India Vs England: 90 ഓവർ; ഇംഗ്ലണ്ടിന് ജയിക്കാൻ 350 റൺസ്; ലീഡ്സ് ടെസ്റ്റ് ആവേശകരമായ അന്ത്യത്തിലേക്ക്

india Vs England Test: ലീഡ്സ് ടെസ്റ്റിൽ ഒരു ദിനം ബാക്കി നിൽക്കെ ഇംഗ്ലണ്ടിന് ജയിക്കാൻ വേണ്ടത് 350 റൺസ്. നാലാം ദിനം കളി നിർത്തുമ്പോൾ വിക്കറ്റ് നഷ്ടമില്ലാതെ 21 റൺസ് എന്ന നിലയിലാണ് ഇംഗ്ലണ്ട്. ഇന്ത്യയുടെ രണ്ടാം ഇന്നിങ്സ് 364 റൺസിൽ അവസാനിച്ചു. ആദ്യ ഇന്നിങ്സിലേതിന് സമാനമായി രണ്ടാം ഇന്നിങ്സിലും ഇന്ത്യയുടെ ലോവർ ഓർഡർ ചീട്ടുകൊട്ടാരം പോലെ തകർന്നു വീണു. 

സെഞ്ചുറി നേടിയ കെ എൽ രാഹുൽ പുറത്തായതോടെ ഇന്ത്യയുടെ ബാറ്റിങ് തകർച്ച ആരംഭിക്കുകയായിരുന്നു. 333-4 എന്ന നിലയിൽ നിന്ന് 364ന്  ഇന്ത്യ ഓൾഔട്ടായി. 29 റൺസ് കണ്ടെത്തുന്നതിന് ഇടയിലാണ് ഇന്ത്യയുടെ അവസാന അഞ്ച് വിക്കറ്റുകൾ വീണത്. എട്ട് വർഷത്തിന് ശേഷം ഇന്ത്യൻ ടീമിലേക്ക് തിരിച്ചുവരവ് നടത്തിയ കരുൺ നായർക്ക് രണ്ടാം ഇന്നിങ്സിലും തിളങ്ങാനായില്ല. ഒന്നാം ഇന്നിങ്സിൽ 41 റൺസിന് ഇടയിലായിരുന്നു ഇന്ത്യയുടെ അവസാന ഏഴ് വിക്കറ്റുകൾ നഷ്ടമായത്. 

Also Read: Prithvi Shaw: കളം മാറ്റി ചവിട്ടാൻ പൃഥ്വി ഷാ; മുംബൈ വിടാൻ അനുവാദം തേടി

അഞ്ചാം ദിനം ലീഡ്സ് കാത്തുവെച്ചിരിക്കുന്ന അത്ഭുതം എന്ത്?

അവസാന ദിനം ബാസ്ബോൾ ശൈലിയിൽ ഇംഗ്ലണ്ട് തകർപ്പൻ ചെയ്സ് നടത്തി ജയിച്ചു കയറുമോ? അതോ ബുമ്ര നേതൃത്വം നൽകുന്ന ബോളിങ് നിര ഇംഗ്ലണ്ടിനെ തകർത്തിടുമോ? അതുമല്ലെങ്കിൽ സമനിലയിലേക്ക് കളി എത്തിക്കാൻ ഇംഗ്ലണ്ടിനാവുമോ? എന്തായാലും പരമ്പരയിലെ ആദ്യ ടെസ്റ്റിന്റെ അവസാന ദിനം ആവേശകരമാകുമെന്ന് ഉറപ്പ്. 

