India Vs England: സൂപ്പർ സൂപ്പർ സൂപ്പർ പന്ത്! രണ്ടാം ഇന്നിങ്സിലും സെഞ്ചുറി; ശതകം പിന്നിട്ട് രാഹുലും

Rishabh Pant Century, india Vs England Test: വൈസ് ക്യാപ്റ്റൻ സ്ഥാനം എന്ന ഉത്തരവാദിത്വം, ഇന്ത്യൻ ക്രിക്കറ്റിലെ തലമുറ മാറ്റും..ഇതൊന്നും ഒരു തരത്തിലും ഋഷഭ് പന്തിൽ സമ്മർദം നിറയ്ക്കുന്നില്ല. ഇന്ത്യൻ ബാറ്റർമാർ എന്നും പ്രയാസപ്പെട്ടിരുന്ന ഇംഗ്ലണ്ട് മണ്ണ് ഋഷഭ് പന്തിന്റെ ഏറ്റവും പ്രിയപ്പെട്ട ഇടമാവുന്നു. ലീഡ്സ് ടെസ്റ്റിന്റെ രണ്ടാം ഇന്നിങ്സിലും ഋഷഭ് പന്തിന് തകർപ്പൻ സെഞ്ചുറി. ഇംഗ്ലണ്ടിൽ രണ്ട് ഇന്നിങ്സിലും സെഞ്ചുറി നേടുന്ന ആദ്യ ബാറ്ററായും പന്ത് മാറി. മറുവശത്ത് ആദ്യ ഇന്നിങ്സിൽ സ്കോർ ഉയർത്താനാവാതിരുന്നതിന്റെ നിരാശ കെ എൽ രാഹുൽ രണ്ടാം ഇന്നിങ്സിൽ തീർത്ത് സെഞ്ചുറിയിലേക്കും എത്തി. ഇതോടെ ഇന്ത്യ മികച്ച ലീഡിലേക്ക് ബാറ്റ് വീശുന്നു. 

ഇംഗ്ലണ്ട് ബോളർമാരെ ആക്രമിച്ച് രണ്ടാം ഇന്നിങ്സിലും സെഞ്ചുറി നേടി ഋഷഭ് പന്ത് ലീഡ്സിലെ സ്റ്റാറാവുകയാണ്. ആദ്യം കരുതലോടെ പ്രതിരോധിച്ച് കളിച്ചെങ്കിലും പിന്നാലെ ഋഷഭ് പന്ത് സ്കോറിങ്ങിന്റെ വേഗം കൂട്ടി.  ഋഷഭ് പന്തിന്റെ ആക്രമണ ശൈലി ഇംഗ്ലണ്ട് ബോളർമാരുടെ ലൈനും ലെങ്ത്തും തെറ്റിച്ചു. 131 ബോളിൽ നിന്നാണ് ഋഷഭ് പന്ത് സെഞ്ചുറിയിലേക്ക് എത്തിയത്.  13 ഫോറും രണ്ട് സിക്സും പന്തിന്റെ ബാറ്റിൽ നിന്ന് വന്നുകഴിഞ്ഞു.

Also Read: India Vs England: ഋഷഭ് പന്ത് 134ന് പുറത്തായതിന് കാരണം ഗംഭീർ; ആരോപണവുമായി ദിനേശ് കാർത്തിക്

ഋഷഭ് പന്തിന്റെ ടെസ്റ്റ് കരിയറിലെ എട്ടാമത്തെ സെഞ്ചുറിയാണ് ഇത്. ഇംഗ്ലണ്ട് മണ്ണിലെ നാലാമത്തെ സെഞ്ചുറിയും. ലീഡ്സ് ടെസ്റ്റിന്റെ ഒന്നാം ഇന്നിങ്സിൽ സിക്സ് പറത്തിയാണ് പന്ത് സെഞ്ചുറി തികച്ചത്. ഇംഗ്ലണ്ട് സ്പിന്നർ ബാഷിറിന് എതിരെയായിരുന്നു ഇത്. രണ്ടാം ഇന്നിങ്സിൽ പന്ത് സെഞ്ചുറി പിന്നിട്ടത് ബാഷിറിനെതിരെ സിംഗിളെടുത്തും. ഋഷഭ് പന്ത് 96 റൺസിൽ നൽക്കെ ഇന്ത്യൻ വൈസ് ക്യാപ്റ്റനെ കൂറ്റൻ ഷോട്ട് കളിക്കാൻ പ്രേരിപ്പിക്കുന്നതിനായി ഇംഗ്ലണ്ട് ക്യാപ്റ്റൻ ബെൻ സ്റ്റോക്ക്സ് ജോ റൂട്ടിന്റെ കൈകളിലേക്ക് പന്ത് നൽകി. എന്നാൽ ഇംഗ്ലണ്ടിന്റെ തന്ത്രങ്ങളിലൊന്നും വീഴാതെ പന്ത് സ്കോർ മൂന്നക്കം കടത്തി. 

Also Read: എല്ലാ ഭാരവും ബുമ്രയുടെ മേൽ; 40 ഓവർ വരെ ശാർദുലിനെ മാറ്റി നിർത്തിയത് എന്തിന്?

ഒന്നാം ഇന്നിങ്സിൽ സെഞ്ചുറി നേടിയ ഋഷഭ് പന്ത് എം എസ് ധോണിയുടെ റെക്കോർഡ് മറികടന്നിരുന്നു. ടെസ്റ്റിൽ ഇന്ത്യക്കായി ഏറ്റവും കൂടുതൽ സെഞ്ചുറി നേടുന്ന വിക്കറ്റ് കീപ്പർ ബാറ്റർ എന്ന നേട്ടത്തിലാണ് ധോണിയെ ലീഡ്സിലെ ആദ്യ സെഞ്ചുറിയോടെ പന്ത് മറികടന്ന്. 

Also Read: Prithvi Shaw: കളം മാറ്റി ചവിട്ടാൻ പൃഥ്വി ഷാ; മുംബൈ വിടാൻ അനുവാദം തേടി

202 പന്തിൽ നിന്നാണ് രാഹുൽ സെഞ്ചുറിയിലേക്ക് എത്തിയത്. രാഹുലിന്റെ ടെസ്റ്റ് കരിയറിലെ ഒൻപതാമത്തെ സെഞ്ചുറിയാണ് ഇത്. ഇതിൽ എട്ടും ഇന്ത്യക്ക് പുറത്ത് നിന്നാണ് രാഹുൽ നേടിയത്. രാഹുലും പന്തും ചേർന്നുള്ള കൂട്ടുകെട്ടിന്റെ ബലത്തിൽ ഇന്ത്യയുടെ ലീഡ് 300നോട് അടുക്കുകയാണ്. രാഹുലിനേയും പന്തിനേയും കുഴപ്പിക്കുന്നതിൽ ഇംഗ്ലണ്ട് ബോളർമാർ പരാജയപ്പെട്ടു.

Read More: India Vs England: വീണതാണ് എന്ന് കരുതിയോ? പന്തിന്റെ ബുദ്ധിയാണത്; സച്ചിൻ വിശദീകരിക്കുന്നു