'ഹിമാചലിലെ ബിജെപിയുടെ പ്രവർത്തനം തങ്ങളേക്കാൾ മികച്ചത്'; ഹിമാചൽ കോൺഗ്രസ് അദ്ധ്യക്ഷ പ്രതിഭാ സിംഗ്

ഷിംല: ഹിമാചൽ പ്രദേശ് കോൺഗ്രസിലെ അസ്വാരസ്യങ്ങൾക്ക് ആക്കം കൂട്ടി പ്രദേശ് കോൺഗ്രസ് കമ്മിറ്റി പ്രസിഡന്റ് തന്നെ രംഗത്ത്. സംസ്ഥാനത്തെ ബിജെപിയുടെ പ്രവർത്തനം തങ്ങളേക്കാൾ മികച്ചതാണെന്ന പ്രസ്താവനയുമായാണ് കോൺഗ്രസ് അദ്ധ്യക്ഷയും എംപിയുമായ പ്രതിഭാ സിംഗ് രംഗത്തെത്തിയത്. പ്രതിഭ സിങ്ങിന്റെ മകനും സംസ്ഥാന പൊതുമരാമത്ത് വകുപ്പ് മന്ത്രിയുമായ വിക്രമാദിത്യ സിംഗ് തന്റെ പിതാവിനെ അപമാനിച്ചെന്ന് ആരോപിച്ച് ഹിമാചൽ മന്ത്രിസഭയിൽ നിന്ന് രാജി ഭീഷണി മുഴക്കിയതിന് പിന്നാലെയാണ് പ്രതിഭയുടെ ബിജെപി അനുകൂല പ്രസ്താവന എന്നത് ശ്രദ്ധേയമാണ്. അനുനയ നീക്കങ്ങൾക്കൊടുവിൽ വിക്രമാദിത്യ തന്റെ രാജി പ്രഖ്യാപനം പിൻവലിച്ചിരുന്നു. 

രാജ്യസഭാ തെരഞ്ഞെടുപ്പിൽ തങ്ങളുടെ ആറ് എംഎൽഎമാർ ക്രോസ് വോട്ട് ചെയ്തതിനെത്തുടർന്ന് ഹിമാചലിലെ കോൺഗ്രസ് വലിയ രാഷ്ട്രീയ പ്രതിസന്ധി നേരിട്ടിരുന്നു. കേന്ദ്ര നേതൃത്വത്തിന്റെ ഇടപെടലിനെ തുടർന്ന് പ്രതിസന്ധികൾക്ക് താൽക്കാലിക ആശ്വാസം ലഭിച്ചതിന് പിന്നാലെയാണ് കോൺഗ്രസ് നേതൃത്വത്തിന് തലവേദന സൃഷ്ടിച്ചുകൊണ്ട് സംസ്ഥാന അദ്ധ്യക്ഷ തന്നെ രംഗത്തെത്തിയിരിക്കുന്നത്. മണ്ഡലങ്ങളിൽ ബിജെപിയുടെ പ്രവർത്തനം കോൺഗ്രസിനേക്കാൾ  മികച്ചതാണെന്നാണ് പ്രതിഭാ സിംഗ് പറഞ്ഞത്. 

കോൺഗ്രസിൽ ഇനിയും ഒരുപാട് കാര്യങ്ങൾ ചെയ്യാനുണ്ട്. എംപി എന്ന നിലയിൽ ഞാൻ എന്റെ നിയോജകമണ്ഡലം സന്ദർശിക്കുകയും പ്രദേശവാസികളുമായി ഇടപഴകാനും അവരുടെ പ്രശ്നങ്ങൾ പരിഹരിക്കാനും ശ്രമിക്കുന്നു. അവരുടെ ഫീഡ്‌ബാക്കിൽ നിന്നാണ് ബിജെപിയുടെ പ്രവർത്തനം നമ്മേക്കാൾ മികച്ചതെന്ന് ഞാൻ മനസ്സിലാക്കിയത്,” കോൺഗ്രസ് എംപി വാർത്താ ഏജൻസിയായ എഎൻഐയോട് പറഞ്ഞു.

ഹിമാചൽ പ്രദേശ് മുഖ്യമന്ത്രി സുഖ്‌വീന്ദർ സിംഗ് സുഖുവിനെ താൻ ഈ സന്ദേശം അറിയിച്ചതായും സംഘടനയെ ശക്തിപ്പെടുത്താൻ അദ്ദേഹത്തോട് ആവശ്യപ്പെട്ടതായും പ്രതിഭ സിംഗ് കൂട്ടിച്ചേർത്തു. 'സംഘടനയെ ശക്തിപ്പെടുത്തിയാൽ മാത്രമേ വരാനിരിക്കുന്ന തിരഞ്ഞെടുപ്പിനെ നേരിടാൻ കഴിയൂ എന്നാണ് ആദ്യ ദിവസം മുതൽ മുഖ്യമന്ത്രിയോട് ഞാൻ പറഞ്ഞിരുന്നത്. ഇത് ഞങ്ങൾക്ക് വളരെ ബുദ്ധിമുട്ടുള്ള ഒരു സാഹചര്യമാണ്. ഗ്രൗണ്ടിൽ ഒരുപാട് ബുദ്ധിമുട്ടുകൾ നമുക്ക് കാണാൻ കഴിയും. മറുവശത്ത്, പ്രധാനമന്ത്രി മോദിയുടെ നിർദ്ദേശങ്ങൾക്കനുസൃതമായി പ്രവർത്തിച്ചുകൊണ്ട് ബിജെപി ധാരാളം കാര്യങ്ങൾ ചെയ്യുന്നു.

