Sanju Samson: സഞ്ജുവിന്റെ സ്ഥാനം തെറിക്കുമോ? നിർണായക പ്രതികരണവുമായി ഗംഭീർ

ഇംഗ്ലണ്ടിന് എതിരായ ട്വന്റി20 പരമ്പരയിൽ അഞ്ച് കളിയിലും മലയാളി താരം സഞ്ജു സാംസൺ ബാറ്റിങ്ങിൽ പരാജയപ്പെട്ടു. ഇംഗ്ലീഷ് പേസർമാരുടെ ഷോർട്ട് പിച്ച് പന്തുകൾ അതിജീവിക്കാനാവാതെയാണ് സഞ്ജു വിക്കറ്റുകൾ വലിച്ചെറിഞ്ഞത്. അഞ്ച് കളിയിലും നിരാശപ്പെടുത്തിയതോടെ ഇന്ത്യൻ ടീമിലെ സഞ്ജുവിന്റെ ഭാവി സംബന്ധിച്ചും ചോദ്യങ്ങൾ ഉയർന്നു. 

എന്നാൽ സഞ്ജുവിന് ആശങ്കപ്പെടേണ്ട സാഹചര്യമില്ല എന്ന സൂചന നൽകുകയാണ് പരിശീലകൻ ഗംഭീർ. വാങ്കഡെയിൽ നടന്ന അഞ്ചാം ട്വന്റി20യും ജയിച്ച് പരമ്പര 4-1ന് സ്വന്തമാക്കിയതിന് പിന്നാലെയാണ് സഞ്ജുവിനെ പിന്തുണച്ച് ഗംഭീർ സംസാരിച്ചത്. മോശം ഫോമിൽ തുടരുന്ന ക്യാപ്റ്റൻ സൂര്യകുമാർ യാദവിനേയും ഗംഭീർ പിന്തുണയ്ക്കുന്നു. 

ഞങ്ങൾക്ക് വേണ്ടത് അഗ്രസീവ് ബ്രാൻഡ് ക്രിക്കറ്റ്

ആക്രമിച്ച് കളിക്കുന്ന ക്രിക്കറ്റ് ആണ് കളിക്കാരിൽ നിന്ന് ഞങ്ങൾ ആവശ്യപ്പെടുന്നത്. പല മത്സരങ്ങളിലും അവർക്ക് മികച്ച പ്രകടനം പുറത്തെടുക്കാനായേക്കില്ല. പക്ഷേ നമ്മൾ മുൻപോട്ട് വയ്ക്കുന്ന ആശയത്തിന് അനുസരിച്ചാണ് അവർ കളിക്കുന്നത്. ടീമിന് വേണ്ടി ഏറ്റവും മികച്ച കളി പുറത്തെടുക്കാനാണ് അവരുടെ ശ്രമം, സഞ്ജു, സൂര്യ ഉൾപ്പെടെയുള്ള താരങ്ങളെ പിന്തുണച്ച് ഗംഭീർ പറഞ്ഞു. 

യശസ്വി ജയ്സ്വാൾ, ശുഭ്മാൻ ഗിൽ എന്നിവരെ ഇന്ത്യ ട്വന്റി20 ഓപ്പണിങ് സ്പോട്ടിലേക്ക് പരിഗണിക്കുന്ന സാഹചര്യത്തിൽ സഞ്ജുവിന് മേലുള്ള സമ്മർദം ഇപ്പോൾ കൂടുതലാണ്. വാങ്കഡെയിൽ ട്വന്റി20യിൽ ഏഴ് പന്തിൽ നിന്ന് 16 റൺസ് മാത്രമെടുത്താണ് സഞ്ജു മടങ്ങിയത്. 

അഞ്ച് ട്വന്റി20യിൽ ആദ്യ മൂന്നിലും ആർച്ചറുടെ ഷോർട്ട് പിച്ച് പന്തിന് മുൻപിലാണ് സഞ്ജു വീണത്. നാലാം ട്വന്റി20യിൽ പുനെയിൽ സാഖിബ് മഹ്മൂദിന്റെ ഷോർട്ട് പിച്ച് പന്തിൽ വിക്കറ്റ് നൽകി സഞ്ജു മടങ്ങുകയായിരുന്നു.  26, 5, 3, 1, 16 എന്നതാണ് പരമ്പരയിലെ സഞ്ജുവിന്റെ സ്കോറുകൾ. പരമ്പരയിലെ അഞ്ച് മത്സരത്തിലും പരാജയപ്പെട്ടതോടെ സഞ്ജുവിന്റെ ഇന്ത്യൻ ടീമിലെ ഓപ്പണിങ് സ്ഥാനത്തിനും കോട്ടം തട്ടുന്നുണ്ട്. സ്ഥിരത ഇല്ലായ്മ എന്ന വിമർശനം സഞ്ജുവിന് നേരെ ഇനി ശക്തമായി ഉയരാനാണ് സാധ്യത. 

ആദ്യ ട്വന്റി20യിൽ ഇംഗ്ലണ്ടിന് എതിരെ മൂന്ന് പന്തിൽ സൂര്യകുമാർ ഡക്കായിരുന്നു. രണ്ടാം ട്വന്റി20യിൽ ഏഴ് പന്തിൽ നിന്ന് നേടിയത് 12 റൺസ്. മൂന്നാം ട്വന്റി20യിൽ ഏഴ് പന്തിൽ നിന്ന് സൂര്യ കണ്ടെത്തിയത് 14 റൺസ്. നാലാം ട്വന്റി20യിൽ നാല് പന്തിലാണ് സൂര്യ ഡക്കായത്. പരമ്പര അവസാന ട്വന്റി20യിലേക്ക് എത്തിയപ്പോൾ മൂന്ന് പന്തിൽ നിന്ന് രണ്ട് റൺസ് മാത്രമാണ് സൂര്യക്ക് കണ്ടെത്താനായത്. 

Read More

• india Vs England Twenty20: 97 റൺസിന് ഇംഗ്ലണ്ട് പുറത്ത്; ഇന്ത്യക്ക് കൂറ്റൻ ജയം
• Indian Women Cricket Team: ഇന്ത്യൻ പെൺപടയ്ക്ക് അഞ്ച് കോടി; പാരിതോഷികം
•  പ്രഖ്യാപിച്ച് ബിസിസിഐ
• Abhishek Sharma Century: വാങ്കഡേയിൽ 'അഭിഷേക് ഷോ'; 37 പന്തിൽ സെഞ്ചുറി
• India Vs England Twenty20: വീണ്ടും നിരാശപ്പെടുത്തി സഞ്ജു; അഞ്ചാം വട്ടവും വീണത് ഷോർട്ട് പിച്ച് പന്തിൽ