Eid Al Adha 2024: സൗദിയിൽ മാസപ്പിറവി കണ്ടു, ബലിപെരുന്നാള്‍ 16ന്

റിയാദ്: വ്യാഴാഴ്ച സൗദിയിൽ ദുൽഹജ്ജ് മാസപ്പിറവി ദൃശ്യമായി. റിയാദിന് സമീപം ഹരീഖിലാണ് പിറ ദൃശ്യമായത്. ഇതോടെ ഈ മാസം 16ന് ബലിപെരുന്നാള്‍ ആയിരിക്കുമെന്ന് ഉറപ്പായി. വെള്ളിയാഴ്ച ദുൽഹജ്ജ് ഒന്നായിരിക്കും. അറഫ സംഗമം ഈ മാസം 15നും ആയിരിക്കും. വെള്ളിയാഴ്ച, ദുൽഹിജ്ജ മാസത്തിൻ്റെ തുടക്കമാണെന്ന് സൗദി അറേബ്യയിലെ സുപ്രീം കോടതി പ്രഖ്യാപിച്ചു.

അറഫാത്ത് ജൂൺ 15 ശനിയാഴ്ച ആയിരിക്കുമെന്നും മാസപ്പിറവി കണ്ടതിന് ശേഷം സുപ്രീം കോടതി അറിയിച്ചു. ജൂൺ 6 വ്യാഴാഴ്ച, ദുൽ ഖഅദയുടെ അവസാന ദിവസമാണ്. ജൂൺ 7 വെള്ളിയാഴ്ച ദുൽഹിജ്ജയുടെ ആദ്യ ദിവസവുമാണ്. ഇതിനർത്ഥം ഈദ് അൽ അദ്ഹയുടെ ആദ്യ ദിവസം ജൂൺ 16 ഞായറാഴ്ച (ദുൽ ഹിജ്ജ 10) ആയിരിക്കുമെന്നും കോടതി അറിയിച്ചു.

അതേസമയം, ദുൽഹജ്ജ്​ മാസപ്പിറവി ദൃശ്യമാകാത്തതിനാൽ ഒമാനിൽ ബലി​പെരുന്നാൾ ജൂൺ 17 തിങ്കളാഴ്ച ആയിരിക്കുമെന്ന് അധികൃതര്‍ അറിയിച്ചു. ഒമാൻ മതകാര്യ മന്ത്രാലയമാണ് ഇക്കാര്യം സ്ഥിരീകരിച്ചത്. ദുൽഹജ്ജ്​ മാസപ്പിറവി നിരീക്ഷിക്കാൻ പൗരൻമാരോടും താമസക്കാരോടും എൻഡോവ്‌മെന്റ്, മതകാര്യ മന്ത്രാലയം ആവശ്യപ്പെട്ടിരുന്നു​. ബലി​ പെരുന്നാളിനോട് അനുബന്ധിച്ചുള്ള പൊതുഅവധി ഇനി വരുന്ന ദിവസങ്ങളിൽ പ്രഖ്യാപിക്കും.

സൗദി അറേബ്യയും യുഎഇയും പോലുള്ള ഇസ്ലാമിക രാജ്യങ്ങൾക്ക്, ബലിപെരുന്നാള്‍ ഏറ്റവും പ്രതീക്ഷിക്കുന്ന മതപരമായ അവധി ദിവസങ്ങളിൽ ഒന്നാണ്. മിക്ക ജീവനക്കാർക്കും ഒരു നീണ്ട വാരാന്ത്യ അവധിയാണ് അനുവദിച്ചിരിക്കുന്നത്. ഗവൺമെൻ്റിൻ്റെ പൊതു അവധി ദിവസങ്ങളുടെ പട്ടിക പ്രകാരം യുഎഇ നിവാസികൾക്ക് അറഫാ ദിനത്തിന് (ദുൽ ഹിജ്ജ 9) ഒരു ദിവസവും ഈദ് അൽ അദ്ഹയ്ക്ക് (ദുൽ ഹിജ്ജ 10 മുതൽ 12 വരെ) മൂന്ന് ദിവസത്തെ അവധിയും ലഭിക്കും.

വിശ്വാസികൾ ബലി പെരുന്നാൾ എന്നറിയപ്പെടുന്ന ഈദ് അൽ അദ്ഹ പ്രത്യേക പ്രാർത്ഥനകൾ നടത്തിയാണ് അടയാളപ്പെടുത്തുന്നത്. ഇബ്രാഹിം നബിയുടെ വിശ്വാസ പരീക്ഷണത്തിൻ്റെ സ്മരണയ്ക്കായി കന്നുകാലികളെ അറുത്ത് ബലി നൽകും. അല്ലാഹുവിൻ്റെ കൽപ്പനയുടെ അടിസ്ഥാനത്തിൽ തൻ്റെ മകനെ ബലിയർപ്പിക്കാൻ തയ്യാറായ ഇബ്രാഹിം നബിയുടെ സന്നദ്ധത മാഹാത്മ്യം ആഘോഷിക്കാനാണ് ഈ ദിനം ആചരിക്കുന്നത്.

Read More

• കങ്കണ റണാവത്തിന് സിഐഎസ്‌എഫ് ഉദ്യോഗസ്ഥയുടെ മര്‍ദനം
• ക്രെഡിറ്റ് സുരേന്ദ്രനോ? ബിജെപി പോസ്റ്റിനെക്കുറിച്ച് അറിയില്ലെന്ന് സുരേഷ് ഗോപി
• സംസ്ഥാനത്ത് മഴ കനക്കും; എട്ട് ജില്ലകളിൽ മുന്നറിയിപ്പ്
• തോൽവി താത്കാലിക പ്രതിഭാസം, പുതിയൊരു മന്ത്രി വരും: ഇ.പി ജയരാജന്‍
• രാജ്യസഭാ സീറ്റ് കിട്ടിയേ തീരൂവെന്ന് ഘടകകക്ഷികൾ; എൽഡിഎഫിൽ പ്രതിസന്ധി
• 'ഇടതുപക്ഷത്തിന്റെ കേന്ദ്രവിരുദ്ധ സമരങ്ങൾ ഗുണം ചെയ്തത് യുഡിഎഫിന്'; കെ. രാധാകൃഷ്ണൻ ഇന്ത്യൻ എക്സ്പ്രസിനോട്