗ്ലാദേശിന് എതിരേയും സെപ്തംബർ 23ന് പാക്കിസ്ഥാന് എതിരേയും സെപ്തംബർ 26ന് ഇന്ത്യക്ക് എതിരേയുമാണ് ശ്രീലങ്കയുടെ സൂപ്പർ ഫോർ മത്സരങ്ങൾ. 

Also Read: ഒരു മത്സരത്തിന് 4.5 കോടി രൂപ; ഇന്ത്യൻ ജഴ്സിയിൽ ഇനി അപ്പോളോ ടയേഴ്സിന്റെ ലോഗോ

ശ്രീലങ്ക ഏറെ പ്രതീക്ഷയോടെ നോക്കുന്ന സ്പിന്നറാണ് 22കാരനായ ദുലിത്. ശ്രീലങ്കയ്ക്കായി ദുലിതിന്റെ അഞ്ചാമത്തെ മാത്രം മത്സരമായിരുന്നു വ്യാഴാഴ്ച നടന്ന അഫ്ഗാനിസ്ഥാനെതിരായ പോരാട്ടം. അത് ഏഷ്യാ കപ്പിലെ ദുലിതിന്റെ ആദ്യ മത്സരവും ആയിരുന്നു. 

Read More: ഐപിഎൽ ടീമുകൾക്ക് മുൻപിൽ പോലും പാക്കിസ്ഥാൻ വിറയ്ക്കും; പരിഹാസവുമായി ഇർഫാൻ പഠാൻ