Kashmir Cloudburst: കശ്മീരിലെ മേഘവിസ്‌ഫോടനം; മരണസംഖ്യ 28 ആയി

Jammu Kashmir Kishtwar Cloudburst Updates: ശ്രീനഗർ: ജമ്മുകശ്മീരിലെ കിഷ്ത്വാർ ജില്ലയിലുണ്ടായ മേഘവിസ്‌ഫോടനത്തെ തുടർന്നുണ്ടായ മിന്നൽ പ്രളയത്തിൽ മരിച്ചവരുടെ എണ്ണം 28 ആയി. 79 പേർക്ക് പരിക്കേറ്റു. ഇതിൽ ഗുരുതര പരിക്കേറ്റ 35പേരെ വിദഗ്ധ ചികിത്സയ്ക്കായി കിഷ്ത്വാറിലെ ജില്ലാ ആശുപത്രിയിലേക്ക് മാറ്റി.

കിഷ്ത്വാർ ജില്ലയിലെ വിദൂര മേഖലയായ ചൊസിതിയിലാണ് മിന്നൽ പ്രളയം ഉണ്ടായത്. മേഖലയിലെ ചസോട്ടി ഗ്രാമത്തിലാണ് ദുരന്തമുണ്ടായത്. മച്ചൈൽ മാതാ തീർത്ഥാടനത്തിന്റെ ഭാഗമായി നിരവധി ആളുകൾ ഒത്തുകൂടിയിരുന്നത് ദുരന്തത്തിൻറെ വ്യാപ്തി വർധിപ്പിച്ചു. 2,800 മീറ്റർ ഉയരത്തിൽ സ്ഥിതി ചെയ്യുന്ന മച്ചൈൽ മാതാ ക്ഷേത്രത്തിലേക്ക് തീർത്ഥാടകർ വാഹനങ്ങൾ പാർക്ക് ചെയ്ത് കാൽനടയായി യാത്ര ആരംഭിക്കുന്ന സ്ഥലമാണ് ചൊസിതി. നിരവധി തീർഥാടകരാണ് പ്രദേശത്ത് തടിച്ചുകൂടിയത്.

Also Read:കശ്മീരിൽ മേഘവിസ്‌ഫോടനം; നിരവധി മരണം

കേന്ദ്ര ആഭ്യന്തര മന്ത്രി അമിത് ഷാ, കശ്മീർ ലെഫ്റ്റനന്റ് ഗവർണർ മനോജ് സിൻഹയുമായും മുഖ്യമന്ത്രി ഒമർ അബ്ദുള്ളയുമായും ടെലിഫോണിൽ സംസാരിച്ച് സ്ഥിതിഗതികൾ വിലയിരുത്തി. ദേശീയ ദുരന്ത നിവാരണ സേനയുടെ (എൻഡിആർഎഫ്) രണ്ട് ടീമുകളെ ഉദംപൂരിൽ നിന്ന് കിഷ്ത്വാറിലേക്ക് അയച്ചിട്ടുണ്ട്. രക്ഷാപ്രവർത്തനം തുടരുകയാണെന്ന് കിഷ്ത്വാർ ഡെപ്യൂട്ടി കമ്മീഷണർ പങ്കജ് കുമാർ ശർമ്മ പറഞ്ഞു.

Also Read:ട്രംപിന്റെ സമ്മർദ്ദ തന്ത്രങ്ങൾക്കിടെ എസ്. ജയ്‌ശങ്കർ റഷ്യയിലേക്ക്; ചൈനീസ് വിദേശകാര്യ മന്ത്രി ഇന്ത്യയിലേക്ക്

അപകടത്തിൽ കൊല്ലപ്പെട്ടവരുടെ കുടുംബാംഗങ്ങളെ പ്രധാനമന്ത്രി നരേന്ദ്ര മോദി അനുശോചനം അറിയിച്ചു. കിഷ്ത്വാറിൽ മേഘവിസ്‌ഫോടനത്തിലും വെള്ളപ്പൊക്കത്തിലും ദുരിതമനുഭവിക്കുന്ന എല്ലാവരോടും എന്റെ പ്രാർത്ഥനകൾ പങ്കുവയ്ക്കുന്നു. സ്ഥിതിഗതികൾ സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്. രക്ഷാപ്രവർത്തനങ്ങളും ദുരിതാശ്വാസ പ്രവർത്തനങ്ങളും പുരോഗമിക്കുകയാണ്.- പ്രധാനമന്ത്രി എക്സിൽ കുറിച്ചു.

Also Read: ബിസിനസുകാരന്റെ 60 കോടി തട്ടിയെന്ന് പരാതി; ശിൽപ്പ ഷെട്ടിക്കും ഭർത്താവിനുമെതിരെ വഞ്ചനാകേസ്

മേഖലയിൽ രക്ഷാപ്രവർത്തനം പുരോഗമിക്കുകയാണെന്ന് മുഖ്യമന്ത്രിയുടെ ഓഫീസും അറിയിച്ചു. അതേസമയം, നിരവധി ആളുകൾ ഒത്തുകൂടിയിരുന്നതിനാൽ മരണസംഖ്യ ഇനിയും ഉയരാനുള്ള സാധ്യതയുണ്ട്. പ്രദേശത്തെ നിരവധി വീടുകളും കടകളും മിന്നൽ പ്രളയത്തിൽ ഒലിച്ചുപോയി. കഴിഞ്ഞ ആഴ്ച ഉത്തരാഖണ്ഡിലെ ഉത്തരകാശിയിലുണ്ടായ മിന്നൽ പ്രളയത്തിൽ നിരവധിയാളുകളാണ് കൊല്ലപ്പെട്ടത്.

Read More: പ്രായം 124 നോട്ട്ഔട്ട്; കന്നി വോട്ടർ; തിരഞ്ഞെടുപ്പ് കമ്മിഷൻ വെട്ടിലാക്കിയ 35കാരി