Kerala Blasters: വീണ്ടും വമ്പ് കാണിച്ച് മോഹൻ ബഗാൻ; 3-0ന് തോറ്റ് കേരള ബ്ലാസ്റ്റേഴ്സ്

മോഹൻ ബഗാന് മുൻപിൽ ഒരിക്കൽ കൂടി കീഴടങ്ങി വീണ് കേരള ബ്ലാസ്റ്റേഴ്സ്. ഇതോടെ ബ്ലാസ്റ്റേഴ്സിന്റെ പ്ലേഓഫ് പ്രതീക്ഷകൾ വിദൂരതയിലായി. ഇനിയുള്ള നാല് കളികളിൽ ജയിച്ചാലും മറ്റ് ടീമുകളുടെ മത്സരഫലങ്ങൾ നോക്കിയാവും ബ്ലാസ്റ്റേഴ്സിന്റെ സാധ്യതകൾ. എതിരില്ലാത്ത മൂന്ന് ഗോളിനാണ് കലൂരിൽ ബ്ലാസ്റ്റേഴ്സിനെ മോഹൻ ബഗാൻ സൂപ്പർ ജയന്റ്സ് നാണം കെടുത്തിയത്. 

ആദ്യ പകുതിയിൽ മക്ലറന്റെ ഇരട്ട പ്രഹരമാണ് കേരള ബ്ലാസ്റ്റേഴ്സിനെ തളർത്തിയത്. രണ്ടാം പകുതിയിൽ റോഡ്രിഗസിൽ നിന്നും ഗോൾ വന്നതോടെ തിരികെ കയറി വരാൻ പറ്റാത്ത പാകത്തിൽ കേരള ബ്ലാസ്റ്റേഴ്സ് വീണു. 28ാം മിനിറ്റിലാണ് മോഹൻ ബഗാൻ സൂപ്പർ ജയന്റ്സ് കൊച്ചി ജവഹർലാൽ നെഹ്റു സ്റ്റേഡിയത്തെ നിശബ്ദമാക്കി ആദ്യ ഗോൾ അടിച്ചത്. മോഹൻ ബഗാന്റെ ഗോൾവേട്ടക്കാരൻ മക്ലാറെനാണ് പന്ത് വലയിലാക്കിയത്. ഇടത് നിന്ന് ലിസ്റ്റൺ പന്തുമായി രണ്ട് ബ്ലാസ്റ്റേഴ്സ് കളിക്കാരെ മറികടന്ന് മക്ലറെന് പന്ത് നൽകി. സിക്സ് യാർഡിൽ നിന്ന് പന്ത് വലയിലാക്കുന്നതിൽ മോഹൻ ബഗാൻ സൂപ്പർ താരത്തിന് പിഴച്ചില്ല. 

ഗോൾ നേടിയതിന് പിന്നാലെ മോഹൻ ബഗാൻ കൂടുതൽ അപകടകാരികളാവുന്നതാണ് കണ്ടത്. 32ാം മിനിറ്റിൽ മികച്ചൊരു ത്രൂ ബോൾ മൻവീറിന് മുൻപിലേക്ക് വന്നെങ്കിലും ഡ്രിനിച്ചിന് ഭീഷണി ഒഴിവാക്കാനായി. 40ാം മിനിറ്റിൽ ലൂണ ഫ്രീകിക്ക് എടുത്തെങ്കിലും അവസരം വെറുതെ കളഞ്ഞുകുളിച്ചു. 

ആദ്യ പകുതിയിൽ ഇരട്ട പ്രഹരം

ആദ്യ പകുതി അവസാനിക്കുന്നതിന് മുൻപ് മോഹൻ ബഗാൻ ലീഡ് 2-0 ആയി ഉയർത്തി. മക്ലരൻ തന്നെയാണ് വീണ്ടും മഞ്ഞപ്പടക്കൂട്ടത്തെ നിശബ്ദരാക്കിയത്. കമിങ്സിൽ നിന്ന് എത്തിയ വോളിയിൽ സച്ചിന് പിടികൊടുക്കാതെ മക്ലരൻ പന്ത് വലയിലാക്കി. 

