ഡൽഹി മുഖ്യമന്ത്രിയെ വിടാതെ കേന്ദ്ര ഏജൻസികൾ; കേജ്‌രിവാൾ മൂന്ന് ദിവസത്തെ സിബിഐ കസ്റ്റഡിയിൽ

ഡൽഹി: മദ്യനയ അഴിമതിക്കേസിൽഅന്വേഷണ ഏജൻസി അറസ്റ്റ് ചെയ്ത് മണിക്കൂറുകൾക്ക് ശേഷം ഡൽഹി മുഖ്യമന്ത്രി അരവിന്ദ് കെജ്‌രിവാളിനെ ഡൽഹി കോടതി മൂന്ന് ദിവസത്തേക്ക് സിബിഐ കസ്റ്റഡിയിലേക്ക് വിട്ടു. എഎപി ദേശീയ കൺവീനറെ അഞ്ച് ദിവസത്തെ കസ്റ്റഡിയിൽ വിട്ടുകിട്ടാനായിരുന്നു സിബിഐ കോടതിയിൽ ആവശ്യപ്പട്ടത്. കഴിഞ്ഞ ദിവസമാണ് തിഹാർ ജയിലിൽ തടവിലുള്ള കെജ്രിവാളിനെ സിബിഎ അറസ്റ്റ് ചെയ്തത്.

അറസ്റ്റ് രേഖപ്പെടുത്തിയതിന് പിന്നാലെ ചൊവ്വാഴ്ച തിഹാർ ജയിലിൽ വെച്ച് സിബിഐ കെജ്രിവാളിനെ ചോദ്യം ചെയ്തതായി വൃത്തങ്ങൾ അറിയിച്ചു. മദ്യനയ കേസുമായി ബന്ധപ്പെട്ട് ഇഡി കള്ളപ്പണ ഇടപാട് അന്വേഷിക്കുമ്പോൾ, കേസിലെ പൊതുപ്രവർത്തകരുടെ അഴിമതിയും കൈക്കൂലിയും തെളിയിക്കുന്നതിനായാണ് സിബിഐ  അന്വേഷണം നടത്തുന്നത്. കള്ളപ്പണം വെളുപ്പിക്കൽ കേസിൽ മാർച്ച് 21 നാണ് ഇ.ഡി കെജ്രിവാളിനെ അറസ്റ്റ് ചെയ്തത്. അഴിമതി നിരോധന നിയമം (പിസി ആക്ട്) പ്രകാരം 2022 ൽ കേജ്രിവാളിനെതിരെ സിബിഐ അഴിമതിക്ക് കേസെടുത്തിരുന്നുവെങ്കിലും അദ്ദേഹത്തെ കേസിൽ പ്രതി ചേർത്തിരുന്നില്ല. 

ഇ.ഡി അന്വേഷിക്കുന്ന എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ ഏപ്രിൽ 1 മുതൽ കേജ്രിവാൾ തിഹാർ ജയിലിൽ തടവിലാണ്. ലോക്‌സഭാ തിരഞ്ഞെടുപ്പ് പ്രചാരണത്തിനായി കേജ്രിവാളിന് മെയ് 10ന് സുപ്രീം കോടതി 21 ദിവസത്തെ ഇടക്കാല ജാമ്യം അനുവദിച്ചിരുന്നു. ജൂൺ രണ്ടിന് അദ്ദേഹം ജയിലിലേക്ക് മടങ്ങി.

അതേസമയം, കള്ളപ്പണം വെളുപ്പിക്കൽ കേസിൽ കെജ്‌രിവാളിന് സുപ്രീം കോടതിയിൽ നിന്ന് ജാമ്യം ലഭിക്കാൻ സാധ്യത മുന്നിഷക്കണ്ട് പരിഭ്രാന്തരായ ബിജെപി, സിബിഐയെ ഉപയോഗിച്ച് അദ്ദേഹത്തെ കള്ളക്കേസിൽ അറസ്റ്റ് ചെയ്യുകയായിരുന്നുവെന്ന് ആം ആദ്മി പാർട്ടി ആരോപിച്ചു. 

അതേ സമയം മദ്യനയ കേസിൽ വിചാരണക്കോടതി അനുവദിച്ച ജാമ്യത്തിന് ഇടക്കാല സ്‌റ്റേ ഏർപ്പെടുത്തിയ ഡൽഹി ഹൈക്കോടതിയുടെ ഉത്തരവിനെ ചോദ്യം ചെയ്ത് സുപ്രീം കോടതിയിൽ സമർപ്പിച്ച ഹർജി അരവിന്ദ് കെജ്‌രിവാൾ ഇന്ന് പിൻവലിച്ചു. 
സ്റ്റേ സ്ഥിരീകരിച്ച് ചൊവ്വാഴ്ച പുറപ്പെടുവിച്ച ഹൈക്കോടതിയുടെ അന്തിമ ഉത്തരവിനെ ചോദ്യം ചെയ്ത് പുതിയ ഹർജി നൽകുമെന്ന് കേജ്രിവാളിന്റെ അഭിഭാഷകർ വ്യക്തമാക്കി.

Read More

• നീറ്റ് പരീക്ഷാ വിവാദം; ധർമേന്ദ്ര പ്രധാന്റെ സത്യപ്രതിജ്ഞയ്ക്കിടെ പരിഹാസവുമായി പ്രതിപക്ഷം
• വീണ്ടും ചോദ്യപേപ്പർ ചോർച്ച; സിഎസ്ഐആർ-നെറ്റ് പരീക്ഷകൾ മാറ്റി
• മണിപ്പൂരിൽ അക്രമങ്ങൾ ഏതാനും മാസങ്ങൾക്കുള്ളിൽ അവസാനിക്കും: മുഖ്യമന്ത്രി ബിരേൻ സിങ്
• വിദ്യാർത്ഥികളുടെ ഭാവി അപകടത്തിൽ, നീറ്റ് വിവാദം പാർലമെൻ്റിൽ ഉന്നയിക്കും: രാഹുൽ ഗാന്ധി