RCB Vs CSK IPL 2025: ആയുഷിനും രക്ഷിക്കാനായില്ല; ത്രില്ലറിൽ ചെന്നൈയെ വീഴ്ത്തി ബെംഗളൂരു ഒന്നാമത്

ജയസാധ്യതകൾ മാറി മറിഞ്ഞ മത്സരത്തിൽ ഒടുവിൽ ചെന്നൈ സുപ്പർ കിങ്സിനെ രണ്ട് റൺസിന് തോൽപ്പിച്ച് ജയം പിടിച്ച് റോയൽ ചലഞ്ചേഴ്സ് ബെംഗളൂരു. ചിന്നസ്വാമിയിൽ അവസാന പന്ത് വരെ നീണ്ട ത്രില്ലറിൽ ജയിച്ചു കയറി 16 പോയിന്റോടെ ഒന്നാം സ്ഥാനത്തേക്കും ബെംഗളൂരു എത്തി. അവസാന ഓവറിൽ 14 റൺസ് ആണ് ചെന്നൈക്ക് ജയിക്കാൻ വേണ്ടിയിരുന്നത്. യഷ് ദയാലിൽ നിന്ന് വന്ന നോ ബോൾ കളി ബെംഗളൂരുവിന്റെ കൈകളിൽ നിന്ന് നഷ്ടപ്പെടുത്തി എന്ന് തോന്നിച്ചു. എന്നാൽ ഫിനിഷിങ്ങിൽ പിഴച്ച് ചെന്നൈ മറ്റൊരു തോൽവിയിലേക്ക് കൂടി വീണു. 

ഐപിഎല്ലിൽ ഇത് ആദ്യമായാണ് ലീഗ് ഘട്ടത്തിലെ രണ്ട് മത്സരങ്ങളിലും ബെംഗളൂരു ചെന്നൈ സൂപ്പർ കിങ്സിനെ തോൽപ്പിക്കുന്നത്. ചിന്നസ്വാമി സ്റ്റേഡിയത്തിൽ മഴ മാറി നിന്നപ്പോൾ ബെതലിന്റേയും കോഹ്ലിയുടേയും അവസാന ഓവറുകളിലെ ഷെഫേർഡിന്റേയും വെടിക്കെട്ട് ബാറ്റിങ് ബലത്തിൽ 214 റൺസ് ആണ് ആർസിബി ചെന്നൈക്ക് മുൻപിൽ വിജയ ലക്ഷ്യം വെച്ചത്. 

മുംബൈക്കാരൻ ആയുഷ് മാത്രേയുടെ തോളിലേറി ചെന്നൈ ജയത്തിലേക്ക് എത്തുമെന്നും തോന്നിച്ചു. ആയുഷും ജഡേജയും ചേർന്ന് ചെന്നൈ ചെയ്സിങ് സുരക്ഷിതമായി മുൻപോട്ട് കൊണ്ട് പോയി. ഭുവിയുടെ ഒരോവറിൽ ആയുഷ് 26 റൺസ് അടിച്ചെടുത്തു. ചെന്നൈ സ്കോർ 52-2 എന്ന നിലയിൽ നിൽക്കുമ്പോൾ ഒന്നിച്ച ഈ സഖ്യം പിരിഞ്ഞത് സ്കോർ 172ൽ എത്തിയപ്പോഴാണ്. 

എൻഗിഡി ആയുഷിനെ പുറത്താക്കി മത്സരം ബെംഗളൂരുവിന് അനുകൂലമായി തിരിച്ചു. 48 പന്തിൽ നിന്ന് 9 ഫോറും അഞ്ച് സിക്സും പറത്തി 94 റൺസിൽ നിൽക്കെയാണ് ആയുഷ് മടങ്ങിയത്. അർഹിച്ച സെഞ്ചുറിക്കരികിൽ ആയുഷ് വീണതിന് പിന്നാലെ തൊട്ടടുത്ത പന്തിൽ അപകടകാരിയായ ഡെവാൾഡ് ബ്രവിസിനേയും ഡക്കാക്കി എൻഗിഡി മടക്കി. അവസാന ഓവറിൽ ധോണിയെ യഷ് ദയാലും പുറത്താക്കിയതോടെ സമ്മർദം ചെന്നൈയുടെ മേൽ നിറയുകയായിരുന്നു. രവീന്ദ്ര ജഡേജയും ശിവം ദുബെയും പുറത്താവാതെ നിന്നിട്ടും ടീമിനെ ജയത്തിലേക്ക് എത്തിക്കാനായില്ല. 

View this post on Instagram

A post shared by IPL (@iplt20)

നേരത്തെ ആദ്യം ബാറ്റ് ചെയ്ത ആർസിബിക്ക് വേണ്ടി ഓപ്പണിങ് സഖ്യം തകർപ്പൻ തുടക്കം നൽകി. 97 റൺസ് ആണ് ഇരുവരും ചേർന്ന് കണ്ടെത്തിയത്. ബെതൽ 33 പന്തിൽ നിന്ന് 55 റൺസും കോഹ്ലി 33 പന്തിൽ നിന്ന് 62 റൺസും അടിച്ചെടുത്തു. ഒടുവിൽ റൊമാരിയോ ഷെഫേർഡ് തകർത്തടിച്ച് ആർസിബി സ്കോർ 200 കടത്തുകയായിരുന്നു. 14 പന്തിൽ നിന്നാണ് ഷെഫേർഡ് 53 റൺസ് എടുത്തത്. നാല് ഫോറും ആറ് സിക്സും വിൻഡിസ് താരത്തിന്റെ ബാറ്റിൽ നിന്ന് പറന്നു. ഐപിഎല്ലിലെ വേഗമേറിയ രണ്ടാമത്തെ അർധ ശതകമായും ഇത് മാറി. 

Read More

• GT vs SRH: തോറ്റ് തുന്നം പാടി ഹൈദരാബാദ്; പ്ലേഓഫിനോട് അടുത്ത് ഗുജറാത്ത്
• അവ്നീത് കൗറിന്റെ ഹോട്ട് ഫോട്ടോയ്ക്ക് കോഹ്ലിയുടെ ലൈക്ക്; പിന്നാലെ വിശദീകരണം
• Hardik Pandya IPL: ഏഴ് സ്റ്റിച്ചുകൾ; ഹർദിക് കളിച്ചത് കടുത്ത വേദന വകവയ്ക്കാതെ
• Vaibhav Suryavanshi: വൈഭവിനെ ആകാശത്തോളം പ്രശംസിക്കേണ്ടതില്ല; മുന്നറിയിപ്പുമായി ഗാവസ്കർ