പെപ്രയെ ഫൌൾ ചെയ്തതിന് ലഭിച്ച ഫ്രീകിക്കിലൂടെയാണ് കേരള ബ്ലാസ്റ്റേഴ്സ് രണ്ടാം പകുതി ആരംഭിച്ചത്. ബോക്സിലേക്ക് ലൂണയുടെ ക്രോസ് വന്നെങ്കിലും മോഹൻ ബഗാൻ പ്രതിരോധനിര വിജയകരമായി തട്ടിയകറ്റി. ആദ്യ പകുതിയിൽ പുറത്തെടുത്ത ഊർജത്തോടെയാണ് രണ്ടാം പകുതിയിലും ബ്ലാസ്റ്റേഴ്സ് പന്ത് തട്ടാൻ ആരംഭിച്ചത്. എന്നാൽ തങ്ങളുടെ ലീഡ് നിലനിർത്താൻ പാകത്തിൽ നിർണായകമായ ബ്ലോക്കുകളും ഇന്റർസെപ്ഷനുകളും മോഹൻ ബഗാൻ പ്രതിരോധനിരയിൽ നിന്ന് വന്നു. 

View this post on Instagram

A post shared by Indian Super League (@indiansuperleague)

66ാം മിനിറ്റിലാണ് റോഡ്രിഗസിന്റെ ഗോൾ വന്നത്. ആദ്യം ബോക്സിനുള്ളിൽ ബ്ലോക്ക് ചെയ്ത പന്ത് വീണ്ടും റോഡ്രിഗസിന് നേരെ എത്തി. തന്റെ ഇടംകാലുകൊണ്ട് റോഡ്രിഗസ് പന്ത് വലയിലാക്കി. 78ാം മിനിറ്റിൽ ലൂണയിൽ നിന്ന് പവർഫുൾ ഷോട്ട് വന്നെങ്കിലും ടാർഗറ്റിൽ നിന്ന് അകന്ന് പോയി. 

കലൂർ ജവഹർലാൽ നെഹ്റു സ്റ്റേഡിയത്തിൽ ഇതുവരെ രണ്ട് ടീമുകളെ മാത്രമാണ് ഐഎസ്എൽ ചരിത്രത്തിൽ കേരള ബ്ലാസ്റ്റേഴ്സിന് തോൽപ്പിക്കാനാവാത്തത്. മോഹൻ ബഗാൻ സുപ്പർ ജയന്റ്സിനേയും പഞ്ചാബ് എഫ്സിയേയും. സീസണിൽ ജീവൻ നിലനിർത്താൻ മോഹൻ ബഗാന് എതിരെ രണ്ടും കൽപ്പിച്ചാണ് കേരള ബ്ലാസ്റ്റേഴ്സ് ഇറങ്ങിയത്. പക്ഷേ മോഹൻ ബഗാൻ വീണ്ടും ബ്ലാസ്റ്റേഴ്സിന്റെ നെഞ്ച് തകർത്തു. 

Read More

• ചാമ്പ്യൻസ് ട്രോഫി; വിജയികൾക്ക് ലഭിക്കുക കോടികളുടെ സമ്മാനത്തുക; പ്രഖ്യാപനവുമായി ഐസിസി
• വനിതാ പ്രീമിയർ ലീഗിന് ഇന്ന് തുടക്കം; ആര്‍സിബി- ഗുജറാത്ത് ആദ്യ പോരാട്ടം; മത്സരം എവിടെ എപ്പോൾ കാണാം?
• Royal Challengers Banglore: എന്തുകൊണ്ട് കോഹ്ലിയെ ആർസിബി ക്യാപ്റ്റനാക്കിയില്ല? കാരണം
• Lionel Messi Family: മെസിയും ഭാര്യയും പെൺകുഞ്ഞിനായി കാത്തിരിക്കുന്നു? അന്റോണലയുടെ പ്രതികരണം