സുനേരി ബാഗ് റോഡിലെ ബംഗ്ലാവ് രാഹുൽ ഗാന്ധിയുടെ ഔദ്യോഗിക വസതിയായേക്കും

ന്യൂഡൽഹി: ലോക്സഭാ പ്രതിപക്ഷ നേതാവ് രാഹുൽ ഗാന്ധിക്ക് ഡൽഹിയിൽ പുതിയ വസതി ഒരുങ്ങുന്നു. സുനേരി ബാഗ് റോഡിലെ അഞ്ചാം നമ്പർ ബംഗ്ലാവ് രാഹുലിന്റെ ഔദ്യോഗിക വസതി ആയേക്കുമെന്ന് വൃത്തങ്ങൾ പറഞ്ഞു. കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി ഇന്നലെ ബംഗ്ലാവ് സന്ദർശിച്ചിരുന്നു.

നിലവിൽ മുൻ മന്ത്രി എ.നാരായൺ സ്വാമിയാണ് ഇവിടെ താമസിക്കുന്നത്. അദ്ദേഹം ഇതുവരെ ബംഗ്ലാവ് ഒഴിഞ്ഞിട്ടില്ല. അദ്ദേഹം വസതി ഒഴിഞ്ഞതും ലോക്‌സഭാ സെക്രട്ടറിയേറ്റിന് ബംഗ്ലാവ് കൈമാറും. ഉടൻ തന്നെ രാഹുലിന് അനുവദിക്കുമെന്നാണ് സർക്കാർ വൃത്തങ്ങൾ അറിയിച്ചത്. അതേസമയം, രാഹുൽ ഗാന്ധിക്ക് ബംഗ്ലാവ് വാഗ്‌ദാനം ചെയ്തിട്ടുണ്ടെങ്കിലും അദ്ദേഹം ഇതുവരെ മറുപടി പറഞ്ഞിട്ടില്ല. 

തുഗ്ലക് ലെയ്‌നിലെ 12-ാം നമ്പർ വീട്ടിലാണ് രാഹുൽ 19 വർഷത്തോളം താമസിച്ചിരുന്നത്. അപകീർത്തി പരാമർശത്തിൽ ശിക്ഷ വിധിക്കപ്പെട്ടതോടെ ഈ വസതി രാഹുൽ ഒഴിഞ്ഞു. പിന്നീട് കുറ്റവിമുക്തനായശേഷവും 10 ജന്‍പഥില്‍ അമ്മ സോണിയ ഗാന്ധിക്കൊപ്പമാണ് രാഹുൽ താമസിച്ചുവരുന്നത്. 

ലോക്സഭാ പ്രതിപക്ഷ നേതാവായി തിരഞ്ഞെടുക്കപ്പെട്ടതോടെ രാഹുൽ കാബിനറ്റ് മന്ത്രി റാങ്കിലുള്ള ടൈപ് എട്ട് കാറ്റഗറിയിലേക്ക് മാറിയിരുന്നു. കാബിനറ്റ് മന്ത്രിമാര്‍, സുപ്രീംകോടതി, ഹൈക്കോടതി ജഡ്ജിമാര്‍, കേന്ദ്രമന്ത്രിമാര്‍, സര്‍ക്കാരിലെ പ്രധാന സെക്രട്ടറിമാര്‍ എന്നിവര്‍ക്കാണ് ടൈപ് എട്ട് ബംഗ്ലാവ് അനുവദിക്കാറുള്ളത്. സുനേരി ബാഗിൽ രാഹുൽ താമസിക്കാനെത്തിയാൽ സുപ്രീംകോടതി ചീഫ് ജസ്റ്റിസ് ഡി.വൈ.ചന്ദ്രചൂഡ് അയല്‍ക്കാരിലൊരാളായിരിക്കും.

Read More

• പ്രതിപക്ഷ ശബ്ദമാകാൻ മമത, നിതി ആയോഗ് യോഗത്തിൽ പങ്കെടുക്കും
• ഗവർണർക്കെതിരെ പ്രസ്താവന നടത്താം; മമത ബാനജിക്ക് ആശ്വാസമായി ഹൈക്കോടതി വിധി
• ഇന്ത്യയിലെ വിവിധ കോടതികളിൽ കെട്ടിക്കിടക്കുന്നത് അഞ്ച് കോടിയിലധികം കേസുകൾ
• റെയിൽവേ ആക്രമണത്തിന് പിന്നിൽ വ്യക്തമായ ലക്ഷ്യമുണ്ടെന്ന് ഫ്രഞ്ച് പ്രധാനമന്ത്രി