കെസിഎയും സഞ്ജുവും രണ്ട് തട്ടിൽ; കളിക്കാൻ തയ്യാറായിട്ടും മുഖം തിരിച്ച് അസോസിയേഷൻ

വിജയ് ഹസാരെ ട്രോഫിയിൽ കേരളത്തിന്റെ  ആദ്യ മത്സരം മുതൽ കളിക്കാൻ സന്നദ്ധനാണെന്നു കേരള ക്രിക്കറ്റ് അസോസിയേഷനെ(കെസിഎ) അറിയിച്ചിരുന്നതായി സഞ്ജു സാംസൺ. ഇത് വ്യക്തമാക്കി ഡിസംബർ 19ന് കേരള ക്രിക്കറ്റ് അ ഇമെയിൽ അയച്ചിരുന്നതായി സഞ്ജു ഐഇ മലയാളത്തോട് പറഞ്ഞു. കെസിഎയിൽ നിന്ന് അനുകൂല മറുപടിക്കായി കാത്തിരിക്കുകയാണെന്നും സഞ്ജു പറഞ്ഞു.

എന്നാൽ വിജയ് ഹസാരെ ട്രോഫി തുടങ്ങുന്നതിന് മുമ്പ് ക്യാംപ് നടത്തിയിരുന്നതായും ഈ ക്യംപിൽ പങ്കെടുക്കാതിരുന്നത് കൊണ്ടാണ് സഞ്ജുവിനെ ടീമിൽ ഉൾപ്പെടുത്താതിരുന്നത് എന്നുമാണ് കേരള ക്രിക്കറ്റ് അസോസിയേഷൻ ഐഇ മലയാളത്തോട് കഴിഞ്ഞ ദിവസം പ്രതികരിച്ചത്. സഞ്ജുവിന് കളിക്കാൻ താത്പര്യം ഉണ്ടെങ്കിൽ കളിക്കുന്നതിൽ തടസമില്ലെന്നും കെസിഎ സെക്രട്ടറി ഐഇ മലയാളത്തോട് പറഞ്ഞിരുന്നു. 

എന്നാൽ വിജയ് ഹസാരെയിൽ കേരളത്തിന്റെ ആദ്യ മത്സരം മുതൽ കളിക്കാൻ സന്നദ്ധനാണ് എന്ന് അറിയിച്ച് കെസിഎയ്ക്ക് ഇമെയിൽ അയച്ചിരുന്നതായാണ് സഞ്ജു വ്യക്തമാക്കുന്നത്. 23ന് ബറോഡയ്ക്ക് എതിരെ ആയിരുന്നു വിജയ് ഹസാരെയിലെ കേരളത്തിന്റെ ആദ്യ മത്സരം. ആദ്യ മത്സരം മുതൽ കേരളത്തിനായി കളിക്കാൻ സന്നദ്ധത അറിയിച്ചിട്ടും സഞ്ജുവിന്റെ ഇമെയിലിന് കെസിഎ മറുപടി നൽകാതിരിക്കുകയായിരുന്നു. 

വിജയ് ഹസാരെയ്ക്ക് മുമ്പ് നടന്ന കേരള ടീമിന്റെ ക്യാപിൽ പങ്കെടുക്കാൻ കഴിയില്ലെന്ന് സഞ്ജു അറിയിച്ചിരുന്നതായി കെസിഎ സെക്രട്ടറി വിനോദ് ഐഇ മലയാളത്തോട് പറഞ്ഞിരുന്നു. ക്യാംപിൽ നിന്ന് വിട്ടുനിൽക്കുന്നതിന്റെ കാരണം സഞ്ജു അറിയിച്ചില്ല എന്നും അദ്ധേഹം പറഞ്ഞു. സഞ്ജു കേരളത്തിനായി കളിക്കാൻ ആദ്യ മത്സരം മുതൽ സന്നദ്ധത അറിയിച്ചിട്ടും കെസിഎ എന്തുകൊണ്ട് ഇന്ത്യൻ താരത്തിന് അനുകൂല മറുപടി നൽകിയില്ല എന്ന ചോദ്യമാണ് ഇപ്പോൾ ഉയരുന്നത്. വിജയ് ഹസാരെ ട്രോഫിയിൽ മൂന്ന് മത്സരങ്ങൾ കൂടിയാണ് ഇനി കേരളത്തിന് ഗ്രൂപ്പ് ഘട്ടത്തിൽ കളിക്കാനുള്ളത്. ബിഹാർ, ത്രിപുര,  ബംഗാൾ എന്നീ ടീമുകൾക്ക് എതിരെയാണ് ഇനിയുള്ള വിജയ് ഹസാരെയിലെ കേരളത്തിന്റെ മത്സരങ്ങൾ. ഗ്രൂപ്പ് ഇയിൽ കളിക്കുന്ന കേരളം മൂന്ന് കളിയിൽ നിന്ന് രണ്ട് തോൽവിയോടെ പോയിന്റ് പട്ടികയിൽ ഏഴാം സ്ഥാനത്താണ്. ബറോഡയ്ക്കും ഡൽഹിക്കും എതിരെ കേരളം തോറ്റപ്പോൾ മധ്യപ്രദേശിന് എതിരായ മത്സരം മഴയെ തുടർന്ന് ഉപേക്ഷിച്ചു.

