Kerala Blasters: ബ്ലാസ്റ്റേഴ്സിന് നേരിയ ആശ്വാസം; മോഹൻ ബഗാൻ ഇറങ്ങുന്നത് റിസർവ് താരങ്ങളുമായി?

Kerala Blasters Vs Mohun Bagan Super Cup Quarter Final: സൂപ്പർ കപ്പിൽ ഈസ്റ്റ് ബംഗാളിനെ 2-0ന് വീഴ്ത്തിയതോടെ ആത്മവിശ്വാസത്തിലാണ് കേരള ബ്ലാസ്റ്റേഴ്സ്. എന്നാൽ സൂപ്പർ കപ്പ് ക്വാർട്ടർ ഫൈനലിൽ മോഹൻ ബഗാനെ നേരിടുക എന്ന വലിയ വെല്ലുവിളിയാണ് കേരള ബ്ലാസ്റ്റേഴ്സിന് മുൻപിലുള്ളത്. ലീഗ് വിന്നേഴ്സ് ഷീൽഡും ഐഎസ്എൽ കിരീടവും നേടി നിൽക്കുന്ന മോഹൻ ബഗാന്റെ ലക്ഷ്യം സൂപ്പർ കപ്പും നേടി ട്രബിൾ എന്ന പുതു ചരിത്രം എഴുതി സീസൺ ആഘോഷമായി അവസാനിപ്പിക്കുക എന്നതാണ്. എന്നാൽ കേരള ബ്ലാസ്റ്റേഴ്സിന് ആശ്വാസം നൽകുന്നൊരു റിപ്പോർട്ട് ആണ് ഇപ്പോൾ പുറത്തുവരുന്നത്. 

കേരള ബ്ലാസ്റ്റേഴ്സിന് എതിരെ സൂപ്പർ കപ്പ് ക്വാർട്ടർ ഫൈനലിൽ ഇറങ്ങുമ്പോൾ മോഹൻ ബഗാൻ തങ്ങളുടെ സൂപ്പർ താരങ്ങൾ ഇല്ലാതെ റിസർവ് താരങ്ങളെയാവും കളിപ്പിക്കുക എന്ന സൂചനകളാണ് വരുന്നത്. മോഹൻ ബഗാന്റെ പ്രധാന വിദേശ താരങ്ങൾ സൂപ്പർ കപ്പ് ക്വാർട്ടർ കളിക്കാൻ ഉണ്ടായേക്കില്ലെന്നാണ് റിപ്പോർട്ട്. എന്നാൽ ഈ റിപ്പോർട്ടുകൾ മോഹൻ ബഗാൻ ഔദ്യോഗികമായി സ്ഥിരീകരിച്ചിട്ടില്ല. 

ഏപ്രിൽ 26ന് ആണ് കേരള ബ്ലാസ്റ്റേഴ്സ്-മോഹൻ ബഗാൻ സൂപ്പർ കപ്പ് ക്വാർട്ടർ ഫൈനൽ പോരാട്ടം. പുതിയ പരിശീലകൻ കാറ്റലയ്ക്ക് കീഴിൽ ഒത്തിണക്കത്തോടെ കളിക്കുന്ന കേരള ബ്ലാസ്റ്റേഴ്സിനെയാണ് ഈസ്റ്റ് ബംഗാളിന് എതിരെ കണ്ടത്. മോഹൻ ബഗാൻ ക്വാർട്ടറിൽ തങ്ങളുടെ റിസർവ് താരങ്ങളുമായി ഇറങ്ങുകയും കേരള ബ്ലാസ്റ്റേഴ്സിന് ഈസ്റ്റ് ബംഗാളിനെതിരായ പ്രകടനം പോലൊന്ന് പുറത്തെടുക്കാനുമായാൽ സൂപ്പർ കപ്പ് ക്വാർട്ടർ ഫൈനൽ അതിജീവിക്കാൻ ഡേവിഡ് കാറ്റലയ്ക്കും സംഘത്തിനും സാധിച്ചേക്കും. 

കേരള ബ്ലാസ്റ്റേഴ്സ് കളിക്കാരുടെ ചിന്താഗതിയിൽ മാറ്റം വരുത്താനാണ് താൻ പ്രധാനമായും ശ്രമിച്ചത് എന്ന് ഈസ്റ്റ് ബംഗാളിന് എതിരായ മത്സരത്തിന് ശേഷം പരിശീലകൻ കാറ്റല പറഞ്ഞിരുന്നു. വലിയ പ്രതീക്ഷകൾ അവർക്കുമേൽ നിറഞ്ഞിരുന്നതിനാൽ പ്രയാസമേറിയ സീസണായിരുന്നു അവർക്ക് ഇത് എന്നും കേരള ബ്ലാസ്റ്റേഴ്സ് പരിശീലകൻ പറഞ്ഞു. 

മോഹൻ ബഗാനെതിരായ മത്സരം എളുപ്പമായിരിക്കില്ല എന്ന് കേരള ബ്ലാസ്റ്റേഴ്സ് താരം നോവ സദൂയിയും വ്യക്തമാക്കി. ഈസ്റ്റ് ബംഗാളിന് എതിരായ കേരള ബ്ലാസ്റ്റേഴ്സിന്റെ ജയത്തിൽ നിർണായക പങ്കുവഹിച്ചത് നോവയുടെ പ്രകടനം ആയിരുന്നു. നോവയെ ഈസ്റ്റ് ബംഗാൾ താരം അൻവർ അലി ബോക്സിനുള്ളിൽ വീഴ്ത്തിയതിനാണ് കേരള ബ്ലാസ്റ്റേഴ്സിന് ആദ്യ ഗോളിലേക്ക് വഴിവെച്ച പെനാൽറ്റി ലഭിച്ചത്. പിന്നാലെ രണ്ടാം പകുതിയിൽ തകർപ്പൻ ഇടംകാൽ ഷോട്ടോടെ നോവ ലീഡ് 2-0 ആയി ഉയർത്തുകയായിരുന്നു. 

View this post on Instagram

A post shared by Kerala Blasters FC (@keralablasters)

Read More

• Kerala Blasters: സൂപ്പർ കപ്പിനായി കച്ചമുറുക്കി കേരള ബ്ലാസ്റ്റേഴ്സ്; സ്ക്വാഡിനെ പ്രഖ്യാപിച്ചു
• '2026 ലോകകപ്പ് മനസിലുണ്ട്; ഇല്ലെന്ന് പറഞ്ഞാൽ കള്ളമാവും'; നിർണായക വാക്കുകളുമായി മെസി
• മാർച്ചിൽ പരുക്കേറ്റു; ഏപ്രിലിൽ വീണ്ടും പരുക്ക്; കണ്ണീരണിഞ്ഞ് മടങ്ങി നെയ്മർ; വിരമിക്കൽ മുറവിളി ശക്തം
• പ്രീമിയർ ലീഗ്; കിരീടത്തിനായി ലിവർപൂളിന് എത്ര മത്സരങ്ങൾ കൂടി കാത്തിരിക്കണം?