77 പന്തിൽ സെഞ്ചുറി; അതും സിക്സടിച്ച്; മന്ഥാന, യു ബ്യൂട്ടി! IND W Vs AUS W 2nd ODI

india Women's Vs Australia Women's 2nd ODI:77 പന്തിൽ സെഞ്ചുറിയടിച്ച് ഇന്ത്യയുടെ സ്റ്റാർ ഓപ്പണർ സ്മൃതി മന്ഥാന. ഏകദിനത്തിലെ ഒരു ഇന്ത്യൻ താരത്തിന്റെ ഏറ്റവും വേഗതയേറിയ സെഞ്ചുറിയാണ് ടീം വൈസ് ക്യാപ്റ്റനായ സ്മൃതി മന്ഥാന തകർത്തടിച്ചെടുത്തിരിക്കുന്നത്. ഓസ്ട്രേലിയയുടെ തഹ്ലിയ മഗ്രാത്തിനെ മിഡ് ഓഫിലേക്ക് സിക്സ് പറത്തിയാണ് ഏകദിനത്തിലെ 12ാം സെഞ്ചുറിയിലേക്ക് മന്ഥാന സ്റ്റൈലായി എത്തിയത്. 

നേരത്തെ അയർലൻഡിന് എതിരെ 70 പന്തിൽ സ്മൃതി മന്ഥാന സെഞ്ചുറി നേടിയിരുന്നു. ഈ വർഷം രാജ്കോട്ടിൽ വെച്ചായിരുന്നു ഇത്. ഇപ്പോൾ തന്റെ തന്നെ റെക്കോർഡ് മന്ഥാന തിരുത്തി. ഒടുവിൽ 91 പന്തിൽ നിന്ന് 117 റൺസ് നേടിയാണ് മന്ഥാന ക്രീസ് വിട്ടത്.

14 ഫോറും നാല് സിക്സും മന്ഥാനയുടെ ബാറ്റിൽ നിന്ന് വന്നു. 2025ലെ മന്ഥാനയുടെ മൂന്നാമത്തെ ഏകദിന സെഞ്ചുറിയാണ് ഇത്. രണ്ട് വ്യത്യസ്ത കലണ്ടർ വർഷം മൂന്നോ അതിൽ അധികമോ സെഞ്ചുറി നേടുന്ന ആദ്യ വനിതാ ക്രിക്കറ്റ് താരമായി മന്ഥാന മാറി. 2024ലും മന്ഥാന ഏകദിനത്തിൽ മൂന്ന് സെഞ്ചുറി കണ്ടെത്തിയിരുന്നു. 

Also Read: ഒരു മത്സരത്തിന് 4.5 കോടി രൂപ; ഇന്ത്യൻ ജഴ്സിയിൽ ഇനി അപ്പോളോ ടയേഴ്സിന്റെ ലോഗോ

2013ൽ ആണ് മന്ഥാന ഇന്ത്യക്കായി അരങ്ങേറ്റം കുറിച്ചത്. ഏകദിനത്തിലെ 106ാമത്തെ ഇന്നിങ്സിലാണ് മറ്റൊരു സെഞ്ചുറിയിലേക്ക് കൂടി ഇന്ത്യൻ ആരാധകരുടെ പ്രിയപ്പെട്ട താരം ആക്രമണ ബാറ്റിങ്ങുമായി നിറഞ്ഞ് എത്തിയിരിക്കുന്നത്. ഓസ്ട്രേലിയക്കെതിരെ ഏകദിനത്തിൽ ഏറ്റവും വേഗത്തിൽ സെഞ്ചുറി നേടുന്ന താരവുമായി മന്ഥാന മാറി.

Also Read: ഡഗൗട്ടിൽ നോക്കുകുത്തിയായി ഇരുത്താനാണോ പ്ലേയിങ് 11ൽ ഇടം? സഞ്ജുവിനായി മുറവിളി

ഓഫ് സൈഡിൽ നിന്ന് കൂടുതൽ റൺസ് കണ്ടെത്തുന്നതാണ് മന്ഥാനയുടെ പതിവ് എങ്കിലും ഇത്തവണ ഓസ്ട്രേലിയക്കെതിരെ ലെഗ് സൈഡിൽ നിന്ന് റൺസ് വാരിയാണ് മന്ഥാന സെഞ്ചുറി തൊട്ടത്. മന്ഥാനയുടെ ബാറ്റിങ് മികവിൽ ഇന്ത്യ ഓസ്ട്രേലിയക്ക് മുൻപിൽ വെച്ചത് 292 റൺസ്.

Also Read: ബുമ്രക്കെതിരെ ഒരു സിക്സ്; പാക്കിസ്ഥാന് വേണ്ടിവന്നത് 400 ബോളുകൾ

സ്മൃതി മന്ഥാനയ്ക്ക് പുറമെ ഇന്ത്യക്കായി സ്കോർ ഉയർത്തിയത് ദീപ്തി ശർമയാണ്. 53 പന്തിൽ നിന്ന് 40 റൺസ് ആണ് ദീപ്തി ശർമ കണ്ടെത്തിയത്. മൂന്ന് ഏകദിനങ്ങളുടെ പരമ്പരയാണ് ഇന്ത്യയിൽ ഓസ്ട്രേലിയ കളിക്കുന്നത്. ഇപ്പോൾ 1-0ന് പരമ്പരയിൽ മുൻപിൽ നിൽക്കുകയാണ് ഓസ്ട്രേലിയ. 

Read More: ഐപിഎൽ ടീമുകൾക്ക് മുൻപിൽ പോലും പാക്കിസ്ഥാൻ വിറയ്ക്കും; പരിഹാസവുമായി ഇർഫാൻ പഠാൻ