Ahmedabad Plane Crash: ആകാശദുരന്തം; ബ്ലാക്ക് ബോക്സ് കണ്ടെത്തി; കോക്ക്പിറ്റ് വോയ്‌സ് റെക്കോർഡറിനായി തിരച്ചിൽ

Air india Plane Crash in Ahmedabad: ഡൽഹി: അഹമ്മദാബാദിൽ ടേക്ക് ഓഫിനിടെ തകർന്നുവീണ എയർ ഇന്ത്യ വിമാനത്തിന്റെ ബ്ലാക്ക് ബോക്സ് കണ്ടെടുത്തു. ദുരന്തമുണ്ടായി ഒരു ദിവസത്തിനു പിന്നാലെയാണ് ബ്ലാക്ക് ബോക്സ് കണ്ടെത്തിയത്. വിമാനം ഇടിച്ചിറങ്ങിയ ബിജെ മെഡിക്കല്‍ കോളേജ് ഹോസ്റ്റല്‍ കെട്ടിടത്തിന്റെ മേല്‍ക്കൂരയില്‍ നിന്നാണ് ബ്ലാക്ക് ബോക്‌സ് കണ്ടെത്തിയതെന്നാണ് വിവരം.

വിമാനത്തിന്റെ രണ്ടു ബ്ലാക്ക് ബോക്സുകളിൽ ഒന്നായ ഡിജിറ്റൽ ഫ്ലൈറ്റ് ഡാറ്റ റെക്കോർഡർ (DFDR) ആണ് അന്വേഷണ ഉദ്യോഗസ്ഥർ കണ്ടെടുത്തത്. രണ്ടാമത്തെ ബ്ലാക്ക് ബോക്സായ കോക്ക്പിറ്റ് വോയ്‌സ് റെക്കോർഡറിനായി (CVR) ഇപ്പോഴും തിരച്ചിൽ തുടരുകയാണ്.

Also Read: വിമാന ദുരന്തം: അപകടസ്ഥലം സന്ദർശിച്ച് എൻഐഎ അടക്കമുള്ള കേന്ദ്ര ഏജൻസികൾ

ബ്ലാക്ക് ബോക്‌സിൽനിന്നുള്ള വിവരങ്ങളുടെ അടിസ്ഥാനത്തിൽ അപകടത്തെ കുറിച്ച് നിർണായക സൂചനകൾ ലഭിക്കുമെന്നാണ് പ്രതീക്ഷ. അപകടം അന്വേഷിക്കുന്ന സിവിൽ ഏവിയേഷൻ മന്ത്രാലയത്തിന്റെ കീഴിലുള്ള എയർക്രാഫ്റ്റ് ആക്‌സിഡന്റ് ഇൻവെസ്റ്റിഗേഷൻ ബ്യൂറോ (എഎഐബി) ആണ് ബ്ലാക്ക് ബോക്സ് കണ്ടെടുത്തത്.

Also Read:രഞ്ജിതയെ അധിക്ഷേപിച്ച ഡെപ്യൂട്ടി തഹസിൽദാർ കസ്റ്റഡിയിൽ; പിരിച്ചുവിടാൻ സർക്കാരിന് ശുപാർശ

അതേസമയം, അപകടസ്ഥലം ഇന്ന് കേന്ദ്ര ഏജൻസികൾ സന്ദർശിച്ചതായി വൃത്തങ്ങൾ അറിയിച്ചു. ദേശീയ അന്വേഷണ ഏജൻസി (എൻ‌ഐഎ) അടക്കമുള്ള കേന്ദ്ര ഏജൻസികൾ ദുരന്തഭൂമിയിലെത്തിയതായാണ് റിപ്പോർട്ട്. സന്ദർശനവുമായി ബന്ധപ്പെട്ട കൂടുതൽ വിശദാംശങ്ങള്‍ പുറത്തുവിട്ടിട്ടില്ല. സംഭവസ്ഥലത്ത് പ്രധാനമന്ത്രി നരേന്ദ്ര മോദിയും ഇന്ന് സന്ദർശനം നടത്തിയിരുന്നു. സിവിൽ ആശുപത്രിയിലെത്തി പരുക്കേറ്റവരെയും പ്രധാനമന്ത്രി സന്ദർശിച്ചു. 

Also Read: ദുരന്തഭൂമി സന്ദർശിച്ച് പ്രധാനമന്ത്രി; വേദനാജനകമെന്ന് നരേന്ദ്ര മോദി

വ്യാഴാഴ്ച ഉച്ചയ്ക്ക് അഹമ്മദാബാദിലെ സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന എയർ ഇന്ത്യ വിമാനമാണ് നിമിഷങ്ങൾക്കകം തകർന്ന് വീണ് തീഗോളമായി മാറിയത്. 230 യാത്രക്കാരും 12 ജീവനക്കാരുമായി അഹമ്മദാബാദിൽ നിന്ന് ലണ്ടനിലേക്ക് പറന്ന വിമാനമാണ് അപകടത്തിൽപെട്ടത്. വിമാനത്തിലുണ്ടായിരുന്ന 241 പേർ മരിച്ചതായി എയർ ഇന്ത്യ സ്ഥിരീകരിച്ചിട്ടുണ്ട്. അപകടത്തിൽ ഒരു യാത്രക്കാരൻ മാത്രമാണ് അത്ഭുതകരമായി രക്ഷപ്പെട്ടത്.

Read More: 37 വർഷങ്ങൾക്ക് മുൻപും അഹമ്മദാബാദിൽ വിമാനാപകടം; അന്ന് മരിച്ചത് 133 പേർ