404 റൺസ് ആണ് ഹെഡിങ്ലേയിൽ നാലാം ഇന്നിങ്സിൽ ചെയ്സ് ചെയ്ത് ജയിച്ച ഏറ്റവും ഉയർന്ന സ്കോർ. 1948ൽ ആണ് ഇത്. ഇംഗ്ലണ്ടിനെതിരെ ബ്രാഡ്മാന്റെ ഓസ്ട്രേലിയയാണ് ഈ കൂറ്റൻ വിജയ ലക്ഷ്യം മറികടന്നത്. ഹെഡിങ്ലേയിൽ നാലാം ഇന്നിങ്സിൽ ചെയ്ത് ചെയ്ത് ജയിച്ച രണ്ടാമത്തെ ഉയർന്ന സ്കോർ 359 റൺസ് ആണ്. 2019ൽ ഓസ്ട്രേലിയക്കെതിരെ ഇംഗ്ലണ്ട് ആണ് ഈ ജയം പിടിച്ചത്. 

Also Read: India Vs England: ഋഷഭ് പന്ത് 134ന് പുറത്തായതിന് കാരണം ഗംഭീർ; ആരോപണവുമായി ദിനേശ് കാർത്തിക്

കെ എൽ രാഹുലും ഋഷഭ് പന്തും ചേർന്നുള്ള 195 റൺസ് കൂട്ടുകെട്ടാണ് ഇന്ത്യയെ ലീഡ് ഉയർത്താൻ സഹായിച്ചത്. ഋഷഭ് പന്ത് ഇംഗ്ലണ്ട് മണ്ണിലെ ടെസ്റ്റിൽ രണ്ട് ഇന്നിങ്സിലും സെഞ്ചുറി നേടുന്ന ആദ്യ ഇന്ത്യൻ താരമായി. ഇംഗ്ലണ്ട് ബോളർമാരുടെ ലൈനും ലെങ്ത്തും തെറ്റിക്കുന്ന ശൈലിയിലാണ് ഋഷഭ് പന്ത് ലീഡ്സിൽ രണ്ടാം ഇന്നിങ്സിൽ ബാറ്റ് വീശിയത്. 

Also Read: എല്ലാ ഭാരവും ബുമ്രയുടെ മേൽ; 40 ഓവർ വരെ ശാർദുലിനെ മാറ്റി നിർത്തിയത് എന്തിന്?

ഋഷഭ് പന്തിന്റെ ടെസ്റ്റ് കരിയറിലെ എട്ടാമത്തെ സെഞ്ചുറിയാണ് ഇത്. ഇംഗ്ലണ്ട് മണ്ണിലെ നാലാമത്തെ സെഞ്ചുറിയും. ലീഡ്സ് ടെസ്റ്റിന്റെ ഒന്നാം ഇന്നിങ്സിൽ സിക്സ് പറത്തിയാണ് പന്ത് സെഞ്ചുറി തികച്ചത്. ഇംഗ്ലണ്ട് സ്പിന്നർ ബാഷിറിന് എതിരെയായിരുന്നു ഇത്. രണ്ടാം ഇന്നിങ്സിൽ പന്ത് സെഞ്ചുറി പിന്നിട്ടത് ബാഷിറിനെതിരെ സിംഗിളെടുത്തും. 

ആദ്യ ഇന്നിങ്സിൽ സ്കോർ ഉയർത്താനാവാതിരുന്നതിന്റെ നിരാശ കെ എൽ രാഹുൽ രണ്ടാം ഇന്നിങ്സിൽ തീർത്ത് സെഞ്ചുറിയിലേക്കും എത്തി.202 പന്തിൽ നിന്നാണ് രാഹുൽ സെഞ്ചുറിയിലേക്ക് എത്തിയത്. രാഹുലിന്റെ ടെസ്റ്റ് കരിയറിലെ ഒൻപതാമത്തെ സെഞ്ചുറിയാണ് ഇത്. ഇതിൽ എട്ടും ഇന്ത്യക്ക് പുറത്ത് നിന്നാണ് രാഹുൽ നേടിയത്. 

Read More: India Vs England: വീണതാണ് എന്ന് കരുതിയോ? പന്തിന്റെ ബുദ്ധിയാണത്; സച്ചിൻ വിശദീകരിക്കുന്നു