വിമാനത്തിൽ വിളമ്പിയ ഓംലെറ്റിൽ പാറ്റ; 2 വയസ്സുകാരിക്ക് ഭക്ഷ്യവിഷബാധ

ഡൽഹി: എയർ ഇന്ത്യ വിമാനത്തിൽ വിളമ്പിയ ഭക്ഷണത്തിൽ നിന്നു പാറ്റയെ കണ്ടെത്തിയതായി യാത്രക്കാരി. ഭക്ഷണം കഴിച്ച ശേഷം, തനിക്കും രണ്ടു വയസ്സുകാരിയായ മകൾക്കും ഭക്ഷ്യ വിഷബാധ ഉണ്ടായതായി യുവതി ആരോപിച്ചു. സെപ്റ്റംബർ 17ന് ഡൽഹിയിൽ നിന്ന് ന്യൂയോർക്കിലേക്ക് പുറപ്പെട്ട വിമാനത്തിലാണ് ദുരനുഭവം ഉണ്ടായതെന്ന് എക്സിൽ പങ്കുവച്ച കുറിപ്പിൽ യുവതി വ്യക്തമാക്കി.

പ്രഭാതഭക്ഷണത്തോടൊപ്പം വിളമ്പിയ ഓംലെറ്റിലാണ് പാറ്റയെ കണ്ടെത്തിയത്. ഓംലെറ്റിന്റെ ദൃശ്യങ്ങളും യാത്രക്കാരി സോഷ്യൽ മീഡിയയിൽ പങ്കുവച്ചിട്ടുണ്ട്. 'പകുതിയിൽ കൂടുതൽ കഴിച്ച ശേഷമാണ് ഭക്ഷണത്തിൽ പാറ്റയെ കണ്ടെത്തിയത്. ഭക്ഷണം രണ്ടു വയസ്സുള്ള കുഞ്ഞിനും നൽകിയിരുന്നു. ഭക്ഷണം കഴിച്ച ശേഷം ശാരീരികമായി അസ്വസ്ഥത അനുഭവപ്പെട്ടിരുന്നു. യാത്രയുടെ തുടക്കത്തിൽ തന്നെ തങ്ങൾക്ക് ഭക്ഷ്യവിഷബാധയേറ്റതിൽ അതിശയിക്കാനില്ല," യാത്രക്കാരി കുറിച്ചു.

Found a cockroach in the omelette served to me on the @airindia flight from Delhi to New York. My 2 year old finished more than half of it with me when we found this. Suffered from food poisoning as a result. @DGCAIndia@RamMNKpic.twitter.com/1Eyc3wt3Xw

— Suyesha Savant (@suyeshasavant) September 28, 2024

സിവിൽ ഏവിയേഷൻ മന്ത്രി കെ. രാംമോഹൻ നായിഡുവിനെയും, എയർ ഇന്ത്യയുടെ ഏവിയേഷൻ കാറ്ററിങ് സർവീസ് പ്രൊവൈഡർ താജ്‌സാറ്റ്‌സിനെയും ടാഗ് ചെയ്താണ് യുവതി പോസ്റ്റ് പങ്കുവച്ചത്. എയർ ഇന്ത്യയെ വിശ്വസിച്ചിരുന്ന യാത്രക്കാരായിരുന്നു തങ്ങളെങ്കിലും, ഇപ്പോൾ മടക്കയാത്ര ഭയപ്പെടുന്നുവെന്നും യുവതി കുറിച്ചു.

അതേസമയം, സംഭവത്തിൽ ആശങ്കയുണ്ടെന്നും, അന്വേഷണം ആരംഭിച്ചതായും, എയർ ഇന്ത്യ വക്താവ് പ്രതികരിച്ചു. "കാറ്ററിങ് അധികൃതരെ കൂടുതൽ അന്വേഷണങ്ങൾക്കായി സമീപിച്ചിട്ടുണ്ട്. ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ നടപടികൾ സ്വീകരിക്കും," വക്താവ് പറഞ്ഞു.

Read More

• വ്യോമാക്രമണത്തിൽ ഹിസ്ബുല്ല തലവൻ ഹസൻ നസ്റല്ല കൊല്ലപ്പെട്ടതായി ഇസ്രയേൽ
• യുഎൻ ജനറൽ അസംബ്ലിയിൽ കശ്മീർ വിഷയം ഉയർത്തി പാക്കിസ്ഥാൻ, തിരിച്ചടിച്ച് ഇന്ത്യ
• പിതാവിന്റെ രോഗം പ്രചോദനമായി; പ്രമേഹരോഗികൾക്ക് ആശ്വാസമായി കോമൾ പാണ്ഡയുടെ കണ്ടുപിടിത്തം
• ബംഗ്ലാദേശ് പ്രക്ഷോഭത്തിന്റെ ബുദ്ധികേന്ദ്രം ആര്: വെളിപ്പെടുത്തലുമായി മുഹമ്മദ് യൂനുസ്
• 749 ജഡ്ജിമാരിൽ സ്വത്ത് വിവരങ്ങൾ വെളിപ്പെടുത്തിയത് 98 പേർ മാത്രം, കൂടുതലും കേരള ഹൈക്കോടതിയിലുള്ളവർ
• വ്യത്യസ്ത മത വിഭാഗങ്ങളിൽപ്പെട്ടവരുടെ പ്രണയത്തെ ചൊല്ലി ഡെറാഡൂൺ റെയിൽവേ സ്റ്റേഷനിൽ സംഘർഷം