പഹൽഗാം ഭീകരാക്രമണം; പാകിസ്ഥാൻ സൂപ്പർ ലീഗ് സംപ്രേഷണം ഇന്ത്യയിൽ നിർത്തിവച്ചു

പഹൽഗാമിലുണ്ടായ ഭീകരാക്രമണത്തിൽ 26 പേർ കൊല്ലപ്പെടുകയും 10 പേർക്ക് പരിക്കേൽക്കുകയും ചെയ്ത സംഭവത്തിന്റെ പശ്ചാത്തലത്തിൽ, പാകിസ്ഥാൻ സൂപ്പർ ലീഗിന്റെ സംപ്രേഷണം ഇന്ത്യയിൽ നിർത്തിവച്ചു. പാകിസ്ഥാൻ ലീഗുമായി (പിഎസ്എൽ) ബന്ധപ്പെട്ട എല്ലാ ഉള്ളടക്കങ്ങളും ലൈവ് സ്ട്രീമിംഗ് പ്ലാറ്റ്‌ഫോമായ ഫാൻകോഡ് നീക്കം ചെയ്തു.

പിഎസ്എൽ സംപ്രേഷണം അവസാനിപ്പിക്കുന്നതുമായി ബന്ധപ്പെട്ട് ഫാൻകോഡിൽ നിന്ന് ഔദ്യോഗിക സ്ഥിരീകരണം വന്നിട്ടില്ല. ടൂർണമെന്റിന്റെ ആദ്യ 13 മത്സരങ്ങൾ പ്ലാറ്റ്‌ഫോമിൽ സ്ട്രീം ചെയ്തിരുന്നു. ഭീകരാക്രമണത്തിനു പിന്നാലെ പാക്കിസ്ഥാനെതിരെ നടപടികൾ കടുപ്പിച്ചിരിക്കുകയാണ് ഇന്ത്യ. കായിക ലോകത്തും ആക്രമണത്തിനെതിരായ പ്രതിഷേധം ശക്തമാണ്. 

ബുധനാഴ്ച, പഹൽഗാം ഭീകരാക്രമണത്തെ അപലപിച്ച് ബിസിസിഐ പ്രസ്താവന ഇറക്കിയിരുന്നു. മുൻകാല സംഘർഷങ്ങളുടെ പശ്ചാത്തലത്തിൽ ഇന്ത്യയും പാകിസ്ഥാനും തമ്മിൽ വർഷങ്ങളായി ദ്വിരാഷ്ട്ര ക്രിക്കറ്റ് പരമ്പരകൾ കളിക്കാറില്ല.

പഹൽഗാം ഭീകരാക്രമണത്തിൽ നിരപരാധികളായ നിരവധി പേരുടെ ജീവൻ നഷ്ടപ്പെട്ടതിൽ ക്രിക്കറ്റ് സമൂഹം അഗാധമായ ഞെട്ടലും ദുഃഖവും രേഖപ്പെടുത്തുന്നുവെന്ന്, ബിസിസിഐ സെക്രട്ടറി ദേവജിത് സൈകിയ പ്രസ്താവനയിൽ പറഞ്ഞു. സംഭവത്തിൽ അഗാധമായ ദുഃഖമുണ്ടെന്നും, ഇരകളുടെ കുടുംബങ്ങൾക്ക് ഹൃദയംഗമമായ അനുശോചനം രേഖപ്പെടുത്തുന്നതായും ക്രിക്കറ്റ് താരം വിരാട് കോഹ്ലി സോഷ്യൽ മീഡിയ പോസ്റ്റിൽ പറഞ്ഞു. ക്രിക്കറ്റ് ഇതിഹാസം സച്ചിൻ ടെണ്ടുൽക്കറും അനുശോചനം അറിയിച്ചിരുന്നു.

Read More

• Jammu Kashmir Terror Attack: ഇന്ത്യ തിരിച്ചടിയ്ക്ക് തയ്യാറെടുക്കുന്നോ ? മിസൈലുകൾ പരീക്ഷിച്ച് നാവികസേന
• Jammu Kashmir Terror Attack: പഹൽഗാം ഭീകരാക്രമണം രാജ്യത്തിന്റെ ആത്മാവിനേറ്റ മുറിവ്, ഭീകരരെ വെറുതെ വിടില്ലെന്ന് നരേന്ദ്ര മോദി
• പഹൽഗാമ ഭീകരാക്രമണം: കടുത്ത നടപടികളിലേക്ക് നീങ്ങി ഇന്ത്യ; പാക് നയതന്ത്രജ്ഞനെ വിളിച്ചുവരുത്തി
• വിവാഹം, ഹണിമൂൺ, ശവസംസ്കാരം; ആ യാത്ര ഒരു പേടിസ്വപ്നമായി മാറുമെന്ന് ഒരിക്കലും കരുതിയില്ല: നാവിക ഉദ്യോഗസ്ഥന്റെ ഭാര്യ
• പഹൽഗാം ഭീകരാക്രമണം; കടുത്ത നടപടികളുമായി ഇന്ത്യ; പാക് പൗരന്മാർ 48 മണിക്കൂറിനുള്ളിൽ രാജ്യം വിടണം