ടാൻ നീക്കം ചെയ്യാൻ ഇതിൽ ഏതു ഫെയ്സ്മാസ്ക് നിങ്ങൾ തിരഞ്ഞെടുക്കും?

ടാനും, മൃതചർമ്മവും നിങ്ങളുടെ സൗന്ദര്യത്തിന് മങ്ങലേൽപ്പിക്കുന്നതായി തോന്നുണ്ടോ? ഇത് സ്വാഭാവികമായ ഒന്നാണ്. അമിതമായി സൂര്യപ്രകാശം ഏൽക്കുന്നതും, വരണ്ട ചർമ്മ പ്രകൃതവും ഇതിനു പിന്നിലെ കാരണങ്ങളാകാം. കൈയ്യിലും കാലിലും മാത്രമല്ല മുഖത്തെ ടാനും കരുവാളിപ്പും ആണ് പലപ്പോഴും ബുദ്ധിമുട്ടുണ്ടാക്കുന്നത്. അതിൽ തന്നെ മുഖത്തെ മൃതചർമ്മം നീക്കം ചെയ്യേണ്ടത് ചർമ്മ പരിചരണത്തിൽ ഏറെ പ്രധാനമാണ്. ഫെയ്സ് വാഷിൻ്റെ മാത്രം ഉപയോഗം ഇതിനു ശാശ്വതമായ പരിഹാരമാകുന്നില്ല. പകരം നിങ്ങളുടെ ചർമ്മത്തിന് അനുയോജ്യമായ ഫെയ്സ്മാസ്ക് തിരഞ്ഞെടുക്കൂ.

ഓട്സ് തൈര് ഫെയ്സ്മാസ്ക്

ചേരുവകൾ

• ഓട്സ്- 1 ടേബിൾസ്പൂൺ
• തൈര്- 1 ടേബിൾസ്പൂൺ
• തേൻ- 1 ടീസ്പൂൺ

തയ്യാറാക്കുന്ന വിധം

ഒരു ടേബിൾസ്പൂൺ ഓട്സിലേയ്ക്ക്, ഒരു ടേബിൾസ്പൂൺ തൈര്, ഒരു ടീസ്പൂൺ തേൻ, എന്നിവ ചേർത്തിളക്കി യോജിപ്പിക്കാം. ആ മിശ്രിതം മുഖത്ത് പുരട്ടി 15 മിനിറ്റ് വിശ്രമിക്കാം. ശേഷം മൃദുവായി മസാജ് ചെയ്ത് തണുത്ത വെള്ളത്തിൽ കഴുകി കളയാം. 

ഗുണങ്ങൾ

ഓട്സ് പ്രകൃതിദത്തമായ എക്സ്ഫോളിയേറ്ററാണ്. അത് മൃതചർമ്മത്തെ നീക്കം ചെയ്യുന്നതിന് ഗുണകരമാണ്. തൈരിൽ അടങ്ങിയിരിക്കുന്ന ലാക്ടിക് ആസിഡ് ചർമ്മത്തെ ഹൈഡ്രേറ്റ് ചെയ്ത് നിറം മെച്ചപ്പെടുത്താൻ സഹായിക്കുന്നു, തേനിന് ധാരാളം ആൻ്റി ബാക്ടീരിയൽ സവിശേഷതകളുണ്ട് അത് മറ്റ് അസ്വസ്ഥതകളിൽ നിന്നും ചർമ്മത്തെ സംരക്ഷിക്കുന്നു. 

അവക്കാഡോയും ഒലിവ് എണ്ണയും

ചേരുവകൾ

• അവക്കാഡോ- 1
• തേൻ- 1 ടേബിൾസ്പൂൺ
• ഒലിവ് എണ്ണ- 1 ടേബിൾസ്പൂൺ

നന്നായി പഴുത്ത ഒരു അവക്കാഡോയിലേയ്ക്ക് ഒരു ടേബിൾസ്പൂൺ തേനും, ഒരു ടേബിൾസ്പൂൺ ഒലിവ് എണ്ണയും, ചേർത്തിളക്കി യോജിപ്പിക്കാം. ഈ മിശ്രിതം മുഖത്തും കഴുത്തിലും പുരട്ടാം. 20 മിനിറ്റു കഴിഞ്ഞ് മൃദുവായി മസാജ് ചെയ്യാം. ശേഷം തണുത്ത വെള്ളത്തിൽ കഴുകി കളയാം. 