ഹിമാചൽ പ്രദേശ് കോൺഗ്രസ് അധ്യക്ഷൻ പറഞ്ഞു: “ഞങ്ങൾ ദുർബലമായ നിലയിലാണ്. ഇത് ബുദ്ധിമുട്ടുള്ള സമയമാണെന്ന് എനിക്ക് പറയാൻ കഴിയും. ഇനിയെങ്കിലും നമുക്ക് തിരഞ്ഞെടുപ്പിൽ മത്സരിച്ച് ജയിക്കണം. സംസ്ഥാന ഘടകത്തിലെ ഭിന്നത പരിഹരിക്കാൻ ആറംഗ കോ-ഓർഡിനേഷൻ കമ്മിറ്റി രൂപീകരിക്കാൻ കോൺഗ്രസ് കേന്ദ്ര നേതൃത്വം തീരുമാനിച്ചിരുന്നു. സമിതി രൂപീകരിക്കാനുള്ള കേന്ദ്ര നേതൃത്വത്തിന്റെ തീരുമാനത്തോട് പ്രതിഭ സിങ്ങും മകൻ വിക്രമാദിത്യ സിംഗും മനസ്സില്ലാമനസ്സോടെ സമ്മതിച്ചെങ്കിലും അവർ സന്തുഷ്ടരല്ലെന്നാണ് വിവരം. 

കൂറുമാറ്റ നിരോധന നിയമപ്രകാരം ആറ് കോൺഗ്രസ് എംഎൽഎമാരെ അയോഗ്യരാക്കിയതിനെക്കുറിച്ചുള്ള ചോദ്യത്തിന്, ഈ നീക്കത്തിൽ നിയമസഭാംഗങ്ങൾ അസ്വസ്ഥരാകുന്നത് സ്വാഭാവികമാണെന്ന് പ്രതിഭാ സിംഗ് പറഞ്ഞു. “തീർച്ചയായും, എന്തുകൊണ്ട്? ഒരു വർഷത്തിലേറെയായി, നിങ്ങൾ സ്വയം ശ്രദ്ധിക്കാതെയും അവരെ ശ്രദ്ധിക്കാതെയും നിലകൊള്ളുമ്പോൾ അവർ അസ്വസ്ഥരാകുന്നത് സ്വാഭാവികമാണ്. അവരോടൊപ്പം ഇരുന്ന് സംസാരിച്ച് പരിഹാരം കണ്ടെത്തിയിരുന്നെങ്കിൽ ഈ അവസ്ഥ ഉണ്ടാകുമായിരുന്നില്ല,” അവർ പറഞ്ഞു.

ബജറ്റിലെ കട്ട് പ്രമേയത്തിൽ വോട്ടെടുപ്പ് സമയത്ത് ഹാജരാകാൻ പാർട്ടി വിപ്പ് ലംഘിച്ചതിന് ആറ് എംഎൽഎമാരെയും കൂറുമാറ്റ നിരോധന നിയമപ്രകാരം വ്യാഴാഴ്ച അയോഗ്യരാക്കിയിരുന്നു. സുപ്രീം കോടതിയെ സമീപിക്കുമെന്ന് വിമത എംഎൽഎമാരിൽ ഒരാൾ പിന്നീട് പറഞ്ഞു. അയോഗ്യതയെ തുടർന്ന് സഭയിലെ അംഗബലം 68ൽ നിന്ന് 62 ആയി കുറഞ്ഞു. ഇതോടെ കോൺഗ്രസ് എംഎൽഎമാരുടെ എണ്ണം 34 ആയി. ബിജെപിക്ക് 25 എംഎൽഎമാരാണുള്ളത്.

Read More

• മലയാളിയായ പ്രശാന്ത് ബാലകൃഷ്ണൻ നായർ ബഹിരാകാശത്തേക്ക്; ഗഗൻയാൻ ദൗത്യസംഘത്തിന്റെ തലവൻ
• 370 സീറ്റുകൾ മാത്രമല്ല, ബിജെപി ലക്ഷ്യം വെക്കുന്നത് 50 ശതമാനം വോട്ടും
• ലോക്സഭാ തിരഞ്ഞെടുപ്പ്: അഞ്ചിടത്ത് കോൺഗ്രസ്-ആം ആദ്മി പാർട്ടി സീറ്റുകളിൽ ധാരണയായി
• കോൺഗ്രസിനെ വീണ്ടും വെട്ടിലാക്കി മമത; ബംഗാളിലെ 42 സീറ്റിലും ഒറ്റയ്ക്ക് മത്സരിക്കുമെന്ന് തൃണമൂൽ കോൺഗ്രസ്