50 ഓവർ ഫോർമാറ്റാണ് വിജയ് ഹസാരെ ട്രോഫി. ഇതിൽ കളിച്ച് മികച്ച പ്രകടനം പുറത്തെടുത്താൽ സഞ്ജുവിന് ഇനി വരുന്ന ഇന്ത്യയുടെ ചാംപ്യൻസ് ട്രോഫി ടീമിലും ഇടം നേടാനുള്ള സാധ്യത തെളിയും. നിലവിൽ മൂന്ന് രാജ്യാന്തര സെഞ്ചുറിയോടെ ഇന്ത്യയുടെ ട്വന്റി20 ടീമിൽ സ്ഥാനം ഉറപ്പിച്ചെങ്കിലും ഏകദിനത്തിലെ കാര്യം അങ്ങനെയല്ല. അവസാനം കളിച്ച ഏകദിനത്തിൽ സെഞ്ചുറി നേടിയിട്ടും ഇന്ത്യൻ ഏകദിന ടീമിലേക്ക് സഞ്ജുവിന് വീണ്ടും വിളി എത്തിയിട്ടില്ല. ദക്ഷിണാഫ്രിക്കയ്ക്ക് എതിരെ ആയിരുന്നു സഞ്ജുവിന്റെ ഏകദിന സെഞ്ചുറി.

മിന്നും ഫോമിൽ സഞ്ജു

ഏകദിനത്തിൽ ഇന്ത്യക്കായി മികച്ച കണക്കുകളാണ് സഞ്ജുവിന്റെ അക്കൗണ്ടിലുള്ളത്. 16 ഏകദിനത്തിൽ നിന്ന് 510 റൺസ് ആണ് സഞ്ജു സ്കോർ ചെയ്തത്. 56.7 ആണ് ഏകദിനത്തിലെ സഞ്ജുവിന്റെ ബാറ്റിങ് ശരാശരി. സ്ട്രൈക്ക് എഡിറ്റ് 99.6. ട്വന്റി20 ഫോർമാറ്റിലേക്ക് വരുമ്പോൾ 37 കളിയിൽ നിന്ന് 810 റൺസ് ആണ് സഞ്ജു സ്കോർ ചെയ്തത്. ബാറ്റിങ് ശരാശരി 27.9. സ്ട്രൈക്ക്റേറ്റ് 155.2. ബംഗ്ലാദേശിന് എതിരെ ഒരു ട്വന്റി20 സെഞ്ചുറി നേടിയ സഞ്ജു പിന്നെ വന്ന ഇന്ത്യയുടെ ദക്ഷിണാഫ്രിക്കയ്ക്ക് എതിരായ പരമ്പരയിൽ രണ്ട് സെഞ്ചുറി നേടിയാണ് ട്വന്റി20 ടീമിൽ സ്ഥാനം ഉറപ്പിച്ചത്. ദക്ഷിണാഫ്രിക്കയ്ക്ക് എതിരെ കിങ്സ്മെഡിൽ 50 പന്തിൽ നിന്ന് 107 റൺസ് ആണ് സഞ്ജു അടിച്ചെടുത്തത്. പിന്നാലെ പരമ്പരയിലെ മൂന്നാമത്തെ ട്വന്റി20യിൽ 56 പന്തിൽ നിന്ന് 109 റൺസും നേടി. ഇതോടെ ഈ വർഷത്തെ ട്വന്റി20യിലെ ബാറ്റിങ് ശരാശരി 44ലേക്ക് എത്തിക്കാൻ സഞ്ജുവിനായി.

Read More

• പുതുവത്സര സമ്മാനവുമായി ചുണക്കുട്ടന്മാർ നാളെ വരുമോ?'സന്തോഷ കിരീട'ത്തിനായി കാത്ത് കേരളം
• വിരമിക്കൽ തീയതി തീരുമാനിച്ച് രോഹിത്; ഒരു നിബന്ധന
• 'കിങ് മരിച്ചു'; കോഹ്ലിയെ അധിക്ഷേപിച്ച് ഓസീസ് താരം
• പന്തിനെ വീഴ്ത്തിയ തന്ത്രം; ഹെഡ്ഡിന്റെ സെലിബ്രേഷന് പിന്നിൽ