ഫിൻജാൽ ചുഴലിക്കാറ്റ് നാളെ തീരത്തേക്ക്; തമിഴ്നാട്ടിൽ കനത്ത ജാഗ്രത; 13 വിമാനങ്ങൾ റദ്ദാക്കി

ചെന്നൈ: തെക്കുപടിഞ്ഞാറൻ ബംഗാൾ ഉൾക്കടലിൽ രണ്ട് ദിവസത്തോളമായി നിശ്ചലമായി രൂപംകൊണ്ട ന്യൂനമർദം, വെള്ളിയാഴ്ച ഉച്ചയോടെ ഫിൻജാൽ ചുഴലിക്കാറ്റായി മാറി. ഈ വർഷം മൺസൂണിന് ശേഷം ബംഗാൾ ഉൾക്കടലിൽ രൂപംകൊള്ളുന്ന രണ്ടാമത്തെ ചുഴലിക്കാറ്റാണിത്. ചുഴലിക്കാറ്റിനെ തുടർന്ന് തമിഴ്നാട്ടിൽ കനത്ത ജാഗ്രതാ നിർദേശം പ്രഖ്യാപിച്ചിട്ടുണ്ട്.

ശനിയാഴ്ച ഉച്ചയോടെ ഫിൻജാൽ ചുഴലിക്കാറ്റ് തമിഴ്‌നാട് - പുതുച്ചേരി തീരം കടക്കുമെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) മുന്നറിയിപ്പ് നൽകി. വടക്ക്-വടക്കുപടിഞ്ഞാറ് ദിശയിലേക്ക് നീങ്ങി പുതുച്ചേരിക്ക് സമീപം കാരയ്ക്കലിനും മഹാബലിപുരത്തിനും ഇടയിൽ ചുഴലിക്കാറ്റായി മാറുമെന്ന് കാലവസ്ഥാ വകുപ്പ് പറഞ്ഞു.

ശനിയാഴ്ച കാറ്റിൻ്റെ വേഗത മണിക്കൂറിൽ 70-80 കി.മീ മുതൽ 90 കി.മീ വരെയാകുമെന്നും കാലാവസ്ഥാ വകുപ്പ് അറിയിച്ചു. നാളെ ചെന്നൈ അടക്കം 7 ജില്ലകളിൽ റെഡ് അലർട്ടാണ്. ചെന്നൈ, കാഞ്ചീപുരം, തിരുവള്ളൂർ, ചെങ്കൽപട്ട്, വില്ലുപുരം, കടലൂർ, കല്ലുറിച്ചി ജില്ലകളിലാണ് റെഡ് അലർട്ട്. ശക്തമായ കാറ്റിനും മിന്നലിനും ഇടിയോടുകൂടിയ അതിശക്തമായ മഴയ്ക്കും സാധ്യതയെന്നാണ് പ്രവചനം. തിരുവണ്ണാമല, അരിയലൂർ, മൈലാടുതുറൈ, സേലം, തഞ്ചാവൂർ, നാഗപട്ടണം എന്നീ ജില്ലകളിൽ ഓറഞ്ച് അലർട്ടാണ്.

വിമാനം റദ്ദാക്കി
മോശം കാലാവസ്ഥയെ തുടർന്ന് ചെന്നൈയിൽ നിന്നുള്ള 13 വിമാനങ്ങൾ റദ്ദാക്കിയിട്ടുണ്ട്. ട്രിച്ചി - ചെന്നൈ, ചെന്നൈ - മംഗലാപുരം, ട്രിച്ചി - മംഗലാപുരം, ഹൈദരാബാദ് - ബെംഗളൂരു, ഗോൽകൊണ്ട - ചെന്നൈ ഉൾപ്പെടെ 13 വിമാനങ്ങളാണ് റദ്ദാക്കിയത്.

പരീക്ഷകൾ മാറ്റിവച്ചു
ഫിൻജാൽ ചുഴലിക്കാറ്റിനെ തുടർന്ന് നാളെ (നവംബർ 30) നടത്താനിരുന്ന ചിദംബരം അണ്ണാമലൈ യൂണിവേഴ്‌സിറ്റി, ചെന്നൈ യൂണിവേഴ്‌സിറ്റി, അണ്ണാ യൂണിവേഴ്‌സിറ്റി തുടങ്ങിയ യൂണിവേഴ്‌സിറ്റികളുടെ പരീക്ഷകൾ മാറ്റിവച്ചു. പുതുക്കിയ തീയതി പിന്നീട് അറിയിക്കും. അതേസമയം, ചെന്നൈ, തിരുവള്ളൂർ, കാഞ്ചീപുരം, ചെങ്കൽപട്ട്, മയിലാടുതുറൈ എന്നീ ജില്ലകളിലെ എല്ലാ സ്‌കൂളുകൾക്കും കോളേജുകൾക്കും നാളെ അവധി പ്രഖ്യാപിച്ചിട്ടുണ്ട്.

Read More

• അദാനിക്കെതിരെ അഴിമതിക്കുറ്റം ചുമത്തുന്നത് അമേരിക്ക മുൻകൂട്ടി അറിയിച്ചിരുന്നില്ല: വിദേശ വകുപ്പ്
• ശിൽപ ഷെട്ടിയുടെയും രാജ് കുന്ദ്രയുടെയും വീട്ടിലും ഓഫിസുകളിലും ഇഡി റെയ്ഡ്
• സംഭാലിൽ നടപടി തടഞ്ഞു; ഹൈക്കോടതിയെ സമീപിക്കുന്നതുവരെ കേസുമായി മുന്നോട്ടുപോകരുത്: സുപ്രീം കോടതി
• ഹേമന്ത് സോറൻ ജാർഖണ്ഡ് മുഖ്യമന്ത്രിയായി സത്യപ്രതിജ്ഞ ചെയ്തു
• ഭരണഘടന ഉയർത്തിപ്പിടിച്ച് സത്യപ്രതിജ്ഞ; പ്രിയങ്ക ഗാന്ധി ഇനി വയനാടിന്റെ 'എംപി'
• സോഷ്യൽ മീഡിയ, ഒടിടി പ്ലാറ്റ്‌ഫോമുകളെ നിയന്ത്രിക്കാൻ കർശന നിയമം വേണമെന്ന് കേന്ദ്രമന്ത്രി അശ്വിനി വൈഷ്ണവ്