ഗുണങ്ങൾ

ഫാറ്റി ആസിഡ്, വിറ്റാമിൻ സി എന്നിവയുടെ സമ്പന്നമായ ഉറവിടാണ് അവക്കാഡോ. അത് ചർമ്മത്തെ ഉള്ളിൽ നിന്നു തന്നെ ഈർപ്പമുള്ളതാക്കുന്നു. ഒലിവ് എണ്ണയ്ക്ക് ഹൈഡ്രേറ്റിങ് സവിശേഷതയുണ്ട്. 

ആപ്പിൾ സിഡാർ വിനാഗിരിയും ടീട്രീ ഓയിലും

ചേരുവകൾ

• ബെൻ്റോണൈറ്റ് കളിമണ്ണ്- 1 ടേബിൾസ്പൂൺ
• ആപ്പിൾ സിഡാർ വിനാഗിരി- 1 ടേബിൾസ്പൂൺ
• എസെൻഷ്യൽ ഓയിൽ- 1 തുള്ളി

തയ്യാറാക്കുന്ന വിധം

ഒരു മൺ പാത്രത്തിലേയ്ക്ക് ഒരു ടേബിൾസ്പൂൺ ബെൻ്റോണൈറ്റ് കളിമൺ എടുക്കാം. അതിലേയ്ക്ക് ഒരു ടേബിൾസ്പൂൺ ആപ്പിൾ സിഡാർ വിനാഗിരിയും ഒരു തുള്ളി ടീട്രീ ഓയിൽ പോലെയുള്ള ലഭ്യമായ എസെൻഷ്യൽ ഓയിലും ചേർത്തിളക്കി യോജിപ്പിക്കാം. ഈ ഫെയ്സ്മാസ്ക് മുഖത്ത് പുരട്ടാം. 10 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. ശേഷം ആവശ്യമെങ്കിൽ മോയ്സ്ചറൈസർ പുരട്ടാം. 

ഗുണങ്ങൾ

ബെൻ്റോണൈറ്റ് കളിമൺ ചർമ്മത്തിൽ അടിഞ്ഞു കൂടിയിരിക്കുന്ന അമിതമായ എണ്ണയും മറ്റ് അഴുക്കുകളും നീക്കം ചെയ്യാൻ ഗുണകരമാണ്. ആപ്പിൾ സിഡാർ വിനാഗിരി ചർമ്മത്തിൻ്റെ പിഎച്ച് ലെവൽ നിലനിർത്തി സെബം ഉത്പാദനത്തെ നിയന്ത്രിക്കാൻ സഹായിക്കുന്നു. ആൻ്റി ബാക്ടീരിയൽ ആൻ്റി ഇൻഫ്ലമേറ്ററി സവിശേഷതകൾ ടീ ട്രീ ഓയിലിന് ഉണ്ട്. അത് മുഖക്കുരു, വിണ്ടു കീറൽ എന്നിവ തടഞ്ഞേക്കും. 

പപ്പായയും തേനും

ചേരുവകൾ

• തൈര്- 1 ടേബിൾസ്പൂൺ
• പപ്പായ- 1 ടേബിൾസ്പൂൺ
• തേൻ- 1 ടീസ്പൂൺ

തയ്യാറാക്കുന്ന വിധം

ഒരു ടേബിൾസ്പൂൺ തൈരിലേയ്ക്ക് ഒരു ടേബിൾസ്പൂൺ​ പപ്പായയും, ഒരു ടീസ്പൂൺ തേനും ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടാം. 20 മിനിറ്റിനു ശേഷം തണുത്ത വെള്ളം ഉപയോഗിച്ച് കഴുകി കളയാം. 

ഗുണങ്ങൾ

പപ്പായയിൽ പപ്പെയ്ൻ എന്ന എൻസൈം അടങ്ങിയിട്ടുണ്ട്. അത് മൃതകോശങ്ങളെ അകറ്റി ചർമ്മത്തിൻ്റെ സ്വാഭാവിക നിറം നിലനിർത്താൻ സഹായിക്കുന്നു. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• കൈമുട്ടിലെ കറുപ്പ് നിറം അകറ്റാൻ ഇതാ ഒരു കിടിലൻ വിദ്യ
• യുവത്വം തുളുമ്പുന്ന ചർമ്മം ഇനി വിരൽത്തുമ്പിൽ, നെയ്യ് പുരട്ടൂ
• ചുണ്ടുകൾക്ക് അഴകേകാം, പഞ്ചസാര മുതൽ കാപ്പിപ്പൊടി വരെ ഇങ്ങനെ ഉപയോഗിക്കൂ
• തിളക്കമുള്ള മുടി നേടാം, ഈ ഹെയർ ജെല്ലുകൾ വീട്ടിൽ തയ്യാറാക്കി ഉപയോഗിക്കൂ